॥ ಕಾವ್ಯಕಣ್ಠ ವಾಸಿಷ್ಠ ಶ್ರೀಗಣಪತಿಮುನಿ ವಿರಚಿತಮ್ ಅಂಬಿಕಾಗೀತಮ್ ॥

ಸೇವಕಪಾತಕಶಮನಂ ದೈವಂ ಮಾನಸವಾಞ್ಛಿತಫಲದಂ ದೈವಮ್ ।

ಸಜ್ಜನರಕ್ಷಣಚತುರಂ ದೈವಂ ದುರ್ಜನಮರ್ದನಪರುಷಂ ದೈವಮ್ ॥ ೧॥

ಭಾಸ್ಕರಬಿಂಬೇ ದೀಪ್ತಂ ದೈವಂ ಲೋಚನಮಧ್ಯೇ ಸುಪ್ತಂ ದೈವಮ್ ।

ಸಿತಕರಮಂಡಲಗುಪ್ತಂ ದೈವಂ ತ್ರಿಗುಣಿತಭುವನವ್ಯಾಪ್ತಂ ದೈವಮ್ ॥ ೨॥

ಬಹುಶತಚೇಟೀಸಹಿತಂ ದೈವಂ ರೇಣುಸಮಷ್ಟ್ಯಾ ವಿಹಿತಂ ದೈವಮ್ ।

ಅಂಬರಸೌಧೇ ನಿಹಿತಂ ದೈವಂ ಭೈರವವದನಾಽಭಿಹಿತಂ ದೈವಮ್ ॥ ೩॥

ಅಸುರುಚಿಪದ್ಯಾಭೂತಂ ದೈವಂ ವಸುರುದ್ರಾರ್ಕೈರ್ಗೀತಂ ದೈವಮ್ ।

ಕ್ಷಿತಿಜಲಶುಚಿಷು ಪ್ರೋತಂ ದೈವಂ ಶಿತಮತಿಭಿಃ ಸಮಧೀತಂ ದೈವಮ್ ॥ ೪॥

ಮೃದುಹೃದಯಾನಾಂ ಸೌಮ್ಯಂ ದೈವಂ ಪ್ರಿಯರೂಪಾಣಾಂ ರಮ್ಯಂ ದೈವಮ್ ।

ತತ್ತ್ವಜ್ಞಾನಾಂ ವಿಶ್ವಂ ದೈವಂ ಗುಣವಿರುಚೀನಾಂ ಶೂನ್ಯಂ ದೈವಮ್ ॥ ೫॥

ಚಾಲಕಮವನೇಃ ಶಕ್ತ್ಯಾ ದೈವಂ ಶಂಪಾದ್ವಾರಾ ದೃಶ್ಯಂ ದೈವಮ್ ।

ದೋಗ್ಧ್ರೀಮನುವರವಾಚ್ಯಂ ದೈವಂ ವಿದಧದ್ವಿನತಮಶೋಚ್ಯಂ ದೈವಮ್ ॥ ೬॥

ಶೈಲೇ ಶೈಲೇ ವಿಹರದ್ದೈವಂ ವಿಪಿನೇ ವಿಪಿನೇ ವಿಚರದ್ದೈವಮ್ ।

ಗ್ರಾಮೇ ಗ್ರಾಮೇ ಖ್ಯಾತಂ ದೈವಂ ನಗರೇ ನಗರೇ ಪ್ರಥಿತಂ ದೈವಮ್ ॥ ೭॥

ಪರಿತೋ ವ್ಯೋಮ್ನಿ ನಿರಾಕೃತಿ ದೈವಂ ಸ್ವರ್ಗೇ ಪೌಲೋಮ್ಯಾಕೃತಿ ದೈವಮ್ ।

ಹಿಮವತಿ ಗೌರೀರೂಪಂ ದೈವಂ ತನುಷು ಪ್ರಾಣಾಕಾರಂ ದೈವಮ್ ॥ ೮॥

ಅರ್ಧಂ ಸುರಗಿರಿಧನುಷೋ ದೈವಂ ಭುವನತ್ರಿತಯೇ ಪೂರ್ಣಂ ದೈವಮ್ ।

ಹೃದಿ ಭೂತಾನಾಂ ಕಿಂಚಿದ್ದೈವಂ ತೃಣವನ್ಮನಸಿ ಪ್ರಚುರಂ ದೈವಮ್ ॥ ೯॥

ಲಜ್ಜಾಭಾವೋ ಲಲಿತಂ ದೈವಂ ರಸನಾಭಾವೋ ಭೀಮಂ ದೈವಮ್ ।

ದೃಷ್ಟೌ ದೃಷ್ಟೌ ಸೂಕ್ಷ್ಮಂ ದೈವಂ ವಿಷಯೇ ವಿಷಯೇ ಸ್ಥೂಲಂ ದೈವಮ್ ॥ ೧೦॥

ಸ್ತೋತ್ರೇ ಸ್ತೋತ್ರೇ ಮಧುರಂ ದೈವಂ ಧ್ಯಾನೇ ಧ್ಯಾನೇ ಮದಕೃದ್ದೈವಮ್ ।

ನಮನೇ ನಮನೇ ವರದಂ ದೈವಂ ಚರಿತೇ ಚರಿತೇ ಪೂತಂ ದೈವಮ್ ॥ ೧೧॥

ಆಕಾಶಾಮಲಗಾತ್ರಂ ದೈವಂ ತಾರಾರವಿಶಶಿನೇತ್ರಂ ದೈವಮ್ ।

ವ್ಯಾಪಕಪವನಶ್ವಸಿತಂ ದೈವಂ ಪಾರಾವಾರಸ್ವೇದಂ ದೈವಮ್ ॥ ೧೨॥

ಲೀಲಾನಾರೀವೇಷಂ ದೈವಂ ದಿವ್ಯಹಿರಣ್ಮಯಭೂಷಂ ದೈವಮ್ ।

ಕೇಷಾಂಚಿತ್ಕೃತಪೋಷಂ ದೈವಂ ಕೇಷಾಂಚಿತ್ಕೃತಶೋಷಂ ದೈವಮ್ ॥ ೧೩॥

ಪೋಷವಿಧಾನೇ ಶೀತಂ ದೈವಂ ಶೋಷವಿಧಾನೇ ತಪನಂ ದೈವಮ್ ।

ಸರ್ಗವಿಧಾನೇ ವಿಕಸದ್ದೈವಂ ಪ್ರಲಯವಿಧಾನೇ ಮೀಲದ್ದೈವಮ್ ॥ ೧೪॥

ಸೋಮಂ ಪೀತ್ವಾ ಪುಷ್ಟಂ ದೈವಂ ದ್ವಿಷತೋ ಹತ್ವಾ ಹೃಷ್ಟಂ ದೈವಮ್ ।

ಭುವನಪ್ರಲಯೇ ಶಿಷ್ಟಂ ದೈವಂ ಸರ್ವಪದಾರ್ಥೋತ್ಕೃಷ್ಟಂ ದೈವಮ್ ॥ ೧೫॥

ಕೌಲಾಚಾರಿಷು ಮಾದ್ಯದ್ದೈವಂ ಸಮಯಾಚಾರಿಷು ಶಾಂತಂ ದೈವಮ್ ।

ಯೋಗಾಚಾರಿಷು ಪೀನಂ ದೈವಂ ಜ್ಞಾನಾಚಾರಿಷು ಲೀನಂ ದೈವಮ್ ॥ ೧೬॥

ಕಾಮವಿರೋಧಿ ಕಲತ್ರಂ ದೈವಂ ಗಣಪಷಡಾನನಪುತ್ರಂ ದೈವಮ್ ।

ಪಾಪವಿದಾರಿ ಪವಿತ್ರಂ ದೈವಂ ಜಯತಿ ಮುನಿಸ್ತುತಿಪಾತ್ರಂ ದೈವಮ್ ॥ ೧೭॥

॥ ಇತಿ ಶ್ರೀಭಗವನ್ಮಹರ್ಷಿರಮಣಾಂತೇವಾಸಿನೋ ವಾಸಿಷ್ಠಸ್ಯ

ನರಸಿಂಹಸೂನೋರ್ಗಣಪತೇಃ ಕೃತಾ ‘ಅಂಬಿಕಾಗೀತಮ್’ ಸಂಪೂರ್ಣಮ್ ॥