॥ ಚತುರ್ಥಃ ಸುಮುಖೀ ಸ್ತಬಕಃ ॥

ಅಜಿತಮಿನಾಗ್ನಿತಟಿಚ್ಛಶಿಭಿರ್ಮಮ ಹೃದಯಸ್ಯ ತಮಃ ಪ್ರಬಲಮ್ ।

ಅಮರಪತಿಪ್ರಮದಾಹಸಿತಂ ವಿಮಲಘೃಣಿಪ್ರಕರೈರ್ಹರತು ।।೫೭೬।।

ಸುರನೃಪತೇರ್ದಯಿತಾ ವಿನತಾಹಿತಶಮನೀ ಲುಲಿತಾಮಿತರೈಃ ।

ವರಕರುಣಾವರುಣಾಲಯದೃಙ್ಮಮ ಜನನೀಮವತಾದವನಿಮ್ ।।೫೭೭।।

ಪಟುತಪಸೋ ಜಮದಗ್ನಿಮುನೇರಿಹ ಸಹಧರ್ಮಚರೀಂ ಭುವನೇ ।

ತನಯನಿಕೃತ್ತಶಿರಃ ಕಮಲಾಂ ವರಮತಿಮಾವಿಶದಿಂದ್ರವಧೂಃ ।।೫೭೮।।

ಯದುಕುಲಕೀರ್ತಿವಿಲೋಪಭಿಯಾ ಬತವಿನಿಗೂಹ್ಯ ಋತಂ ಕವಯಃ ।

ಮುನಿಗೃಹಿಣೀ ವಧಹೇತುಕಥಾಮಿತರಪಥೇನ ಭಣಂತಿ ಮೃಷಾ ।।೫೭೯।।

ನ ಸುರಭಿರರ್ಜುನಭೂಮಿಪತಿರ್ಭೃಗುತಿಲಕಸ್ಯ ಜಹಾರ ಸ ಯಾಮ್ ।

ಇಯಮಮೃತಾಂಶುಮನೋಜ್ಞಮುಖೀ ಪರಶುಧರಸ್ಯ ಜನನ್ಯನಘಾ ।।೫೮೦।।

ಅತಿರಥಮರ್ಜುನಭೂಮಿಪತಿಂ ಸಹಪೃತನಂ ಜಮದಗ್ನಿಸುತಃ ।

ಯುಧಿ ಸ ವಿಜಿತ್ಯ ವಿಶಾಲಯಶಾಃ ಪುನರಪಿ ಮಾತರಮಾಹೃತವಾನ್ ।।೫೮೧।।

ಪರಗೃಹವಾಸಕಲಂಕವಶಾನ್ನಿಜಗೃಹಿಣೀಂ ಜಮದಗ್ನಿಮುನಿಃ ।

ಬತವಿನಿಹಂತುಮನಾ ಕಲಯಂಸ್ತನುಭವಮಾದಿಶದುಗ್ರಮನಾಃ ।।೫೮೨।।

ಪಿತೃವಚನಾದತಿಭಕ್ತಿಮತಾಪ್ಯಸುರವದಾತ್ಮಸುತೇನ ಹತಾಮ್ ।

ಮುನಿಗೃಹಿಣೀಮನಘೇತಿವದಂಸ್ತವ ವರದೇಽವಿಶದಂಶ ಇಮಾಮ್ ।।೫೮೩।।

ಇದಮವಿಕಂಪ್ಯಮತಿಪ್ರಬಲಂ ಪ್ರಭವತಿ ಕಾರಣಮಾರ್ಯನುತೇ ।

ಮುನಿಗೃಹಿಣೀಮನಘಾಂ ಭಣಿತುಂ ಶಚಿ ಕಲಯಾ ಯದಿ ಮಾಮವಿಶಃ ।।೫೮೪।।

ಖಲಜನಕಲ್ಪಿತದುಷ್ಟಕಥಾಶ್ರವಣವಸಾದ್ವ್ಯಥಿತಂ ಹೃದಯಮ್ ।

ಅಥ ಚರಿತೇಽವಗತೇ ವಿಮಲಸ್ಮೃತಿವಶತೋ ಮಮ ಯಾತಿ ಮುದಮ್ ।।೫೮೫।।

ತವ ಮಹಸಾ ವಿಶತಾ ಕೃಪಯಾ ಮಮ ಶಚಿ ಸೂಕ್ಷ್ಮಶರೀರಮಿದಮ್ ।

ನೃಪರಿಪುಮಾತೃಪವಿತ್ರಕಥಾ ಸ್ಮರಣಪಥಂ ಗಮಿತಾ ಸಪದಿ ।।೫೮೬।।

ವಿದಧತುರಾಸುರಕೃತ್ಯಮುಭೌ ಬಹುಲಗುಣಾಮಪಿ ಯದ್ಗೃಹಿಣೀಮ್ ।

ಸ ಮುನಿರಘಾತಯದಚ್ಛಕಥಾಂ ದಶರಥಜಶ್ಚ ಮುಮೋಚ ವನೇ ।।೫೮೭।।

ಅಪಿ ವಿನಿಕೃತ್ತಶಿರಾಃ ಶಚಿ ತೇ ವರಮಹಸಾ ವಿಶತಾ ಸಪದಿ ।

ಅಲಭತ ಜೀವಿತಮಂಬ ಪುನರ್ಭುವನಶುಭಾಯ ಮುನೇಸ್ತರುಣೀ ।।೫೮೮।।

ಯದಿ ಶಿರಸಾ ರಹಿತೇ ವಪುಷಿ ಪ್ರಕಟತಯಾ ವಿಲಸಂತ್ಯಸವಃ ।

ಯದಿ ಹೃದಯಂ ಸಹಭಾತಿ ಧಿಯಾ ಕಿಮಿವ ವಿಚಿತ್ರಮಿತಶ್ಚರಿತಮ್ ।।೫೮೯।।

ಪರಶುಧರಸ್ಯ ಸವಿತ್ರಿ ಕಲಾ ತ್ವಯಿ ಪುರುಹೂತಸರೋಜದೃಶಃ ।

ಸ ಶಿರಸಿ ಕಾಚಿದಭೂದ್ರುಚಿರಾ ವಿಶಿರಸಿ ಭೀಮತಮಾ ಭವತಿ ।।೫೯೦।।

ಪರಶುಧರೋಽರ್ಜುನಭೂಮಿಪತಿಂ ಯದಜಯದಂಬ ತಪೋಽತ್ರ ತವ ।

ಅಭಜತ ಕಾರಣತಾಮನಘೇ ವರಮುನಿಗೇಯಪವಿತ್ರಕಥೇ ।।೫೯೧।।

ಭಗವತಿ ಕೃತ್ತಶಿರೋ ಭವತೀ ಮಥಿತವತೀ ನೃಪತೀನಶುಭಾನ್ ।

ಪ್ರಥನಭುವಿ ಪ್ರಗುಣಂ ಭುಜಯೋಃ ಪರಶುಧರಾಯ ವಿತೀರ್ಯ ಬಲಮ್ ।।೫೯೨।।

ಶುಭತಮಕುಂಡಲಪೂರ್ವಸತಿಃ ಪದನತಪಾತಕಸಂಶಮನೀ ।

ದಿಶತು ನಿಕೃತ್ತಶಿರಾಃ ಕುಶಲಂ ಮಮ ಸುರಪಾರ್ಥಿವಶಕ್ತಿಕಲಾ ।।೫೯೩।।

ನಿಜಸುತರಂಗಪತೇರ್ನಿಕಟೇ ಕೃತವಸತಿರ್ನತಸಿದ್ಧಿಕರೀ ।

ದಲಿತಶಿರಾಃ ಪ್ರತನೋತು ಮಮ ಶ್ರಿಯಮಮರೇಶ್ವರಶಕ್ತಿಕಲಾ ।।೫೯೪।।

ಭುವಿ ತತಸಹ್ಯನಗಾಂತರಗೇ ಶುಭತಮಚಂದ್ರಗಿರೌ ವರದಾ ।

ಕೃತವಸತಿಃ ಕುರುತಾನ್ಮಮ ಶಂ ಭೃಗುಕುಲರಾಮಜನನ್ಯಜರಾ ।।೫೯೫।।

ಅವತು ವಿಕೃತ್ತಶಿರಾಃ ಪದಯೋರ್ಭಜಕಮನಿಂದ್ಯವಿಚಿತ್ರಕಥಾ ।

ದಿನಕರಮಂಡಲಮಧ್ಯಗೃಹಾ ಸುರಧರಣೀಪತಿಶಕ್ತಿಕಲಾ ।।೫೯೬।।

ಗಗನಚರಾರ್ಚಿತಪಾದುಕಯಾ ಪದನತಸನ್ಮತಿಬೋಧಿಕಯಾ ।

ಮಮ ಸತತಂ ಶುಚಿರೇಣುಕಯಾ ಪರವದಿದಂ ಕುಲಮಂಬಿಕಯಾ ।।೫೯೭।।

ಶಮಯಿತುಮುಗ್ರತಮಂ ದುರಿತಂ ಪ್ರಥಯಿತುಮಾತ್ಮನಿಗೂಢಬಲಮ್ ।

ಗಮಯಿತುಮಗ್ರ್ಯದಶಾಂ ಸ್ವಕುಲಂ ತವ ಚರಣಾಂಬುಜಮಂಬ ಭಜೇ ।।೫೯೮।।

ಪರವಶಗಾಮಶಿವೇನ ವೃತಾಂ ಭರತಧರಾಂ ಪರಿಪಾತುಮಿಮಾಮ್ ।

ಪಟುಮತಿವಾಕ್ಕ್ರಿಯಮಾತನುತಾದ್ಗಣಪತಿಮಭ್ರಹಯಪ್ರಮದಾ ।।೫೯೯।।

ಗಣಪತಿದೇವಮಹೋಂಶಜುಷೋ ಗಣಪತಿನಾಮಕವಿಪ್ರಕವೇಃ ।

ಸುರಪತಿಜೀವಸಖೀ ಶೃಣುಯಾದ್ದಶಶತಪತ್ರಮುಖೀ ಸುಮುಖೀಃ ।।೬೦೦।।

॥ ಇತಿ ಶ್ರೀಭಗವನ್ಮಹರ್ಷಿರಮಣಾಂತೇವಾಸಿನೋ ವಾಸಿಷ್ಠಸ್ಯ

ನರಸಿಂಹಸೂನೋಃ ಗಣಪತೇಃ ಕೃತಾ ಇಂದ್ರಾಣೀ ಸಪ್ತಶತೀ

ಷಷ್ಠಂ ತ್ರೈಷ್ಟುಭಂ ಶತಕಂ ಸಮಾಪ್ತಮ್ ॥

॥ ಇಂದ್ರೋ ವಿಶ್ವಸ್ಯ ರಾಜತಿ ॥