॥ ಕಾವ್ಯಕಣ್ಠ ವಾಸಿಷ್ಠ ಶ್ರೀಗಣಪತಿಮುನಿ ವಿರಚಿತಮ್ ಶ್ರೀತಾರಕರಾಮನಾಮಸ್ತುತಿಃ ॥

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೧ ॥

ನಿರ್ಗುಣ ನಿಷ್ಕಲ ನಿತ್ಯನಿರಂಜನ ನಿರ್ಗತಮತ್ಸರ ಗಮ್ಯವಿಭೋ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೨ ॥

ಸಂಸಾರೇಽಸ್ಮಿನ್ ನಿರ್ಗತಸಾರೇ ಪಾಹಿ ವಿಪಾರೇ ದಶವದನಾರೇ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೩ ॥

ಸರ್ವಸಮತ್ವಂ ಸರ್ವಹಿತತ್ವಂ ಸತ್ಸಂಗತ್ವಂ ದೇಹಿ ವಿಭೋ ಮೇ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೪ ॥

ಜನನಕ್ಲೇಶಮ್ ಮರಣಕ್ಲೇಶಮ್ ನಾಶಯ ಗಮನಾಗಮನಕ್ಲೇಶಮ್ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೫ ॥

ಕೋ ಮೇ ಪುತ್ರಃ ಕಾ ಮೇ ಜಾಯಾ ಮಾಯಾ ಸೇಯಂ ಪಾಹಿ ವಿಭೋ ಮಾಮ್ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೬ ॥

ಸನಕಸನಂದನಸಂಸ್ತುತಚರಿತಂ ಜಾನೀತೇ ತ್ವಾಂ ಗೋಗುಣರಹಿತಮ್ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೭ ॥

ನಾಸ್ತಿ ವಪುಸ್ತೇ ನಾಸ್ತಿ ತವಾಖ್ಯಾ ನಾಸ್ತಿ ಚ ಕರ್ಮ ಸ್ವಸ್ತಿದ ವಿಷ್ಣೋ ।

ದಶರಥನಂದನ ದಶರಥನಂದನ ದಶರಥನಂನ್ದನ ದಾಶರಥೇ ॥ ೮ ॥

ಮಾಯಾ ಕಲ್ಪಿತಮಿದಮಖಿಲಂ ತೇ ರೂಪಂ ಕರ್ಮ ಚ ನಾಮ ಚ ವಿವಿಧಮ್ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೯ ॥

ನಾಮ ತು ರಾಮೇತ್ಯಮಲಮಿದಂ ತೇ ತಾರಕಂ ಋಷಯಃ ಪರಿಭಾಷಂತೇ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೧೦ ॥

ಚತುರಾಸ್ಯಸ್ತ್ವಂ ಚಕ್ರಧರಸ್ತ್ವಂ ಪರಮೇಶಸ್ತ್ವಂ ಪರಮಾತ್ಮಾ ತ್ವಮ್ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೧೧ ॥

ತತ್ತ್ವಸಮೂಹಾದುಪರಿ ಲಸಂತಂ ಪುರುಷಂ ಸಾಂಖ್ಯಾಃ ಪ್ರವದಂತಿ ತ್ವಾಮ್ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೧೨ ॥

ದಶಶತಪತ್ರೇ ದಶಮುಖಶತ್ರೋ ಯೋಗವಿದಸ್ತ್ವಾಮಾಲೋಕಂತೇ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೧೩ ॥

ಜೈಮಿನಿಮುಖ್ಯಾಃ ಕರ್ಮಫಲಂ ತ್ವಾಂ ದೇವ ವದಂತೋ ನಂದಂತಿ ಸ್ಮ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೧೪ ॥

ವೇದಾಂತೇ ಯೇ ನಿಷ್ಠಿತಮತಯಃ ತೇ ಪ್ರಾಹುಸ್ತ್ವಾಮೇಕಮಭೇದಮ್ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೧೫ ॥

ಗಣಪತಿಕವಿನಾ ರಚಿತಂ ಸ್ತೋತ್ರಂ ಲಲಿತಂ ಪ್ರೀತ್ಯೈ ಭವತೋ ಭೂಯಾತ್ ।

ದಶರಥನಂದನ ದಶರಥನಂದನ ದಶರಥನಂದನ ದಾಶರಥೇ ॥ ೧೬ ॥

॥ ಇತಿ ಶ್ರೀಭಗವನ್ಮಹರ್ಷಿರಮಣಾಂತೇವಾಸಿನೋ ವಾಸಿಷ್ಠಸ್ಯ

ನರಸಿಂಹಸೂನೋರ್ಗಣಪತೇಃ ಕೃತಾ ‘ಶ್ರೀತಾರಕರಾಮನಾಮಸ್ತುತಿಃ’ ಸಂಪೂರ್ಣಮ್ ॥