॥ ಪಂಚದಶಃ ಸ್ತಬಕಃ - ಸ್ವಾಗತಾವೃತ್ತಮ್ ॥

ಶಕ್ತೇಃ ಸ್ವಾಗತಮ್

ಆಪದಾಮಪಹರಂತು ತತಿಂ ನಃ ಸಂಪದಾಮಪಿ ದಿಶಂತು ಸಮೃದ್ಧಿಮ್ ।

ದಂತಕುಂದರುಚಿದತ್ತಬಲಾನಿ ವ್ಯೋಮಕೇಶಸುದೃಶೋ ಹಸಿತಾನಿ ॥ ೩೫೧ ॥

ಅಲ್ಪಮಪ್ಯಧಿಕಶಕ್ತಿಸಮೃದ್ಧಂ ಮಂದಮಪ್ಯಧಿಕಸೂಕ್ಷ್ಮವಿಸಾರಮ್ ।

ಸುಸ್ಮಿತಂ ಸ್ಮರವಿರೋಧಿರಮಣ್ಯಾಃ ಕಲ್ಪತಾಂ ಮಮ ಕುಲಸ್ಯ ಶುಭಾಯ ॥ ೩೫೨ ॥

ಪುಷ್ಕರಾದ್ರವಿಮತೋ ಭುವಮೇತಾಂ ಭೂಮಿತಶ್ಶಶಧರಂ ಕ್ರಮಮಾಣಾ ।

ನೈವ ಮುಂಚತಿ ಪದಂ ಬತ ಪೂರ್ವಂ ನೋತ್ತರಂ ವ್ರಜತಿ ನೇಶಪುರಂಧ್ರೀ ॥ ೩೫೩ ॥

ಭೂಷಣೇಷ್ವಿವ ಸವಿತ್ರಿ ಸುವರ್ಣಂ ಮೃತ್ತಿಕಾಮಿವ ಘಟೇಷ್ವಖಿಲೇಷು ।

ವಿಶ್ವವಸ್ತುಷು ನಿರಸ್ತವಿಶೇಷಾಂ ದೇವಿ ಪಶ್ಯತಿ ಸತೀಂ ವಿಬುಧಸ್ತ್ವಾಮ್ ॥ ೩೫೪ ॥

ಕಿಟ್ಟಭೂತಮಖಿಲೇಶ್ವರಜಾಯೇ ದೃಶ್ಯಜಾತಮಖಿಲಂ ನಿಜಪಾಕೇ ।

ಪ್ರಾಣಬುದ್ಧಿಮನಸಾಮಿಹ ವರ್ಗಃ ಸಾರಭೂತ ಇತಿ ಸೂರಿಜನೋಕ್ತಿಃ ॥ ೩೫೫ ॥

ಸಾರಮೀಶ್ವರಿ ತಿಲೇಷ್ವಿವ ತೈಲಂ ವಿಗ್ರಹೇಷು ನಿಖಿಲೇಷು ನಿಗೂಢಮ್ ।

ಯೇ ಧಿಯಾ ಮಥನತೋ ವಿದುರೇಕಂ ತೇ ಭವಂತಿ ವಿಬುಧಾಸ್ತ್ವಯಿ ಲೀನಾಃ ॥ ೩೫೬ ॥

ಆಯಸಂ ತ್ರಿಭುವನೇಶ್ವರಿ ಪಿಂಡಂ ವಹ್ನಿನೇವ ತಪಸಾ ತನುಪಿಂಡಮ್ ।

ಯಸ್ಯ ಚಿಜ್ಜ್ವಲನಜಾಲಮಯಂ ಸ್ಯಾತ್ ತಪ್ತಮಂಬ ಸ ತವಾಲಯಭೂತಃ ॥ ೩೫೭ ॥

ಯೋಽರಣೇರ್ಮಥನತೋಽತಿಪವಿತ್ರಂ ವೀತಿಹೋತ್ರಮಿವ ವೀತಕಲಂಕಃ ।

ಪ್ರಾಣಮುಜ್ಜ್ವಲಯತಿ ಸ್ವಶರೀರಾತ್ ತ್ವಾಮಸಾವಭಯದೇಽರ್ಹತಿ ಯಷ್ಟುಮ್ ॥ ೩೫೮ ॥

ಪ್ರಾಣತಾ ಶ್ವಸಿತಮೇವ ವಿಚಾರ್ಯಂ ಕುರ್ವತಾ ಕರಣಮೇವ ನಿಭಾಲ್ಯಮ್ ।

ಗಚ್ಛತಾ ಗಮನಮೇವ ವಿಶೋಧ್ಯಂ ತತ್ತನೌ ಮಥನಮಾಗಮಬೋಧ್ಯಮ್ ॥ ೩೫೯ ॥

ಯೋ ರಸಂ ಪಿಬತಿ ಮೂರ್ಧಸರೋಜಾತ್ ಸೋಮಪೋಽಯಮನಘಃ ಪ್ರಯತಾತ್ಮಾ ।

ಅಗ್ನಿಹೋತ್ರಮಖಿಲೇಶ್ವರಿ ನಿತ್ಯಂ ಮೂಲಕುಂಡದಹನಸ್ಥಿತಿರಸ್ಯ ॥ ೩೬೦ ॥

ಚಿನ್ಮಯೀ ಪಿಬಸಿ ಸೋಮಮಿಮಂ ಕಿಂ ಸೋಮ ಏವ ಕಿಮಸಾವಸಿ ಮಾತಃ ।

ಪೀಯಸೇ ಪಿಬಸಿ ಚ ಸ್ವಯಮೇಕಾ ಪೇಯಪಾತೃಯುಗಲಂ ಕಿಮು ಭೂತ್ವಾ ॥ ೩೬೧ ॥

ತೈಜಸಂ ಕನಕಮಗ್ನಿವಿತಪ್ತಂ ತೇಜ ಏವ ಕನಕಾಂಗಿ ಯಥಾ ಸ್ಯಾತ್ ।

ಮೋದರೂಪಕಲಯಾ ತವ ತಪ್ತಂ ತನ್ಮಯಂ ಭವತಿ ಮೋದಜಪಿಂಡಮ್ ॥ ೩೬೨ ॥

ಕಾಽಪಿ ಮೋದಲಹರೀ ತವ ವೀಚಿರ್ನಿರ್ಗತಾ ದಶಶತಾರಸುಧಾಬ್ಧೇಃ ।

ಪೂರಯತ್ಯಖಿಲಮಂಬ ಶರೀರಂ ನೇಹ ವೇದ್ಮಿ ಪರಮೇ ಜಡಭಾಗಮ್ ॥ ೩೬೩ ॥

ಸೇಯಮುತ್ತಮತಮಾ ನಿಪತಂತೀ ಶೀತಲಾದ್ದಶಶತಾರಪಯೋದಾತ್ ।

ಪ್ರೇರಿತಾದಖಿಲರಾಜ್ಞಿ ಭವತ್ಯಾ ಬುದ್ಧಿಸಸ್ಯಮವತಾದ್ರಸವೃಷ್ಟಿಃ ॥ ೩೬೪ ॥

ದುಗ್ಧಸಿಂಧುಮಥನಾದಮೃತಂ ವಾ ಶಬ್ದಸಿಂಧುಮಥನಾತ್ಪ್ರಣವೋ ವಾ ।

ಲಭ್ಯತೇ ಸುಕೃತಿಭಿಸ್ತವ ವೀಚಿರ್ಮೂರ್ಧಕಂಜಮಥನಾದ್ರಸ ಏಷಃ ॥ ೩೬೫ ॥

ಅಸ್ಥಿಷು ಪ್ರವಹತಿ ಪ್ರತಿವೇಗಂ ಮಜ್ಜಸಾರಮಮೃತಂ ವಿದಧಾನಾ ।

ಬಿಭ್ರತಿ ಮದಮನುಷ್ಣಮದೋಷಂ ಮೂರ್ಧಕಂಜನಿಲಯೇ ತವ ಧಾರಾ ॥ ೩೬೬ ॥

ತೈತ್ತಿರೀಯಕಥಿತೋ ರಸಲಾಭಃ ಸೋಽಯಮೇವ ಸಕಲಾಗಮವರ್ಣ್ಯೇ ।

ಏತದೇವ ಶಶಿಮಂಡಲನಾಥೇ ತಂತ್ರಭಾಷಿತಪರಾಮೃತಪಾನಮ್ ॥ ೩೬೭ ॥

ಮೂರ್ಧಸೋಮಮಜರಾಮರರೂಪೇ ಯುಕ್ತವೀಕ್ಷಣಕರೇಣ ನಿಪೀಡ್ಯ ।

ಶಂಭುಸುಂದರಿ ಸುನೋಮಿ ಧಿನೋಮಿ ತ್ವಾಂ ಪ್ರದೀಪ್ತಕುಲಕುಂಡನಿಶಾಂತಾಮ್ ॥ ೩೬೮ ॥

ದೃಷ್ಟಿರೇವ ರವಿದೀಧಿತಿರುಗ್ರಾ ಶೀರ್ಷಕಂಜಶಶಿನಂ ಪ್ರವಿಶಂತೀ ।

ಶೀತಲಾಮೃತಮಯೀ ಖಲು ಭೂತ್ವಾ ಯೋಗಿನೋ ದ್ರವತಿ ಮೋದಕಲಾ ತೇ ॥ ೩೬೯ ॥

ಮೂರ್ಧನಿ ದ್ರವಸಿ ಯೋಗಯುತಾನಾಂ ಚಕ್ಷುಷಿ ಜ್ವಲಸಿ ಶಂಕರಭಾಮೇ ।

ತಿಷ್ಠಸಿ ಸ್ಥಿರಪದಾ ಕುಲಕುಂಡೇ ಬಾಹ್ಯತಃ ಸ್ಖಲಸಿ ನೈವ ಕದಾಽಪಿ ॥ ೩೭೦ ॥

ಸಾ ಯದಿ ದ್ರವತಿ ಮೋದಕಲಾ ಸ್ಯಾತ್ ಸಾ ಯದಿ ಜ್ವಲತಿ ಚಿತ್ಕಲಿಕಾ ಸ್ಯಾತ್ ।

ಸಾ ಪರಾ ಸ್ಥಿರಪದಾ ಯದಿ ತಿಷ್ಠತ್ಯಕ್ಷರಾ ಭವತಿ ಕಾಚನ ಸತ್ತಾ ॥ ೩೭೧ ॥

ಪಶ್ಯತಾ ನಯನಮಂಡಲವೃತ್ತಿಂ ಗೃಹ್ಯಸೇ ತ್ವಮಚಲಾಧಿಪಕನ್ಯೇ ।

ಜಾನತಾ ದಶಶತಾರವಿಲಾಸಂ ಸ್ಪೃಶ್ಯಸೇ ವಿದಿತಮಂಬ ರಹಸ್ಯಮ್ ॥ ೩೭೨ ॥

ವ್ಯಾಪ್ತಶಕ್ತ್ಯಸುಬಲೇನ ಲಸಂತೀ ಭಾನುಬಿಂಬನಯನೇನ ತಪಂತೀ ।

ಚಂದ್ರಬಿಂಬಮನಸಾ ವಿಹರಂತೀ ಸಾ ಪುನರ್ಜಯತಿ ಮೂರ್ಧ್ನಿ ವಸಂತೀ ॥ ೩೭೩ ॥

ಸ್ವಾಗತಂ ಸಕಲಲೋಕನುತಾಯೈ ಸ್ವಾಗತಂ ಭುವನರಾಜಮಹಿಷ್ಯೈ ।

ಸ್ವಾಗತಂ ಮಯಿ ಭೃಶಂ ಸದಯಾಯೈ ಸ್ವಾಗತಂ ದಶಶತಾರಮಿತಾಯೈ ॥ ೩೭೪ ॥

ಸತ್ಕವಿಕ್ಷಿತಿಭುಜೋ ಲಲಿತಾಭಿಃ ಸ್ವಾಗತಾಭಿರನಘಾಭಿರಿಮಾಭಿಃ ।

ಸ್ವಾಗತಂ ಭಣಿತಮಸ್ತು ಭವಾನ್ಯೈ ಖೇಲನಾಯ ಶಿರ ಏತದಿತಾಯೈ ॥ ೩೭೫ ॥