॥ ದ್ವಿತೀಯೋ ರಥೋದ್ಧತಾ ಸ್ತಬಕಃ ॥

ಕ್ಷಾಲನಾಯ ಹರಿತಾಂ ವಿಭೂತಯೇ ವಿಷ್ಟಪಸ್ಯ ಮದನಾಯ ವಜ್ರಿಣಃ ।

ತಜ್ಜಯಂತಜನನೀಮುಖಾಬ್ಜತೋ ನಿರ್ಗತಂ ಸ್ಮಿತಮಘಂ ಧುನೋತು ನಃ ।।೫೨೬।।

ಅನ್ನಲೋಪಕೃಶಭೀರುಕಪ್ರಜಾಂ ಭಿನ್ನಭಾವಬಲಹೀನನೇತೃಕಾಮ್ ।

ವಾಸವಸ್ಯ ವರವರ್ಣಿನೀ ಪರೈರರ್ದಿತಾಮವತು ಭಾರತಾವನಿಮ್ ।।೫೨೭।।

ಪಾಣಿಪಾದಮನಿಮೇಷರಾಜ್ಞಿ ತೇ ಪಾರಿಜಾತನವಪಲ್ಲವೋಪಮಮ್ ।

ಅಕ್ಷಪಾವಿರಹಮಂಗಭಾಸರಿದ್ವಾಸಿಚಕ್ರಮಿಥುನಂ ಕುಚದ್ವಯಮ್ ।।೫೨೮।।

ಪೂರ್ಣಚಂದ್ರಯಶಸೋಽಪಹಾರಕಂ ಸಂಪ್ರಸಾದಸುಷಮಾಸ್ಪದಂ ಮುಖಮ್ ।

ಜ್ಞಾನಶಕ್ತಿರುಚಿಶೇವಧೀದೃಶೌ ರಕ್ತವರ್ಣಕಸುಧಾಘನೋಽಧರಃ ।।೫೨೯।।

ಮರ್ದಯತ್ತಿಮಿರಮುದ್ಧತಂ ದಿಶಾಮಲ್ಪಮಪ್ಯಧಿಕವೈಭವಂ ಸ್ಮಿತಮ್ ।

ಪ್ರಾವೃಡಂತಯಮುನಾತರಂಗವನ್ನೀಲಚಾರುರತಿಪಾವನಃ ಕಚಃ ।।೫೩೦।।

ವಲ್ಲಕೀಂ ಚ ಪರುಷಧ್ವನಿಂ ವದನ್ ದುಃಖಿತಸ್ಯ ಚ ಮುದಾವಹಃ ಸ್ವರಃ ।

ಚಾರು ಹಾವಶಬಲಾಽಲಸಾ ಗತಿಃ ಕಾಯಧಾಮವಚಸಾಂ ನ ಪದ್ಧತೌ ।।೫೩೧।।

ಯೋಗಸಿದ್ಧಿಮತುಲಾಂ ಗತಾ ಮತಿಶ್ಚಾತುರೀ ಚ ಬುಧಮಂಡಲಸ್ತುತಾ ।

ವಿಷ್ಟಪತ್ರಿತಯರಾಜ್ಯತೋಽಪ್ಯಸಿ ತ್ವಂ ಸುಖಾಯ ಮಹತೇ ಬಿಡೌಜಸಃ ।।೫೩೨।।

ತ್ವಾಮುದೀಕ್ಷ್ಯ ಧೃತದೇವತಾತನುಂ ದೀಪ್ತಪಕ್ಷ್ಮಲವಿಶಾಲಲೋಚನಾಮ್ ।

ಆದಿತೋ ಜನನಿ ಜನ್ಮಿನಾಮಭೂದ್ವಾಸವಸ್ಯ ರತಿರಾದಿಮೇ ರಸೇ ।।೫೩೩।।

ಆದಿಮಂ ರಸಮನಾದಿವಾಸನಾ ವಾಸಿತೌ ಪ್ರಥಮಮನ್ವಗೃಹ್ಣತಾಮ್ ।

ಸಮ್ಮದಸ್ಯ ನಿಧಿಮಾದಿದಂಪತೀ ಸೋಽಚಲತ್ತ್ರಿಭುವನೇ ತತಃ ಕ್ರಮಃ ।।೫೩೪।।

ಜ್ಯಾಯಸಾ ದಿವಿಷದಾಂ ಪುರಾತನೀ ನೀಲಕಂಜನಯನಾ ವಿಲಾಸಿನೀ ।

ಯದ್ವಿಹಾರಮತನೋತ್ಪ್ರರೋಚನಂ ತತ್ಸತಾಮಭವದಾದಿಮೇ ರಸೇ ।।೫೩೫।।

ನ ತ್ವದಂಬ ನಲಿನಾನನಾಽಧಿಕಾ ನಾಪಿ ನಾಕಪತಿತೋಽಧಿಕಃ ಪುಮಾನ್ ।

ನಾಧಿಕಂ ಚ ವನಮಸ್ತಿ ನಂದನಾನ್ನಾದಿಮಾದಪಿ ರಸೋಽಧಿಕೋ ರಸಾತ್ ।।೫೩೬।।

ನಾಯಿಕಾ ತ್ವಮಸಮಾನಚಾರುತಾ ನಾಯಕಃ ಸ ಮರುತಾಂ ಮಹೀಪತಿಃ ।

ನಂದನಂ ಚ ರಸರಂಗಭೂಃ ಕಥಂ ಮನ್ಮಥಸ್ಯ ನ ಭವೇದಿಹೋತ್ಸವಃ ।।೫೩೭।।

ದೇವಿ ವಾಂ ಮೃತಿಕಥೈವ ದೂರತೋ ಜಾತುಚಿದ್ಗಲತಿ ನೈವ ಯೌವನಮ್ ।

ಕಾಂಕ್ಷಿತಃ ಪರಿಕರೋ ನ ದುರ್ಲಭಃ ಕಿಂ ರಸಃ ಪರಿಣಮೇದಿಹಾನ್ಯಥಾ ।।೫೩೮।।

ವಿಷ್ಟಪಸ್ಯ ಯುವರಾಜಕೇಶವೇ ತ್ರಾಣಭಾರಮಖಿಲಂ ನಿಧಾಯ ವಾಮ್ ।

ಕ್ರೀಡತೋರಮರರಾಜ್ಞಿ ನಂದನೇ ಕ್ರೀಡಿತಾನಿ ಮಮ ಸಂತು ಭೂತಯೇ ।।೫೩೯।।

ಯದ್ಯುವಾಮಮರರಾಜ್ಞಿ ನಂದನೇ ಕುರ್ವತೋ ರಹಸಿ ದೇವಿ ಮಂತ್ರಣಮ್ ।

ತತ್ರ ಚೇನ್ಮಮ ಕೃತಿರ್ಮನಾಗಿಯಂ ಸ್ಪರ್ಶಮೇತಿ ಭುವಿ ಕೋ ನು ಮತ್ಕೃತೀ ।।೫೪೦।।

ಕ್ರಂದನಂ ಯದಿ ಮಮೇಹ ವಂದಿನೋ ನಂದನೇ ವಿಹರತೋಃ ಸವಿತ್ರಿ ವಾಮ್ ।

ಅಂತರಾಯಕೃದಥಾಬ್ಜಕಾಂತಿ ತೇ ಸಂಪ್ರಗೃಹ್ಯ ಚರಣಂ ಕ್ಷಮಾಪಯೇ ।।೫೪೧।।

ಯೋಷಿತಾಮಪಿ ವಿಮೋಹನಾಕೃತಿರ್ಮೋಹನಂ ತು ಪುರುಷಸಂಹತೇರಪಿ ।

ಇಂದ್ರಮಂಬರಮಯಾಂ ಬಭೂವಿಥ ತ್ವಂ ರಸಾರ್ದ್ರಹೃದಯಾ ಲಸದ್ರಸಮ್ ।।೫೪೨।।

ದಿವ್ಯಚಂದನರಸಾನುಲೇಪನೈಃ ಪಾರಿಜಾತಸುಮತಲ್ಪಕಲ್ಪನೈಃ ।

ಚಾರುಗೀತಕೃತಿಭಿಶ್ಚ ಭೇಜಿರೇ ನಾಕಲೋಕವನದೇವತಾಶ್ಚ ವಾಮ್ ।।೫೪೩।।

ಸ್ವರ್ಣದೀಸಲಿಲಶೀಕರೋಕ್ಷಿತಾಃ ಪಾರಿಜಾತಸುಮಗಂಧಧಾರಿಣಃ ।

ನಂದನೇ ತ್ರಿದಶಲೋಕರಾಜ್ಞಿ ವಾಂ ಕೇಽಪಿ ಭೇಜುರಲಸಾಃ ಸಮೀರಣಾಃ ।।೫೪೪।।

ಆದಧಾಸಿ ಸಕಲಾಂಗನಾಧಿಕೇ ಪದ್ಮಗಂಧಿನಿ ಸುಧಾಧರಾಧರೇ ।

ಮಂಜುವಾಣಿ ಸುಕುಮಾರಿ ಸುಂದರಿ ತ್ವಂ ಸುರೇಂದ್ರಸಕಲೇಂದ್ರಿಯಾರ್ಚನಮ್ ।।೫೪೫।।

ಆದಿದೇವಿ ವದನಂ ತವಾಭವತ್ಕಾಂತಿಧಾಮ ಮದನಂ ದಿವಸ್ಪತೇಃ ।

ಆನನಾದಪಿ ರಸಾಮೃತಂ ಕಿರನ್ನಿಷ್ಕ್ರಮಂ ವಿಲಸಿತಂ ಕಲಂ ಗಿರಾಮ್ ।।೫೪೬।।

ಚಾರುವಾಗ್ವಿಲಸಿತಾಚ್ಚ ನಿಸ್ತುಲಪ್ರೇಮವೀಚಿರುಚಿರಂ ವಿಲೋಕಿತಮ್ ।

ವೀಕ್ಷಿತಾದಪಿ ವಿಲಾಸವಿಶ್ರಮಸ್ಥಾನಮಲ್ಪಮಲಸಂ ಶುಚಿಸ್ಮಿತಮ್ ।।೫೪೭।।

ಭಾಸುರೇಂದ್ರದೃಢಬಾಹುಪಂಜರೀ ಲಜ್ಜಯಾ ಸಹಜಯಾ ನಮನ್‌ಮುಖೀ ।

ತದ್ವಿಲೋಚನವಿಕರ್ಷಕಾಲಕಾ ಪಾತು ಮಾಂ ತ್ರಿದಿವಲೋಕನಾಯಿಕಾ ।।೫೪೮।।

ಭಾರತಕ್ಷಿತಿವಿಷಾದವಾರಣೇ ತತ್ಸುತಂ ಗಣಪತಿಂ ಕೃತೋದ್ಯಮಮ್ ।

ಆದಧಾತು ಪಟುಮರ್ಜುನಸ್ಮಿತಾ ದುರ್ಜನಪ್ರಮಥನಕ್ಷಮಾ ಶಚೀ ।।೫೪೯।।

ಚಾರುಶಬ್ದಕಲಿತಾಃ ಕೃತೀರಿಮಾಃ ಸತ್ಕವಿಕ್ಷಿತಿಭುಜೋ ರಥೋದ್ಧತಾಃ ।

ಸಾ ಶೃಣೋತು ಸುರಮೇದಿನೀಪತೇರ್ನೇತ್ರಚಿತ್ತಮದನೀ ವಿಲಾಸಿನೀ ।।೫೫೦।।

॥ ಇತಿ ದ್ವಿತೀಯಃ ಸ್ತಬಕಃ ॥