॥ కావ్యకణ్ఠ వాసిష్ఠ శ్రీగణపతిముని విరచితమ్ ఉమాఽక్షరమాలా ॥

।। అనుష్టుబ్వృత్తం ।।

అక్షరం వాక్పథాతీతం ఋక్షరాజనిభాననమ్ ।

రక్షతాద్ధామ నః కిఞ్చిదుక్షవాహనమోహనమ్ ।।1।।

ఆకాశకేశమహీషీం ఆకారవిజితోర్వశీమ్ ।

ఆశాహీనజనధ్యేయాం ఆశాపాలార్చితాం నుమః ।।2।।

ఇంద్రప్రభృతిగీర్వాణవందితాఙ్ఘ్రికుశేశయా ।

చంద్రస్తనన్ధయాపీడజాయా విజయతేతరామ్ ।।3।।

ఈశ్వరీం సర్వభూతానాం కః శివాం స్తోతుమీశ్వరః ।

చతుర్భిరసమేతో నా వదనైరుతబాహుభిః ।।4।।

ఉమా నామాదిమా భామా వామా శ్యామా విమానమా ।

విమానమాన్యమాయా మా భీమా రామానుమాతు మా ।।5।।

ఊరుం తం దక్షిణం మాతుః స్మరామి నిజమాసనమ్ ।

యస్మాదహం పరిభ్రష్టః కల్కీ భూభువనం గతః ।।6।।

ఋషీణాం చక్షుషో జ్యోతిః బాలా శైలస్య చక్షుషః ।

హరస్య చక్షుషః కాన్తా మాతోమా మమ చక్షుషః ।।7।।

ౠకారం వేష్టితం ద్వాభ్యాం నాభ్యాముభయతో దిశమ్ ।

ఆకారో వా క్షమః పాతుం స చంద్రేణ వతంసితః ।।8।।

ఌకారః శీతలాపాఙ్గి కకారేణేవ సర్వదా ।

శ్లిష్ట ఏవ త్వయా గౌరి మేరుధన్వా ప్రయుజ్యతే ।।9।।

ౡకారోఽమ్బ త్వయా బాల్యే కలభాషిణి భాషితః ।

నచేదయమసన్వర్ణో గృహ్యతే కథమాగమే ।।10।।

ఏణస్తనన్ధయాలోకం ఏకాంతాలోచనామృతమ్ ।

ఏకామ్రనాయకదృశోర్భాగ్యం విజయతేతరామ్ ।।11।।

ఐశ్వర్యం కః పుమానీష్టే గిరిజాయాః ప్రభాషితుమ్ ।

చామరగ్రాహిణీ యస్యాః స్వయమంభోజవాసినీ ।।12।।

ఓఙ్కార ఇవ శర్వస్య హ్రీఙ్కారస్తవ వాచకః ।

అనయోరంబికే భేదం యో న వేద స వేద నా ।।13।।

ఔదార్యే దేవతా ధేనుః సౌందర్యే మణిపుత్రికా ।

స్వయం శక్తిర్నగసుతా త్రిలోకీ రాజ్యమర్హతి ।।14।।

అంసయోర్వినతం సమ్యగున్నతం కుచకుంభయోః ।

అమృతం శఙ్కరదృశోః పరం జయతి దైవతమ్ ।।15।।

అః కుణ్ఠితోఽభవద్యేషు తేషు దర్శితవిక్రమా ।

యాతుధానేషు భీమేషు పాతు వో భీమభామినీ ।।16।।

।। ఆర్యావృత్తం ।।

కమలాసుతేన యత్నాత్ కృతాని శృఙ్గారతన్త్రసూత్రాణి ।

స్తోకాన్యపి బహులార్థాన్యగజాహసితాని పాన్తు త్వామ్ ।।17।।

ఖం భవతీ భూర్భవతీ పవనో భవతీ హుతాశనో భవతీ ।

సలిలం చ దేవి భవతీ భవతీం హిత్వా న కిఞ్చిదపి ।।18।।

గణపతయే స్తనఘటయోః పదకమలే సప్తలోకభక్తేభ్యః ।

అధరమణౌ త్రిపురజితే దధాసి పీయూషమమ్బ త్వమ్ ।।19।।

ఘనమతిదాయకవేణీ వాణీపతిముఖ్యదేవతావినుతా ।

పురరిపుపాణిగృహీతీ పూర్ణం విదధాతు మే కామమ్ ।।20।।

ఙత్వం వాదస్య లిపౌ మాతః కేనాపి లిఙ్గభేదేన ।

త్వద్రూపతా పురారేస్తదభావే తు ద్వయోరైక్యమ్ ।।21।।

చఞ్చలవిశాలనయనా తుఙ్గకుచా చఞ్చరీకనీలకచా ।

పఞ్చముఖస్య పురన్ధ్రీ జగతోంఽహఃసఞ్చయం హరతు ।।22।।

ఛత్రగ్రహణనియోజ్యా దశశతనేత్రస్య భామినీ యస్యాః ।

తస్యాశ్చరణముమాయా భవాతపే కిశ్యతాం ఛత్రమ్ ।।23।।

జమ్బుకనాయకనయనజ్యోత్స్నేయం రఙ్గశాయినో భగినీ ।

అఖిలానామణ్డానామధిరాజ్ఞీ విజయతే చణ్డీ ।।24।।

ఝఙ్కృతిం కరోతి చేన్నమత్తషట్పదావలీ

యన్ముఖామ్బుజన్మనా సుగన్ధినా నిమన్త్రితా ।

కర్ణకున్తలభ్రమాద్భవేన నైవ వార్యతే

శైలశక్రపుత్రికా ధునోతు సా మమ భ్రమమ్ ।।25।।

।। తూణకవృత్తం ।।

ఞమఙణనాః సంప్రోక్తా చపకటతాఖ్యేషు గౌరి వర్గేషు ।

ఉత్తమసంజ్ఞాః ప్రాజ్ఞైః నరవర్గే తు త్వదఙ్ఘ్రిరతాః ।।26।।

టఙ్కృతిముఖరితదిక్కం సజ్యం బాణాసనం కరే దధతీ ।

ధ్యేయా మాయా శబరీ శత్రుభయం తర్తుకామేన ।।27।।

ఠఙ్కమపూర్వం లక్ష్మ్యా ప్రహసన్ప్రవదస్యలం తు వదనస్య ।

పరితో మునిభిర్గీతః పరిగ్రహో ధూర్జటేర్జయతి ।।28।।

డమరుధరో భగవానపి గాయతి యస్యాః శుభం గుణవ్రాతమ్ ।

తస్యాః శిఖరిసుతాయా నాకృతపుణ్యో భవేద్వన్దీ ।।29।।

ఢక్కాదివాద్యహస్తప్రమథసమారాధితశ్రవణయుగ్మా ।

శుభ్రకిరణార్ధమౌలేః శుద్ధాన్తవిలాసినీ జయతి ।।30।।

ణటధాత్వర్థే చతురో నాథో యస్యాస్తరఙ్గిణీధారీ ।

అగపురుహూతసుతా సా కరోతు మే మానసే నటనమ్ ।।31।।

తనుకాన్తివిజితకనకా తరణిః సంసారఘోరజలరాశేః ।

తరుణారుణాభచరణా తనోతు మే గిరిసుతా క్షేమమ్ ।।32।।

థస్యేవ యస్య నాస్తి ప్రారంభో యేన న ద్వితీయత్వమ్ ।

తస్య గృణన్త్యక్షరతా యస్మిన్నపి తన్మహో జయతి ।।33।।

దరహసితద్విగుణీకృతముఖకాన్తిర్జయతి పురజితః కాన్తా ।

నయనోన్మేషవిలాసో యస్యాః సకలాని భువనాని ।।34।।

ధరణీధరస్య దుహితా ధరణీధరవాసినో వధూర్దయితా ।

ధరణీవిటస్య భగినీ ధరణీమేతాముమా పాతు ।।35।।

నగజే పాయం పాయం లావణ్యసుధాం త్వదీయగాత్రస్య ।

నయనాఞ్జలినా శూలీ బభూవ మృత్యుఞ్జయో మన్యే ।।36।।

పతిరుగ్రదృష్టిరుగ్రో యువరాజోఽయం సదా మదోపేతః ।

తవ రాజ్ఞి న కరుణా చేద్ భువనస్య కథం శుభం భవతు ।।37।।

ఫలితం మమామ్బ సుకృతం కాలేనైతావతా న సన్దేహః ।

యద్ భవదీయం స్తోత్రం పవిత్రమీశాని రచయామి ।।38।।

బలిభిర్నిపీడ్యమానానబలాన్ పాతుం గృహీతజననాయ ।

బలమమ్బ దేహి మహ్యం బలిమేతత్కల్పయామి మనః ।।39।।

భవదీయస్య మహేశ్వరి కటాక్షనామ్నో నవస్య మేఘస్య ।

ప్రావృషమహమాశఙ్కే కరుణాం కల్యాణతోయముచః ।।40।।

మతిరహితః స్తువసి త్వం యం కఞ్చన ధనపిశాచికావిష్టమ్ ।

ఇష్టం చ నైవ లభసే పశ్య జగన్మాతరం స్తుత్వా ।।41।।

యమినాం స్మర్తుం యోగ్యం నిగమాగమవాక్యసఞ్చయైర్మృగ్యమ్ ।

మూర్తం లోచనభాగ్యం పురామరేర్జయతి నీపవనే ।।42।।

రథచరణపాణిభగినీ దానవదమనీ నమద్విపచ్ఛమనీ ।

భువనత్రయస్య జననీ విన్ధ్యే ధరణీధరే జయతి ।।43।।

లలనాజనప్రకాణ్డం కలనాదపరాస్తబాలకలకణ్ఠమ్ ।

పురవైరిణః కలత్రం మురవైరి సమర్చితం భజ రే ।।44।।

వన్ద్యముమాపదకమలం నిన్ద్యమిదం సఙ్గకారణసదనమ్ ।

వయసి సకలేఽప్యతీతే నయసి ముధా ముగ్ధ కిం కాలమ్ ।।45।।

శమ్బరశాత్రవశాత్రవకలత్రపదమిత్రమహమహో ధన్యః ।

భూమణ్డలే విశాలే సదృశః పురుషో మయా కోఽన్యః ।।46।।

షడ్వదనస్య సవిత్రీ షణ్ణాం హన్త్రీ మనః సపత్నానామ్ ।

షడ్భిర్గమ్యం మార్గేర్భర్గస్య పురన్ధ్రికాస్థానమ్ ।।47।।

సర్వత్ర సఙ్గముక్తో గర్వవియుక్తః స్వతన్త్రసఞ్చారః ।

నిర్వర్ణయన్ కదా వా శర్వవధూధామ విహరామి ।।48।।

హరిముఖవన్దితచరణా హరిణాఙ్కమదాపహాస్యరాజీవా ।

హరిణస్తనన్ధయాక్షీ హరినాయకవాహనా జయతి ।।49।।

క్షత్రియాన్తకారిణః ప్రసూత్వమేవ కేవలం

నాప కాపి యత్కలా మమాపి మాతృతామగాత్ ।

దుష్టలోకమారిణీ నృసింహశక్తిరూపిణీ

ధూర్జటేర్వధూటికా ధునోతు సా మదాపదమ్ ।।50।। ।। తూణకవృత్తం ।।

।। ఇతిశ్రీ భగవన్మహర్షిరమణాఽన్తేవాసినో వాసిష్ఠస్య నరసింహసూనో-

ర్గణపతేః కృతిః ఉమాఽక్షరమాలా సమాప్తా ।।