॥ ಅಥ ಸಪ್ತಮಂ ಜಾಗತಂ ಶತಕಮ್ ॥

॥ ಪ್ರಥಮೋ ದ್ರುತವಿಲಂಬಿತ ಸ್ತಬಕಃ ॥

ಸುರಮಹೀರಮಣಸ್ಯ ವಿಲಾಸಿನೀ ಜಲಚರಧ್ವಜಜೀವಿತದಾಯಿನೀ ।

ಹರತು ಬೋಧದೃಗಾವರಣಂ ತಮೋ ಹೃದಯಗಂ ಹಸಿತೇನ ಸಿತೇನ ಮೇ ।।೬೦೧।।

ನಮದಮರ್ತ್ಯಕಿರೀಟಕೃತೈಃ ಕಿಣೈಃ ಕಮಠಪೃಷ್ಠನಿಭೇ ಪ್ರಪದೇಽಂಕಿತಾ ।

ಪರಿಧುನೋತು ಶಚೀ ಭರತಕ್ಷಿತೇರ್ವೃಜಿನಜಾಲಮಜಾಲಮಕಂಪನಮ್ ।।೬೦೨।।

ಅತಿತರಾಂ ನತಪಾಲನಲೋಲಯಾ ವಿಬುಧನಾಥಮನೋಹರಲೀಲಯಾ ।

ಕಿರಿಮುಖೀಮುಖಶಕ್ತ್ಯುಪಜೀವ್ಯಯಾ ವಿದಿತಯಾದಿತಯಾ ಗತಿಮಾನಹಮ್ ।।೬೦೩।।

ಘನಹಿರಣ್ಯಮದಾಪಹರೋಚಿಷಾ ವನರುಹಾನನಯಾಽವನದಕ್ಷಯಾ ।

ಗತಿಮದಿಂದ್ರಮನೋರಥನಾಥಯಾ ಭುವನಮೇವ ನ ಮೇ ಕುಲಮಾತ್ರಕಮ್ ।।೬೦೪।।

ತನುಷು ವಾಮನಮೂರ್ತಿಧರೇ ವಿಭೌ ತಮನುಯಾ ಚ ವಿರಾಜತಿ ವಾಮನೀ ।

ಶರಣವಾನನಯಾಂಬಿಕಯಾ ಲಸತ್ಕರುಣಯಾಽರುಣಯಾ ಪದಯೋರಹಮ್ ।।೬೦೫।।

ಸಕರುಣಾ ಕುಶಲಂ ಮಮ ರೇಣುಕಾತನುರಜಾ ತನುತಾದುದಿತೋ ಯತಃ ।

ಯುಧಿ ಮುನಿರ್ವಿದಧೌ ಪರಶುಂ ದಧಜ್ಜನಪತೀನಪತೀವ್ರಭುಜಾಮದಾನ್ ।।೬೦೬।।

ಸುಜನಶತ್ರುರಮಾಥಿ ಘನಧ್ವನಿಃ ಶಚಿ ಸರಾತ್ರಿಚರಸ್ತವ ತೇಜಸಾ ।

ಜನನಿ ರಾಮಸಹೋದರಸಾಯಕಂ ಪ್ರವಿಶತಾಽವಿಶತಾದಧಿಕೌಜಸಾ ।।೬೦೭।।

ತವ ಮಹಃಕಲಯಾಬಲಮಾಪ್ತಯಾ ಜನನಿ ಶುಂಭನಿಶುಂಭಮದಚ್ಛಿದಾ ।

ಜಗದರಕ್ಷ್ಯತ ಗೋಪಕುಲೇಶಿತುಸ್ತನುಜಯಾಽನುಜಯಾರ್ಜುನಸಾರಥೇಃ ।।೬೦೮।।

ನ ವಿನಿರೂಪಯಿತುಂ ಪ್ರಬಭೂವ ಯಾಂ ಕವಿಜನೋ ವಿವಿಧಂ ಕಥಯನ್ನಪಿ ।

ಮುನಿಹೃದಂಬುಜಸೌಧತಲೇಂದಿರಾ ಜಯತಿ ಸಾ ಯತಿಸಾಧುಜನಾವನೀ ।।೬೦೯।।

ಇಮಮಯಿ ತ್ರಿದಿವೇಶ್ವರಿ ಕಲ್ಕಿನಂ ರುಷಮಪೋಹ್ಯ ಸವಿತ್ರಿ ವಿಲೋಕಿತೈಃ ।

ಸುರಪತೇರ್ದ್ವಿಷತೋಽಘವತೋ ಲಸನ್ಮದನಕೈರವಕೈರವಲೋಚನೇ ।।೬೧೦।।

ಸ್ಮರದಮರ್ತ್ಯನೃಪಾಲವಿಲಾಸಿನೀಂ ಪ್ರಬಲಪಾತಕಭೀತಿವಿನಾಶಿನೀಮ್ ।

ಪ್ರವಣಯಾಂತರನನ್ಯಧಿಯಾ ಲಸದ್ವಿನಯಯಾನಯಯಾಮವತೀರ್ಮನಃ ।।೬೧೧।।

ಭಗವತೀಗಗನಸ್ಥಲಚಾರಿಣೀ ಜಯತಿ ಸಂಗರರಂಗವಿಹಾರಿಣೀ ।

ಸುಕೃತಶತ್ರುಮತಿಭ್ರಮಕಾರಿಣೀ ಹರಿಹಯಾರಿಹಯಾದಿವಿದಾರಿಣೀ ।।೬೧೨।।

ಶರಣವಾನಹಮರ್ಜುನಹಾಸಯಾ ಭುವನಭೂಪತಿಹಾರಿವಿಲಾಸಯಾ ।

ದಿವಿ ಪುಲೋಮಜಯಾ ಧವಲಾಚಲೇ ಗಿರಿಜಯಾಽರಿಜಯಾವಿತದೇವಯಾ ।।೬೧೩।।

ಚರಣಯೋರ್ಧೃತಯಾ ವಿಜಯಾಮಹೇ ವಯಮಶೇಷಜಗನ್ನೃಪಜಾಯಯಾ ।

ದಿವಿ ಪುಲೋಮಜಯಾ ಧವಲಾಚಲೇ ನಗಜಯಾ ಗಜಯಾನವಿಲಾಸಯಾ ।।೬೧೪।।

ಅರಿವಧಾಯ ವಿಧಾಯ ಬುಧಾಧಿಪಂ ಪಟುಭುಜಾಬಲಭೀಷಣಮಾಜಿಷು ।

ನ ಭವತೀ ಶಚಿ ಗಚ್ಛತಿ ದುರ್ಗತಃ ಕ್ವಚನ ಕಾಚನ ಕಾತರಧೀರಿವ ।।೬೧೫।।

ಸಪದಿ ಮಾನಸಧೈರ್ಯಹೃತೋ ಜಗಜ್ಜನನಿ ವಜ್ರತನೋರ್ಜ್ವಲಿತಾರ್ಚಿಷಃ ।

ಅರಿಜನೇ ಪ್ರಥಮಂ ತವ ವೀಕ್ಷಯಾ ಸುರಪತೇರಪತೇಜಸಿ ವಿಕ್ರಮಃ ।।೬೧೬।।

ನ ಮನನೋಚಿತಮಸ್ತಿ ಪರಂ ನೃಣಾಂ ವಿಬುಧರಾಜವಧೂಪದಪದ್ಮತಃ ।

ಜಗತಿ ದರ್ಶನಯೋಗ್ಯಮಿಹಾಪರಂ ನ ರಮಣೀ ರಮಣೀಯಮುಖಾಬ್ಜತಃ ।।೬೧೭।।

ಶರಣವಾನಹಮಸ್ಮಿ ಪುರಾತನಪ್ರಮದಯಾ ಮುನಿಗೇಯಚರಿತ್ರಯಾ ।

ಸ್ವಬಲಚಾಲಿತನಾಕಜಗನ್ನಭೋವಸುಧಯಾ ಸುಧಯಾ ಸುರರಾಡ್ದೃಶಾಮ್ ।।೬೧೮।।

ಅಯಮಹಂ ಗತಿಮಾನತಿಶಾಂತಯಾ ತ್ರಿದಿವಭೂಮಿಪತಿಪ್ರಿಯಕಾಂತಯಾ ।

ಮನಸಿ ಮೌನಿಜನೈರತಿಭಕ್ತಿತೋ ನಿಹಿತಯಾ ಹಿತಯಾ ಸುಕೃತಾತ್ಮನಾಮ್ ।।೬೧೯।।

ವಿನಯತಃ ಸ್ತುತಯಾ ಗಮಯಾಮ್ಯಹಂ ಜನಿಮತಾಂ ಜನಯಿತ್ರಿ ನಿಶಾಸ್ತ್ವಯಾ ।

ಪ್ರಸೃತಯಾ ಕುಲಕುಂಡಧನಂಜಯಾದ್ಧೃತತನೂತತನೂತನವೇಗಯಾ ।।೬೨೦।।

ಸಕೃದಮೋಘಸರಸ್ವತಿಸಾಧುಧೀಹೃದಯವೇದ್ಯಪದಾಂಬುಜಸೌಷ್ಠವೇ ।

ಮಮ ಶಿವಂ ಸುಮನಃ ಪೃಥಿವೀಪತೇಃ ಸುವದನೇ ವದ ನೇತ್ರಲಸದ್ದಯೇ ।।೬೨೧।।

ದುರವಗಾಹಪಥೇ ಪತಿತಂ ಚಿರಾಜ್ಜನನಿ ಗಮ್ಯವಿಲೋಕನಲಾಲಸಮ್ ।

ಸ್ವಯಮಮರ್ತ್ಯನೃಪಾಲಮನೋರಮೇ ಸುನಯನೇ ನಯ ನೇಯಮಿಮಂ ಜನಮ್ ।।೬೨೨।।

ಅವತು ನಃ ಸ್ವಯಮೇವ ಪಟೂನ್ ವಿಪದ್ವಿಮಥನಾಯ ವಿಧಾಯ ಬುಧೇಶ್ವರೀ ।

ಸಕಲಮರ್ಮಸುವೀತದಯೈಃ ಪರೈರ್ವಿನಿಹತಾನಿಹ ತಾಪವತಃ ಶಚೀ ।।೬೨೩।।

ಸುರಧರಾಪತಿಜೀವಿತನಾಥಯಾ ಸ್ವಜನನಕ್ಷಿತಿರಕ್ಷಣಕರ್ಮಣಿ ।

ಪಟುತಮೋ ಜನ ಏಷ ವಿಧೀಯತಾಮಿಹ ತಯಾ ಹತಯಾ ತು ಸಮೂಹಯಾ ।।೬೨೪।।

ಗಣಪತೇಃ ಶೃಣುಯಾದಿಮಮುಜ್ಜ್ವಲಂ ದ್ರುತವಿಲಂಬಿತವೃತ್ತಗಣಂ ಶಚೀ ।

ಸಲಿಲರಾಶಿಸುತಾಭವನೀಭವದ್ಭುವನಪಾವನಪಾದಸರೋರುಹಾ ।।೬೨೫।।

॥ ಇತಿ ಪ್ರಥಮಃ ಸ್ತಬಕಃ ॥