॥ ಕಾವ್ಯಕಣ್ಠ ವಾಸಿಷ್ಠ ಶ್ರೀಗಣಪತಿಮುನಿ ವಿರಚಿತಮ್ ಉಮಾಽಕ್ಷರಮಾಲಾ ॥

।। ಅನುಷ್ಟುಬ್ವೃತ್ತಂ ।।

ಅಕ್ಷರಂ ವಾಕ್ಪಥಾತೀತಂ ಋಕ್ಷರಾಜನಿಭಾನನಮ್ ।

ರಕ್ಷತಾದ್ಧಾಮ ನಃ ಕಿಞ್ಚಿದುಕ್ಷವಾಹನಮೋಹನಮ್ ।।1।।

ಆಕಾಶಕೇಶಮಹೀಷೀಂ ಆಕಾರವಿಜಿತೋರ್ವಶೀಮ್ ।

ಆಶಾಹೀನಜನಧ್ಯೇಯಾಂ ಆಶಾಪಾಲಾರ್ಚಿತಾಂ ನುಮಃ ।।2।।

ಇಂದ್ರಪ್ರಭೃತಿಗೀರ್ವಾಣವಂದಿತಾಙ್ಘ್ರಿಕುಶೇಶಯಾ ।

ಚಂದ್ರಸ್ತನನ್ಧಯಾಪೀಡಜಾಯಾ ವಿಜಯತೇತರಾಮ್ ।।3।।

ಈಶ್ವರೀಂ ಸರ್ವಭೂತಾನಾಂ ಕಃ ಶಿವಾಂ ಸ್ತೋತುಮೀಶ್ವರಃ ।

ಚತುರ್ಭಿರಸಮೇತೋ ನಾ ವದನೈರುತಬಾಹುಭಿಃ ।।4।।

ಉಮಾ ನಾಮಾದಿಮಾ ಭಾಮಾ ವಾಮಾ ಶ್ಯಾಮಾ ವಿಮಾನಮಾ ।

ವಿಮಾನಮಾನ್ಯಮಾಯಾ ಮಾ ಭೀಮಾ ರಾಮಾನುಮಾತು ಮಾ ।।5।।

ಊರುಂ ತಂ ದಕ್ಷಿಣಂ ಮಾತುಃ ಸ್ಮರಾಮಿ ನಿಜಮಾಸನಮ್ ।

ಯಸ್ಮಾದಹಂ ಪರಿಭ್ರಷ್ಟಃ ಕಲ್ಕೀ ಭೂಭುವನಂ ಗತಃ ।।6।।

ಋಷೀಣಾಂ ಚಕ್ಷುಷೋ ಜ್ಯೋತಿಃ ಬಾಲಾ ಶೈಲಸ್ಯ ಚಕ್ಷುಷಃ ।

ಹರಸ್ಯ ಚಕ್ಷುಷಃ ಕಾಂತಾ ಮಾತೋಮಾ ಮಮ ಚಕ್ಷುಷಃ ।।7।।

ೠಕಾರಂ ವೇಷ್ಠಿತಂ ದ್ವಾಭ್ಯಾಂ ನಾಭ್ಯಾಮುಭಯತೋ ದಿಶಮ್ ।

ಆಕಾರೋ ವಾ ಕ್ಷಮಃ ಪಾತುಂ ಸ ಚಂದ್ರೇಣ ವತಂಸಿತಃ ।।8।।

ಌಕಾರಃ ಶೀತಲಾಪಾಙ್ಗಿ ಕಕಾರೇಣೇವ ಸರ್ವದಾ ।

ಶ್ಲಿಷ್ಟ ಏವ ತ್ವಯಾ ಗೌರಿ ಮೇರುಧನ್ವಾ ಪ್ರಯುಜ್ಯತೇ ।।9।।

ೡಕಾರೋಽಮ್ಬ ತ್ವಯಾ ಬಾಲ್ಯೇ ಕಲಭಾಷಿಣಿ ಭಾಷಿತಃ ।

ನಚೇದಯಮಸನ್ವರ್ಣೋ ಗೃಹ್ಯತೇ ಕಥಮಾಗಮೇ ।।10।।

ಏಣಸ್ತನನ್ಧಯಾಲೋಕಂ ಏಕಾಂತಾಲೋಚನಾಮೃತಮ್ ।

ಏಕಾಮ್ರನಾಯಕದೃಶೋರ್ಭಾಗ್ಯಂ ವಿಜಯತೇತರಾಮ್ ।।11।।

ಐಶ್ವರ್ಯಂ ಕಃ ಪುಮಾನೀಷ್ಟೇ ಗಿರಿಜಾಯಾಃ ಪ್ರಭಾಷಿತುಮ್ ।

ಚಾಮರಗ್ರಾಹಿಣೀ ಯಸ್ಯಾಃ ಸ್ವಯಮಂಭೋಜವಾಸಿನೀ ।।12।।

ಓಙ್ಕಾರ ಇವ ಶರ್ವಸ್ಯ ಹ್ರೀಙ್ಕಾರಸ್ತವ ವಾಚಕಃ ।

ಅನಯೋರಂಬಿಕೇ ಭೇದಂ ಯೋ ನ ವೇದ ಸ ವೇದ ನಾ ।।13।।

ಔದಾರ್ಯೇ ದೇವತಾ ಧೇನುಃ ಸೌಂದರ್ಯೇ ಮಣಿಪುತ್ರಿಕಾ ।

ಸ್ವಯಂ ಶಕ್ತಿರ್ನಗಸುತಾ ತ್ರಿಲೋಕೀ ರಾಜ್ಯಮರ್ಹತಿ ।।14।।

ಅಂಸಯೋರ್ವಿನತಂ ಸಮ್ಯಗುನ್ನತಂ ಕುಚಕುಂಭಯೋಃ ।

ಅಮೃತಂ ಶಙ್ಕರದೃಶೋಃ ಪರಂ ಜಯತಿ ದೈವತಮ್ ।।15।।

ಅಃ ಕುಣ್ಠಿತೋಽಭವದ್ಯೇಷು ತೇಷು ದರ್ಶಿತವಿಕ್ರಮಾ ।

ಯಾತುಧಾನೇಷು ಭೀಮೇಷು ಪಾತು ವೋ ಭೀಮಭಾಮಿನೀ ।।16।।

।। ಆರ್ಯಾವೃತ್ತಂ ।।

ಕಮಲಾಸುತೇನ ಯತ್ನಾತ್ ಕೃತಾನಿ ಶೃಙ್ಗಾರತಂತ್ರಸೂತ್ರಾಣಿ ।

ಸ್ತೋಕಾನ್ಯಪಿ ಬಹುಲಾರ್ಥಾನ್ಯಗಜಾಹಸಿತಾನಿ ಪಾಂತು ತ್ವಾಮ್ ।।17।।

ಖಂ ಭವತೀ ಭೂರ್ಭವತೀ ಪವನೋ ಭವತೀ ಹುತಾಶನೋ ಭವತೀ ।

ಸಲಿಲಂ ಚ ದೇವಿ ಭವತೀ ಭವತೀಂ ಹಿತ್ವಾ ನ ಕಿಞ್ಚಿದಪಿ ।।18।।

ಗಣಪತಯೇ ಸ್ತನಘಟಯೋಃ ಪದಕಮಲೇ ಸಪ್ತಲೋಕಭಕ್ತೇಭ್ಯಃ ।

ಅಧರಮಣೌ ತ್ರಿಪುರಜಿತೇ ದಧಾಸಿ ಪೀಯೂಷಮಮ್ಬ ತ್ವಮ್ ।।19।।

ಘನಮತಿದಾಯಕವೇಣೀ ವಾಣೀಪತಿಮುಖ್ಯದೇವತಾವಿನುತಾ ।

ಪುರರಿಪುಪಾಣಿಗೃಹೀತೀ ಪೂರ್ಣಂ ವಿದಧಾತು ಮೇ ಕಾಮಮ್ ।।20।।

ಙತ್ವಂ ವಾದಸ್ಯ ಲಿಪೌ ಮಾತಃ ಕೇನಾಪಿ ಲಿಙ್ಗಭೇದೇನ ।

ತ್ವದ್ರೂಪತಾ ಪುರಾರೇಸ್ತದಭಾವೇ ತು ದ್ವಯೋರೈಕ್ಯಮ್ ।।21।।

ಚಞ್ಚಲವಿಶಾಲನಯನಾ ತುಙ್ಗಕುಚಾ ಚಞ್ಚರೀಕನೀಲಕಚಾ ।

ಪಞ್ಚಮುಖಸ್ಯ ಪುರನ್ಧ್ರೀ ಜಗತೋಂಽಹಃಸಞ್ಚಯಂ ಹರತು ।।22।।

ಛತ್ರಗ್ರಹಣನಿಯೋಜ್ಯಾ ದಶಶತನೇತ್ರಸ್ಯ ಭಾಮಿನೀ ಯಸ್ಯಾಃ ।

ತಸ್ಯಾಶ್ಚರಣಮುಮಾಯಾ ಭವಾತಪೇ ಕಿಶ್ಯತಾಂ ಛತ್ರಮ್ ।।23।।

ಜಮ್ಬುಕನಾಯಕನಯನಜ್ಯೋತ್ಸ್ನೇಯಂ ರಙ್ಗಶಾಯಿನೋ ಭಗಿನೀ ।

ಅಖಿಲಾನಾಮಣ್ಡಾನಾಮಧಿರಾಜ್ಞೀ ವಿಜಯತೇ ಚಣ್ಡೀ ।।24।।

ಝಙ್ಕೃತಿಂ ಕರೋತಿ ಚೇನ್ನಮತ್ತಷಟ್ಪದಾವಲೀ

ಯನ್ಮುಖಾಮ್ಬುಜನ್ಮನಾ ಸುಗನ್ಧಿನಾ ನಿಮಂತ್ರಿತಾ ।

ಕರ್ಣಕುಂತಲಭ್ರಮಾದ್ಭವೇನ ನೈವ ವಾರ್ಯತೇ

ಶೈಲಶಕ್ರಪುತ್ರಿಕಾ ಧುನೋತು ಸಾ ಮಮ ಭ್ರಮಮ್ ।।25।।

।। ತೂಣಕವೃತ್ತಂ ।।

ಞಮಙಣನಾಃ ಸಂಪ್ರೋಕ್ತಾ ಚಪಕಟತಾಖ್ಯೇಷು ಗೌರಿ ವರ್ಗೇಷು ।

ಉತ್ತಮಸಂಜ್ಞಾಃ ಪ್ರಾಜ್ಞೈಃ ನರವರ್ಗೇ ತು ತ್ವದಙ್ಘ್ರಿರತಾಃ ।।26।।

ಟಙ್ಕೃತಿಮುಖರಿತದಿಕ್ಕಂ ಸಜ್ಯಂ ಬಾಣಾಸನಂ ಕರೇ ದಧತೀ ।

ಧ್ಯೇಯಾ ಮಾಯಾ ಶಬರೀ ಶತ್ರುಭಯಂ ತರ್ತುಕಾಮೇನ ।।27।।

ಠಙ್ಕಮಪೂರ್ವಂ ಲಕ್ಷ್ಮ್ಯಾ ಪ್ರಹಸನ್ಪ್ರವದಸ್ಯಲಂ ತು ವದನಸ್ಯ ।

ಪರಿತೋ ಮುನಿಭಿರ್ಗೀತಃ ಪರಿಗ್ರಹೋ ಧೂರ್ಜಟೇರ್ಜಯತಿ ।।28।।

ಡಮರುಧರೋ ಭಗವಾನಪಿ ಗಾಯತಿ ಯಸ್ಯಾಃ ಶುಭಂ ಗುಣವ್ರಾತಮ್ ।

ತಸ್ಯಾಃ ಶಿಖರಿಸುತಾಯಾ ನಾಕೃತಪುಣ್ಯೋ ಭವೇದ್ವಂದೀ ।।29।।

ಢಕ್ಕಾದಿವಾದ್ಯಹಸ್ತಪ್ರಮಥಸಮಾರಾಧಿತಶ್ರವಣಯುಗ್ಮಾ ।

ಶುಭ್ರಕಿರಣಾರ್ಧಮೌಲೇಃ ಶುದ್ಧಾಂತವಿಲಾಸಿನೀ ಜಯತಿ ।।30।।

ಣಟಧಾತ್ವರ್ಥೇ ಚತುರೋ ನಾಥೋ ಯಸ್ಯಾಸ್ತರಙ್ಗಿಣೀಧಾರೀ ।

ಅಗಪುರುಹೂತಸುತಾ ಸಾ ಕರೋತು ಮೇ ಮಾನಸೇ ನಟನಮ್ ।।31।।

ತನುಕಾಂತಿವಿಜಿತಕನಕಾ ತರಣಿಃ ಸಂಸಾರಘೋರಜಲರಾಶೇಃ ।

ತರುಣಾರುಣಾಭಚರಣಾ ತನೋತು ಮೇ ಗಿರಿಸುತಾ ಕ್ಷೇಮಮ್ ।।32।।

ಥಸ್ಯೇವ ಯಸ್ಯ ನಾಸ್ತಿ ಪ್ರಾರಂಭೋ ಯೇನ ನ ದ್ವಿತೀಯತ್ವಮ್ ।

ತಸ್ಯ ಗೃಣಂತ್ಯಕ್ಷರತಾ ಯಸ್ಮಿನ್ನಪಿ ತನ್ಮಹೋ ಜಯತಿ ।।33।।

ದರಹಸಿತದ್ವಿಗುಣೀಕೃತಮುಖಕಾಂತಿರ್ಜಯತಿ ಪುರಜಿತಃ ಕಾಂತಾ ।

ನಯನೋನ್ಮೇಷವಿಲಾಸೋ ಯಸ್ಯಾಃ ಸಕಲಾನಿ ಭುವನಾನಿ ।।34।।

ಧರಣೀಧರಸ್ಯ ದುಹಿತಾ ಧರಣೀಧರವಾಸಿನೋ ವಧೂರ್ದಯಿತಾ ।

ಧರಣೀವಿಟಸ್ಯ ಭಗಿನೀ ಧರಣೀಮೇತಾಮುಮಾ ಪಾತು ।।35।।

ನಗಜೇ ಪಾಯಂ ಪಾಯಂ ಲಾವಣ್ಯಸುಧಾಂ ತ್ವದೀಯಗಾತ್ರಸ್ಯ ।

ನಯನಾಞ್ಜಲಿನಾ ಶೂಲೀ ಬಭೂವ ಮೃತ್ಯುಞ್ಜಯೋ ಮನ್ಯೇ ।।36।।

ಪತಿರುಗ್ರದೃಷ್ಟಿರುಗ್ರೋ ಯುವರಾಜೋಽಯಂ ಸದಾ ಮದೋಪೇತಃ ।

ತವ ರಾಜ್ಞಿ ನ ಕರುಣಾ ಚೇದ್ ಭುವನಸ್ಯ ಕಥಂ ಶುಭಂ ಭವತು ।।37।।

ಫಲಿತಂ ಮಮಾಮ್ಬ ಸುಕೃತಂ ಕಾಲೇನೈತಾವತಾ ನ ಸಂದೇಹಃ ।

ಯದ್ ಭವದೀಯಂ ಸ್ತೋತ್ರಂ ಪವಿತ್ರಮೀಶಾನಿ ರಚಯಾಮಿ ।।38।।

ಬಲಿಭಿರ್ನಿಪೀಡ್ಯಮಾನಾನಬಲಾನ್ ಪಾತುಂ ಗೃಹೀತಜನನಾಯ ।

ಬಲಮಮ್ಬ ದೇಹಿ ಮಹ್ಯಂ ಬಲಿಮೇತತ್ಕಲ್ಪಯಾಮಿ ಮನಃ ।।39।।

ಭವದೀಯಸ್ಯ ಮಹೇಶ್ವರಿ ಕಟಾಕ್ಷನಾಮ್ನೋ ನವಸ್ಯ ಮೇಘಸ್ಯ ।

ಪ್ರಾವೃಷಮಹಮಾಶಙ್ಕೇ ಕರುಣಾಂ ಕಲ್ಯಾಣತೋಯಮುಚಃ ।।40।।

ಮತಿರಹಿತಃ ಸ್ತುವಸಿ ತ್ವಂ ಯಂ ಕಞ್ಚನ ಧನಪಿಶಾಚಿಕಾವಿಷ್ಟಮ್ ।

ಇಷ್ಟಂ ಚ ನೈವ ಲಭಸೇ ಪಶ್ಯ ಜಗನ್ಮಾತರಂ ಸ್ತುತ್ವಾ ।।41।।

ಯಮಿನಾಂ ಸ್ಮರ್ತುಂ ಯೋಗ್ಯಂ ನಿಗಮಾಗಮವಾಕ್ಯಸಞ್ಚಯೈರ್ಮೃಗ್ಯಮ್ ।

ಮೂರ್ತಂ ಲೋಚನಭಾಗ್ಯಂ ಪುರಾಮರೇರ್ಜಯತಿ ನೀಪವನೇ ।।42।।

ರಥಚರಣಪಾಣಿಭಗಿನೀ ದಾನವದಮನೀ ನಮದ್ವಿಪಚ್ಛಮನೀ ।

ಭುವನತ್ರಯಸ್ಯ ಜನನೀ ವಿನ್ಧ್ಯೇ ಧರಣೀಧರೇ ಜಯತಿ ।।43।।

ಲಲನಾಜನಪ್ರಕಾಣ್ಡಂ ಕಲನಾದಪರಾಸ್ತಬಾಲಕಲಕಣ್ಠಮ್ ।

ಪುರವೈರಿಣಃ ಕಲತ್ರಂ ಮುರವೈರಿ ಸಮರ್ಚಿತಂ ಭಜ ರೇ ।।44।।

ವಂದ್ಯಮುಮಾಪದಕಮಲಂ ನಿಂದ್ಯಮಿದಂ ಸಙ್ಗಕಾರಣಸದನಮ್ ।

ವಯಸಿ ಸಕಲೇಽಪ್ಯತೀತೇ ನಯಸಿ ಮುಧಾ ಮುಗ್ಧ ಕಿಂ ಕಾಲಮ್ ।।45।।

ಶಮ್ಬರಶಾತ್ರವಶಾತ್ರವಕಲತ್ರಪದಮಿತ್ರಮಹಮಹೋ ಧನ್ಯಃ ।

ಭೂಮಣ್ಡಲೇ ವಿಶಾಲೇ ಸದೃಶಃ ಪುರುಷೋ ಮಯಾ ಕೋಽನ್ಯಃ ।।46।।

ಷಡ್ವದನಸ್ಯ ಸವಿತ್ರೀ ಷಣ್ಣಾಂ ಹಂತ್ರೀ ಮನಃ ಸಪತ್ನಾನಾಮ್ ।

ಷಡ್ಭಿರ್ಗಮ್ಯಂ ಮಾರ್ಗೇರ್ಭರ್ಗಸ್ಯ ಪುರಂಧ್ರಿಕಾಸ್ಥಾನಮ್ ।।47।।

ಸರ್ವತ್ರ ಸಙ್ಗಮುಕ್ತೋ ಗರ್ವವಿಯುಕ್ತಃ ಸ್ವತಂತ್ರಸಞ್ಚಾರಃ ।

ನಿರ್ವರ್ಣಯನ್ ಕದಾ ವಾ ಶರ್ವವಧೂಧಾಮ ವಿಹರಾಮಿ ।।48।।

ಹರಿಮುಖವಂದಿತಚರಣಾ ಹರಿಣಾಙ್ಕಮದಾಪಹಾಸ್ಯರಾಜೀವಾ ।

ಹರಿಣಸ್ತನನ್ಧಯಾಕ್ಷೀ ಹರಿನಾಯಕವಾಹನಾ ಜಯತಿ ।।49।।

ಕ್ಷತ್ರಿಯಾಂತಕಾರಿಣಃ ಪ್ರಸೂತ್ವಮೇವ ಕೇವಲಂ

ನಾಪ ಕಾಪಿ ಯತ್ಕಲಾ ಮಮಾಪಿ ಮಾತೃತಾಮಗಾತ್ ।

ದುಷ್ಟಲೋಕಮಾರಿಣೀ ನೃಸಿಂಹಶಕ್ತಿರೂಪಿಣೀ

ಧೂರ್ಜಟೇರ್ವಧೂಟಿಕಾ ಧುನೋತು ಸಾ ಮದಾಪದಮ್ ।।50।।

।। ತೂಣಕವೃತ್ತಂ ।।

।। ಇತಿಶ್ರೀ ಭಗವನ್ಮಹರ್ಷಿರಮಣಾಽಂತೇವಾಸಿನೋ ವಾಸಿಷ್ಠಸ್ಯ ನರಸಿಂಹಸೂನೋ-

ರ್ಗಣಪತೇಃ ಕೃತಿಃ ಉಮಾಽಕ್ಷರಮಾಲಾ ಸಮಾಪ್ತಾ ।।