॥ ಕಾವ್ಯಕಂಠ ವಾಸಿಷ್ಠ ಶ್ರೀಗಣಪತಿಮುನಿ ವಿರಚಿತಮ್ ಹೇರಂಭೋಪಸ್ಥಾನಮ್ ॥

ಪ್ರಥಮಃ ಖಂಡಃ — ಶಶಿವದನಾವೃತ್ತಮ್

ಶ್ರಿಯಮಸಮಾನಾಂ ಮಮ ಶುಭನಾಮಾ ।

ದಿಶತು ಗಣಾನಾಂ ಪತಿರತಿಧಾಮಾ ॥ ೧॥

ವಿಜಿತಜರಾಧಿಂ ವಿನಿಹತರೋಗಮ್ ।

ದ್ವಿರದಮುಖೋ ಮೇ ವಿತರತು ಯೋಗಮ್ ॥ ೨॥

ವಿತರತು ಮಹ್ಯಂ ನಿಜಪದಭಕ್ತ್ತಿಮ್ ।

ಗಣಪತಿರಗ್ರ್ಯಾಮಪಿ ಭುಜಶಕ್ತ್ತಿಮ್ ॥ ೩॥

ಹರತನಯೋ ಮೇ ವಿಭುರತಿಹೃದ್ಯಾಮ್ ।

ವಿತರತು ಭೂತಪ್ರವಿಮಲವಿದ್ಯಾಮ್ ॥ ೪॥

ಮಮ ಕರಿವಕ್ತ್ರಃ ಪ್ರಭುರನವದ್ಯಾಮ್ ।

ದಿಶತು ಭವಿಷ್ಯದ್ವಿದಮುರುವಿದ್ಯಾಮ್ ॥ ೫॥

ನಿಜವಿಷಯಾಜಿಷ್ವಘಹಿಮಭಾನೋ ।

ಇಮಮವಿಜೇಯಂ ಕುರು ಹರಸೂನೋ ॥ ೬॥

ಸುಮಧುರಮಾಧ್ವೀಧರಪದಜಾತಮ್ ।

ಕರಿಮುಖ ದಾಸಂ ಕುರು ಕವಿಮೇತಮ್ ॥ ೭॥

ಗಣಪತಿರೂಪಂ ಮನಸಿ ಕರೋಮಿ ।

ಗಣಪತಿಕೀರ್ತಿಮ್ ವಚಸಿ ತನೋಮಿ ॥ ೮॥

ಮಮ ಗಣನಾಥಃ ಶಮಯತು ಪಾಪಮ್ ।

ಸಪದಿ ವಿಮುಷ್ಣಾತ್ವಪಿ ಪರಶಾಪಮ್ ॥ ೯॥

ಶಶಿವದನಾನಾಂ ನವಕೃತಿರೇಷಾ ।

ಭಜತು ಗಣೇಶಂ ಪತಿಮಿವ ಯೋಷಾ ॥ ೧೦॥

ದ್ವಿತೀಯಃ ಖಂಡಃ — ಮದಲೇಖಾವೃತ್ತಮ್

ಆಹ ಪ್ರಾಜ್ಞಜನಸ್ತ್ವಾಂ ಮೂಲಾಧಾರನಿಶಾಂತಮ್ ।

ಮಂದೇ ಸುಪ್ತಮಿಭಾಸ್ಯ ಜ್ಞೇ ಯುಕ್ತ್ತೇ ವಿಲಸಂತಮ್ ॥ ೧೧॥

ಅಸ್ತಿ ವ್ಯೋಮ್ನಿ ಗುರುರ್ಯಸ್ತಸ್ಯೈವ ತ್ವಮಿಹಾಸಿ ।

ವಿಘ್ನೇಶಾನವಿವರ್ತಃ ಸದ್ಭಕ್ತೇಷು ವಿಭಾಸಿ ॥ ೧೨॥

ಕೋऽಪಿ ಪ್ರಾಭವಶಾಲೀ ಮೂಲಾಧಾರವಿಹಾರೀ ।

ಪ್ರಜ್ಞಾಸಿದ್ಧಿವಧೂಭ್ಯಾಮ್ ಶ್ಲಿಷ್ಟೋ ಭಾತ್ಯಘಹಾರೀ ॥ ೧೩॥

ಆಶಾ ಮೇ ತವ ಶಕ್ತ್ತಿಂ ದೇಹೇ ದ್ರಷ್ಟುಮಪಾರಾಮ್ ।

ಪಾತುಂ ಚೇಶ್ವರಸೂನೋ ಮೂರ್ಧನ್ಯಾಮೃತಧಾರಾಮ್ ॥ ೧೪॥

ಯಾ ಚಿತ್ ಸಾ ತವ ಮಾತಾ ಯಃ ಶ್ರೇಷ್ಠಃ ಸ ಪಿತಾ ತೇ ।

ಸಿದ್ಧಿರ್ಬಾಹ್ಯಮತಿರ್ಯೇ ತೇ ನಾಥ ಪ್ರಮದೇ ತೇ ॥ ೧೫॥

ಯಾ ಲಿಪ್ಸಾ ಹೃದಯೇ ಮೇ ತಾಂ ಪೂರ್ಣಾಂ ಕುರು ಮಾ ವಾ ।

ಏಷಾಂಗೀಕ್ರಿಯತಾಂ ಮೇ ಮತ್ತೇಭಾನನ ಸೇವಾ ॥ ೧೬॥

ನಾ ಖೇ ಯಾತಿ ಸುರೋ ವಾ ತ್ವಂ ಚೇತ್ ಕಿಂಚಿದುದಾಸ್ಯಮ್ ।

ಆಧಾರೇ ವಿದಧಾಸಿ ಸ್ಕಂದಸ್ಯಾಗ್ರಜ ಲಾಸ್ಯಮ್ ॥ ೧೭॥

ನ ಸ್ವಾರ್ಥೇ ಮಮ ಯತ್ನೋ ನಿಃಸ್ವಾರ್ಥೇ ಮಮ ಸೋऽಯಮ್ ।

ಉದ್ಯೋಗಃ ಶಿವಸೂನೋ ಸದ್ಯೋ ದೇಹಿ ಸಹಾಯಮ್ ॥ ೧೮॥

ಮಾಹಾತ್ಮ್ಯಂ ನನು ವಕ್ತ್ತುಂ ಕಃ ಶಕ್ತ್ತಃ ಪುರುಷಸ್ತೇ ।

ಹಸ್ತೀಂದ್ರಾನನ ಭಾಗ್ಯಂ ಸರ್ವೇಷಾಂ ತವ ಹಸ್ತೇ ॥ ೧೯॥

ಏತಾಃ ಸಮ್ಮದಕತ್ರೀರ್ಹೈರಂಬೀರ್ಮದಲೇಖಾಃ ।

ಸೇವಂತಾಂ ಕವಿಭೃಂಗಾಶ್ಚಾಂದ್ರೀರ್ಭಾ ಇವ ಲೇಖಾಃ ॥ ೨೦॥

ತೃತೀಯಃ ಖಂಡಃ — ಇಂದ್ರವಜ್ರಾವೃತ್ತಮ್

ಏಕಾದಶಾನಾಂ ಪ್ರವರಂ ಸುತಾನಾಂ ರುದ್ರಸ್ಯ ಮಂತ್ರಾಧಿಪತಿಮ್ ನಮಾಮಿ ।

ಶಾಸ್ತ್ರಾಣಿ ಸರ್ವಾಣ್ಯಪಿ ಯಸ್ಯ ಕೀಲಾಃ ಸೂರ್ಯಾನಪೋಹ್ಯಂ ತಿಮಿರಂ ಹರಂತಿ ॥

೨೧॥

ಪ್ರಾಜ್ಞೇನ ಬುದ್ಧ್ಯಾ ಯದಕಾರಿ ಪದ್ಯಂ ಸಾಧಾರಣಸ್ತತ್ರ ತವೋಪಕಾರಃ ।

ಹೇರಂಬ ಯನ್ಮಂತ್ರಮೃಷಿಶ್ಚಕಾರ ವ್ಯಕ್ತೋವಿಶಿಷ್ಟಸ್ತವ ತತ್ರ ಯತ್ನಃ ॥ ೨೨॥

ಜಿಹ್ವಾಸ್ಥಲಂ ನಾಥ ವಿಗಾಹಮಾನಂ ತ್ವಾಮಾಹುರುಚ್ಛಿಷ್ಟಮಯಿ ಛಲೋಕ್ತ್ಯಾ ।

ಉಚ್ಛಿಷ್ಟತಾ ಚೇತ್ತವ ರುದ್ರಸೂನೋ ಸ್ವಾಧ್ಯಾಯನಿಷ್ಠೀವನಯೋರ್ಭಿದಾ ಕಾ ॥ ೨೩॥

ಸರ್ವಾಣಿ ಧಾನ್ಯಾನಿ ಚ ಭಕ್ಷಯಂತಂ ದಂತೈಃ ಶಿತೈರ್ದೇವ ಸಹಾಯವಂತಮ್ ।

ಏತಂ ಬಿಲಸ್ಥಂ ರಸನಾಹ್ವಯಂ ತೇ ವಾಹಂ ವಿದೋ ಮೂಷಿಕಮಾಮನಂತಿ ॥ ೨೪॥

ಆಧಾರಚಕ್ರೇ ವಸತೋ ಗಣೇಶ ಜ್ಯೋತಿರ್ಮಯಾಣೋರ್ಜ್ವಲತಃ ಸದಾ ತೇ ।

ಏಕಃ ಪಚತ್ಯನ್ನಮಶೇಷಮೂಷ್ಮಾ ಸಂಪ್ರೇರಯತ್ಯನ್ಯ ಇಮಾಸ್ತು ವಾಚಃ ॥ ೨೫॥

ವೈಶ್ವಾನರೋಽಗ್ನಿಃ ಸಕಲಸ್ಯ ಜೀವೋ ವಾಗಿಂದ್ರಿಯಾಗ್ನಿಃ ಶಿವನಂದನ ತ್ವಮ್ ।

ಯೋ ವೇದ ನೈವ ಯುವಯೋರ್ವಿಭೇದಂ ಪಿಂಡೇಷು ನಾ ಮುಹ್ಯತಿ ಸ ಪ್ರಸಂಗೆ ॥ ೨೬॥

ತ್ವಾಂ ಬ್ರಹ್ಮಣಸ್ಪತ್ಯಭಿಧಾನಮಾಹುಃ ಕೇಚಿದ್ವಿಭೋರೀಶಪದಸ್ಯ ಪುತ್ರಮ್ ।

ಅನ್ಯೈರ್ಬೃಹಸ್ಪತ್ಯಭಿಧಾನ ಉಕ್ತೋ ಧೀರೈರ್ವಿಭೋರಿಂದ್ರಪದಸ್ಯ ಮಂತ್ರೀ ॥ ೨೭॥

ಜಿಹ್ವೈವ ವೇದಿಸ್ತವ ತೋಯಪೂತಾ ಲೋಕಪ್ರಸಂಗಸ್ತವ ತತ್ರ ಧೂಮಃ ।

ಜ್ವಾಲಾ ಜಗನ್ನಾಥಕಥಾ ಪವಿತ್ರಾ ಚೇತೋ ಘೃತಂ ಜುಹ್ವತಿ ಯತ್ರ ಸಂತಃ ॥ ೨೮॥

ವಿದ್ಯುನ್ಮಯೀಮೂರ್ತಿರಗಾದಿ ಜಿಷ್ಣೋರ್ಯಾ ಮೌನಿಭಿಃ ಸೈವ ತವ ಸ್ವರೂಪಮ್ ।

ಇಂದ್ರಸ್ಯ ಭೇದಸ್ತವ ಚೋದಿತೋ ಯಃ ಸ ಪ್ರಾಣವಿದ್ಯುತ್ತನುಭೇದಮೂಲಃ ॥ ೨೯॥

ದಿವ್ಯಾಗ್ರಿಗಾತ್ರಂ ಧಿಷಣಾ ಕಲತ್ರಂ ಭರ್ಗಸ್ಯ ಪುತ್ರಂ ಪ್ರಣತಸ್ಯ ಮಿತ್ರಮ್ ।

ವಾಸಿಷ್ಠ ವಾಗಗ್ನಿಋಚೋ ಭಜಂತಾಮೇತಾಃ ಕರೀಂದ್ರಾನನಮಿಂದ್ರವಜ್ರಾಃ ॥ ೩೦॥

ಚತುರ್ಥಃ ಖಂಡಃ — ವಸಂತತಿಲಕವೃತ್ತಮ್

ಕಿಂ ಬೃಂಹಿತಾನಿ ಕುರುಷೇ ಕಲುಷೇಣ ಭಗ್ನೇ ಮಗ್ನೇ ಮಹಾವಿಪದಿ ದೇವ ನಿಜೇ ವಿವರ್ತೇ ।

ನಿದ್ರಾಮಿ ಚೇದ್ವರದ ಬೋಧಯ ಹಸ್ತಘಾತಾದ್ಗಚ್ಛಾಮಿ ಚೇದಪಥಮಾಶು ನಿವರ್ತಯಸ್ವ ॥ ೩೧॥

ವೇಷಸ್ತವಾಯಮಪರೋ ಯದಿ ದೇವ ನಾಟ್ಯಮಾರಭ್ಯತಾಂ ತದುಚಿತಮ್ ಕಿಮುಪೈಷಿ ಮೌನಮ್ ।

ಏತಾಂ ಪ್ರಭೋ ಯವನಿಕಾಮಪಸಾರಯಂತು ಸಾಕ್ಷಾದ್ಗಣಾಸ್ತವ ಕುತಃ ಕ್ರಿಯತೇ ವಿಲಂಬಃ ॥ ೩೨॥

ಏತತ್ತಮೋ ನಯನಶಕ್ತ್ತಿಹರಂ ಗುಹಾಯಾಮ್ ಮಾರ್ಗಂ ರುಣದ್ಧಿ ನ ವಿಲೋಕಿತುಮಸ್ಮಿ ಶಕ್ತ್ತಃ ।

ಸ್ನೇಹೋಽಸ್ತಿ ಕಾಚನ ದಶಾಸ್ತಿ ವಿಭೋ ಕಟಾಕ್ಷಜ್ಯೋತಿರ್ಲವಮ್ ಸದಯ ದೇಹಿ ಪುರೋ ವ್ರಜೇಯಮ್ ॥ ೩೩॥

ಘೋರಂ ಕರೋಮಿ ನ ತಪೋ ಯದಿ ತೇಽಪರಾಧಃ ಕಿಂ ಪ್ರೇರಣಂ ನ ಕೃತವಾನಸಿ ರುದ್ರಸೂನೋ ।

ಸಂಪ್ರೇರಿತಶ್ಚ ಭವತಾ ಯದಿ ನಾಚರೇಯಂ ಸಂಪ್ರೇರಣಸ್ಯ ತವ ಕಾ ಗಜವಕ್ತ್ರ ಶಕ್ತ್ತಿಃ ॥ ೩೪॥

ಕಾರ್ಯಂ ನ ಮೇ ಕಿಮಪಿ ತತ್ ಖಲು ನಿರ್ಜರಾಣಾಂ ರೂಪಂ ನ ಮೇ ಕಿಮಪಿ ತತ್ತವ ಕೋಽಪಿ ವೇಷಃ ।

ಇಷ್ಟಂ ನು ಕಷ್ಟಮಥ ಕಸ್ಯ ಕರೀಂದ್ರವಕ್ತ್ರ ಶಿಷ್ಟಂ ತು ಮೇ ಕಿಮಪಿ ನಾಮ ನರಾಂಗಸಂಗಿ ॥ ೩೫॥

ನಾಮಾಪಿ ತತ್ತವ ಭವತ್ಯಥವಾ ಗಜಾಸ್ಯ ಚರ್ಚಾ ವಿನಶ್ವರತಮೇ ತನುಕಂಚುಕೇ ಕಾ ।

ವಿಷ್ಣೋರಿವೇಂದುಧವಲಂ ಭವಿತಾ ಯಶಶ್ಚೇತ್ ತದ್ದಂತಕಾಂತಿಷು ತವೈವ ಲಯಂ ಪ್ರಯಾತು ॥ ೩೬॥

ಸ್ಥೂಲಾಂ ತನೂಮಸುಮಶೇಷಮನೋರಥಾನಾಂ ಸ್ಥಾನಂ ಮನಶ್ಚ ಧಿಷಣಾಂ ಪ್ರಮದಂ ಚ ಮೂಲಮ್ ।

ಆಕ್ರಮ್ಯ ಕೋಶಮಖಿಲಂ ಚ ವಿಭೋ ಖಲಾರೇ ವಿಘ್ನಾಧಿರಾಜ ಮಯಿ ದರ್ಶಯ ತೇ ವಿಭೂತಿಮ್ ॥ ೩೭॥

ದೇವೀ ಮತಿರ್ಜಲಜಪತ್ರವಿಶಾಲನೇತ್ರಾ ದೇವೀ ಚ ಸಿದ್ಧಿರಕಲಂಕಸುಧಾಕರಾಸ್ಯಾ ।

ಛಾಯೋಷ್ಣತಾ ಚ ದಿನನಾಥಮಿವ ಜ್ವಲಂತಂ ನಿತ್ಯಂ ಭವಂತಮಿಭವಕ್ತ್ರ ವಿಭೋ ಭಜೇ ತೇ ॥ ೩೮॥

ಸಿದ್ಧೇಂದ್ರವೇಷಭೃತಿ ಭೂಮಿಹಿತಾಯ ರುದ್ರೇ ಕೈಲಾಸಶೈಲಮಧಿತಿಷ್ಠತಿ ವಜ್ರಪಾಣಿಃ ।

ಧೃತ್ವಾ ಗಜೇಂದ್ರಮುಖವೇಷಮಮುಷ್ಯ ಪುತ್ರೋ ಭೂತ್ವಾ ವಿಭುರ್ನಯತಿ ಪಾರಿಷದಾನಶೇಷಾನ್ ॥ ೩೯॥

ಸಮ್ಮೋದಯಂತು ಹೃದಯಂ ದ್ವಿರದಾನನಸ್ಯ ದೇವಸ್ಯ ಸಿದ್ಧಿಧಿಷಣಾ ಹೃದಯೇಶ್ವರಸ್ಯ ।

ಏತಾ ವಸಂತತಿಲಕಾಃ ಕವಿಕುಂಜರೇಣ ಗೀತಾಃ ಕಯಾಽಪ್ಯಮಲಭಾವನಯಾ ಯುತೇನ ॥ ೪೦॥

॥ ಇತಿ ಶ್ರೀಭಗವನ್ಮಹರ್ಷಿರಮಣಾಂತೇವಾಸಿನೋ ವಾಸಿಷ್ಠಸ್ಯ ನರಸಿಂಹಸೂನೋಃ

ಗಣಪತೇಃ ಕೃತಿರ್ಹೇರಂಬೋಪಸ್ಥಾನಂ ಸಮಾಪ್ತಮ್ ॥