॥ ಕಾವ್ಯಕಣ್ಠ ವಾಸಿಷ್ಠ ಶ್ರೀಗಣಪತಿಮುನಿ ವಿರಚಿತಮ್ ಶ್ರೀತ್ರಿಪುರಸುಂದರೀಗೀತಮ್ ॥

ಸಜಲತೋಯದಶ್ಯಾಮಕುಂತಲಾ ।

ಕುಂದಮಾಲಯಾ ರಚಿತಶೇಖರಾ ।।೧।।

ಅಮೃತಭಾನುನಾ ಸರಸಿಜೇನ ಚ ।

ತುಲಿತಮಾನನಂ ಮಂಜು ಬಿಭ್ರತೀ ।। ೨।।

ಚಾರುನಾಸಿಕಾಭೂಷಣತ್ವಿಷಾ ।

ಚಂದ್ರಿಕಾಚ್ಛಯಾ ಸಹ ಲಸತ್ ಸ್ಮಿತಾ ।। ೩ ।।

ಗಂಡಯುಗ್ಮಕೇ ನಾತಿಶೋಭಿನಾ ।

ಪಾಂಡುಪಾಂಡುನಾಽಽರಾಧಿತಸ್ಮರಾ ।।೪।।

ನೀಲನೀರಜಚ್ಛದವಿಲೋಚನಾ ।

ಶ್ರೀಯುಗೋಪಮಶ್ರವಣಶಾಲಿನೀ ।।೫।।

ದರ್ಪಣಾಕ್ಷಿಪದ್ಭಾಲಭಾಸುರಾ ।

ಲಘುವಿಶೇಷಕಂ ತತ್ರ ಬಿಭ್ರತೀ ।। ೬ ।।

ಕುಂಡಲಪ್ರಭಾಮಂಡಿತಾಂಸಕಾ ।

ಪಂಚಸಾಯಕೋತ್ಸಾಹವರ್ಧಿನೀ ।।೭।।

ಪಲ್ಲವಾಧರಾ ಶುಕ್ಲದಂತಿಕಾ ।

ಫುಲ್ಲತಾಂ ಸದಾ ಬಿಭ್ರತೀ ಮುಖೇ ॥೮॥

ಚಾಪಸುಂದರಾರಾಲಝಿಲ್ಲಿಕಾ ।

ಅಲಸಹಾಸಭಾವಿಜಿತಮಲ್ಲಿಕಾ ।।೯।।

ಕಂಬುಕಂಧರಾ ಕನಕಮಾಲಿನೀ ।

ಬಿಸನಿಭಪ್ರಭೇ ಬಿಭ್ರತೀ ಭುಜೇ ।। ೧೦ ।।

ಅರುಣಕಂಜಭೌ ಬಿಭ್ರತೀ ಕರೌ ।

ತುಂಗಪೀವರಸ್ತನವಿಶೋಭಿನೀ ।। ೧೧ ।।

ಸಿಂಹಮಧ್ಯಮಾ ನಿಮ್ನನಾಭಿಕಾ ।

ಮನ್ಮಥಾಯುಧದ್ರೋಮರಾಜಿಕಾ ।। ೧೨ ।।

ನಾಗನಾಸಿಕಾ ಸುಂದರೋರುಕಾ ।

ಚಾರುಜಂಘಿಕಾ ಕೋಮಲಾಂಘ್ರಿಕಾ ।। ೧೩।।

ಸುಮಶರಾಹ್ವಯಬ್ರಹ್ಮನಿರ್ಮಿತಾ ।

ಸಾಲಭಂಜಿಕಾ ಜಂಗಮಾ ಯಥಾ ।। ೧೪ ।।

ಸರಸಿಜಾಟವೀಮಧ್ಯಚಾರಿಣೀಮ್ ।

ನಾಭಿಜನ್ಮನಶ್ಚಾರುಹಾಸಿನೀಮ್ ।। ೧೫ ।।

ಪುಷ್ಪಧನ್ವಿನಃ ಪ್ರಿಯಮೃಗೀದೃಶಮ್ ।

ಪಾಕಶಾಸನಪ್ರಾಣನಾಯಿಕಾಮ್ ।। ೧೬ ।।

ಉರ್ವಶೀಮುಖಂ ಸುರವಧೂಜನಮ್ ।

ರೂಪಸಂಪದಾ ಜಿತವತೀ ಸತೀ ।। ೧೭ ।।

ತ್ರಿಪುರವೈರಿಣೋ ಜೀವಿತೇಶ್ವರೀ ।

ತ್ರಿಪುರಸುಂದರೀ ಹೃದಿ ಚಕಾಸ್ತು ಮೇ ।। ೧೮ ।।

।। ಇತಿ ಶ್ರೀಭಗವನ್ಮಹರ್ಷಿರಮಣಾಂತೇವಾಸಿನೋ ವಾಸಿಷ್ಠಸ್ಯ ನರಸಿಂಹಸೂನೋರ್ಗಣಪತೇಃ ಕೃತಿಃ ಶ್ರೀತ್ರಿಪುರಸುಂದರೀಗೀತಂ ಸಮಾಪ್ತಮ್ ।।