॥ ಕಾವ್ಯಕಂಠ ವಾಸಿಷ್ಠ ಶ್ರೀಗಣಪತಿಮುನಿ ವಿರಚಿತಮ್ ಇಂದ್ರ ಶತಕಮ್ ॥

ದ್ವಿತೀಯಃ ಸ್ವರೂಪಸ್ತಬಕಃ - ತ್ರೈಷ್ಟುಭಃ

ದೇವಂ ಮಹೇಂದ್ರಂ ಪದಬಂಧುಪಾಪವಿಧ್ವಂಸನಂ ವಜ್ರಧರಂ ನಮಾಮಿ ।

ಲೋಕಾಂತರಂ ಲೋಕಮಯಂ ಚ ಯಸ್ಯ ಲೋಕಾತಿಗಂ ಚ ಪ್ರವಿಭಾತಿ ರೂಪಮ್ ।।೨೬।।

ಆತ್ಮೈವ ಲೋಕಃ ಸಕಲೋ ಮಹೀಯಾನಾತ್ಮೈವ ಲೋಕಾಂತರತಾಮುಪೈತಿ ।

ಆತ್ಮೈವ ಲೋಕಸ್ಯ ಪರಃ ಪರಸ್ತಾದಾತ್ಮೈವ ಲೋಕಾಧಿಪತಿರ್ಮಹೇಂದ್ರಃ ।।೨೭।।

ಪ್ರಾಕ್ ಸರ್ಗತೋ ನಿಷ್ಕಲ ಏಕ ಆಸೀತ್ ಸತ್ಪೂರ್ಣಬೋಧಾಕೃತಿರಾದಿದೇವಃ ।

ಸಪ್ರಾಜ್ಯಶಕ್ತಿರ್ಭುವನಂ ಸಸರ್ಜ ಸೃಷ್ಟಸ್ಯ ಚಾಭೂಜ್ಜಗತೋಽಂತರಾತ್ಮಾ ।।೨೮।।

ಯೋ ಭಾತಿ ಶುದ್ಧೋ ಜಗತಃ ಪರಸ್ತಾತ್ ಯಶ್ಚಾಂತರಾತ್ಮಾ ಜಗತೋಽಖಿಲಸ್ಯ ।

ಬಾಹ್ಯಾಲಯಾಕಾಶವದೇಕರೂಪಾವೇತೌ ಕವೀನಾಂ ವಚನೇಷು ಭಿನ್ನೌ ।।೨೯।।

ಲೋಕಾತಿಗಂ ಬ್ರಹ್ಮ ವದಂತಿ ಶುದ್ಧಂ ಲೋಕಾಂತರಂ ಚಾಲಕಮಿಂದ್ರಮಾಹುಃ ।

ಜ್ಞೇಯೋಽಯಮೇಕಸ್ಯ ಪರೀಕ್ಷಕಾಣಾಂ ದೃಷ್ಟಿಪ್ರಭೇದಾದಭಿಧಾನಭೇದಃ ।।೩೦।।

ಬ್ರಹ್ಮಾಗುಣಂ ಗಮ್ಯತಮಂ ಚಕಾಸ್ತಿ ತ್ರೈಲೋಕ್ಯಮಿಂದ್ರಃ ಸಗುಣಃ ಪ್ರಶಾಸ್ತಿ ।

ಪೂರ್ವಸ್ಯ ರೂಪಂ ಭವತಿ ತ್ರಿಪಾದಮನ್ಯಸ್ಯ ವಿಶ್ವೇನ ಸಹೈಕಪಾದಮ್ ।।೩೧।।

ಯಶ್ಚಾಗುಣೋ ಯಃ ಸಗುಣಶ್ಚ ದೇವೋ ಭಾವಃ ಸ ಕೇಷಾಮಪಿ ಪಂಡಿತಾನಾಮ್ ।

ಮೋದಃ ಸದಾ ಪೂರ್ಣರಸೋಽಪರೇಷಾಂ ಬೋಧಃ ಪರೇಷಾಂ ವಿದುಷಾಂ ಮತೇನ ।।೩೨।।

ಭಾವಃ ಸ ನೋ ಚೇದಸತೋ ಮತಿಃ ಕಾ ಬೋಧೋ ನ ಚೇತ್ ಕೀದೃಗಿವಾಸ್ಯ ಸತ್ತಾ ।

ಭಾವಃ ಪ್ರಬೋಧಶ್ಚ ನ ಚೇದ್ವದಂತು ಮೋದೋ ಭವೇದೇಷ ಕಥಂ ಸಖಾಯಃ ।।೩೩।।

ಪಾಷಾಣಸತ್ತೇವ ವಿನೈವ ಬೋಧಂ ತಸ್ಯಾಪಿ ಸತ್ತೇತಿ ನ ಸಾಧುವಾದಃ ।

ಪಾಷಾಣಸತ್ತಾಽಪಿ ವಿಹಾಯ ಬೋಧಂ ಕೇನಾನುಭೂತಾ ಸುಧಿಯೋ ಭಣಂತು ।।೩೪।।

ಶುಕ್ತೌ ಯಥಾ ವಾ ರಜತಸ್ಯ ಬೋಧೋ ಬೋಧೋಽಪ್ಯಸಂತ್ಸಂಭವತೀತಿ ವಾದೀ ।

ಸತ್ಯೇವ ತದ್ದೇಶಗತಾಮಸತ್ತಾಂ ಬೋಧೇ ಸಮಾರೋಪಯತೀತರಸ್ಯ ।।೩೫।।

ಮೋದಸ್ಯ ಭಾಸೋ ನ ವಿನಾಽನುಭೂತಿಂ ಬೋಧಂ ವಿನಾ ಕಸ್ಯ ಕುತೋಽನುಭೂತಿಃ ।

ಬೋಧಃ ಪ್ರಪೂರ್ಣಶ್ಚ ಸುಖೋ ನಿಸರ್ಗಾತ್ ತದ್ಯೋಗನಿದ್ರಾನುಭವೇ ಪ್ರಸಿದ್ಧಮ್ ।।೩೬।।

ವಸ್ತುಸ್ವರೂಪಂ ಪರಮಃ ಪ್ರಕಾಶೋ ಬೋಧಃ ಸ ಏವ ಪ್ರಮದಃ ಸ ಏವ ।

ಭಾವಃ ಸ ಏವಾನುಭವೈಕಗಮ್ಯಃ ಸ್ವರ್ಭೂಮಿಪಾಲಶ್ಚ ಸ ಏವ ನಮ್ಯಃ ।।೩೭।।

ಸೂಕ್ಷ್ಮೋ ವಿರಾಜನ್ನಖಿಲಸ್ಯ ರಾಜಾ ಶಬ್ದಾಯತೇ ಸೂಕ್ಷ್ಮಮಯಂ ಪ್ರಕಾಶಃ ।

ತಸ್ಮಿನ್ನಖಂಡೇ ಪರಮಾನುಭೂತಿಃ ಕಾಚಿತ್ ಪ್ರಪೂರ್ಣಾ ಲಸತಿ ಪ್ರಕಾಶೇ ।।೩೮।।

ಸತ್ತಾ ವಿಭಾ ನಾದಪರಾ ನ ಕಾಚಿತ್ ಚಿತ್ತಿಶ್ಚ ಶಬ್ದಾದಿತರಾ ನ ಕಾಪಿ ।

ಮೋದಶ್ಚ ನಾಖಂಡನಿಜಾನುಭೂತೇಃ ಅನ್ಯಾ ನ ಕಾಚಿದ್ಯದಿ ಚಿಂತಯಾಮಃ ।।೩೯।।

ಸ್ಥೂಲಾಃ ಪ್ರಕಾಶಶ್ಚ ರಸಶ್ಚ ಶಬ್ದಃ ಸ್ಥೂಲಪ್ರಪಂಚೇ ಪೃಥಗತ್ರ ಭಾಂತು ।

ವಸ್ತ್ವೇಕಮೇವ ತ್ರಿತಯಂ ತದೇತತ್ ಸೂಕ್ಷ್ಮತ್ವಕಾಲೇ ಯದಿ ಚಿಂತಯಾಮಃ ।।೪೦।।

ಶುದ್ಧಸ್ವರೂಪೇ ನ ರಸಾಂತರಾಣಾಂ ಜ್ಞಾನಾಂತರಾಣಾಂ ಚ ಭವೇತ್ಪ್ರವೇಶಃ ।

ವಿಶ್ವಾಂತರೇ ಸರ್ವರಸಾನುಭೂತಿಃ ಸರ್ವಜ್ಞತಾ ಚ ಪ್ರಗುಣೇ ವಿಭಾತಃ ।।೪೧।।

ಏಕೋ ರಸಃ ಸರ್ವರಸಾನುಭೂತೌ ಸರ್ವಜ್ಞತಾಯಾಮಭಿದಾ ಚ ವಿತ್ತಿಃ ।

ನಿತ್ಯಾತ್ಮನಿಷ್ಠೇಷ್ವಪಿ ಸಂಪ್ರದೃಷ್ಟೇ ತತ್ ಕಿಂ ದ್ವಯಂ ವಿಶ್ವಪತಾವಸಾಧ್ಯಮ್ ।।೪೨।।

ಭಾವೇನ ಸ ಪ್ರಾಣಿತಿ ನಾನಿಲೇನ ಬುದ್ಧ್ಯಾ ವಿಜಾನಾತ್ಯಖಿಲಾನಿ ನಾಕ್ಷೈಃ ।

ಸಮ್ಮೋದತೇ ಪೂರ್ಣತಯಾ ನ ಭೋಗೈಃ ಈಷ್ಟೇ ಸ್ವಶಕ್ತ್ಯಾ ನ ಚಮೂಬಲೇನ ।।೪೩।।

ತಸ್ಯ ಸ್ವರಾಜಃ ಸಹಜಂ ಚತುಷ್ಕಂ ಸತ್ತಾಮತಿರ್ವ್ಯಾಪಕತಾ ಚ ಶಕ್ತಿಃ ।

ಏಕಂ ಪರಸ್ತಾದವಿಭಕ್ತಮೇತತ್ ದೃಷ್ಟಿಪ್ರಭೇದಾದ್ಭುವನೇಽತ್ರ ಭಕ್ತಮ್ ।।೪೪।।

ಸತ್ತಾ ಚ ಸನ್ವಾಙ್ಮಯಮುದ್ಗತಂ ಚೇದ್ ವಿತ್ತಿಶ್ಚ ವೇತ್ತಾ ಯದಿ ಕಾಪ್ಯಹಂತಾ ।

ಮೋದಶ್ಚ ಮೋದೀ ಯದಿ ಭೋಗ್ಯಮನ್ಯತ್ ಶಕ್ತಿಶ್ಚ ಶಕ್ತೋ ಯದಿ ಕಾರ್ಯಜಾಲಮ್ ।।೪೫।।

ಭೋಕ್ತಾ ದಿವಃ ಪಕ್ತೃತಮಃ ಪೃಥಿವ್ಯಾ ಆಕಾಶದೇಶೇನ ಮಹಾಶರೀರೀ ।

ಶಕ್ತೇರಧೀಶಃ ಶಮನೋಽಸುರಾಣಾಂ ಗೃಹ್ಣಾತು ಮೇ ವಾಗುಪಹಾರಮಿಂದ್ರಃ ।।೪೬।।

ಸೂರ್ಯಸ್ಯ ಭಾಸಾ ಪ್ರತಪನ್ನಭಸ್ತೋ ಜ್ವಾಲಾಭಿರಗ್ರೇಃ ಪ್ರದಹನ್ ಪೃಥಿವ್ಯಾಮ್ ।

ವಿದ್ಯುತ್ಪ್ರತಾಪೇನ ಪಚಂತ್ಸಮಂತಾತ್ ಗೃಹ್ಣಾತು ಮೇ ವಾಗುಪಹಾರಮಿಂದ್ರಃ ।।೪೭।।

ರಾಜ್ಯಾಯ ತನ್ವನ್ಭುವನೇಷು ಶಾಸ್ತ್ರಂ ವಜ್ರಂ ದಧಾನೋ ಜ್ವಲದುಗ್ರಮಸ್ತ್ರಮ್ ।

ಸ್ವಾಭಾವಿಕಃ ಸರ್ವಜಗನ್ನೃಪಾಲೋ ಗೃಹ್ಣಾತು ಮೇ ವಾಗುಪಹಾರಮಿಂದ್ರಃ ।।೪೮।।

ಇಂದ್ರಸ್ಯ ದೃಷ್ಟಿಃ ಸರತಾದಿತೋ ನಃ ತಪ್ತಾನನಾಥಾನಭಿಲಕ್ಷ್ಯ ದೀನಾನ್ ।

ನೀಚೈಃ ಶಯಾತೇ ಪರಿಭೂಯಮಾನೌ ದೇಶಶ್ಚ ವಂಶಶ್ಚ ಸಮೇಷು ಯೇಷಾಮ್ ।।೪೯।।

ಏತಾಃ ಕವೀನಾಮಧಿಪಸ್ಯ ಪೂತಾಃ ತ್ರಾತಾರಮಾತ್ಮಾನಮಶೇಷಜಂತೋಃ ।

ನಾಥಂ ಸುರಾಣಾಂ ನಯನಂ ಮುನೀನಾಮ್ ಇಂದ್ರಂ ಭಜಂತಾಂ ಹರಿಮಿಂದ್ರವಜ್ರಾಃ ।।೫೦।।