॥ ಚತುರ್ಥಸ್ತಾಮರಸ ಸ್ತಬಕಃ ॥

ದಿಶತು ಶಿವಂ ಮಮ ಚಂದ್ರವಲಕ್ಷಸ್ತಿಮಿರಸಮೂಹನಿವಾರಣದಕ್ಷಃ ।

ಕೃತಗತಿರೋಧಕಪಾತಕನಾಶಃ ಸುರಧರಣೀಶವಧೂಸ್ಮಿತಲೇಶಃ ।।೬೭೬।।

ಅವಿದಿತಮಾರ್ಗತಯಾತಿವಿಷಣ್ಣಾಂ ಗತಿಮಪಹಾಯ ಚಿರಾಯ ನಿಷಣ್ಣಾಮ್ ।

ಭರತಧರಾಮನಿಮೇಷಧರತ್ರೀಪತಿಗೃಹಿಣೀ ಪರಿಪಾತು ಸವಿತ್ರೀ ।।೬೭೭।।

ಭುವನಮಿದಂ ಭವತಃ ಕಿಲ ಪೂರ್ವಂ ಯದಮಲರೂಪಮನಾಕೃತಿಸರ್ವಮ್ ।

ಪ್ರಕೃತಿರಿಯಂ ಕುರುತಾದದರಿದ್ರಾಮತಿಮತಿಶಾತತರಾಂ ಮಮ ಭದ್ರಾ ।।೬೭೮।।

ಸೃಜತಿ ಜಗಂತಿ ವಿಭೌ ಪರಮೇ ಯಾ ಸುಬಹುಲಶಕ್ತಿರರಾಜತ ಮಾಯಾ ।

ಪ್ರದಿಶತು ಸಾ ಮಮ ಕಂಚನ ಯೋಗಂ ಝಟಿತಿ ನಿರಾಕೃತಮಾನಸರೋಗಮ್ ।।೬೭೯।।

ಪ್ರತಿವಿಷಯಂ ವಿಕೃತೀತರಸತ್ತಾ ವಿಲಸತಿ ಯಾ ಮತಿಮದ್ಭಿರುಪಾತ್ತಾ ।

ಇಯಮನಘಾ ಪರಿಪಾಲಿತಜಾತಿಂ ವಿತರತು ಮೇ ವಿವಿಧಾಂ ಚ ವಿಭೂತಿಮ್ ।।೬೮೦।।

ಪ್ರತಿವಿಷಯಗ್ರಹಣಂ ಪರಿಪೂತಾಮತಿರಖಿಲಸ್ಯ ಜನಸ್ಯ ಚ ಮಾತಾ ।

ಮಮ ವಿದಧಾತು ಶುಭಂ ಶುಭನಾಮಾ ತ್ರಿದಿವನಿವಾಸಿನರೇಶ್ವರರಾಮಾ ।।೬೮೧।।

ಗಗನತನುರ್ದಗತೋ ವಿಪುಲಸ್ಯ ಪ್ರಭುಪದಮಗ್ರ್ಯಮಿತಾ ಸಕಲಸ್ಯ ।

ಪ್ರತಿಜನದೇಹಮಜಾ ಪ್ರವಹಂತೀ ಮಮ ಹೃದಿ ನಂದತು ಸಾ ವಿಹರಂತೀ ।।೬೮೨।।

ಪಟುಕುಲಕುಂಡಧನಂಜಯಕೀಲಾ ಸಮುದಿತಹಾರ್ದವಿಭಾಕರಲೀಲಾ ।

ದ್ರುತಶಿರ ಇಂದುಕಲಾಮೃತಧಾರಾ ಜನಮವತಾನ್ನಿಜಭಕ್ತಮುದಾರಾ ।।೬೮೩।।

ವಿಷಯಸಮಾಕೃತಿರತ್ರ ಪುರಸ್ತಾದ್ವಿಮಲತಮಾ ಕಿಲ ತತ್ರ ಪರಸ್ತಾತ್ ।

ಭುವನಮಯೀ ಭುವನಾಚ್ಚ ವಿಭಕ್ತಾ ಮತಿರನಘಾಽವತು ಮಾಮತಿಶಕ್ತಾ ।।೬೮೪।।

ವಿಷಯಪರಿಗ್ರಹಣೇಷ್ವತಿಸಕ್ತಾ ವಿಷಯವಿಭೂತಿಷು ಕಾಽಪಿ ವಿವಿಕ್ತಾ ।

ಅಖಿಲಪತೇರ್ಮಯಿ ದೀವ್ಯತು ಶಕ್ತಿರ್ವಿಮಲತಮಾ ವಿಧುತೇತರಶಕ್ತಿಃ ।।೬೮೫।।

ದೃಶಿದೃಶಿ ಭಾತಿ ಯದೀಯಮಪಾಪಂ ದಿಶಿ ದಿಶಿ ಗಂತೃ ಚ ವೇತ್ತೃ ಚ ರೂಪಮ್ ।

ಭವತು ಶಿವಾಯ ಮಮೇಯಮನಿಂದ್ಯಾ ಭುವನಪತೇರ್ಗೃಹಿಣೀ ಮುನಿವಂದ್ಯಾ ।।೬೮೬।।

ಜಡಕುಲಕುಂಡದರೀಷು ಶಯಾನಾ ಬುಧಕುಲವಹ್ನಿಷು ಭೂರಿವಿಭಾನಾ ।

ಹರಿಹಯಶಕ್ತಿರಮೇಯಚರಿತ್ರಾ ಮಮ ಕುಶಲಂ ವಿದಧಾತು ಪವಿತ್ರಾ ।।೬೮೭।।

ದಹರಗತಾಖಿಲಮಾಕಲಯಂತೀ ದ್ವಿದಲಗತಾ ಸಕಲಂ ವಿನಯಂತೀ ।

ದಶಶತಪತ್ರಗತಾ ಮದಯಂತೀ ಭವತು ಮಯೀಂದ್ರವಧೂರ್ವಿಲಸಂತೀ ।।೬೮೮।।

ಗೃಹಯುಗಲೀಶ್ರಿಯ ಆಶ್ರಿತಗಮ್ಯಾ ಪದಕಮಲದ್ವಿತಯೀ ಬಹುರಮ್ಯಾ ।

ಮಮ ಹೃದಿ ಭಾತ್ವವಿಕುಂಠಿತಯಾನಾ ಹರಿಸುದೃಶಸ್ತರುಣಾರುಣಭಾನಾ ।।೬೮೯।।

ಉಪರಿ ತತಾಕುಲಕುಂಡನಿಶಾಂತಾಜ್ಜ್ವಲಿತಧನಂಜಯದೀಧಿತಿಕಾಂತಾತ್ ।

ಹರಿಹಯಶಕ್ತಿರಿಯಂ ಮಮ ಪುಷ್ಟಾ ದ್ರವಯತು ಮಸ್ತಕಚಂದ್ರಮದುಷ್ಟಾ ।।೬೯೦।।

ನಭಸಿ ವಿರಾಜತಿ ಯಾ ಪರಶಕ್ತಿರ್ಮಮ ಹೃದಿ ರಾಜತಿ ಯಾ ವರಶಕ್ತಿಃ ।

ಉಭಯಮಿದಂ ಮಿಲಿತಂ ಬಹುವೀರ್ಯಂ ಭವತು ಸುಖಂ ಮಮ ಸಾಧಿತಕಾರ್ಯಮ್ ।।೬೯೧।।

ತ್ರಿಭುವನಭೂಮಿಪತೇಃ ಪ್ರಿಯಯೋಷಾ ತ್ರಿಮಲಹರೀ ಸುರವಿಷ್ಟಪಭೂಷಾ ।

ಮಮ ವಿತನೋತು ಮನೋರಥಪೋಷಂ ದುರಿತವಿಪತ್ತಿತತೇರಪಿ ಶೋಷಮ್ ।।೬೯೨।।

ಪವನಜಗತ್ಪ್ರಭುಪಾವನಮೂರ್ತಿರ್ಜಲಧರಚಾಲನವಿಶ್ರುತಕೀರ್ತಿಃ ।

ಮಮ ಕುಶಲಾಯ ಭವತ್ವರಿಭೀಮಾ ಜನನವತಾಂ ಜನನೀ ಬಹುಧಾಮಾ ।।೬೯೩।।

ಮಮ ಸುರರಾಜವಧೂಕಲಯೋಗ್ರಾ ಖಲಜನಧೂನನಶಕ್ತನಖಾಗ್ರಾ ।

ದಮಯತು ಕೃತ್ತಶಿರಾಃ ಕಲುಷಾಣಿ ಪ್ರಕಟಬಲಾ ಹೃದಯಸ್ಯ ವಿಷಾಣಿ ।।೬೯೪।।

ಕುಲಿಶಿವಧೂಕಲಯಾ ಪರಿಪುಷ್ಟಾ ಬುಧನುತಸದ್ಗುಣಜಾಲವಿಶಿಷ್ಟಾ ।

ಮಮ ಪರಿತೋ ವಿಲಸದ್ವಿಭವಾನಿ ದ್ರುಪದಸುತಾ ವಿದಧಾತು ಶಿವಾನಿ ।।೬೯೫।।

ಸುರಜನರಾಡ್ದಯಿತಾಂಶವಿದೀಪ್ತೇ ಪದಕಮಲಾಶ್ರಿತಸಾಧುಜನಾಪ್ತೇ ।

ದುರಿತವಶಾದಭಿತೋ ಗತಭಾಸಂ ಮನುಜಕುಮಾರಜನನ್ಯವ ದಾಸಮ್ ।।೬೯೬।।

ಅಮರನರೇಶ್ವರಮಂದಿರನೇತ್ರೀ ಸುಮಶರಜೀವನಸುಂದರಗಾತ್ರೀ ।

ಭವತು ಶಚೀ ವಿತತಸ್ವಯಶಸ್ಸು ಪ್ರತಿಫಲಿತಾ ಗಣನಾಥವಚಸ್ಸು ।।೬೯೭।।

ವಿಕಸತು ಮೇ ಹೃದಯಂ ಜಲಜಾತಂ ವಿಲಸತು ತತ್ರ ಶಚೀಸ್ತುತಿಗೀತಮ್ ।

ಸ್ಫುರತು ಸಮಸ್ತಮಿಹೇಪ್ಸಿತವಸ್ತು ಪ್ರಥಿತತಮಂ ಮಮ ಪಾಟವಮಸ್ತು ।।೬೯೮।।

ಕುರು ಕರುಣಾರಸಸಿಕ್ತನಿರೀಕ್ಷೇ ವಚನಪಥಾತಿಗಸದ್ಗುಣಲಕ್ಷೇ ।

ಶಚಿ ನರಸಿಂಹಜಮಾಹಿತಗೀತಂ ಭರತಧರಾಮವಿತುಂ ಪಟುಮೇತಮ್ ।।೬೯೯।।

ಸುಲಲಿತತಾಮರಸೈಃ ಪ್ರಸಮಾಪ್ತಂ ವರನುತಿಬಂಧಮಿಮಂ ಶ್ರವಣಾಪ್ತಮ್ ।

ಜನನಿ ನಿಶಮ್ಯ ಸುಸಿದ್ಧಮಶೇಷಂ ಹರಿಲಲನೇ ಮಮ ಕುರ್ವಭಿಲಾಷಮ್ ।।೭೦೦।।

॥ ಇತಿ ಶ್ರೀಭಗವನ್ಮಹರ್ಷಿರಮಣಾಂತೇವಾಸಿನೋ ವಾಸಿಷ್ಠಸ್ಯ

ನರಸಿಂಹಸೂನೋಃ ಗಣಪತೇಃ ಕೃತೌ ಇಂದ್ರಾಣೀಸಪ್ತಶತೀ ಸಮಾಪ್ತಾ ॥

॥ ಇಂದ್ರೋ ವಿಶ್ವಸ್ಯ ರಾಜತಿ ॥