॥ ಕಾವ್ಯಕಣ್ಠ ವಾಸಿಷ್ಠ ಶ್ರೀಗಣಪತಿಮುನಿವಿರಚಿತಮ್ ಶಿವಗೀತಮ್ ॥

ಉದ್ದೀಪ್ಯತ್ ಕಿರಣಂ ಚಿತ್ರಂ ಶ್ರೀಶರಣಮ್ ।

ಕಾಮಾರೇಶ್ಚರಣಂ ಭೂಯಾನ್ನಃ ಶರಣಮ್ ॥೧॥

ಸತ್ಯಃ ಕೋಽಪಿ ಶಿವೋ ನಿತ್ಯಃ ಪಾಲಯಿತಾ ।

ಮಧ್ಯೇ ಯೋ ಜಗತಾಂ ಸ ಧ್ಯೇಯಃ ಸತತಮ್ ॥ ೨ ॥

ನಾಸ್ತ್ಯೇತಸ್ಯ ವಪುರವಸ್ಥ್ಯೇ ಕ್ವಾಪಿ ನ ಸಃ ।

ಮತ್ಯಾಽಭಾಣಿ ಬುಧೈಃ ಸತ್ಯಾಧಾರಪದಮ್ ॥ ೩ ॥

ಉಕ್ತಂ ಸೂಕ್ಷ್ಮತಮಂ ದ್ವೇಧೈಕಂ ಪರಮಮ್ ।

ರೂಪಂ ರೂಪತಯಾ ಕಿಂ ಚ ಸ್ಥಾನತಯಾ ॥ ೪ ॥

ಸೋಽಣುಃ ಸ್ಯಾದಣುತೋ ಧಾತೈಷಾಂ ಜಗತಾಮ್ ।

ತಚ್ಛಕ್ತಿರ್ಮಹತೋ ವಿಜ್ಞೇಯಾ ಮಹತೀ ॥ ೫ ॥

ಗತ್ವಾ ತಿಷ್ಠತಿ ನಾ ಯತ್ಸ್ವಂ ಹಾರ್ದಪದಮ್ ।

ಅಗ್ರಾಹ್ಯಸ್ಯ ವಿಭೋಸ್ತಸ್ಯ ಧ್ಯಾನಮಿದಮ್ ॥ ೬ ॥

ಆತ್ಮಾನಂ ಜಗತಾಂ ರಾಜಾನಂ ಪಿತರಮ್ ।

ಆಚಾರ್ಯಂ ಚ ಮುಹುಃ ಸಙ್ಗಾಯಾಮಿ ಹರಮ್ ॥ ೭ ॥

ದೀಪ್ಯಂತಂ ದಿವಿ ತಂ ಲೋಕೇ ಸರ್ವಭುಜಮ್ ।

ಭೂತೇಶಂ ಪ್ರಣುಮೋ ಮಾಯಾಕಾಂತಮಜಮ್ ॥ ೮ ॥

ದೃಶ್ಯೇ ವಿಶ್ವತನುಂ ಪಾರೇ ನಿರ್ವಪುಷಮ್ ।

ಗಾಯಾಮಃ ಪರಮಂ ಭಕ್ತಜ್ಞಾನಪುಷಮ್ ॥ ೯ ॥

ಅಷ್ಟೌ ತೇ ತನವಃ ತ್ರಾತರ್ವಿಶ್ವಮಿದಮ್ ।

ವಕ್ತ್ಯೇತದ್ಭವತೇ ಮಾಹಾತ್ಮ್ಯಂ ವಿಶದಮ್ ॥ ೧೦ ॥

ಸರ್ವೇಷಾಂ ಜಗತಾಂ ಮಾತಾ ದೇವನುತಾ ।

ಈಶಾನ ತ್ರಿಗುಣಾ ಮಾಯಾ ತೇ ದಯಿತಾ ॥ ೧೧ ॥

ಶಕ್ತ್ಯಾಸೌ ಭುವನಂ ಸೃಷ್ಟ್ವಾ ಪಾತುಮಿದಮ್ ।

ಹೈಮಂ ದಿವ್ಯವಪುರ್ಜಗ್ರಾಹಾಭಯದಮ್ ॥ ೧೨ ॥

ಸೂಕ್ಷ್ಮಂ ಸ್ಯಾದಗುಣಂ ಹೈಮಂ ಸ್ಯಾತ್ಸಗುಣಮ್ ।

ದೇವಸ್ಯಾದಿವಿಭೋರೇವಂ ದ್ವೇ ವಪುಷೀ ॥ ೧೩ ॥

ಭಾಷಾಮಾತ್ರವಪುಃ ಪೂರ್ವಂ ಸ್ಯಾದವಪುಃ ।

ಅನ್ಯದ್ಬುದ್ಧಿಮತಾಂ ಧ್ಯಾನಗ್ರಾಹ್ಯವಪುಃ ॥ ೧೪ ॥

ಬಿಭ್ರದ್ಭಾತಿ ಜಗತ್ಸಾಮ್ರಾಜ್ಯಂ ಗಗನೇ ।

ಹೈಮೋಽಸೌ ಪುರುಷಃ ಸಿದ್ಧಾನಾಂ ಭುವನೇ ॥ ೧೫ ॥

ಇಂದ್ರೋ ವೇದವಿದಾಂ ಭಾಷಾಯಾಂ ಸಪರಃ ।

ನಾಥಸ್ತಂತ್ರವಿದಾಂ ವ್ಯಾಹಾರೇಷು ಹರಃ ॥ ೧೬ ॥

ಪ್ರತ್ಯುಷ್ಣಾಂಶುತಯಾ ತನ್ವಾ ಬಿಂಬಿತಯಾ ।

ಪ್ರತ್ಯಂಡಂ ಪ್ರಭುತಾಂ ಧತ್ತೇ ಸೋಽದ್ಭುತಯಾ ॥ ೧೭ ॥

ಅಭ್ರೇ ರಾಜತಿ ಯೋ ಬಿಭ್ರಾಣೋ ಭುವನಮ್ ।

ಶುಭ್ರಾಗೇ ಚ ವಿಭುಃ ಸಭ್ರಾಜಿಷ್ಣುಯಶಾಃ ॥ ೧೮ ॥

ಗೌರೋಽಯಂ ಗಗನೇ ಶುಕ್ಲಃ ಶುಭ್ರನಗೇ ।

ಏಕೇಯಂ ತು ಭಿದಾ ಮಾಯಾರೂಪಕೃತಾ ॥ ೧೯ ॥

ರುದ್ರಃ ಶುಕ್ಲಗಿರಾವಗ್ನಿರ್ವಾ ಸ ಪುಮಾನ್ ।

ಈಶೋ ವ್ಯೋಗ್ನಿ ಲಸನ್ನಿಂದ್ರೋ ವಾ ಸುಮಹಾನ್ ॥ ೨೦ ॥

ಹೈಮಂ ಭೂತಪತೇ ಶುಕ್ಲಂ ವಾ ಶಿವ ತೇ ।

ರೂಪಂ ಯಃ ಸ್ಮರತಿ ಪ್ರಾಜ್ಞೋಽಯಂ ಜಯತಿ ॥ ೨೧ ॥

ಅಭ್ರೇ ಯೇ ಮರುತಃ ಶುಭ್ರೇ ಭೂಭೃತಿ ತೇ ।

ಕ್ಲೇಶಾನಾಂ ದಮನಾ ಈಶಾನ ಪ್ರಮಥಾಃ ॥ ೨೨ ॥

ದಾಸೋಽಹಂ ಮರುತಃ ಪಾತಾರೋ ಜಗತಃ ।

ಭೂತಾ ವಾ ಭವತಾಂ ಸ್ತೋತಾ ಪಾಪಹೃತಾಮ್ ॥ ೨೩ ॥

ಪಾಯಾನ್ಮಾಮಭಿತಸ್ತಿಷ್ಠಂತಂ ತಪಸಿ ।

ಬಿಭ್ರಾಣಃ ಸ ಶಿವಃ ಕಾರುಣ್ಯಂ ಮನಸಿ ॥ ೨೪ ॥

ಗಾತಾರಂ ಗಣಪಂ ಗಾಯತ್ರೈರ್ಮುಕುಲೈಃ ।

ಈಶೋ ಯೋ ಜಯತಾತ್ಸರ್ವೈಶ್ಚಾಪಿ ಬಲೈಃ ॥ ೨೫ ॥

॥ ಇತಿ ಶ್ರೀಭಗವನ್ಮಹರ್ಷಿರಮಣಾಂತೇವಾಸಿನೋ ವಾಸಿಷ್ಠಸ್ಯ ನರಸಿಂಹಸೂನೋರ್ಗಣಪತೇಃ ಕೃತಿಃ ಶಿವಗೀತಂ ಸಮಾಪ್ತಮ್ ॥