॥ ಪಂಚಮಂ ಶತಕಮ್ ॥

॥ ಸಪ್ತದಶಃ ಸ್ತಬಕಃ - ಚಂಪಕಮಾಲಾವೃತ್ತಮ್ ॥

ಮದಕರೀಶಕ್ತಿಃ

ಪಾಪವಿಧೂತೌ ನಿರ್ಮಲಗಂಗಾ ತಾಪನಿರಾಸೇ ಚಂದ್ರಮರೀಚಿಃ ।

ಭರ್ಗಪುರಂಧ್ರೀಹಾಸಕಲಾ ಮೇ ಭದ್ರಮಮಿಶ್ರಂ ಕಾಽಪಿ ಕರೋತು ॥ ೪೦೧ ॥

ಶಿಷ್ಟಕುಲಾನಾಂ ಸಮ್ಮದಯಿತ್ರೀ ದುಷ್ಟಜನಾನಾಂ ಸಂಶಮಯಿತ್ರೀ ।

ಕಷ್ಟಮಪಾರಂ ಪಾದಜುಷೋ ಮೇ ವಿಷ್ಟಪರಾಜ್ಞೀ ಸಾ ವಿಧುನೋತು ॥ ೪೦೨ ॥

ನೂತನಭಾಸ್ವದ್ಬಿಂಬನಿಭಾಂಘ್ರಿಂ ಶೀತಲರಶ್ಮಿದ್ವೇಷಿಮುಖಾಬ್ಜಾಮ್ ।

ಖ್ಯಾತವಿಭೂತಿಂ ಪುಷ್ಪಶರಾರೇಃ ಪೂತಚರಿತ್ರಾಂ ಯೋಷಿತಮೀಡೇ ॥ ೪೦೩ ॥

ಉಜ್ಜ್ವಲತಾರೇ ವ್ಯೋಮ್ನಿ ಲಸಂತೀ ಸಾರಸಬಂಧೌ ಭಾತಿ ತಪಂತೀ ।

ಶೀತಲಭಾಸಾ ಚಿಂತನಕರ್ತ್ರೀ ಪಾತು ಕುಲಂ ಮೇ ವಿಷ್ಟಪಭರ್ತ್ರೀ ॥ ೪೦೪ ॥

ಪ್ರಾಣಮನೋವಾಗ್ವ್ಯಸ್ತವಿಭೂತಿರ್ಲೋಕವಿಧಾತುಃ ಕಾಚನ ಭೂತಿಃ ।

ಪುಷ್ಕರಪೃಥ್ವೀಪಾವಕರೂಪಾ ಶುಷ್ಕಮಘಂ ನಃ ಸಾ ವಿದಧಾತು ॥ ೪೦೫ ॥

ಇಷ್ಟಫಲಾನಾಮಂಬ ಸಮೃದ್ಧ್ಯೈ ಕಷ್ಟಫಲಾನಾಂ ತತ್ಕ್ಷಣಧೂತ್ಯೈ ।

ಚೇಷ್ಟಿತಲೇಶೋದ್ದೀಪಿತಶಕ್ತಿಂ ವಿಷ್ಟಪಭರ್ತ್ರೀ ತ್ವಾಮಹಮೀಡೇ ॥ ೪೦೬ ॥

ಭೂಮಿರುಹಾಗ್ರಸ್ಥಾಪಿತಭಾಂಡಾದ್ಯೋ ಮಧು ಪಾಯಂ ಪಾಯಮಜಸ್ರಮ್ ।

ವಿಸ್ಮೃತವಿಶ್ವೋ ನಂದತಿ ಮಾತಸ್ತತ್ರ ಕಿಲ ತ್ವಂ ಧಾಮ ದಧಾಸಿ ॥ ೪೦೭ ॥

ಕೋಽಪಿ ಸಹಸ್ರೈರೇಷ ಮುಖಾನಾಂ ಶೇಷ ಇತೀಡ್ಯಃ ಪನ್ನಗರಾಜಃ ।

ಉದ್ಗಿರತೀದಂ ಯದ್ವದನೇಭ್ಯೋ ದೇವಿ ತನೌ ಮೇ ತದ್ಬತ ಪಾಸಿ ॥ ೪೦೮ ॥

ಸಾಕಮಮೇಯೇ ದೇವಿ ಭವತ್ಯಾ ಪಾತುಮಹಂತಾ ಯಾವದುದಾಸ್ಯಾ ।

ತಾವದಿಯಂ ತಾಂ ಮೂರ್ಛಯತೀಶೇ ಪನ್ನಗರಾಜೋದ್ಗಾರಜಧಾರಾ ॥ ೪೦೯ ॥

ಶಾಮ್ಯತಿಚಿಂತಾಜೀವಿತಮಸ್ಯಾಮಿಂದ್ರಿಯಸತ್ತಾಽಪ್ಯಸ್ತಮುಪೈತಿ ।

ಯಾತಿ ನಿರುದ್ಧಾ ಹಾ ಗಲದೇಶೇ ಸಂಶಯಮೇಷಾ ಮಾತರಹಂತಾ ॥ ೪೧೦ ॥

ಗೌರಿ ಮಹೇಶಪ್ರಾಣಸಖೀ ಮಾಂ ಪಾಹಿ ವಿಪನ್ನಾಂ ಮಾತರಹಂತಾಮ್ ।

ಸಾ ಯದಿ ಜೀವೇದೀಶ್ವರಿ ತುಭ್ಯಂ ದಾಸಜನಸ್ತಾಮರ್ಪಯತೇಽಯಮ್ ॥ ೪೧೧ ॥

ತ್ವತ್ಸ್ಮೃತಿವೀರ್ಯಾಚ್ಛಾಂತಿಸಮೃದ್ಧಾಂ ಮಾತರಹಂತಾಂ ಶುದ್ಧತಮಾಂ ಮೇ ।

ಆತ್ಮಭುಜಿಷ್ಯಾಂ ಕರ್ತುಮಿದಾನೀಂ ಶಾಂತಧಿಯಸ್ತೇ ಕೋಽಸ್ತಿ ವಿಕಲ್ಪಃ ॥ ೪೧೨ ॥

ಮಂದರಧಾರೀ ನಾಮೃತಹೇತುರ್ವಾಸುಕಿರಜ್ಜುರ್ನಾಮೃತಹೇತುಃ ।

ಮಂಥನಹೇತುಸ್ಸಾಽಮೃತಹೇತುಃ ಸರ್ವಬಲಾತ್ಮಾ ಶರ್ವಪುರಂಧ್ರೀ ॥ ೪೧೩ ॥

ಪ್ರಾಣಿಶರೀರಂ ಮಂದರಶೈಲೋ ಮೂಲಸರೋಜಂ ಕಚ್ಛಪರಾಜಃ ।

ಪೂರ್ಣಮನಂತಂ ಕ್ಷೀರಸಮುದ್ರಃ ಪೃಷ್ಠಗವೀಣಾ ವಾಸುಕಿರಜ್ಜುಃ ॥ ೪೧೪ ॥

ದಕ್ಷಿಣನಾಡೀ ನಿರ್ಜರಸೇನಾ ವಾಮನನಾಡೀ ದಾನವಸೇನಾ ।

ಶಕ್ತಿವಿಲಾಸೋ ಮಂಥನಕೃತ್ಯಂ ಶೀರ್ಷಜಧಾರಾ ಕಾಽಪಿ ಸುಧೋಕ್ತಾ ॥ ೪೧೫ ॥

ಕಂಠನಿರುದ್ಧೇ ಭೂರಿ ವಿಷಾಗ್ನೌ ತೈಜಸಲಿಂಗಾವಾಸಿಹರೇಣ ।

ತ್ವದ್ಬಲಜಾತಂ ಸ್ವಾದ್ವಮೃತಂ ಕೋ ದೇವಿ ನಿಪೀಯ ಪ್ರೇತ ಇಹ ಸ್ಯಾತ್ ॥ ೪೧೬ ॥

ಯೇನ ವಿಭುಸ್ತೇ ಮಾದ್ಯತಿ ಶರ್ವೋ ಯತ್ರ ಶಿವೇ ತ್ವಂ ಕ್ರೀಡಸಿ ದೃಷ್ಟಾ ।

ಸಮ್ಮದಮೂಲಂ ತಂ ಮದಮಾದ್ಯೇ ವರ್ಧಯ ಪುತ್ರೇಽನುಗ್ರಹಪಾತ್ರೇ ॥ ೪೧೭ ॥

ಯೋ ಮದಮೀದೃಙ್ಮಾರ್ಗಮುಪೇಕ್ಷ್ಯ ಸ್ವರ್ವಿಭುಪೂಜ್ಯೇ ಗರ್ವಸಮೇತಃ ।

ಆಹರತಿ ಶ್ರೀಬಾಹ್ಯಸಮೃದ್ಧ್ಯಾ ನಾ ಸುರಯಾ ವಾ ಸೋಽಸುರ ಉಕ್ತಃ ॥ ೪೧೮ ॥

ತಾಮ್ಯತಿ ತೀವ್ರಾಫೇನನಿಷೇವೀ ಕ್ಲಾಮ್ಯತಿ ಸಂವಿತ್ಪತ್ರನಿಷೇವೀ ।

ಭ್ರಾಮ್ಯತಿ ಹಾಲಾಭಾಂಡನಿಷೇವೀ ಶಾಮ್ಯತಿ ಶೀರ್ಷದ್ರಾವನಿಷೇವೀ ॥ ೪೧೯ ॥

ಅಸ್ತು ವಿರೇಕೇ ಪಥ್ಯಮಫೇನಂ ಪತ್ರಮಜೀರ್ಣೇಷ್ವಸ್ತು ನಿಷೇವ್ಯಮ್ ।

ಅಸ್ತು ಹಿತಂ ತದ್ಯಕ್ಷ್ಮಣಿ ಮದ್ಯಂ ಸಂಸೃತಿಹಾರೀ ದೇವಿ ರಸಸ್ತೇ ॥ ೪೨೦ ॥

ನೈವ ಮಹಾಂತಸ್ಸತ್ತ್ವಸಮೃದ್ಧಾಃ ಸರ್ವಮದೇಷ್ವಪ್ಯಂಬ ಚಲಂತು ।

ಅಲ್ಪಜನಾನಾಂ ಮಾದಕವಸ್ತುಪ್ರಾಶನಮೀಶೇ ನಾಶನಮುಕ್ತಮ್ ॥ ೪೨೧ ॥

ಕೇಽಪಿ ಯಜಂತೇ ಯನ್ಮಧುಮಾಂಸೈಸ್ತ್ವಾಂ ತ್ರಿಪುರಾರೇರ್ಜೀವಿತನಾಥೇ ।

ಅತ್ರ ನ ಯಾಗೋ ದೂಷಣಭಾಗೀ ದ್ರವ್ಯಸಸಂಗೋ ದುಷ್ಯತಿ ಯಷ್ಟಾ ॥ ೪೨೨ ॥

ದಕ್ಷಿಣಮಾರ್ಗೇ ಸಿದ್ಧ್ಯತಿ ಭಕ್ತಃ ಸವ್ಯಸರಣ್ಯಾಂ ಸಿದ್ಧ್ಯತಿ ವೀರಃ ।

ನೇಶ್ವರಿ ಸವ್ಯೇ ನಾಪ್ಯಪಸವ್ಯೇ ಸಿದ್ಧ್ಯತಿ ದಿವ್ಯೇ ತ್ವಧ್ವನಿ ಮೌನೀ ॥ ೪೨೩ ॥

ನಾರ್ಚನಭಾರೋ ನಾಪಿ ಜಪೋಽಸ್ಯಾಂ ದಿವ್ಯಸರಣ್ಯಾಂ ಭವ್ಯತಮಾಯಾಮ್ ।

ಕೇವಲಮಂಬಾಪಾದಸರೋಜಂ ನಿಶ್ಚಲಮತ್ಯಾ ಮೃಗ್ಯಮಜಸ್ರಮ್ ॥ ೪೨೪ ॥

ಕಾಚಿದಮೂಲ್ಯಾ ಚಂಪಕಮಾಲಾ ವೃತ್ತನಿಬದ್ಧಾ ಮಂಜುಲಮಾಲಾ ।

ಅಸ್ತು ಗಣೇಶಸ್ಯೇಶ್ವರಕಾಂತಾ ಕಂಠವಿಲೋಲಾ ಚಂಪಕಮಾಲಾ ॥ ೪೨೫ ॥