॥ ಕಾವ್ಯಕಣ್ಠ ವಾಸಿಷ್ಠ ಶ್ರೀಗಣಪತಿಮುನಿ ವಿರಚಿತಮ್ ಉಮಾತ್ರಿಶತೀ ॥

ಅನುಷ್ಟುಭ್ವೃತ್ತಮ್

ಉಮಾ ಹೈಮವತೀ ದೇವೀ ಮಹಾದೇವೀ ಮಹೇಶ್ವರೀ ।

ಅಜಾ ಧೂಮ್ರಾ ಸುರೂಪೈಕಾ ವಿಶ್ವಸೂರ್ವಿಶ್ವಧಾರಿಣೀ ।।೧।।

ಶಿವಾ ಭಗವತೀ ಭದ್ರಾ ಪ್ರಕೃತಿರ್ವಿಕೃತಿಃ ಕೃತಿಃ ।

ಅನನ್ತಾಽನಾದಿರವ್ಯಕ್ತಾ ದುರ್ಗಪಾರಾ ದುರತ್ಯಯಾ ।। ೨।।

ಸ್ವಧಾ ಸ್ವಾಹಾ ಸುಧಾ ಪುಷ್ಟಿಃ ಸುಖಾ ಸೋಮಸ್ವರೂಪಿಣೀ ।

ತುಷ್ಟಿರ್ನಿದ್ರಾ ವಿಷ್ಣುಮಾಯಾ ಜಾತಿರ್ಧೀಶ್ಚೇತನಾ ಚಿತಿಃ ।। ೩ ।।

ಮಾತಾ ಶಾನ್ತಿಃ ಕ್ಷಮಾ ಶ್ರದ್ಧಾ ಹ್ರೀವೃತ್ತಿರ್ವ್ಯಾಪಿನೀ ಸ್ಮೃತಿಃ ।

ಶಕ್ತಿಸ್ತೃಷ್ಣಾ ಕ್ಷುಧಾ ಭ್ರಾನ್ತಿಃ ಕಾನ್ತಿಃ ಛಾಯಾ ರಮಾ ದಯಾ ।। ೪ ।।

ಭವಾನೀ ರಾಜಸೀ ಸೃಷ್ಟಿರ್ಮೃಡಾನೀ ಸಾತ್ತ್ವಿಕೀ ಸ್ಥಿತಿಃ ।

ರುದ್ರಾಣೀ ತಾಮಸೀ ಮೃತ್ಯುಃ ಶರ್ವಾಣೀ ತ್ರಿಗುಣಾ ಪರಾ ।।೫।।

ಕೃಷ್ಣಾ ಲಕ್ಷ್ಮೀಃ ಕಾಮಧೇನುರಾರ್ಯಾ ದಾಕ್ಷಾಯಣೀ ಸತೀ ।

ಗಣೇಶಜನನೀ ದುರ್ಗಾ ಪಾರ್ವತೀ ಬ್ರಹ್ಮಚಾರಿಣೀ ।। ೬ ।।

ಗಮ್ಭೀರನಾದವದ್ಧಣ್ಟಾ ಕೂಷ್ಮಾಣ್ಡಾ ಷಣ್ಮುಖಪ್ರಸೂಃ ।

ಕಾತ್ಯಾಯನೀ ಕಾಲರಾತ್ರಿರ್ಗೌರೀ ಸಿದ್ಧಿಪ್ರದಾಯಿನೀ ।। ೭ ।।

ಅಪರ್ಣಾ ತಾಪಸೀ ಬಾಲಾ ಕನ್ಯಾ ಕಾನ್ತಾರಚಾರಿಣೀ ।

ಮಹರ್ಷಿಸ್ತುತಚಾರಿತ್ರಾ ತ್ರಿನೇತ್ರಾರ್ಧಾಙ್ಗಭಾಗಿನೀ ।। ೮ ।।

ರಮಣೀಯತಮಾ ರಾಜ್ಞೀ ರಜತಾದ್ರಿನಿವಾಸಿನೀ ।

ಗೀರ್ವಾಣಮೌಲಿಮಾಣಿಕ್ಯನೀರಾಜಿತಪದಾಮ್ಬುಜಾ ।।೯।।

ಸರ್ವಾಗಮಸ್ತುತೋಪಾಸ್ಯಾ ವಿದ್ಯಾ ತ್ರಿಪುರಸುન્દರೀ ।

ಕಮಲಾತ್ಮಾ ಛಿನ್ನಮಸ್ತಾ ಮಾತಙ್ಗೀ ಭುವನೇಶ್ವರೀ ।। ೧೦ ।।

ತಾರಾ ಧೂಮಾವತೀ ಕಾಲೀ ಭೈರವೀ ಬಗಲಾಮುಖೀ ।

ಅನುಲ್ಲಙ್ಘ್ಯತಮಾ ಸನ್ಧ್ಯಾ ಸಾವಿತ್ರೀ ಸರ್ವಮಙ್ಗಲಾ ।। ೧೧ ।।

ಛನ್ದಃ ಸವಿತ್ರೀ ಗಾಯತ್ರೀ ಶ್ರುತಿರ್ನಾದಸ್ವರೂಪಿಣೀ ।

ಕೀರ್ತನೀಯತಮಾ ಕೀರ್ತಿಃ ಪಾವನೀ ಪರಮಾಮ್ಬಿಕಾ ।।೧೨।।

ಉಷಾ ದೇವ್ಯರುಷೀ ಮೈತ್ರೀ ಭಾಸ್ವತೀ ಸೂನೃತಾರ್ಜುನೀ ।

ವಿಭಾವರೀ ಬೋಧಯಿತ್ರೀ ವಾಜಿನೀ ವಾಜಿನೀವತೀ ।। ೧೩ ।।

ರಾತ್ರಿಃ ಪಯಸ್ವತೀ ನಮ್ಯಾ ಘೃತಾಚೀ ವಾರುಣೀ ಕ್ಷಪಾ ।

ಹಿಮಾನಿವೇಶಿನೀ ರೌದ್ರಾ ರಾಮಾ ಶ್ಯಾಮಾ ತಮಸ್ವತೀ ।।೧೪।।

ಕಪಾಲಮಾಲಿನೀ ಘೋರಾ ಕರಾಲಾಖಿಲಮೋಹಿನೀ ।

ಬ್ರಹ್ಮಸ್ತುತಾ ಮಹಾಕಾಲೀ ಮಧುಕೈಟಭನಾಶಿನೀ ।।೧೫।।

ಭಾನುಪಾದಾಙ್ಗುಲಿರ್ಬ್ರಹ್ಮಪಾದಾ ಪಾಶ್ಯೂರುಜಙ್ಘಿಕಾ ।

ಭೂನಿತಮ್ಬಾ ಶಕ್ರಮಧ್ಯಾ ಸುಧಾಕರಪಯೋಧರಾ ।।೧೬।।

ವಸುಹಸ್ತಾಙ್ಗುಲಿರ್ವಿಷ್ಣುದೋಃ ಸಹಸ್ರಾ ಶಿವಾನನಾ ।

ಪ್ರಜಾಪತಿರದಾ ವಹ್ನಿನೇತ್ರಾ ವಿತ್ತೇಶನಾಸಿಕಾ ।। ೧೭ ।।

ಸನ್ಧ್ಯಾಭೂಯುಗಲಾ ವಾಯುಶ್ರವಣಾ ಕಾಲಕುನ್ತಲಾ ।

ಸರ್ವದೇವಮಯೀ ಚಣ್ಡೀ ಮಹಿಷಾಸುರಮರ್ದಿನೀ ।। ೧೮ ।।

ಕೌಶಿಕೀ ಧೂಮ್ರನೇತ್ರಘ್ನೀ ಚಣ್ಡಮುಣ್ಡವಿನಾಶಿನೀ ।

ರಕ್ತಬೀಜಪ್ರಶಮನೀ ನಿಶುಮ್ಭಮದಶೋಷಿಣೀ ।। ೧೯।।

ಶುಮ್ಭವಿಧ್ವಂಸಿನೀ ನನ್ದಾ ನನ್ದಗೋಕುಲಸಮ್ಭವಾ ।

ಏಕಾನಂಶಾ ಮುರಾರಾತಿಭಗಿನೀ ವಿನ್ಧ್ಯವಾಸಿನೀ ।। ೨೦ ।।

ಯೋಗೀಶ್ವರೀ ಭಕ್ತವಶ್ಯಾ ಸುಸ್ತನೀ ರಕ್ತದನ್ತಿಕಾ ।

ವಿಶಾಲಾ ರಕ್ತಚಾಮುಣ್ಡಾ ವೈಪ್ರಚಿತ್ತನಿಷೂದಿನೀ ।। ೨೧ ।।

ಶಾಕಮ್ಭರೀ ದುರ್ಗಮಘ್ನ್ನೀ ಶತಾಕ್ಷ್ಯಮೃತದಾಯಿನೀ ।

ಭೀಮೈಕವೀರಾ ಭೀಮಾಸ್ಯಾ ಭ್ರಾಮರ್ಯರುಣನಾಶಿನೀ ।। ೨೨ ।।

ಬ್ರಹ್ಮಾಣೀ ವೈಷ್ಣವೀನ್ದ್ರಾಣೀ ಕೌಮಾರೀ ಸೂಕರಾನನಾ ।

ಮಾಹೇಶ್ವರೀ ನಾರಸಿಂಹೀ ಚಾಮುಣ್ಡಾ ಶಿವದೂತಿಕಾ ।। ೨೩।।

ಗೌರ್ಭೂರ್ಮಹೀದ್ಯೌರದಿತಿರ್ದೇವಮಾತಾ ದಯಾವತೀ ।

ರೇಣುಕಾ ರಾಮಜನನೀ ಪುಣ್ಯಾ ವೃದ್ಧಾ ಪುರಾತನೀ ।। ೨೪ ।।

ಭಾರತೀ ದಸ್ಯುಜಿನ್ಮಾತಾ ಸಿದ್ಧಾ ಸೌಮ್ಯಾ ಸರಸ್ವತೀ ।

ವಿದ್ಯುದ್ವಜೇಶ್ವರೀ ವೃತ್ರನಾಶಿನೀ ಭೂತಿರಚ್ಯುತಾ ।। ೨೫।।

ದಣ್ಡಿನೀ ಪಾಶಿನೀ ಶೂಲಹಸ್ತಾ ಖಟ್ವಾಙ್ಗಧಾರಿಣೀ ।

ಖಙ್ಗಿನೀ ಚಾಪಿನೀ ಬಾಣಧಾರಿಣೀ ಮುಸಲಾಯುಧಾ ।। ೨೬।।

ಸೀರಾಯುಧಾಙ್ಕುಶವತೀ ಶಙ್ಖಿನೀ ಚಕ್ರಧಾರಿಣೀ ।

ಉಗ್ರಾ ವೈರೋಚನೀ ದೀಪ್ತಾ ಜ್ಯೇಷ್ಠಾ ನಾರಾಯಣೀ ಗತಿಃ ।। ೨೭।।

ಮಹೀಶ್ವರೀ ವಹ್ನಿರೂಪಾ ವಾಯುರೂಪಾಽಮ್ಬರೇಶ್ವರೀ ।

ದ್ಯುನಾಯಿಕಾ ಸೂರ್ಯರೂಪಾ ನೀರೂಪಾಖಿಲನಾಯಿಕಾ ।। ೨೮ ।।

ರತಿಃ ಕಾಮೇಶ್ವರೀ ರಾಧಾ ಕಾಮಾಕ್ಷೀ ಕಾಮವರ್ಧಿನೀ ।

ಭಣ್ಡಪ್ರಣಾಶಿನೀ ಗುಪ್ತಾ ತ್ರ್ಯಮ್ಬಕಾ ಶಮ್ಭುಕಾಮುಕೀ ।। ೨೯।।

ಅರಾಲನೀಲಕುನ್ತಲಾ ಸುಧಾಂಶುಸುನ್ದರಾನನಾ ।

ಪ್ರಫುಲ್ಲಫುಲ್ಲಲೋಚನಾ ಪ್ರವಾಲಲೋಹಿತಾಧರಾ ।। ೩೦ ।।

ತಿಲಪ್ರಸೂನನಾಸಿಕಾ ಲಸತ್ಕಪೋಲದರ್ಪಣಾ ।

ಅನಙ್ಗಚಾಪಝಿಲ್ಲಿಕಾ ಸ್ಮಿತಾಪಹಾಸ್ಯಮಲ್ಲಿಕಾ ।। ೩೧॥

ವಿವಸ್ವದಿನ್ದುಕುಣ್ಡಲಾ ಸರಸ್ವತೀಜಿತಾಮೃತಾ ।

ಸಮಾನವರ್ಜಿತಶ್ರುತಿಃ ಸಮಾನಕಮ್ಬುಕನ್ಧರಾ ।। ೩೨ ।।

ಅಮೂಲ್ಯಮಾಲ್ಯಮಣ್ಡಿತಾ ಮೃಣಾಲಚಾರುದೋರ್ಲತಾ ।

ಕರೋಪಮೇಯಪಲ್ಲವಾ ಸುರೋಪಜೀವ್ಯಸುಸ್ತನೀ ।। ೩೩।।

ಬಿಸಪ್ರಸೂನಸಾಯಕಕ್ಷುರಾಭರೋಮರಾಜಿಕಾ ।

ಬುಧಾನುಮೇಯಮಧ್ಯಮಾ ಕಟೀತಟೀಭರಾಲಸಾ ।। ೩೪ ।।

ಪ್ರಸೂನಸಾಯಕಾಗಮಪ್ರವಾಲಚುಞ್ಚುಕಾಞ್ಚಿಕಾ ।

ಮನೋಹರೋರುಯುಗ್ಮಕಾ ಮನೋಜತೂಣಜಙ್ಘಿಕಾ ।। ೩೫।।

ಕ್ವಣತ್ಸುವರ್ಣಹಂಸಕಾ ಸರೋಜಸುನ್ದರಾಙ್ಘ್ರಿಕಾ ।

ಮತಙ್ಗಜೇನ್ದ್ರಗಾಮಿನೀ ಮಹಾಬಲಾ ಕಲಾವತೀ ।। ೩೬।।

ಶುದ್ಧಾ ಬುದ್ಧಾ ನಿಸ್ತುಲಾ ನಿರ್ವಿಕಾರಾ

ಸತ್ಯಾ ನಿತ್ಯಾ ನಿಷ್ಕಲಾ ನಿಷ್ಕಲಙ್ಕಾ ।

ಅಜ್ಞಾ ಪ್ರಜ್ಞಾ ನಿರ್ಭವಾ ನಿತ್ಯಮುಕ್ತಾ

ಧ್ಯೇಯಾ ಜ್ಞೇಯಾ ನಿರ್ಗುಣಾ ನಿರ್ವಿಕಲ್ಪಾ ।। ೩೭ ।। (ಇನ್ದ್ರವಜ್ರಾ)

ಆಗಮಾಬ್ಧಿಲೋಡನೇನ ಸಾರಭೂತಮಾಹೃತಂ

ಶೈಲಪುತ್ರಿಕಾಭಿಧಾಶತತ್ರಯಾಮೃತಂ ಮಯಾ ।

ಯೇ ಭಜನ್ತಿ ಸೂರಯಸ್ತರನ್ತಿ ತೇ ಮಹಾಭಯಂ

ರೋಗಜಂ ಚ ವೈರಿಜಂ ಚ ಮೃತ್ಯುಜಂ ಚ ಸರ್ವಜಮ್ ।। ೩೮ ।। (ತೂಣಕಮ್)

।। ಇತಿ ಶ್ರೀಭಗವನ್ಮಹರ್ಷಿರಮಣಾನ್ತೇವಾಸಿನೋ ವಾಸಿಷ್ಠಸ್ಯ ನರಸಿಂಹಸೂನೋಃ ಗಣಪತೇಃ ಕೃತಿಃ ಉಮಾತ್ರಿಶತೀ ಸಮಾಪ್ತಾ ।।