॥ కావ్యకణ్ఠ వాసిష్ఠ శ్రీగణపతిముని విరచితమ్ అంబికాగీతమ్ ॥

సేవకపాతకశమనం దైవం మానసవాఞ్ఛితఫలదం దైవమ్ ।

సజ్జనరక్షణచతురం దైవం దుర్జనమర్దనపరుషం దైవమ్ ॥ ౧॥

భాస్కరబింబే దీప్తం దైవం లోచనమధ్యే సుప్తం దైవమ్ ।

సితకరమండలగుప్తం దైవం త్రిగుణితభువనవ్యాప్తం దైవమ్ ॥ ౨॥

బహుశతచేటీసహితం దైవం రేణుసమష్ట్యా విహితం దైవమ్ ।

అంబరసౌధే నిహితం దైవం భైరవవదనాఽభిహితం దైవమ్ ॥ ౩॥

అసురుచిపద్యాభూతం దైవం వసురుద్రార్కైర్గీతం దైవమ్ ।

క్షితిజలశుచిషు ప్రోతం దైవం శితమతిభిః సమధీతం దైవమ్ ॥ ౪॥

మృదుహృదయానాం సౌమ్యం దైవం ప్రియరూపాణాం రమ్యం దైవమ్ ।

తత్త్వజ్ఞానాం విశ్వం దైవం గుణవిరుచీనాం శూన్యం దైవమ్ ॥ ౫॥

చాలకమవనేః శక్త్యా దైవం శంపాద్వారా దృశ్యం దైవమ్ ।

దోగ్ధ్రీమనువరవాచ్యం దైవం విదధద్వినతమశోచ్యం దైవమ్ ॥ ౬॥

శైలే శైలే విహరద్దైవం విపినే విపినే విచరద్దైవమ్ ।

గ్రామే గ్రామే ఖ్యాతం దైవం నగరే నగరే ప్రథితం దైవమ్ ॥ ౭॥

పరితో వ్యోమ్ని నిరాకృతి దైవం స్వర్గే పౌలోమ్యాకృతి దైవమ్ ।

హిమవతి గౌరీరూపం దైవం తనుషు ప్రాణాకారం దైవమ్ ॥ ౮॥

అర్ధం సురగిరిధనుషో దైవం భువనత్రితయే పూర్ణం దైవమ్ ।

హృది భూతానాం కిఞ్చిద్దైవం తృణవన్మనసి ప్రచురం దైవమ్ ॥ ౯॥

లజ్జాభావో లలితం దైవం రసనాభావో భీమం దైవమ్ ।

దృష్టౌ దృష్టౌ సూక్ష్మం దైవం విషయే విషయే స్థూలం దైవమ్ ॥ ౧౦॥

స్తోత్రే స్తోత్రే మధురం దైవం ధ్యానే ధ్యానే మదకృద్దైవమ్ ।

నమనే నమనే వరదం దైవం చరితే చరితే పూతం దైవమ్ ॥ ౧౧॥

ఆకాశామలగాత్రం దైవం తారారవిశశినేత్రం దైవమ్ ।

వ్యాపకపవనశ్వసితం దైవం పారావారస్వేదం దైవమ్ ॥ ౧౨॥

లీలానారీవేషం దైవం దివ్యహిరణ్మయభూషం దైవమ్ ।

కేషాఞ్చిత్కృతపోషం దైవం కేషాఞ్చిత్కృతశోషం దైవమ్ ॥ ౧౩॥

పోషవిధానే శీతం దైవం శోషవిధానే తపనం దైవమ్ ।

సర్గవిధానే వికసద్దైవం ప్రలయవిధానే మీలద్దైవమ్ ॥ ౧౪॥

సోమం పీత్వా పుష్టం దైవం ద్విషతో హత్వా హృష్టం దైవమ్ ।

భువనప్రలయే శిష్టం దైవం సర్వపదార్థోత్కృష్టం దైవమ్ ॥ ౧౫॥

కౌలాచారిషు మాద్యద్దైవం సమయాచారిషు శాంతం దైవమ్ ।

యోగాచారిషు పీనం దైవం జ్ఞానాచారిషు లీనం దైవమ్ ॥ ౧౬॥

కామవిరోధి కలత్రం దైవం గణపషడాననపుత్రం దైవమ్ ।

పాపవిదారి పవిత్రం దైవం జయతి మునిస్తుతిపాత్రం దైవమ్ ॥ ౧౭॥

॥ ఇతి శ్రీభగవన్మహర్షిరమణాంతేవాసినో వాసిష్ఠస్య

నరసింహసూనోర్గణపతేః కృతా ‘అంబికాగీతమ్’ సంపూర్ణమ్ ॥