॥ ದ್ವಿತೀಯಃ ಸ್ತಬಕಃ - ಪಂಚಚಾಮರವೃತ್ತಮ್ ॥

ಸರ್ಗಾದಿವರ್ಣನಮ್

ಸಹಾದರೇಣ ಯೋ ವಲಕ್ಷಪಾರಿಜಾತಮಾಲಯಾ

ಗಲಸ್ಥಲೀವಿಭೂಷಯಾ ಧ್ವನಿಂ ವಿನೈವ ಭಾಷತೇ ।

ಮಹೇಶಪುಣ್ಯಯೋಷಿತೋ ಮನೋಜ್ಞಹಾಸ ಏಷ ಮೇ

ವಿಭೂತಯೇ ಪ್ರಕಲ್ಪತಾಂ ವಿಧೂತಯೇ ಚ ಪಾಪ್ಮನಾಮ್ ॥ ೨೬ ॥

ನಿರಂತರಶ್ರಿತೇ ಸದಾ ಕೃಪಾರಸಪ್ರವಾಹಿನೀ

ವಿಲಾಸಿನೀತನುರ್ವಿಭೋಃ ಪುಮಾಕೃತೇರ್ವಿಮೋಹಿನೀ ।

ಸುಧಾತರಂಗಕಲ್ಪಹಾಸಭಾಸುರಾನನಾ ಶಿವಾ

ಪದಾಬ್ಜಲಂಬಿನೋ ಧುನೋತು ಪಾಪ್ಮನಃ ಫಲಂ ಮಮ ॥ ೨೭ ॥

ಕರೋತಿ ಯಾ ಬಿಭರ್ತಿ ಯಾ ನಿಹಂತಿ ಯಾ ಜಗತ್ತ್ರಯಂ

ಸಮಂತತೋ ವಿಭಾತಿ ಯಾ ನ ದೃಶ್ಯತೇ ಕ್ವಚಿಚ್ಚ ಯಾ ।

ಅತೀವ ಗುಪ್ತರೂಪಿಣೀ ಗುರೂಪದೇಶಮಂತರಾ

ನ ಶಕ್ಯತೇ ಬುಧೈಶ್ಚ ಬೋದ್ಧಮಂಧಕಾರಿಸುಂದರೀ ॥ ೨೮ ॥

ಮಹಾಂಧಕಾರಬಂಧುರಸ್ಯ ಭೂತಸಂಚಯಸ್ಯ ಯಾ

ವಿನಿದ್ರಿತಸ್ಯ ಸರ್ವಬೀಜಧಾಗ್ನಿ ಮೌನಮುದ್ರಿತೇ ।

ಸಮಂತತೋ ವಿಜೃಂಭಣಾಯ ಭಾಸನಾಯ ಚಾಭವನ್

ಮಹದ್ವಿಧಾಯ ಚೇಷ್ಟಿತಂ ಮಮೇಯಮಿಷ್ಟದೇವತಾ ॥ ೨೯ ॥

ಮಹೇಶಗರ್ಭತಃ ಸಮಸ್ತಭೂತಬೀಜಕೋಶತಃ

ಕಿರಂತ್ಯಶೇಷವಿಶ್ವಮಪ್ಯಪಾರದಿವ್ಯವೈಭವಾ ।

ವಿಚಿತ್ರಚೇಷ್ಟಯಾಽಽದ್ಯಯಾ ವಿಧೂತನಾಥನಿದ್ರಯಾ

ಜಗನ್ನುತಾ ಜಯತ್ಯಸಾವನಾದಿಶಕ್ತಿರದ್ಭುತಾ ॥ ೩೦ ॥

ಭವಂ ಭಣಂತಿ ತಾಂತ್ರಿಕಾಸ್ತ್ವದಾಶ್ರಯಂ ತಮವ್ಯಯಂ

ಸಮಾಮನಂತಿ ವೈದಿಕಾಃ ಸದರ್ಚಿತೇ ಸದಾಹ್ವಯಮ್ ।

ನ ಕಶ್ಚಿದರ್ಥಭೇದ ಏತದಾಖ್ಯಯೋರ್ದ್ವಯೋರ್ಭವೇ-

ದ್ಭಿದೇಯಮಾದಿಮಂ ಪದಂ ಪುಮಾನ್ಪರಂ ನಪುಂಸಕಮ್ ॥ ೩೧ ॥

ಸ ಚೇದ್ಭವೋಽಭಿಧಾನತೋ ಭವಾನ್ಯಸಿ ತ್ವಮವ್ಯಯೇ

ಸಮೀರ್ಯತೇ ಸ ಸದ್ಯದಿ ತ್ವಮಂಬ ಭಣ್ಯಸೇ ಸತೀ ।

ನ ತೇಽಸ್ತಿ ಭಾವತಾ ನ ಶಕ್ತಿರೂಪಿಣೀ ಹಿ ವಿದ್ಯಸೇ

ನ ವೇದ್ಮಿ ಕಾಲಿಕೇ ಕಥಂ ಸತೋಽಸತಶ್ಚ ಭಿದ್ಯಸೇ ॥ ೩೨ ॥

ಜಗದ್ವಿಧಾನಕಾರ್ಯತಃ ಪುರಾ ಸುರಾಸುರಸ್ತುತೇ

ತ್ವಮಂಬ ಜೀವಿತಂ ಭವಸ್ಯಭಾವಮೂಲವಾದಿನಾಮ್ ।

ವಿಕಲ್ಪವರ್ಜಿತಾ ಮತಿಃ ಪ್ರಬೋಧಮೂಲವಾದಿನಾಂ

ರಸೋಽನಪೇಕ್ಷ ಉತ್ತಮಃ ಪ್ರಮೋದಮೂಲವಾದಿನಾಮ್ ॥ ೩೩ ॥

ಭವತ್ಯಸಾವತೋ ಭವಾನ್ಯನಾದಿರಂತವರ್ಜಿತಾ

ಜಗಂತಿ ಮಾತಿ ನಿತ್ಯಮೋರಸೌ ತದಭ್ಯಧಾಯ್ಯುಮಾ ।

ರಸಾತ್ಮಿಕೋಶ್ಯತೇಽಖಿಲೈರಸೌ ತತಃ ಶಿವೋಚ್ಯತೇ

ಪರೈವಮೀಶಿತುಶ್ಚಿತಿಸ್ತ್ರಿಧಾ ಬುಧೈರುದೀರ್ಯತೇ ॥ ೩೪ ॥

ಚಿತಿಃ ಪರೈವ ಕಾಮನಾ ರಸೇನ ಕೇನಚಿದ್ಯುತಾ

ಚಿತಿಃ ಪರೈವ ಸರ್ವದಾಽಪ್ಯನಂತ್ಯಜಸ್ಯ ತು ಕ್ರಿಯಾ ।

ಚಿತಿಃ ಪರೈವ ಗೋಚರಾವಭಾಸಿಕಾ ಮತಿಃ ಸ್ಮೃತಾ

ತ್ರಿತೈವಮನ್ಯಥಾ ಚಿತೇಶ್ಚಿರಂತನೈರುದೀರ್ಯತೇ ॥ ೩೫ ॥

ಚಿಕೀರ್ಷತಿ ಪ್ರಭೌ ಜ್ವಲತ್ತ್ವದೀಯಕೀಲಸಂತತೇ

ವಿಕೀರ್ಣಧೂಮಜಾಲಮೇತದಂಬರಸ್ಥಲಂ ತತಮ್ ।

ವಿಸೃಷ್ಟಿತಃ ಪುರಾಽಸಿ ಯಾ ಶಿವಪ್ರಭುತ್ವರೂಪಿಣೀ

ಪೃಥಕ್ಪ್ರಭುಶ್ಚ ಲಕ್ಷಿತಾಽಸಿ ಸಾ ಸವಿತ್ರಿ ಪುಷ್ಕರೇ ॥ ೩೬ ॥

ಪುನರ್ವಿಪಾಕತೋ ಘನೀಭವದ್ಭಿರಕ್ಷಿಗೋಚರೈ-

ಸ್ತತಸ್ತತಃ ಸಮುಜ್ಜ್ವಲೈಃ ಖಸೂಕ್ಷ್ಮರೇಣುಗೋಲಕೈಃ ।

ಅಜಾಂಡವೃಕ್ಷಕೋಟಿಕಂದಬೃಂದವದ್ವ್ಯಧಾಃ ಪುರಾ

ಮಹೇಶದೃಷ್ಟಿಮಯ್ಯುಮೇಽಂಬ ಮಂಡಲಾನಿ ಭಾಸ್ವತಾಮ್ ॥ ೩೭ ॥

ತಪೋಽಗ್ನಿಧೂಮಜಾಲಕೇ ಭವಂತಿ ತೈಜಸಾಣವೋ

ಭವಂತಿ ಜೀವನಾಣವೋ ಭವಂತಿ ಪಾರ್ಥಿವಾಣವಃ ।

ಕ್ರಮೇಣ ತದ್ವಿಸೃಷ್ಟಿರೀಶಶಕ್ತಿಪಾಕವೈಭವೇ

ಸಹಸ್ರಭಾನುಮಂಡಲಂ ತು ಗೋಚರಾದಿ ಗೃಹ್ಯತಾಮ್ ॥ ೩೮ ॥

ಮಯೂಖಮಾಲಿಮಂಡಲೇ ನಿಧಾಯ ಪಾದಮುಗ್ರಯಾ

ಮಯೂಖಶಕ್ತಿರೂಪಯಾ ತ್ವಯಾಽಂಬ ಚೇಷ್ಟಮಾನಯಾ ।

ಖಕೋಶತಃ ಸಮಾಹೃತೈಃ ಪುನಸ್ತ್ರಿರೂಪರೇಣುಭಿ-

ರ್ವ್ಯಧಾಯಿ ಮಂಗಳಾದಿಭಿಃ ಸಹ ಗ್ರಹೈರಿಯಂ ಮಹೀ ॥ ೩೯ ॥

ವಿಸರ್ಜನೇನ ಭೂಯಸಾಽಪಿ ದೇವ್ಯತೃಪ್ತಯೇಯತಾ

ವಿಚೇಷ್ಟಿತಂ ವಿಲಕ್ಷಣಂ ಪುನರ್ವ್ಯಧೀಯತ ತ್ವಯಾ ।

ಇಹಾಂತರೇ ವಸುಂಧರಾಮಯೂಖಮಾಲಿಬಿಂಬಯೋ-

ರಮುಷ್ಯ ಕರ್ಮಣಃ ಸವಿತ್ರಿ ಚಂದ್ರಮಂಡಲಂ ಫಲಮ್ ॥ ೪೦ ॥

ವಧೂಪುಮಾಕೃತೀ ತತೋ ಬಭೂವಥುರ್ಯುವಾಂ ಶಿವೇ

ತ್ವಮೀಶ್ವರಶ್ಚ ಲೀಲಯಾ ವಿಹರ್ತುಮತ್ರ ವಿಷ್ಟಪೇ ।

ಅಹೋ ಪ್ರಭುಂ ನಭಸ್ತನುಂ ತ್ವದೀಯಗರ್ಭಸಂಭವಾದ್-

ಭಣಂತಿ ಕಾಲಿ ತತ್ರ ಚಿತ್ರಭಾಷಣಾಸ್ತ್ವದಾತ್ಮಜಮ್ ॥ ೪೧ ॥

ಪುಮಾನಥೋ ಸ ಬಿಂಬತೋ ಹಿರಣ್ಮಯೋ ದಿವಾಕರೇ

ಧಿಯಾಽಪಿ ನೈವ ಕೇವಲಂ ಹಿರಣ್ಮಯೇನ ವರ್ಮ್ಮಣಾ ।

ಇದಂ ತು ಕಾರ್ಯರೂಪಮನ್ಯದुಚ್ಯತೇ ಬುಧೈಃ ಪ್ರಭೋ-

ರಿಹಾಂತರೇ ನೃಣಾಂ ಪುನರ್ವಪುಸ್ತದಂಬ ಬಿಂಬಿತಮ್ ॥ ೪೨ ॥

ಸ್ವಯಂ ಚ ಕಾಂಚನಪ್ರಕಾಶವರ್ಷ್ಮಣಾ ಪ್ರಭಾಕರೇ

ತಥಾಽಂತರೇ ನೃಣಾಂ ಚ ತಸ್ಯ ಬಿಂಬಿತಾಽಸಿ ಸನ್ನಿಧೌ ।

ರಸಸ್ಯ ದೇವತಾಽಸಿ ದೇವಿ ಪುಷ್ಕರೇ ದಿವಾಕರೇ

ಮಯೂಖದೇವತಾಽಸಿ ಭೋಗದೇವತಾಽಸಿ ದೇಹಿಷು ॥ ೪೩ ॥

ವಿಸರ್ಜನೇನ ಭೂಯಸಾ ನಭಸ್ಯಮುತ್ರ ಭಾಸ್ಕರೇ

ಮಹೀಷು ಚಾಂಬಿಕೇ ಯುವಾಂ ವಿಧಾಯ ದೇಹಿನೋ ಬಹೂನ್ ।

ಕ್ಷಿತೇಃ ಸುಧಾಕರಂ ಗತಾನ್ ಪಿತೄನ್ ವಿನೇತುಮವ್ಯಯೇ

ತನೂ ಚ ತತ್ರ ಬಭ್ರಥುಃ ಪ್ರಪಂಚರಾಜ್ಞಿ ಮಾಯಯಾ ॥ ೪೪ ॥

ನಭೋಽಂತರೇ ಹಿರಣ್ಮಯಂ ವಿಭುಂ ಪ್ರಚಕ್ಷತೇ ಹರಂ

ದಿನೇಶಬಿಂಬಬಿಂಬಿತಂ ಭಣಂತಿ ಪಂಕಜಾಸನಮ್ ।

ಇಹಾಸ್ಮದಂತರಾಲಯಂ ವದಂತಿ ವಿಷ್ಣುಮಚ್ಯುತಂ

ಸವಿತ್ರಿ ಜನ್ಮಿನಾಮಿಯಂ ತ್ರಿಮೂರ್ತಿವಾದಿಧೋರಣೀ ॥ ೪೫ ॥

ನಭೋಽಂತರೇ ಪ್ರಚಕ್ಷತೇ ಹಿರಣ್ಮಯಾಂಗಮೀಶ್ವರಂ

ದಿನೇಶಬಿಂಬಪೂರುಷಂ ಹಿರಣ್ಯಗರ್ಭಮಾಖ್ಯಯಾ ।

ವಿರಾಜಮಾನಮಕ್ಷರಂ ವಿರಾಜಮಂತರೇ ನೃಣಾಂ

ಸವಿತ್ರಿ ತತ್ತ್ವವೇದಿನಾಮಿಯಂ ತು ನಾಮಕಲ್ಪನಾ ॥ ೪೬ ॥

ಹಿರಣ್ಮಯಾಂಗಮಂಬರೇ ವದಂತಿ ಸೋಮಮಂಬಿಕೇ

ದಿವಾಕರಸ್ಯ ಮಂಡಲೇ ತು ಬಿಂಬಿತಂ ಪುರಂದರಮ್ ।

ಶರೀರಿಣಾಮಿಹಾಂತರೇಽಗ್ನಿಮಾಲಪಂತಿ ಭಾಸುರಂ

ಚಿರಂತನೋಕ್ತಿದರ್ಶಿನಾಮಿಯಂ ಶಿವೇ ಪ್ರಣಾಲಿಕಾ ॥ ೪೭ ॥

ಸರೋರುಹಾಕ್ಷವಾಗ್ವಧೂಮನೋಹರೌ ತು ಪೂರ್ವವ-

ತ್ಸುಧಾಂಶುಬಿಂಬಪೂರುಷಸ್ತು ರುದ್ರಸಂಜ್ಞಕಃ ಶಿವೇ ।

ಹಿರಣ್ಮಯೋಽಂತರಿಕ್ಷಜಾತ ಈಶ್ವರಃ ಸದಾಶಿವಃ

ಸದೇವ ವಸ್ತು ಕಾಂಚನಾಂಗಿ ಪಂಚಮೂರ್ತಿವಾದಿನಾಮ್ ॥ ೪೮ ॥

ಪ್ರಭೋಃ ಪ್ರಮಾಽಽದಿತಸ್ತತಃ ಪ್ರಮಾವತೀ ಸ್ವಯಂ ಪೃಥಗ್

ವಿಹಾಯಸಾ ಶರೀರಿಣೀ ಪ್ರಭೌ ತತೋ ಹಿರಣ್ಮಯೇ ।

ಹಿರಣ್ಮಯಾಂಗನಾಕೃತಿರ್ನಭೋಽಂತರೇ ಚ ಭಾಸ್ಕರೇ

ತಥಾಽಂತರೇಷು ದೇಹಿನಾಂ ಮಹೇಶ್ವರೀ ಜಯತ್ಯುಮಾ ॥ ೪೯ ॥

ಮದೀಯಮಂಬಿಕಾಽಖಿಲಸ್ಯ ವಿಷ್ಟಪಸ್ಯ ದುಷ್ಟಧೀ-

ದವಿಷ್ಠಪಾದಪಂಕಜಾ ಧುನೋತು ಕಷ್ಟಜಾಲಕಮ್ ।

ಇಮೇ ಚ ಕೋಮಲೈಃ ಪದೈರಮೂಲ್ಯತಲ್ಪಶಾಲಿನ-

ಸ್ತದೀಯಮಂಚರೂಪತಾಂ ಭಜಂತು ಪಂಚಚಾಮರಾಃ ॥ ೫೦ ॥