॥ ಕಾವ್ಯಕಣ್ಠ ವಾಸಿಷ್ಠ ಶ್ರೀಗಣಪತಿಮುನಿ ವಿರಚಿತಮ್ ಶಿವಸ್ತವರಾಜಃ ॥

ಪ್ರಥಮಃ ಶಶಿವದನಾವರ್ಗಃ

ಅಮೃತಮಯೂಖಂ ಮುಕುಟಮನರ್ಘಮ್ ।

ಜಯತಿ ದಧಾನೋ ಜಗದಧಿರಾಜಃ ।।೧।।

ಸಕಲಬುಧೌಘೇ ವಿಫಲವಿಧಾನೇ ।

ಅಸತಿ ಶರಣ್ಯೇ ಮತಿಮತಿಗಣ್ಯೇ ।। ೨ ।।

ದುರಿತವಿಸಾರಪ್ರತಮಸಿ ಲೋಕೇ ।

ಋಷಿಕುಲಜಾನಾಂ ಸದಸಿ ಸಶೋಕೇ ।। ೩ ।।

ಅತಿದುರದೃಷ್ಟಾನ್ನರನಿಯುತೇಷು ।

ಅಪಿ ಮಿತಮತ್ತುಂ ಧನರಹಿತೇಷು ।।೪।।

ಉದಿತವಿರೋಧಾಸ್ವಯುತಭಿದಾಸು ।

ಚತಸೃಷು ಜಾತಿಷ್ವಬಲತಮಾಸು ।।೫।।

ಮುಹುರಪಿ ಲೋಲೇ ಕ್ಷಿತಿಸುರಶೀಲೇ ।

ಅಜಗಣಕಲ್ಪೇ ಭುಜಭವಸಙ್ಘೇ ।। ೬ ।।

ಚತುರವಿರೋಧಿವ್ರಜಹೃತಸಾರಾಮ್ ।

ಅವಿರತನೇತ್ರಸ್ರುತಜಲಧಾರಾಮ್ ।। ೭ ।।

ಭರತಧರಿತ್ರೀಂ ಭುವನನೃಪಾಲಃ ।

ಅವತು ದಯಾಲುಃ ಸಿತಗಿರಿಶಾಲಃ ।। ೮।।

ಅರುಣಧರಿತ್ರೀಧರ ಹರ ದೂನಾಮ್ ।

ಭರತಧರಿತ್ರೀಮವ ಶಿವ ದೀನಾಮ್ ।। ೯।।

ಸತುಹಿನರೋಚಿಃಶಕಲಕಮಸ್ತೇ ।

ಸಕರುಣಗೌರೀರಮಣ ನಮಸ್ತೇ ।। ೧೦।।

ಹರ ಭರತಕ್ಷ್ಮಾಜನವರದೂತಮ್ ।

ಕುರು ಚರಿತಾರ್ಥಂ ಗಣಪತಿಮೇತಮ್ ।। ೧೧ ।।

ಅಸಿ ಸಿತಶೈಲೇ ಹರ ಹತಗಾತ್ರೀ ।

ತವ ಕಿಮು ದೃಷ್ಟ್ಯಾಂ ನ ಭರತಧಾತ್ರೀ ।। ೧೨ ।।

ಪುರಜಿತ ಈಡ್ಯಂ ವಿಲಸತಿ ಗುರ್ವ್ಯಾಮ್ ।

ಸಿತಗಿರಿನಾಮ ಸ್ಥಲಮಿದಮುರ್ವ್ಯಾಮ್ ।। ೧೩ ।।

ಸ್ಥಲಮಿದಮಚ್ಛಕ್ಷಿತಿಧರರೂಪಮ್ ।

ಹೃದಯಮಿಲಾಯಾ ಅಪಹತಪಾಪಮ್ ।। ೧೪ ।।

ಹೃದಿವ ನರಾಣಾಂ ಸಿತನಗನಾಮ ।

ಹೃದಪಿ ಧರಾಯಾಸ್ತವ ಶಿವ ಧಾಮ ।। ೧೫ ।।

ಕ್ಷಿತಿಹೃದಯೇ ವಾ ವಿಲಸತಿ ನಿತ್ಯಃ ।

ತ್ರಿಭುವನಮಧ್ಯೇ ಶಿವ ಇತಿ ಸತ್ಯಃ ।। ೧೬ ।।

ಪ್ರಭುಮಿಹ ಸಂತಃ ಪ್ರತಿಖಗಗೋಲಮ್ ।

ವಿದುರಿಮಮನ್ತರ್ವಿರಚಿತಶಾಲಮ್ ।। ೧೭ ।।

ಇಯಮಖಿಲಾಭ್ಯೋ ಬಹುತರಲೀಲಾ ।

ನರಹೃದಯಾಖ್ಯಾ ತವ ಶಿವ ಶಾಲಾ ।। ೧೮ ।।

ದ್ವಿತೀಯೋ ಮುಕುಲವರ್ಗಃ

ಉದ್ದೀಪ್ಯತ್ ಕಿರಣಂ ಚಿತ್ರಂ ಶ್ರೀಶರಣಮ್ ।

ಕಾಮಾರೇಶ್ಚರಣಂ ಭೂಯಾನ್ನಃ ಶರಣಮ್ ।। ೧೯ ।।

ಸತ್ಯಃ ಕೋಽಪಿ ಶಿವೋ ನಿತ್ಯಃ ಪಾಲಯಿತಾ ।

ಮಧ್ಯೇ ಯೋ ಜಗತಾಂ ಸ ಧ್ಯೇಯಃ ಸತತಮ್ ।। ೨೦ ।।

ನಾಸ್ತ್ಯೇತಸ್ಯ ತನುರ್ವಸ್ತ್ವೇ ಕ್ವಾಪಿ ನ ಸಃ ।

ಮತ್ಯಾಽಭಾಣಿ ಪುನಃ ಸತ್ಯಾಧಾರಪದಮ್ ।। ೨೧ ।।

ಉಕ್ತಂ ಸೂಕ್ಷ್ಮತಮಂ ದ್ವೇಧೈಕಂ ಪರಮಮ್ ।

ರೂಪಂ ರೂಪತಯಾ ಕಿಞ್ಚ ಸ್ಥಾನತಯಾ ।। ೨೨ ।।

ಸೋಽಣುಃ ಸ್ಯಾದಣುತೋ ಧಾತೈಷಾಂ ಜಗತಾಮ್ ।

ತಚ್ಛಕ್ತಿರ್ಮಹತೋ ವಿಜ್ಞೇಯಾ ಮಹತೀ ।। ೨೩।।

ಗತ್ವಾ ತಿಷ್ಠತಿ ನಾ ಯತ್ಸ್ವಂ ಹಾರ್ದಪದಮ್ ।

ಅಗ್ರಾಹ್ಯಸ್ಯ ವಿಭೋಸ್ತಸ್ಯ ಧ್ಯಾನಮಿದಮ್ ।। ೨೪ ।।

ದೃಷ್ಟ್ಯಾ ಸಾ ಭುವನಂ ಸೃಷ್ಟ್ವಾ ಶಾಸ್ತುಮಿದಮ್ ।

ಹೈಮಂ ದಿವ್ಯವಪುರ್ಜಗ್ರಾಹೇತಿ ವಿದುಃ ।। ೨೫।।

ಸೂಕ್ಷ್ಮಂ ಸ್ಯಾದಗುಣಂ ಹೈಮಂ ಸ್ಯಾತ್ಸಗುಣಮ್ ।

ದೇವಸ್ಯಾದಿವಿಭೋರೇವಂ ದ್ವೇ ವಪುಷೀ ।। ೨೬ ।।

ಭಾಷಾಮಾತ್ರವಪುಃ ಪೂರ್ವಂ ಸ್ಯಾದವಪುಃ ।

ಅನ್ಯದ್ಭಕ್ತಿಮತಾಂ ಬುದ್ಧಿಗ್ರಾಹ್ಯವಪುಃ ।। ೨೭ ।।

ಬಿಭ್ರದ್ಭಾತಿ ಜಗತ್ಸಾಮ್ರಾಜ್ಯಂ ಗಗನೇ ।

ಹೈಮೋಽಸೌ ಪುರುಷಃ ಸಿದ್ಧಾನಾಂ ಭುವನೇ ।। ೨೮ ।।

ವಾಚಾ ನವ್ಯವಿದಾಮಧ್ಯಕ್ಷಃ ಸ ಪರಃ ।

ಇಂದ್ರಃ ಪೂರ್ವವಿದಾಮಸ್ಮಾಕಂ ತು ಹರಃ ।। ೨೯ ।।

ಪ್ರತ್ಯುಷ್ಣಾಂಶುತಯಾ ತನ್ವಾ ಬಿಮ್ಬತಯಾ ।

ಪ್ರತ್ಯಣ್ಡಂ ಪ್ರಭುತಾಂ ಧತ್ತೇ ಸೋಽದ್ಭುತಯಾ ।। ೩೦ ।।

ಅಭ್ರೇ ರಾಜತಿ ಯೋ ಬಿಭ್ರಾಣೋ ಭುವನಮ್ ।

ಶುಭ್ರಾಗೇ ಚ ವಿಭುಃ ಸ ಭ್ರಾಜಿಷ್ಣುಯಶಾಃ ।। ೩೧।।

ಗೌರೋಽಯಂ ಗಗನೇ ಶುಕ್ಲಃ ಶುಭ್ರನಗೇ ।

ಏಕೇಯನ್ತು ಭಿದಾ ಮಾಯಾರೂಪಕೃತಾ ।। ೩೨।।

ಹೈಮಂ ಭೂತಪತೇ ಶುಕ್ಲಂ ವಾ ಶಿವ ತೇ ।

ರೂಪಂ ಯಃ ಸ್ಮರತಿ ಪ್ರಾಜ್ಞೋಽಯಂ ಜಯತಿ ।। ೩೩ ।।

ಅಭ್ರೇ ಯೇ ಮರುತಃ ಶುಭ್ರೇ ಭೂಭೃತಿ ತೇ ।

ಕೇಶಾನಾಂ ದಮನಾ ಈಶಾನ ಪ್ರಮಥಾಃ ।। ೩೪ ।।

ದಾಸೋಽಹಂ ಮರುತಃ ಪಾತಾರೋ ಜಗತಃ ।

ಭೂತಾ ವಾ ಭವತಾಂ ಸ್ತೋತಾ ಪಾಪಹೃತಾಮ್ ।। ೩೫।।

ಸ್ತೂಯನ್ತಾಂ ಸುಹೃದಃ ಸರ್ವೇ ಸರ್ವವಿದಃ ।

ಈಶಾನಾನುಚರಾಃ ಸರ್ವಾಭೀಷ್ಟಕರಾಃ ।। ೩೬ ।।

ತೃತೀಯಃ ತನುಮಧ್ಯಾವರ್ಗಃ

ಹರ್ತಾ ದುರಿತಾನಾಂ ಧರ್ತಾ ಜಗತಾಂ ನಃ ।

ಭರ್ತಾ ಗುಹಮಾತುಃ ಕರ್ತಾಸ್ತು ಶುಭಸ್ಯ ।। ೩೭ ।।

ಪಾತಾ ಭುವನಾನಾಂ ಧಾತಾ ಚ ವಿಧಾತಾ ।

ನೇತಾ ಪ್ರಮಥಾನಾಂ ತ್ರಾತಾ ಭವತಾನ್ನಃ ।। ೩೮ ।।

ಕರ್ತಾ ಭುವನಾನಾಂ ಭರ್ತಾಽಪಿ ಚ ಹರ್ತಾ ।

ಖ್ಯಾತೋಽವತು ದೇವಸ್ತಾತೋ ಮರುತಾಂ ನಃ ।। ೩೯।।

ಕರ್ತುಂ ಸ್ವರತೀದಂ ಭರ್ತುಂ ಪ್ರವಿಭಾತಿ ।

ಹರ್ತುಂ ಯ ಉದಾಸ್ತೇ ತರ್ತುಂ ಪ್ರಣುಮಸ್ತಮ್ ।। ೪೦ ।।

ಕರ್ತುಂ ಭುವನಂ ವಾಗ್ಭರ್ತುಂ ಭವಭಾತೇ ।

ಹರ್ತುಂ ಖಲು ಭದ್ರಾ ಯೋಗಾಮಲನಿದ್ರಾ ।। ೪೧।।

ಕಾರ್ಯತ್ರಿಕಮೇತತ್ಕರ್ತುಂ ಬಹವೋ ನೋ ।

ಏಕಸ್ಯ ತು ಕಾರ್ಯೈರ್ನಾಮಾನಿ ಬಹೂನಿ ।। ೪೨॥

ಕ್ಷ್ಮಾರ್ಕೇನ್ದುಪತಿಭ್ಯಃ ತ್ರಿಭ್ಯಃ ಪುರುಷೇಭ್ಯಃ ।

ಸರ್ಗಸ್ಥಿತಿಭಙ್ಗಾ ಖ್ಯಾತಿಃ ಖಲು ಭಾಕ್ತಾ ।। ೪೩ ।।

ತೇಷ್ವನ್ಯತಮಂ ಯತ್ ಕಾರ್ಯತ್ರಿಕಹೇತುಮ್ ।

ಕೇಚಿದ್ಬುವತೇ ಸಾ ಭಾಕ್ತಾ ನ ಕಿಮುಕ್ತಿಃ ।।೪೪॥

ಅಧ್ಯಕ್ಷಪರೋಽಯಂ ಸಾಕ್ಷಾದಿವ ವಾದಃ ।

ಏಕಾ ಯದಹನ್ತಾ ತಸ್ಯಾಪಿ ಪರಸ್ಯ ।। ೪೫।।

ಮೇಯಃ ಶಿವ ಸರ್ವೋ ಗೋಲಾತ್ಮಕಲೋಕಃ ।

ಸೀಮಾರಹಿತೋಸಾವೇಕಸ್ತವ ನಾಕಃ ।।೪೬।।

ಲಕ್ಷ್ಮೀಪತಿಸಙ್ಖ్యಾ ಯಾವದ್ರವಿಲೋಕಮ್ ।

ಗೌರೀಪತಿರೇಕೋ ರಾಜತ್ಯಧಿನಾಕಮ್ ।।೪೭।।

ಏಕೈಕ ಇನಃ ಸ್ಯಾತ್ ಪ್ರತ್ಯಬ್ಜಭವಾಣ್ಡಮ್ ।

ಸರ್ವಾಣ್ಡಗಮೇಕಂ ಪ್ರಾಹುಃ ಖಮಖಣ್ಡಮ್ ।। ೪೮ ।।

ಆತ್ಮಾನಮುತಾಹೋ ತಾತಂ ಖಚರಾಣಾಮ್ ।

ಆಹೋಸ್ವಿದಧೀಶಂ ಧ್ಯಾಯಾಮ ಸುರಾಣಾಮ್ ।। ೪೯।।

ತಂ ವ್ಯೋಮಚರಾಣಾಂ ಜೀವಂ ಪವಮಾನಮ್ ।

ತಾತಂ ಶಿವಮಾಹುರ್ನಾಥಂ ಮಘವಾನಮ್ ।। ೫೦ ।।

ಯದ್ಯಪ್ಯಖಿಲಾನಾಮಾತ್ಮಾ ಗುರುರೀಶಃ ।

ಉಕ್ತೋ ಮರುತಾಂ ತು ಪ್ರಾಥಮ್ಯತ ಏಷಃ ।। ೫೧।।

ಅಭ್ರೇ ವಿಚರನ್ತಂ ಭಾನ್ತಂ ನಿನದನ್ತಮ್ ।

ಅಸ್ಮತ್ಪಿತರಂ ತಂ ವನ್ದೇ ಭಗವನ್ತಮ್ ।। ೫೨ ।।

ಯಾನ್ತಂ ಪವಮಾನಂ ಭಾನ್ತಂ ಮಘವಾನಮ್ ।

ನಾಕೇ ನಿನದನ್ತಂ ಗಾಯನ್ತಿ ಶಿವಂ ತಮ್ ।। ೫೩ ।।

ಭಾತೋ ಗಗನಾಗ್ನೇರ್ಯಾತಃ ಪವನಸ್ಯ ।

ತಾರಸ್ಯ ಚ ರೂಪಂ ನಾನೇಕಮಪಾಪಮ್ ।। ೫೪ ।।

ಚತುರ್ಥೋ ವಸುಮತೀವರ್ಗಃ

ನಿತ್ಯಂ ಸ್ವರತಿ ಯೋ ವ್ಯಾಪ್ಯಾಭ್ರಮಖಿಲಮ್ ।

ಗಾಯನ್ತಿ ಕವಯಸ್ತಂ ತಾರಮಮಲಮ್ ।। ೫೫।।

ತಾರಾಹ್ವಯವಪುಃ ಶಮ್ಭೋರಭಯದಮ್ ।

ಭಾನೋಃ ಕಿರಣವದ್ವೈಭೂತಿಕಮಿದಮ್ ।। ೫೬ ।।

ತಂ ಪುಷ್ಕರಗುಣಂ ಗಾಯನ್ತು ಬಹವಃ ।

ಸ ತ್ವಗ್ನಿರಜರೋ ದಿವ್ಯಃ ಶಿವರವಃ ।। ೫೭ ।।

ಯದ್ರೋದಿತಿ ವಿಯದ್ದೇಶೇಽನವರತಮ್ ।

ಭದ್ರಂ ಬುಧಗಣೋ ರುದ್ರಂ ಭಣತಿ ತಮ್ ।। ೫೮ ।।

ಸಙ್ಘರ್ಷಣವಶಾದ್ರಾಜತ್ಯಲಮಯಮ್ ।

ಪಾನೀಯಮುಚಿತಂ ಪ್ರಾಹುರ್ಹರಿಹಯಮ್ ।। ೫೯।।

ತಾರಃ ಸ ಗಗನೇ ನ ತ್ವೇವ ಮರುತಾಮ್ ।

ಸರ್ವತ್ರ ಚ ಮಹಾನ್ ಪ್ರಾಣೋ ಜನಿಮತಾಮ್ ।। ೬೦ ।।

ತಸ್ಯೈವ ಗಗನೇ ಪ್ರಾಣಸ್ಯ ಚರತಃ ।

ಭಙ್ಗಾಃ ಪುನರಿಮೇ ವಾತಾಃ ಕುಮಭಿತಃ ।। ೬೧।।

ರುದ್ರಃ ಸ ನಿನದನ್ ರಾಜನ್ತ್ಸ ಮಘವಾ ।

ವಾತಃ ಸ ವಿಚರನ್ ನಿತ್ಯಂ ದಿವಿ ಯುವಾ ।। ೬೨ ।।

ಏವಂ ಗುಣವಶಾದೇಕಸ್ಯ ಬಹುತಾ ।

ತಾರಾತ್ಮಕವಪುರ್ದೃಷ್ಟ್ಯಾ ನಿಗದಿತಾ ।। ೬೩ ।।

ಕೇಚಿತ್ಪಶುಪತಿಂ ಶಕ್ರಂ ಚ ಪವನಮ್ ।

ದೇವತ್ರಯಮಿತಿ ಪ್ರಾಹುರ್ಗುಣವಶಾತ್ ।। ೬೪ ।।

ವ್ಯಾಪ್ತೋ ದಿವಿ ಸತಶ್ಚಿದ್ವಹ್ನಿರತುಲಃ ।

ನಾಮಾನ್ತರವಶಾತ್ತಾರಾಗ್ನಿರಮಲಃ ।। ೬೫।।

ಆಕ್ರಮ್ಯ ಸಕಲಂ ಭಾನ್ತಂ ಬಹುಬಲಮ್ ।

ಗಾಯಾಮಿ ವಿಮಲಂ ಚಿದ್ವಹ್ನಿಮತುಲಮ್ ।। ೬೬ ।।

ಮಿತ್ರಂ ಮಮ ಶಿವೋ ಬನ್ಧುರ್ಮಮ ಶಿವಃ ।

ತಾತೋ ಮಮ ಶಿವೋ ಮಾತಾ ಮಮ ಶಿವಃ ।। ೬೭ ।।

ನೇತಾ ಮಮ ಶಿವಸ್ತ್ರಾತಾ ಮಮ ಶಿವಃ ।

ರಾಜಾ ಮಮ ಶಿವೋ ದೈವಂ ಮಮ ಶಿವಃ ।। ೬೮ ।।

ಚಕ್ಷುರ್ಮಮ ಶಿವಃ ಶ್ರೋತ್ರಂ ಮಮ ಶಿವಃ ।

ಸ್ವಾನ್ತಂ ಮಮ ಶಿವೋ ಬುದ್ಧಿರ್ಮಮ ಶಿವಃ ।। ೬೯।।

ವಾಣೀ ಮಮ ಶಿವಃ ಪ್ರಾಣೋ ಮಮ ಶಿವಃ ।

ಆತ್ಮಾ ಮಮ ಶಿವಃ ಸರ್ವಂ ಮಮ ಶಿವಃ ।। ೭೦ ।।

ಅನ್ಯಪ್ರಮೃದಿತಂ ಸ್ವಂ ದೇಶಮವಿತುಮ್ ।

ವೀರ್ಯಂ ಮಮ ಧಿಯಃ ಸಂವರ್ಧಯ ವಿಭೋ ।। ೭೧।।

ಗಾಯತ್ರಮನಘಸ್ತೋತ್ರಂ ಗಣಪತೇಃ ।

ಏತಚ್ಛೃಣು ದಯಾಯುಕ್ತಃ ಪಶುಪತೇ ।। ೭೨ ।।

।। ಇತಿ ಶ್ರೀಭಗವನ್ಮಹರ್ಷಿರಮಣಾನ್ತೇವಾಸಿನೋ ವಾಸಿಷ್ಠಸ್ಯ ನರಸಿಂಹಸೂನೋರ್ಗಣಪತೇಃ ಕೃತಿಃ ಶಿವಸ್ತವರಾಜಃ ಸಮಾಪ್ತಃ ।।