॥ ಕಾವ್ಯಕಣ್ಠ ವಾಸಿಷ್ಠ ಶ್ರೀಗಣಪತಿಮುನಿ ವಿರಚಿತಮ್ ಇಂದ್ರವಿಂಶತಿಃ ॥

ಪ್ರಥಮೋ ವರ್ಗಃ

ಅಖಿಲನಾಯಕಂ ಮಖಭುಜಾಂ ವರಮ್ ।

ಅರಿವಿದಾರಣಂ ಹರಿಹಯಂ ಭಜೇ ॥೧॥

ಮಧುಮುಚಾಮೃಚಾಂ ಪರಿಚಯೀ ವೃಷಾ ।

ರಸಕಿರಾಂ ಗಿರಾಂ ಭವತು ಲೋಕಿತಾ ॥ ೨॥

ಅಮರರಾಜ ಮೇ ತ್ರಿಮಲವಾರಣೇ ।

ಭಜನಮೇವ ತೇ ಭವತು ಭೇಷಜಮ್ ॥ ೩ ॥

ಪ್ರತಿಭಯೇ ಗದೇ ಪ್ರತಿಭಟೇ ಪಟೌ ।

ವರದ ತಾರಣಂ ತವ ನಿಷೇವಣಮ್ ॥೪॥

ಅಯಮಿಹಾಶ್ರಿತೋ ಭಯಹರೇಂದ್ರ ತೇ ।

ಮಧುರಪದ್ಯಭೃನ್ನಧುರಿ ಖಿದ್ಯತು ॥೫॥

ದ್ವಿತೀಯೋ ವರ್ಗಃ

ವೃತ್ರಮಯಿ ಭೃಂದನ್ನುತ್ಸೃಜಸಿ ನೀರಮ್ ।

ಉತ್ಸವಸಮೇತೋ ಗರ್ಜಸಿ ಗಭೀರಮ್ ॥ ೬ ॥

ಉಗ್ರತರನಾದಂ ದೀಪ್ತತರಭಾಸಮ್ ।

ಅಪ್ಸು ವಿಹರಂತಂ ದೇವವಿಭುಮೀಡೇ ॥ ೭॥

ವಜ್ರಧರಕೀಲೀ ಭಾತಿ ಭುವಿ ಪಾತಾ ।

ಭೂರಿ ಬಲಶಾಲೀ ತ್ವಂ ನಭಸಿ ನೇತಾ ॥ ೮ ॥

ಮನ್ಥನತ ಆಸೀದೇಷ ಇಹ ಯಜ್ಞೇ ।

ಘರ್ಷಣವಿಶೇಷಾದ್ವ್ಯೋಮನಿ ಸ ಜಜ್ಞೇ ॥೯॥

ಭೂರಿಮಹಿಮಾಢ್ಯಮ್ ಸನ್ಮುನಿಭಿರೀಡ್ಯಮ್ ।

ತ್ರಾತಸುರಚಕ್ರಂ ಸನ್ನಮತಶಕ್ರಮ್ ॥ ೧೦ ॥

ತೃತೀಯೋ ವರ್ಗಃ

ಅಸುರಧಿಪಿಣ್ಡಂ ತಟಿದಧಿಭೂತಮ್ ।

ಅಯಮಮರಾಣಾಂ ಪತಿರಧಿದೈವಮ್ ॥ ೧೧ ॥

ಜಗದಯಮೇತತ್ಪ್ರಭವತಿ ಭರ್ತುಮ್ ।

ಜಗದರಿದರ್ಯಾಕ್ಷಯಮಪಿ ಕರ್ತುಮ್ ॥೧೨॥

ಅಯಮಧಿನಾಥೋ ಭವತಿ ಬಲಸ್ಯ ।

ಅತ ಉಚಿತೋಽಸ್ಯ ಪ್ರಭುರಖಿಲಸ್ಯ ॥ ೧೩ ॥

ನರಸುರದೈತ್ಯಾನ್ವಿತಮಪಿ ನೂನಮ್ ।

ಬಲವಿಭವೇಽಸ್ಮಾತ್ರಿಭುವನಮೂನಮ್ ॥ ೧೪ ॥

ಅಯಮತಿಮತ್ತೈಃ ಕರಿಭಿರಜಯ್ಯಮ್ ।

ಘಟಯತಿ ಸಿಂಹಂ ಮೃಗಶಿಶುಜಯ್ಯಮ್ ॥ ೧೫॥

ಚತುರ್ಥೋ ವರ್ಗಃ

ರಾಕಾಶಶಿಕೀರ್ತಿ ಪಾಕಾಸುರಶತ್ರುಮ್ ।

ಆಕಾಶಮಹೀಶಂ ಶೋಕಾಪಹಮೀಡೇ ॥ ೧೬ ॥

ನಿರ್ಜಿತ್ಯ ಸಮಸ್ತಾನ್ ಭಾವಾನಪಿ ಜಿಷ್ಣೋ ।

ಸಮ್ರಾಡ್ ಭುವನಾನಾಂ ಆಸೀಃ ಪ್ರಭವಿಷ್ಣೋ ॥ ೧೭ ॥

ಜಾನಾಮಿ ಮರುತ್ತ್ವನ್ ಗಾನಾಯ ಯಶಸ್ತೇ ।

ಧ್ಯಾನಾಯ ನ ರೂಪಂ ಜ್ಞಾನಾಯ ನ ತತ್ತ್ವಮ್ ॥ ೧೮ ॥

ಲೋಕೇ ಸ್ಥಿತಿಭಾಜಾಂ ಯತ್ತೇ ಘನಮೂರ್ತಿಃ ।

ಧಾತ್ರೀ ನಿಖಿಲಾನಾಂ ಸೇಯಂ ತವ ಕೀರ್ತಿಃ ॥ ೧೯ ॥

ತುಷ್ಟಿಂ ಬಹುವಿತ್ತಾಂ ಸ್ವಾರಾಡನಿಯತ್ತಾಮ್ ।

ಆನಂದಿತಚಿತ್ತಾಂ ಭಕ್ತಸ್ಯ ವಿಧತ್ತಾಮ್ ॥ ೨೦ ॥

॥ ಇತಿ ಶ್ರೀಭಗವನ್ಮಹರ್ಷಿರಮಣಾಂತೇವಾಸಿನೋ ವಾಸಿಷ್ಠಸ್ಯ

ನರಸಿಂಹಸೂನೋರ್ಗಣಪತೇಃ ಕೃತಾ ಇಂದ್ರವಿಂಶತಿಃ ಸಮಾಪ್ತಾ ॥