॥ ಕಾವ್ಯಕಣ್ಠ ವಾಸಿಷ್ಠ ಶ್ರೀಗಣಪತಿಮುನಿ ವಿರಚಿತಮ್ ಇಂದ್ರ ಕಟಾಕ್ಷಸ್ತಬಕಃ ॥

ತಂ ದಶಶತಾಕ್ಷಂ ಶೀತಲಕಟಾಕ್ಷಮ್ ।

ನೌಮಿ ಧುತಪಾಶಂ ವಜ್ರಧರಮೀಶಮ್ ।।೧।।

ಉಗ್ರಮಪಿ ದಕ್ಷಂ ಭಾಸುರಕಟಾಕ್ಷಮ್ ।

ವೀರ್ಯಧುತವೃತ್ರಂ ನೌಮ್ಯದಿತಿಪುತ್ರಮ್ ।। ೨।।

ಆರ್ತಜನಪಕ್ಷಂ ರಕ್ಷಕಕಟಾಕ್ಷಮ್ ।

ಪ್ರಾಣಿಗಣತಾತಂ ನೌಮಿ ಪುರುಹೂತಮ್ ।। ೩ ।।

ದೇವಮಸದೃಕ್ಷಂ ಪಾವನಕಟಾಕ್ಷಮ್ ।

ನೌಮಿ ಬಹುಮಾಯಂ ವಾಸವಮಮೇಯಮ್ ।। ೪ ।।

ತಂ ಪುರುಷಮೀಡೇ ಸ್ತುತ್ಯಗಣಲಕ್ಷಮ್ ।

ಸ್ವರ್ಭುವನರಾಜ್ಞೀ ಮೋಹನಕಟಾಕ್ಷಮ್ ।।೫।।

ಯತ್ರ ತವ ದೃಷ್ಟಿರ್ವಜ್ರಧರ ಹೃದ್ಯಾ ।

ನವ್ಯಯುಗಕರ್ಮೀ ತತ್ರ ವರವಿದ್ಯಾ ।। ೬।।

ತತ್ರ ವರಲಕ್ಷ್ಮೀಃ ಸಂತತಮಶೂನ್ಯಾ ।

ತತ್ರ ಸುಗುಣಾನಾಂ ಸಂಪದಪಿ ಮಾನ್ಯಾ ।। ೭ ।।

ತತ್ರ ಬಲಮುಗ್ರಂ ಶತ್ರುಮದಹಾರಿ ।

ತತ್ರ ನಯವಿತ್ತ್ವಂ ವಿಶ್ವಹಿತಕಾರಿ ।।೮।।

ಯಂ ತವ ಬಲಾರೇ ಪಾವಯತಿ ದೃಷ್ಟಿಃ ।

ತತ್ರ ನರವರ್ಯೇ ಸರ್ವಶುಭವೃಷ್ಟಿಃ ।।೯।।

ಯತ್ರ ತವ ಪೂರ್ಣಾ ದೃಷ್ಟಿರತಿಭದ್ರಾ ।

ಭೇದಶತಬುದ್ಧಿಸ್ತಸ್ಯ ನ ದರಿದ್ರಾ ।। ೧೦ ।।

ಕಿಂ ನು ಸುಕೃತಾದೀ ಕಿಂ ದುರಿತಖಾದೀ ।

ಶಕ್ರ ತವ ರಕ್ಷಃ ಸೂದನಕಟಾಕ್ಷಃ ।। ೧೧ ।।

ಭಕ್ತಿರಸಿಕಾನಾಂ ಪಾಪತತಿಖಾದೀ ।

ಸೋಽಯಮಿತರೇಷಾಂ ಪಕ್ವಸುಕೃತಾದೀ ।। ೧೨ ।।

ಪಾಪತತಿಖಾದೀ ಯತ್ರ ಸ ಕೃಪಾವಾನ್ ।

ತಸ್ಯ ಹೃದಿ ಬೋಧಃ ಸರ್ವಸಮತಾವಾನ್ ।। ೧೩।।

ತಸ್ಯ ಜಗದರ್ಥೇ ಸರ್ವಮಪಿ ಕಾರ್ಯಮ್ ।

ಅದ್ಭುತಮಪಾರಂ ದಿವ್ಯಮಪಿ ವೀರ್ಯಮ್ ।। ೧೪ ।।

ಪಕ್ವಸುಕೃತಾದೀ ಯತ್ರ ಸವಿಚಿತ್ರಃ ।

ತಸ್ಯ ಖಲು ಭೋಗಃ ಕಾಮಮತಿಮಾತ್ರಃ ।। ೧೫।।

ಯೇ ಗಿರಿಶನಾಮ್ನಾ ಯೇ ಚ ಹರಿನಾಮ್ನಾ ।

ಯೇ ಗಣಪನಾಮ್ನಾ ಯೇ ಚ ರವಿನಾಮ್ನಾ ।। ೧೬ ।।

ಶಕ್ತಿರಿತಿ ನಾಮ್ನಾ ಯೇ ಬಹುಲಧಾಮ್ನಾ ।

ಯೇ ಚ ಮತಿಮಂತೋ ಯಹ್ವ ಇತಿ ನಾಮ್ನಾ ।। ೧೭ ।।

ತ್ವಾಮಯಿ ಭಜಂತೇ ಭಕ್ತ್ಯತಿಶಯೇನ ।

ಸರ್ವಸುರರೂಪಂ ಭೂರಿ ವಿಭವೇನ ।। ೧೮ ।।

ತೇಷ್ವಪಿ ದಿವೋ ಭೂನಾಥ ತವ ದಕ್ಷಾಃ ।

ಭಕ್ತಜನರಕ್ಷಾ ದೀಕ್ಷಿತಕಟಾಕ್ಷಾಃ ।।೧೯।।

ತ್ವತ್ಪದಮಜಾನನ್ನಪ್ಯಜ ಪವಿತ್ರಮ್ ।

ಮಂಗಲಗುಣಸ್ತೇ ದೃಕ್ಪತನಪಾತ್ರಮ್ ।। ೨೦ ।।

ದೃಷ್ಟಿವಶತಸ್ತೇ ಪ್ರೇಷ್ಠಫಲಧಾರಾ ।

ಸಂಶ್ರಿತಕುಲೇಷ್ವಪ್ಯಪ್ರತಿಮಸಾರಾ ।। ೨೧ ।।

ಪಾವನಕಟಾಕ್ಷೈಃ ಸಂಶಮಯ ಪಾಪಮ್ ।

ಶೀತಲಕಟಾಕ್ಷೈಃ ಶಕ್ರ ಮಮ ತಾಪಮ್ ।। ೨೨ ।।

ಮಂಗಲಕಟಾಕ್ಷೈಃ ಸಾಧಯ ಮಮೇಷ್ಟಮ್ ।

ಕಿಂ ಚ ವಿಬುಧಾನಾಂ ನಾಥ ಹರ ಕಷ್ಟಮ್ ।। ೨೩ ।।

ಭಾಸುರಕಟಾಕ್ಷೈರ್ಭಾಸಯತು ಮಹ್ಯಮ್ ।

ನಾಕನರನಾಥೋ ಜ್ಯೋತಿರತಿಗುಹ್ಯಮ್ ।। ೨೪ ।।

।। ಇತಿ ಶ್ರೀಭಗವನ್ಮಹರ್ಷಿರಮಣಾಂತೇವಾಸಿನೋ ವಾಸಿಷ್ಠಸ್ಯ ನರಸಿಂಹಸೂನೋರ್ಗಣಪತೇಃ ಕೃತಿಃ ಇಂದ್ರ ಕಟಾಕ್ಷಸ್ತಬಕಃ ಸಮಾಪ್ತಮ್ ।।