॥ కావ్యకణ్ఠ వాసిష్ఠ శ్రీగణపతిముని విరచితమ్ హేరంభోపస్థానం ॥

ప్రథమ ఖండ: - శశివదనావృత్తం

శ్రియమసమానాం మమ శుభనామా ।

దిశతు గణానాం పతిరతిథామా ॥ 1

విజితజరాధిం వినిహత రోగమ్ ।

ద్విరదముఖో మే వితరతు యోగమ్ ॥ 2

వితరతు మహ్యం నిజపదభక్తిమ్ ।

గణపతిరగ్ర్యామపి భుజశక్తిమ్ ॥ 3

హరతనయో మే విభురతిహృద్యాం ।

వితరతు భూత ప్రవిమల విద్యాం ॥ 4

మమ కరివక్త్ర: ప్రభురనవద్యాం ।

దిశతు భవిష్యద్విదమురువిద్యాం ॥ 5

నిజవిషయాజిష్వఘహిమభానో ।

ఇమమవిజేయం కురు హరసూనో ॥ 6

సుమధురమాధ్వీధరపదజాతం ।

కరిముఖ దాసం కురు కవిమేతం ॥ 7

గణపతిరూపం మనసి కరోమి ।

గణపతికీర్తిం వచసి తనోమి ॥ 8

మమ గణనాథ: శమయతు పాపం ।

సపది విముష్ణాత్వపి పరశాపం ॥ 9

శశివదనానం నవకృతిరేషా ।

భజతు గణేశం పతిమివ యోషా ॥ 10

ద్వితీయ ఖండః - మదలేఖావృత్తం

ఆహా ప్రాజ్ఞజనస్థ్వాo మూలాధార నిశాన్తమ్ ।

మన్దే సుప్తమిభాస్య జ్ఞే యుక్తే విలసన్తమ్ ॥ 11

అస్తి వ్యోమ్ని గురుర్యస్తస్యైవ త్వమిహాసి ।

విఘ్నేశానవివర్త: సద్భక్తేషు విభాసి ॥ 12

కోऽపి ప్రాభవశాలీ మూలాధారవిహారీ ।

ప్రజ్ఞాసిద్ధివధూభ్యాం శ్లిష్టో భాత్యఘహారీ ॥ 13

ఆశా మే తవ శక్తిం దేహే ద్రష్టుమపారం ।

పాతుం చేశ్వరసూనో మూర్ధన్యామృతధారామ్ ॥ 14

యా చిత్ సా తవ మాతా య: శ్రేష్ఠః స పితా తే ।

సిద్ధిర్బాహ్యమతిర్యే తే నాథ ప్రమదే తే ॥ 15

యా లిప్సా హృదయే మే తాం పూర్ణాం కురు మా వా ।

ఏషాఙ్గీక్రియతాం మే మత్తేభానన సేవా ॥ 16

నా ఖే యాతి సురో వా త్వం చేత్ కిఞ్చిదుదాస్యం ।

ఆధారే విదధాసి స్కన్దస్యాగ్రజ లాస్యమ్ ॥ 17

న స్వార్థే మమ యత్నో నిస్స్వార్థే మమ సోऽయమ్ ।

ఉద్యోగ: శివసూనో సద్యో దేహి సహాయమ్ ॥ 18

మాహాత్మ్యం నను వక్తుం క: శక్త: పురుషస్తే ।

హస్తీన్ద్రానన భాగ్యం సర్వేషాం తవ హస్తే ॥ 19

ఏతా: సమ్మదకర్త్రీ: హైరంబీర్మదలేఖా: ।

సేవన్తాం కవిభృంగాశ్చాంద్రీర్భా ఇవ లేఖా: ॥ 20

తృతీయ: ఖండః - ఇంద్ర వజ్రావృత్తం

ఏకాదశానాం ప్రవరం సుతానాం రుద్రస్య మంత్రాధిపతిం నమామి ।

శాస్త్రాణి సర్వాణ్యపి యస్య కీలా: సూర్యానపోహ్యం తిమిరం హరన్తి ॥ 21

ప్రాజ్ఞేన బుద్ధ్యా యదకారి పద్యం సాధారణస్తత్ర తవోపకార: ।

హేరంబ యన్మంత్రమృషిశ్చకార వ్యక్తో విశిష్టస్తవ తత్ర యత్న: ॥ 22

జిహ్వా స్థలం నాథ విగాహమానం త్వామాహురు‌చ్చిష్టమయి ఛలోక్త్యా ।

ఉచ్చిష్టతా చేత్తవ రుద్రసూనో స్వాధ్యాయనిష్ఠీవనయోర్భిదా కా ॥ 23

సర్వాణి ధాన్యాని చ భక్షయన్తం దన్తై: శితైర్దేవ సహాయవన్తమ్ ।

ఏతం బిలస్థం రసనాహ్వయం తే వాహం విదో మూషికమామనన్తి ॥ 24

ఆధారచక్రే వసతో గణేశ జ్యోతిర్మయాణోర్జ్వలత: సదా తే ।

ఏక: పచత్యన్నమశేషమూష్మా సంప్రేరయత్యన్య ఇమాస్తు వాచ: ॥ 25

వైశ్వానరోऽగ్ని: సకలస్య జీవో వాగింద్రియాగ్ని: శివనన్దన త్వమ్ ।

యో వేద నైవం యువయోర్విభేదం పిణ్డేషు నా ముహ్యతి స ప్రసంగే ॥ 26

త్వాం బ్రహ్మణస్పత్యభిధానమాహు: కేచిద్విభోరీశ పదశ్య పుత్రమ్ ।

అన్యైర్బ్రుహస్పత్యభిధాన ఉక్తో ధీరైర్విభోరింద్రపదస్య మంత్రీ ॥ 27

జిహ్వైవ వేదిస్తవ తోయపూతా లోకప్రసంగస్తవ తత్ర ధూమ: ।

జ్వాలా జగన్నాథకథా పవిత్రా చేతో ఘృతం జుహ్వతి యత్ర సన్త: ॥ 28

విద్యున్మయీమూర్తిరగాది జిష్ణోర్యా మౌనిభిః సైవ తవ స్వరూపమ్ ।

ఇంద్రస్య భేదస్తవ చోదితో య: స ప్రాణవిద్యుత్తనుభేదమూల: ॥ 29

దివ్యాగ్నిగాత్రం ధిషణా కళత్రం భర్గస్య పుత్రం ప్రణతస్య మిత్రమ్ ।

వాసిష్ఠ వాగగ్నిఋచో భజన్తామేతా: కరీంద్రాననమింద్రవజ్రా: ॥ 30

చతుర్థ ఖండ: - వసంతతిలకా వృత్తం

కిం బృంహితాని కురుషే కలుషే భగ్నే మగ్నే మహావిపది దేవ నిజే వివర్తే ।

నిద్రామి చేద్వరద బోధయ హస్తఘాతాద్గచ్ఛామి చేదపథమాశు నివర్తయస్వ ॥ 31

వేషస్తవాయమపరో యది దేవ నాట్యమారభ్యతాం తదుచితం కిముపైషి మౌనమ్ ।

ఏతాం ప్రభో యవనికామపసారయంతు సాక్షాద్గణాస్తవ కుత: క్రియతే విలంబ: ॥ 32

ఏతత్తమో నయనశక్తిహరం గుహాయాం మార్గం రుణద్ధి న విలోకితుమస్మి శక్త: ।

స్నేహోస్తి కాచన దశాస్తి విభో కటాక్షజ్యోతిర్లవం సదయ దేహి పురో వ్రజేయం ॥ 33

ఘోరం కరోమి న తపో యది తేऽపరాథ: కిం ప్రేరణం న కృతవానసి రుద్రసూనో ।

సంప్రేరితశ్చ భవతా యది నాచరేయం సంప్రేరణస్య తవ కా గజవక్త్ర శక్తి: ॥ 34

కార్యం న మే కిమపి తత్ ఖలు నిర్జరాణాం రూపం న మే కిమపి తత్తవ కోపి వేష: ।

ఇష్టం ను కష్టమథ కస్య కరీంద్రవక్త్ర శిష్టం తు మే కిమపి నామ నరాంగసంగీ ॥ 35

నామాపి తత్తవ భవత్యథవా గజాస్య చర్చా వినశ్వర తమే తనుకంచుకే కా ।

విష్ణోరివేందుధవళం భవితా యశశ్చేత్ తద్దంతకాంతిషు తవైవ లయం ప్రయాతు ॥ 36

స్థూలాం తనూమసుమశేషమనోరథానాం స్థానం మనశ్చ ధిషణాం ప్రమదం చ మూలం ।

ఆక్రమ్య కోశమఖిలం చ విభో ఖలారే విఘ్నాధిరాజ మయి దర్శయ తే విభూతిం ॥ 37

దేవీ మతిర్జలజపత్రవిశాలనేత్రా దేవీ చ సిద్ధిరకళంకసుధాకరాస్యా ।

ఛాయోష్ణతా చ దిననాథమివ జ్వలన్తం నిత్యం భవంతమిభవక్త్ర విభో భజే తే ॥ 38

సిద్ధేంద్రవేషభృతి భూమిహితాయ రుద్రే కైలాసశైలమధితిష్ఠతి వజ్రపాణి: ।

ధృత్వా గజేంద్రముఖవేషమముష్య పుత్రో భూత్వా విభుర్నయతి పారిషదానశేషాన్ ॥ 39

సమ్మొదయంతు హృదయం ద్విరదాననస్య దేవస్య సిద్ధిధిషణా హృదయేశ్వరస్య ।

ఏతా వసంతతిలకా: కవికుంజరేణ గీతా: కయాऽప్యమలభావనయా యుతేన ॥ 40

॥ ఇతి శ్రీ భగవాన్మహర్షి రమణాంతే వాసినో

వాసిష్టస్య నరసింహ సునునో గణపతే: కృతా హేరంభోపస్థానం సంపూర్ణం ॥