॥ ಕಾವ್ಯಕಂಠ ವಾಸಿಷ್ಠ ಶ್ರೀಗಣಪತಿಮುನಿ ವಿರಚಿತಮ್ ಇಂದ್ರ ಶತಕಮ್ ॥

ಚತುರ್ಥಃ ಕರುಣಾಸ್ತಬಕಃ - ಜಾಗತಃ

ಪ್ರದುಷ್ಟಜನತಾ ಮದೋದ್ಧತಿಹೃತೇ ವಿನಮ್ರಜನತಾ ಗುಣೋನ್ನತಿಕೃತೇ ।

ಅಶೇಷಜಗತೋ ನೃಪಾಯ ವಶಿನೇ ಕೃಪಾಜಲಧಯೇ ನಮಃ ಕುಲಿಶಿನೇ ।।೭೬।।

ವ್ರತೈರ್ ನ ವಿವಿಧೈರ್ ನ ಪೂಜನಶತೈರ್ ನ ಯೋಗವಿಧಿಭಿರ್ ನ ಶುದ್ಧಚರಿತೈಃ ।

ನ ಶಕ್ರತಪಸಾ ನ ಯಜ್ಞವಿಧಿನಾ ನರಸ್ಯ ಮಹಿಮಾ ಕೃಪಾಂ ತವ ವಿನಾ ।।೭೭।।

ಋತಜ್ಞಕೃತಿಭಿಃ ಸದಾಪಿ ವಿನುತಾ ರಜೋವಿರಹಿತಪ್ರಜಾಸು ವಿತತಾ ।

ಸುಧಾಮಪಿ ಮಹಃ ಕಿರಂತ್ಯಜರ ತೇ ನ ತೇಷು ವಿನತಾ ಕೃಪಾ ವಿಜಯತೇ ।।೭೮।।

ನ ಕೋಽಪಿ ಮನಸೋ ಗುಣಃ ಸುಜನಪಾ ಮಹೇಂದ್ರಮನಸೋ ಝರೀ ತವ ಕೃಪಾ ।

ಭವಂತಮಯಿ ತದ್ವಿಭೋ ರುಚಿನಿಧಿ ಭಣಂತಿ ವಿಬುಧಾಃ ಕೃಪಾಜಲನಿಧಿಮ್ ।।೭೯।।

ಅನುಗ್ರಹಕೃತೇ ಸದಾಪ್ಯಭಿಮುಖೀ ವಿಭೋ ತವ ವಿಭಾ ಕೃಪಾನತಸಖೀ ।

ರಸಾರ್ದ್ರಶಿರಸಂ ಸುಪಕ್ವಮನಸಂ ಪುನಾತಿ ವಿಮದಂ ನರಂ ಭುವಿ ವಿದಮ್ ।।೮೦।।

ಅತೀವ ಸರಲಾ ಪ್ರಕಾಶಬಹುಲಾ ಧುತಾಖಿಲಮಲಾಕೃತಾಜರಕಲಾ ।

ಪದಾಹತಭಯಾ ತವಾಕ್ಷರದಯಾ ವಿನಮ್ರವದನೇ ಸರತ್ವಿಹ ಜನೇ ।।೮೧।।

ಗೃಣತ್ಸದವನಪ್ರಕಾರನಿಪುಣಾ ಮುನಿಸ್ತುತಗುಣಾ ಮಹಾವಿತರಣಾ ।

ವಿಚಿತ್ರಕರಣಾ ತವೇಂದ್ರಕರುಣಾ ಸ್ತವೇನ ಮುಖರೇ ಸರತ್ವಿಹ ನರೇ ।।೮೨।।

ಅರುದ್ಧಗಮನಾ ವಿಶಾಲನಯನಾ ವಿಶುದ್ಧಪತನಾ ವಿಚಿತ್ರಚಲನಾ ।

ತಪಸ್ವಿಜನಪಾ ತವೇಶ್ವರಕೃಪಾ ಹೃದಾ ವಿಕಸಿತೇ ಸರತ್ವಿಹ ನತೇ ।।೮೩।।

ತವ ಸ್ಮರಣತೋ ವಿಶುದ್ಧಮನಸಿ ಪ್ರಭೋ ಸುಮನಸಾಂ ವಿತೀರ್ಣಶಿರಸಿ ।

ಕೃಪಾರಸಝರೀ ವಿಪಾಪಸಖ ತೇ ಪತತ್ವಯಿ ಮಯಿ ಸ್ವಭಾವವಿನತೇ ।।೮೪।।

ಚಿರಾದವಿಜಯಂ ಸದಾಪಿ ಸಭಯಂ ವಿಕುಂಠಿತಶಯಂ ವಿಲೋಕ್ಯ ವಿಷಯಮ್ ।

ವಿಷಣ್ಣಮಿಹ ಮಾಂ ವೃಷನ್ನರುಣಯಾ ತ್ವಮಾವೃಣು ದಿವೋ ವಿಭೋ ಕರುಣಯಾ ।।೮೫।।

ಸತಾಂ ಮತಿಮತಾಂ ಯದಿಂದ್ರನಯನಂ ಯದುಗ್ರವಿಧಯಾ ದ್ವಿಷಾಂ ಪ್ರದಮನಮ್ ।

ಸದಾಪಿ ಹೃದಯೇ ಸ್ಥಿತಿರ್ಯದಚಲಾ ನರಸ್ಯ ಸಕಲಾ ಕ್ರಿಯಾ ಯದಮಲಾ ।।೮೬।।

ಅಕುಂಠಿತಗತಿರ್ಯದಚ್ಛಧಿಷಣಾ ಸಮಸ್ತವಿಷಯಾವಗಾಹನಗುಣಾ ।

ತದೇತದಖಿಲಂ ಮಹದ್ವಿಲಸಿತಂ ತವೈವ ಕರುಣಾಝರಸ್ಯ ಫಲಿತಮ್ ।।೮೭।।

ನ ಪಶ್ಯತಿ ತಪೋ ನ ಪಶ್ಯತಿ ಗುಣಂ ನ ಪಶ್ಯತಿ ಶುಭಕ್ರಿಯಾಂ ಚ ನಿಪುಣಮ್ ।

ನ ಪಶ್ಯತಿ ಕೃತಂ ಯಥಾವಿಧಿ ಮಖಂ ನ ಪಶ್ಯತಿ ರಮಾವಿಲಾಸಿ ಚ ಮುಖಮ್ ।।೮೮।।

ನ ಪಶ್ಯತಿ ಗಿರಾಂ ವಿಲಾಸಮತುಲಂ ನ ಪಶ್ಯತಿ ಮಹತ್ಕುಲಂ ಚ ವಿಮಲಮ್ ।

ಕವಾಟರಹಿತೇ ಗೃಹೇ ಪ್ರವಹತಿ ಶ್ರಿಯಾಮಧಿಪತೇ ಕೃಪೇಂದ್ರ ಮಹತಿ ।।೮೯।।

ಅಹಂಕೃತಿಮಹಾಕವಾಟರಹಿತಂ ಮನೋ ಮಮ ಗೃಹಂ ಮಹೇಂದ್ರವಿಹಿತಮ್ ।

ಅನಂತವಿಭವಾ ನಿರಂತರಜಯಾ ನ ವಾ ಪ್ರವಹತಾಜ್ಜವಾತ್ತವ ದಯಾ ।।೯೦।।

ಅಹಂಕೃತಿವಿಕೃತ್ಯಯೋ ವಿರಚಿತಂ ತಮಸ್ತತಮಹಾಗುಹಾಸ್ಥಲಗತಮ್ ।

ಕವಾಟಕಮಿದಂ ಹೃದೋ ವಿಘಟಿತಂ ತವಾಸ್ತ್ವವಿಹತಂ ಕೃಪಾಝರಗತಮ್ ।।೯೧।।

ಅಸಾವಪಿ ಮನಸ್ಯಪಾರಯಶಸಾ ತನೌ ಚ ಪರಿತಸ್ತತೇನ ಮಹಸಾ ।

ಇಮಂ ಸುರಪತೇರ್ವಿಶೋಧ್ಯ ನಿಪುಣಾ ನರಂ ಭುವಿಸುರಂ ಕರೋತು ಕರುಣಾ ।।೯೨।।

ಸ್ಮರತ್ಸು ವಿಕಸತ್ಸ್ವಮೋಘಚಲಿತಂ ವಿಲಕ್ಷಣತಮಪ್ರಭಾವಕಲಿತಮ್ ।

ಇತೋಽಸ್ತು ಸುರರಾಟ್ಕೃಪಾವಿಲಸಿತಂ ಮನೋಽಭಿಲಷಿತಂ ಮಮಾಸ್ತು ಫಲಿತಮ್ ।।೯೩।।

ಅತೀವ ದೃಢತಾಂ ವಿತೀರ್ಯ ಮನಸೇ ಪ್ರಕಾಶಬಹುಲಂ ಬಲಂ ಚ ವಚಸೇ ।

ಧ್ರುವಸ್ಮೃತಿಮಿಮಾಂ ವಿಧಾಯ ಚ ಧಿಯಂ ಪ್ರಭೋ ದಿಶತು ತೇ ದಯಾ ಮಮ ಜಯಮ್ ।।೯೪।।

ಧ್ರುವಸ್ಮೃತಿಧರೇ ಮಯಿ ಸ್ತುತಿಕರೇ ಪದಾಬ್ಜಸುಹೃದಿ ಪ್ರಕಾಶಿತಹೃದಿ ।

ಜಗತ್ ತ್ರಯಧರಃ ಶಚೀಸಹಚರಃ ಪ್ರಪೂರ್ಣಭರಣಾಂ ಕರೋತು ಕರುಣಾಮ್ ।।೯೫।।

ಮಮಾಭಿಲಷಿತಂ ಪ್ರಸಿಧ್ಯತು ನ ವಾ ಮನಃ ಶಮಮಿತಂ ಪ್ರತೃಪ್ಯತು ನ ವಾ ।

ಜಹಾಮಿ ನ ಬಹು ಪ್ರಕೃಷ್ಟಕರಣಂ ದಯಾಜಲನಿಧೇಸ್ತವೇಂದ್ರ ಚರಣಮ್ ।।೯೬।।

ಪ್ರಸಿದ್ಧಯತಿ ನ ಚೇತ್ತದಿಂದ್ರ ವಿಗುಣಂ ಪ್ರತೃಪ್ಯತಿ ನ ಚೇತ್ತದಕ್ಷಮಗುಣಮ್ ।

ನಮತ್ಸು ನ ದಯಾ ನತೇ ಧುತಭಯಾ ಕ್ರಿಯೇತ ಹಸನಂ ಕದಾಪಿ ನ ಮಯಾ ।।೯೭।।

ಸ್ವಕೀಯಹೃದಯಂ ಸಮರ್ಪಯತಿ ತೇ ನತಃ ಕವಿರಯಂ ಸುಪರ್ವನೃಪತೇ ।

ಮಹಸ್ತವ ವಿಶತ್ವಿದಂ ಚ ಭವನಂ ಚರತ್ಯನುದಿನಂ ಯದಿಂದ್ರ ಭುವನಮ್ ।।೯೮।।

ಮನುಂ ತವ ದಿವೋ ಮಹೀಶ ಜಪತಾಂ ಸ್ತವಂ ತವ ಸತಾಂ ಸಹಾಯ ಪಠತಾಮ್ ।

ಕೃಪೇಂದ್ರ ತವ ನಃ ಪ್ರಮಾದರಹಿತಾಂ ಸ್ವದೇಶಮವಿತುಂ ದದಾತು ಪಟುತಾಮ್ ।।೯೯।।

ಕೃಪಾಝರಗತಿಪ್ರಭಾವಮತುಲಂ ವದನ್ನುಪಹರನ್ ಹೃದೇವ ಕಮಲಮ್ ।

ಜಲೋದ್ಧತಗತಿಸ್ತವಸ್ತ್ರಿಜಗತಃ ಪ್ರಶಾಸಿತುರಸೌ ಭವತ್ವಭಿಮತಃ ।।೧೦೦।।

।। ಇತಿ ಶ್ರೀಭಗವನ್ಮಹರ್ಷಿರಮಣಾಂತೇವಾಸಿನೋ ವಾಸಿಷ್ಠಸ್ಯ

ನರಸಿಂಹಸೂನೋರ್ಗಣಪತೇಃ ಕೃತಿಃ ಇಂದ್ರ ಶತಕಮ್ ಸಮಾಪ್ತಮ್ ।।