॥ ದ್ವಿತೀಯಂ ಶತಕಮ್ ॥

॥ ಪಂಚಮಃ ಸ್ತಬಕಃ – ಉಪಜಾತಿವೃತ್ತಮ್ ॥

ಪರಿಣಯಃ

ಶ್ರೀಖಂಡಚರ್ಚಾಮಿವ ಕಲ್ಪಯಂತ್ಯೋ ಮುಹುಃ ಕಪೋಲೇಷು ಸಖೀಜನಸ್ಯ ।

ಶ್ರೀಕಂಠಕಾಂತಾಹಸಿತಾಂಕುರಾಣಾಂ ಶ್ರೀಮಂತಿ ಕುರ್ವಂತು ಜಗಂತಿ ಭಾಸಃ ॥ ೧೦೧ ॥

ಕೀರ್ತಿರ್ವಲಕ್ಷಾ ಕುಸುಮಾಯುಧಸ್ಯ ಸ್ವರ್ಣಾದ್ರಿಕೋದಂಡಜಯೋನ್ನತಸ್ಯ ।

ದರಸ್ಮಿತಶ್ರೀರ್ದ್ವಿರದಾಸ್ಯಮಾತುರ್ದ್ರಾಘೀಯಸೀಂ ವೋ ವಿತನೋತು ಭೂತಿಮ್ ॥ ೧೦೨ ॥

ಪ್ರಮಥ್ಯಮಾನಾಮೃತರಾಶಿವೀಚಿಪ್ರೋದ್ಗಚ್ಛದಚ್ಛಾಚ್ಛತುಷಾರಕಲ್ಪಾಃ ।

ಯುಷ್ಮಾಕಮಿಚ್ಛಾಂ ವಿದಧತ್ವಮೋಘಾಂ ವಿಘ್ನೇಶಮಾತುರ್ದರಹಾಸಲೇಶಾಃ ॥ ೧೦೩ ॥

ಚಂದ್ರಾತಪಃ ಕಶ್ಚನ ಸಂಪ್ರಸನ್ನೋ ಮಹೇಶನೇತ್ರಾತಿಥಿತರ್ಪಣೋ ನಃ ।

ಮನೋಭಿಲಾಷಂ ಸಫಲೀಕರೋತು ಮಹೇಶ್ವರೀಹಾಸಲವಪ್ರಕಾಶಃ ॥ ೧೦೪ ॥

ವಲಕ್ಷವಕ್ಷೋಜಪಟಾಂಚಲೇನ ಚಲೇನ ಸಾರ್ಧಂ ಕೃತಕೇಲಯೋ ನಃ ।

ಪುರತ್ರಯಾರಾತಿಕಲತ್ರಹಾಸಭಾಸೋ ನಿರಾಸಂ ವಿಪದಾಂ ಕ್ರಿಯಾಸುಃ ॥ ೧೦೫ ॥

ಭೂಯಾಸುರಾಯಾಸಹರಾಣಿ ತಾನಿ ಸ್ಮಿತಾನಿ ಭೂತೇಶಮೃಗೀದೃಶೋ ನಃ ।

ಯೇಷಾಂ ತ್ವಿಷೋ ಬಿಭ್ರತಿ ದಿಗ್ವಧೂಟೀಗಂಡೇಷು ಕರ್ಪೂರಪರಾಗಲೀಲಾಮ್ ॥ ೧೦೬ ॥

ಕುರ್ವಂತು ಕಾಮಂ ಸಫಲಂ ಮದೀಯಂ ಕುಲಾದ್ರಿಕನ್ಯಾಹಸಿತಾನಿ ತಾನಿ ।

ಯೇಷಾಂ ಮಯೂಖೈಃ ಕ್ರಿಯತೇ ಸಿತಾದ್ರೇರುದ್ಯಾನವಾಟೀಷು ನವೋ ವಸಂತಃ ॥ ೧೦೭ ॥

ಆಮ್ರೇಡಿತಂ ಭೂಷಣಚಂದ್ರಭಾಸಾಂ ನಾಸಾವಿಭೂಷಾಮಹಸಾಂ ದ್ವಿರುಕ್ತಿಃ ।

ಪುರಾರಿನಾರೀಸ್ಮಿತಕಾಂತಯೋ ಮೇ ಪೂರ್ಣಾನಿ ಕುರ್ವಂತು ಸಮೀಹಿತಾನಿ ॥ ೧೦೮ ॥

ನಿರ್ಮಾಯ ವಿಶ್ವಾಲಯಮಂಬ ಶರ್ವಸ್ತ್ವಯಾ ಸಮಂ ಶಿಲ್ಪವಿದಾ ಸ ಶಿಲ್ಪೀ ।

ವಿಹರ್ತುಮಿಚ್ಛನ್ನಯಿ ವೋಢುಮೈಚ್ಛನ್ನಾರೀಂ ಭವಂತೀಂ ಪುರುಷೋ ಭವಂಸ್ತ್ವಾಮ್ ॥ ೧೦೯ ॥

ದಿವ್ಯಂ ದುಕೂಲಂ ಧವಲಂ ದಧಾನಾ ವೇಣ್ಯಾ ಫಣೀಂದ್ರೋಪಮಯಾ ಲಸಂತೀ ।

ಪ್ರಫುಲ್ಲರಾಜೀವವಿಲೋಚನಾ ತ್ವಂ ಪ್ರಪಂಚಭರ್ತುರ್ನಯನಾನ್ಯಹಾರ್ಷೀಃ ॥ ೧೧೦ ॥

ಪ್ರತ್ಯಂಗಬಂಧಂ ಜ್ವಲದುತ್ತಮಂ ತೇ ಭುಜಂಗರಾಜೋಪಮವೇಣಿರೂಪಮ್ ।

ಆತ್ಮೈಕನಿಷ್ಠಸ್ಯ ಚ ವಿಶ್ವಭರ್ತುರಾರಾಧಯಾಮಾಸ ವಿಲೋಚನಾನಿ ॥ ೧೧೧ ॥

ಅಭೂಸ್ತ್ವಮಾದ್ಯಸ್ಯ ಮನೋಮದಾಯ ಸ ಚಾಪಿ ತೇ ಪ್ರೀತಿಪದಂ ಬಭೂವ ।

ನ ಕೇವಲಂ ವಾಂ ಸಕಲಸ್ಯ ಚಾಸೀದ್ದಾಂಪತ್ಯಬಂಧಸ್ಯ ತದಂಬ ಬೀಜಮ್ ॥ ೧೧೨ ॥

ತವಾತಿಕಾಂತಾ ನಯನಾಂತವೃತ್ತಿರ್ಹಾಸಃ ಪುರಾರೇಶ್ಚ ನವೇಂದುಹಾರೀ ।

ಉಭೌ ವಿವಾಹೋತ್ಸವಪೂರ್ವರಂಗಂ ನಿರ್ವರ್ತಯಾಮಾಸತುರಾದಿರಾಮೇ ॥ ೧೧೩ ॥

ದಾತುಂ ಪ್ರಭುಃ ಸಾಂತ್ವಯಿತುಂ ಸಮರ್ಥಃ ಕರ್ತುಂ ಕ್ಷಮಸ್ತರ್ಜಯಿತುಂ ಚ ಶಕ್ತಃ ।

ಸಂರಕ್ಷತಾನ್ಮಾಂ ತವ ಸರ್ವವಂದ್ಯೇ ಕರಸ್ತುಷಾರಾಂಶುಭೃತಾ ಗೃಹೀತಃ ॥ ೧೧೪ ॥

ಸ್ಪ್ರಷ್ಟುಂ ನ ಶಕ್ಯಾ ಪರಮೇ ಪರೈಸ್ತ್ವಂ ಸ ಚಾನ್ಯಯಾ ಚಿಂತಯಿತುಂ ನ ಶಕ್ಯಃ ।

ತ್ವಮೇವ ಶರ್ವಸ್ಯ ಸ ಏವ ತೇಽಂಬ ದಾಂಪತ್ಯಮೇವಂ ಯುವಯೋಸ್ತು ಸತ್ಯಮ್ ॥ ೧೧೫ ॥

ನಿಜಾದ್ವತಂಸೇಂದುತ ಇಂದುಮನ್ಯಮುತ್ಪಾದ್ಯ ತೇ ಶಂಭುರದಾದ್ವತಂಸಮ್ ।

ಮೂರ್ತಾಮಿವಾಸೌ ಶುಭಗಾತ್ರಿ ರಾತ್ರಿಂ ಪ್ರಾಪ್ಯ ತ್ವದೀಯಾಂ ಕಬರೀಂ ಚಕಾಸೇ ॥ ೧೧೬ ॥

ಬಭೂವಿಥಾಗೇಂದ್ರಗೃಹೇ ಯದಾ ತ್ವಂ ಸ ಚೇಶ್ವರಸ್ತತ್ರ ಚಕಾರ ವಾಸಮ್ ।

ವಿಲೋಕಮಾನಸ್ತವ ದೇವಿ ವಿದ್ಯುತ್ ಪಾಂಚಾಲಿಕಾಯಾಃ ಕಮನೀಯಭಾವಮ್ ॥ ೧೧೭ ॥

ಸಿದ್ಧಂ ಸ ವಾಂ ಸಾಧಯಿತುಂ ಪ್ರವೃತ್ತೋ ಯೋಗಂ ಪ್ರದಗ್ಧೋ ಮದನಶ್ಚ ಕಲ್ಪೇ ।

ವಶೀತಿ ಕೀರ್ತಿಂ ಗಿರಿಶಸ್ಯ ಭರ್ತುಂ ತುಭ್ಯಂ ತ್ವಪರ್ಣೇತಿ ಯಶಶ್ಚ ಕರ್ತುಮ್ ॥ ೧೧೮ ॥

ಘೋರಂ ತಪಶ್ಚದ್ರಚಿತಂ ತ್ವಯಾಽಪಿ ಪ್ರಾಗ್ರೂಪಭರ್ತುಃ ಸಮನುಗ್ರಹಾಯ ।

ವಿಹಾಯ ಯತ್ನಂ ಕ ಇಹಾಖಿಲಾಽಂಬ ಸಂಬಂಧಮಪ್ಯರ್ಥಮುಪೈತು ಜಂತುಃ ॥ ೧೧೯ ॥

ಜ್ವಲತ್ಕಪರ್ದೋ ದಹನಾಂಕಭಾಲಃ ಕಪಾಲಮಾಲೀ ಕರಿಕೃತ್ತಿವಾಸಾಃ ।

ಭುಜಂಗಭೂಷೋ ಭಸಿತಾಂಗರಾಗಃ ಪುಷ್ಪೇಷು ವೈರೀ ಪರುಷಾಟ್ಟಹಾಸಃ ॥ ೧೨೦ ॥

ಶ್ಮಶಾನವಾಸೀ ಪುರುಷಸ್ತ್ರಿಶೂಲī ಜಹಾರ ತೇ ಚೇದನಘಾಂಗಿ ಚೇತಃ ।

ದೃಷ್ಟಾಂತಮರ್ಥೋಽಯಮವಾಪ ನೈವ ಪ್ರೀತಿರ್ಬಹಿಃಕಾರಣಮಾಶ್ರಿತೇತಿ ॥ ೧೨೧ ॥

ರೂಪಂ ಪುರಾರೇರಥವಾ ತದೇತತ್ ಸೇಯಂ ಚ ಚೇಷ್ಟಾ ಸಮಯಾಂತರೇಷು ।

ಕಾಂತಂ ವಪುಃ ಕಾಂತತರಾಶ್ಚ ಲೀಲಾಸ್ತ್ವಯಾ ಸಮಂ ಖೇಲಿತುಮೇಷ ಧತ್ತೇ ॥ ೧೨೨ ॥

ಪ್ರಹೃಷ್ಟಯಕ್ಷಃ ಸಮವೇತಸಿದ್ಧೋ ನೃತ್ಯದ್ಗಣೇಂದ್ರೋ ವಿಕಸನ್ಮುನೀಂದ್ರಃ ।

ಭೂಯೋಽಪಿ ಯೋಗೋ ಯುವಯೋರ್ಹಿಮಾದ್ರೌ ಬಭಾರ ಮಾತರ್ಮಹಮದ್ವಿತೀಯಮ್ ॥ ೧೨೩ ॥

ಮಹೇಶ್ವರಸ್ತ್ವಾಂ ಪರಿಣೀಯ ಲೇಭೇ ಯಾವಾತ್ಮಜೌ ದ್ವಾವನಘಾಂಗಿ ಮುಖ್ಯೌ ।

ಏಕಸ್ತಯೋರ್ಭಾಮ್ಯತಿ ವಿಶ್ವಮತ್ತುಂ ಭೂಭೃತ್ತಟೀರಾಶ್ರಯತೇ ಬತಾನ್ಯಃ ॥ ೧೨೪ ॥

ಸಂಕೀರ್ತಯಂತ್ಯೋ ಜಗತಾಂ ಜನನ್ಯಾಃ ಕಲ್ಯಾಣವಾರ್ತಾಃ ಕಮನೀಯಕೀರ್ತೇಃ ।

ಇಮಾಃ ಪ್ರಮೋದಾಯ ಸತಾಂ ಭವಂತು ಸಂದರ್ಭಶುದ್ಧಾ ಉಪಜಾತಯೋ ನಃ ॥ ೧೨೫ ॥