॥ ಚತುರ್ಥಂ ಶತಕಮ್ ॥

॥ ತ್ರಯೋದಶಃ ಸ್ತಬಕಃ - ಉಪಜಾತಿವೃತ್ತಮ್ ॥

ಕಟಾಕ್ಷಃ

ಭವಾಂಬುಧಿಂ ತಾರಯತಾದ್ಭವಂತಂ ಹಾಸೋಽದ್ಭುತಃ ಕುಂಜರವಕ್ತ್ರಮಾತುಃ ।

ಯೋ ಹಂತಿ ಬಿಂಬಾಧರಲಂಘನೇಽಪಿ ವ್ಯಕ್ತಾಲಸತ್ವೋ ಹರಿತಾಂ ತಮಾಂಸಿ ॥ ೩೦೧ ॥

ಸಕ್ತಃ ಸದಾ ಚಂದ್ರಕಲಾಕಲಾಪೇ ಸರ್ವೇಷು ಭೂತೇಷು ದಯಾಂ ದಧಾನಃ ।

ಗೌರೀಕಟಾಕ್ಷೋ ರಮಣೋ ಮುನಿರ್ವಾ ಮದೀಯಮಜ್ಞಾನಮಪಾಕರೋತು ॥ ೩೦೨ ॥

ಕೃಪಾವಲೋಕೋ ನಗಕನ್ಯಕಾಯಾಃ ಕರೋತು ಮೇ ನಿರ್ಮಲಮಂತರಂಗಮ್ ।

ಯೇನಾಂಕಿತಃ ಶಂಕರ ಏಕತತ್ತ್ವಂ ವಿಶ್ವಂ ಲುಲೋಕೇ ಜಗತೇ ಜಗೌ ಚ ॥ ೩೦೩ ॥

ಕಾಲೀಕಟಾಕ್ಷೋ ವಚನಾನಿ ಮಹ್ಯಂ ದದಾತು ಮೋಚಾಮದಮೋಚನಾನಿ ।

ಯತ್ಪಾತಪೂತಂ ರಘುವಂಶಕಾರಂ ನರಾಕೃತಿಂ ಪ್ರಾಹುರಜಸ್ಯ ನಾರೀಮ್ ॥ ೩೦೪ ॥

ಯುಷ್ಮಾಕಮಗ್ರ್ಯಾಂ ವಿತನೋತು ವಾಣೀಮೇಣೀದೃಗೇಷಾ ಗಿರಿಶಸ್ಯ ಯೋಷಾ ।

ಯಸ್ಯಾಃ ಕಟಾಕ್ಷಸ್ಯ ವಿಸಾರಿ ವೀರ್ಯಂ ಗಿರಾಮಯಂ ಮೇ ವಿವಿಧೋ ವಿಲಾಸಃ ॥ ೩೦೫ ॥

ನಗಾತ್ಮಜಾಯಾಃ ಕರುಣೋರ್ಮಿಶಾಲೀ ದೃಗಂತಸಂತಾನಧುನೀಪ್ರವಾಹಃ ।

ಭೀಷ್ಮೇಣ ತಪ್ತಾನ್ಭವನಾಮಕೇನ ಗ್ರೀಷ್ಮೇಣ ಯುಷ್ಮಾಂಛಿಶಿರೀಕರೋತು ॥ ೩೦೬ ॥

ಅಜಸ್ರಮಾರ್ದ್ರಾ ದಯಯಾಽಂತರಂಗೇ ಯಥಾ ಭವೋ ನಿಮ್ನಗಯೋತ್ತಮಾಂಗೇ ।

ಸಂತಾಪಶಾಂತಿಂ ಭವಸುಂದರೀ ಮೇ ಕರೋತು ಶೀತೇನ ವಿಲೋಕಿತೇನ ॥ ೩೦೭ ॥

ಪುಣ್ಯಾ ಸದಾಽಪೀಶ್ವರ ಏವ ಸಕ್ತಾ ಪತಿವ್ರತಾಸಾಮ್ಯಮಿತಾ ತವೇಕ್ಷಾ ।

ಕುಲಾಚಲಾಧೀಶ್ವರಕನ್ಯಕೇ ಮೇ ಸಂಹಾರಮಂಹೋವಿತತೇರ್ವಿಧತ್ತಾಮ್ ॥ ೩೦೮ ॥

ಶರ್ವಸ್ಯ ರಾಮೇ ನಿಯಮೇನ ಹೀನಾ ಶ್ಯಾಮಾ ತವೇಕ್ಷಾ ಗಣಿಕಾಂಗನೇವ ।

ನೀಚೇಽಪಿ ಮರ್ತ್ಯೇ ನಿಪತತ್ಯನರ್ಘಾ ಬಿಭರ್ತಿ ನಾ ಷೋಡಶ ಯಃ ಸುವರ್ಣಾನ್ ॥ ೩೦೯ ॥

ಪದ್ಮಾಯತಾಕ್ಷಿ ಕ್ಷಿತಿಧಾರಿಕನ್ಯೇ ಕಟಾಕ್ಷನಾಮಾ ತವ ಕಾಲಸರ್ಪಃ ।

ಯಂ ಸಂದಶತ್ಯೇಷ ಜಗತ್ಸಮಸ್ತಂ ವಿಸ್ಮೃತ್ಯ ಚಾಹೋ ನ ದಧಾತಿ ಮೋಹಮ್ ॥ ೩೧೦ ॥

ಈಶದ್ವಿಷಾ ಶೈಲಮಹೇಂದ್ರಕನ್ಯೇ ಕರೋತಿ ಮೈತ್ರೀಂ ವಿಷಮಾಯುಧೇನ ।

ಪ್ರಭಾಷತೇ ಪಾತಕಿನಶ್ಚ ಪಕ್ಷೇ ಕುತಃ ಕಟಾಕ್ಷೋ ನ ತವಾಂಬ ಮುಗ್ಧಃ ॥ ೩೧೧ ॥

ಕೃಪಾನ್ವಿತಃ ಕರ್ಣಸಮೀಪಚಾರೀ ಶ್ರೀಮಾನ್ಸದಾ ಪುಣ್ಯಜನಾನುಕೂಲಃ ।

ಸಾಮ್ಯಂ ಕುರೂಣಾಮಧಿಪಸ್ಯ ಶಂಭೋಃ ಪ್ರಾಣಪ್ರಿಯೇ ತೇ ಭಜತೇ ಕಟಾಕ್ಷಃ ॥ ೩೧೨ ॥

ಕರ್ಣಾಂತಿಕಸ್ಥೋಽಪಿ ನ ಧರ್ಮವೈರೀ ಕೃಷ್ಣೋಽಪಿ ಮಾತರ್ನಕುಲಂ ನ ಪಾತಿ ।

ಶೀತೋಽಪಿ ಸಂದೀಪಯತಿ ಸ್ಮರಾಗ್ನಿಂ ಹರಸ್ಯ ತೇ ಶೈಲಸುತೇ ಕಟಾಕ್ಷಃ ॥ ೩೧೩ ॥

ಅಯಂ ಕಟಾಕ್ಷಸ್ತವ ತೋಯವಾಹಃ ಕಾರುಣ್ಯಕಾಲೇ ಪರಿಜೃಂಭಮಾಣಃ ।

ಗೃಹೇಷು ಲೀನಾನ್ ಸುಖಿನೋ ವಿಹಾಯ ನಿರಾಶ್ರಯಾನ್ ಸಿಂಚತಿ ವಿಶ್ವಮಾತಃ ॥ ೩೧೪ ॥

ಕಸ್ಯಾಪಿ ವಾಚಾ ವಪುಷಾ ಬಲೇನ ಸಮಸ್ಯ ಸರ್ವೈರಪಿ ಯನ್ನಿದೇಶಾಃ ।

ಅಂಭೋಧಿವೇಲಾಸ್ವಪಿ ನ ಸ್ಖಲಂತಿ ಶಂಭೋಃ ಪ್ರಿಯೇಽಯಂ ತವ ದೃಕ್ಪ್ರಸಾದಃ ॥ ೩೧೫ ॥

ದ್ವಾರೇಷು ತೇಷಾಂ ವಿಚರಂತಿ ಶೂರಾಃ ಸೌಧೇಷು ಸಾರಂಗದೃಶಸ್ತರುಣ್ಯಃ ।

ಪ್ರಗಲ್ಭವಾಚಃ ಕವಯಃ ಸಭಾಸು ಶರ್ವಾಣಿ ತೇ ಯೇಷು ಕೃಪಾಕಟಾಕ್ಷಃ ॥ ೩೧೬ ॥

ಯತ್ರಾಂಬ ತೇ ಕೋಽಪಿ ಕಟಾಕ್ಷಲೇಶಃ ಸ ದುರ್ಜಯಃ ಸಂಗರಸೀಮ್ನಿ ಶೂರಃ ।

ಪೂರ್ವಂ ದಿವಂ ಪೂರಯತಿ ದ್ವಿಷದ್ಭಿಸ್ತತೋ ಯಶೋಭಿರ್ಭುವಮಿಂದುಗೌರೈಃ ॥ ೩೧೭ ॥

ಯಂ ತಾರಕಾಕಾಂತಕಲಾಪಕಾಂತೇ ನ ಲೋಕಸೇ ಕೋಽಪಿ ನ ಲೋಕತೇ ತಮ್ ।

ಯಂ ಲೋಕಸೇ ತೇನ ವಿಲೋಕಿತೋಽಪಿ ಶ್ರಿಯಂ ಸಮೃದ್ಧಾಂ ಸಮುಪೈತಿ ಲೋಕಃ ॥ ೩೧೮ ॥

ಸುಧಾಂ ಹಸಂತೀ ಮಧು ಚಾಕ್ಷಿಪಂತೀ ಯಶೋ ಹರಂತೀ ವನಿತಾಧರಸ್ಯ ।

ಪರಿಷ್ಕರೋತ್ಯಸ್ಯ ಕವಿತ್ವಧಾರಾ ಮುಖಂ ಹರಪ್ರೇಯಸಿ ಲೋಕಸೇ ಯಮ್ ॥ ೩೧೯ ॥

ಸರ್ವೇಂದ್ರಿಯಾನಂದಕರೀ ಪುರಂಧ್ರೀ ವಿದ್ಯಾಽನವದ್ಯಾ ವಿಪುಲಾ ಚ ಲಕ್ಷ್ಮೀಃ ।

ಇಯಂ ತ್ರಿರತ್ನೀ ಪುರುಷಸ್ಯ ಯಸ್ಯ ದುರ್ಗೇ ತ್ವಯಾ ದೃಷ್ಟಮಿಮಂ ತು ವಿದ್ಮಃ ॥ ೩೨೦ ॥

ಮುಧಾ ಕ್ಷಿಪಸ್ಯದ್ರಿಸುತೇ ಕಟಾಕ್ಷಾನ್ ಕೈಲಾಸಕಾಂತಾರಮಹೀರುಹೇಷು ।

ಇತಃ ಕಿರೇಷತ್ತವ ನಾಸ್ತಿ ಹಾನಿಃ ಸಿದ್ಧ್ಯತ್ಯಭೀಷ್ಟಂ ಚ ಸಮಸ್ತಮಸ್ಯ ॥ ೩೨೧ ॥

ಶೀತಾಚಲಾಧೀಶಕುಮಾರಿ ಶೀತಃ ಸಂರಕ್ಷಣೇ ಸಂಶ್ರಿತಮಾನವಾನಾಮ್ ।

ದುರ್ಧರ್ಷದುಷ್ಟಾಸುರಮರ್ದನೇಷು ನಿತಾಂತಮುಷ್ಣಶ್ಚ ತವಾವಲೋಕಃ ॥ ೩೨೨ ॥

ರುಷಾ ಸಮೇತಂ ವಿದಧಾತಿ ನಾಶಂ ಕರೋತಿ ಪೋಷಂ ಕೃಪಯಾ ಸನಾಥಮ್ ।

ಅಂಬೌಷಧಸ್ಯೇವ ತವೇಕ್ಷಿತಸ್ಯ ಯೋಗಸ್ಯ ಭೇದೇನ ಗುಣಸ್ಯ ಭೇದಃ ॥ ೩೨೩ ॥

ನಾಶಾಯ ತುಲ್ಯೋದ್ಧತಕಾಮಲೋಭಕ್ರೋಧತ್ರಿದೋಷಸ್ಯ ಭವಾಮಯಸ್ಯ ।

ಶಿವಪ್ರಿಯೇ ವೀಕ್ಷಿತಭೇಷಜಂ ತೇ ಕ್ರೀಣಾನಿ ಭಕ್ತ್ಯಾ ವದ ಭೋಃ ಕಿಯತ್ಯಾ ॥ ೩೨೪ ॥

ಅಭಿಷ್ಟುತಾಂ ಚಾರಣಸಿದ್ಧಸಂಘೈಸ್ತ್ರಿಷ್ಟುಬ್ವಿಶೇಷಾ ಅಪಿ ಮರ್ತ್ಯಸೂನೋಃ ।

ಕೃಪಾಕಟಾಕ್ಷೈರ್ವಿನತಾನ್ಪುನಾನಾಂ ಕಪರ್ದಿನಃ ಸಮ್ಮದಯಂತು ಕಾಂತಾಮ್ ॥

೩೨೫ ॥