॥ ಸಪ್ತಮಂ ಶತಕಮ್ ॥

॥ ಪಂಚವಿಂಶಃ ಸ್ತಬಕಃ - ಇಂದ್ರವಜ್ರಾವೃತ್ತಮ್ ॥

ಕ್ಷೇತ್ರಮಾಲಾ

ಕನ್ಯಾಕುಮಾರೀ ಸುತರಾಂ ವದಾನ್ಯಾ ಮಾನ್ಯಾ ಸಮಸ್ತೈಃ ಪ್ರಕೃತೇರನನ್ಯಾ ।

ಆಕ್ಷೇಪಕಂ ಸಾಗರಬುದ್ಬುದಾನಾಂ ಹಾಸಂ ವಿಧತ್ತಾಂ ಜಗತಃ ಸುಖಾಯ ॥ ೬೦೧ ॥

ರಕ್ಷ ಸ್ವಚೇತೋ ಮದಮತ್ಸರಾದೇರ್ಭಿಕ್ಷಸ್ವ ಕಾಲೇ ತನುರಕ್ಷಣಾಯ ।

ವೀಕ್ಷಸ್ವ ರಾಮೇಶವಧೂಪದಾಬ್ಜಂ ಮೋಕ್ಷಸ್ವಲಾಭೇ ಯದಿ ತೇಽಭಿಲಾಷಃ ॥ ೬೦೨ ॥

ಲೋಕಸ್ವ ದೂರೀಕೃತಭಕ್ತಶೋಕಂ ಹಾಲಾಸ್ಯನಾಥೇಕ್ಷಣಪುಣ್ಯಪಾಕಮ್ ।

ಭೀತಿಃ ಸಖೇ ಚೇದ್ಭವತಃ ಪವಿತ್ರಂ ಜ್ಯೋತಿರ್ವಿಶೇಷಂ ಜಲಚಾರಿನೇತ್ರಮ್ ॥ ೬೦೩ ॥

ಯೋ ಲೋಕತೇ ತಾಮಖಿಲಾಂಡರಾಜ್ಞೀಮಜ್ಞಾನವಿಧ್ವಂಸವಿಧಾನವಿಜ್ಞಾಮ್ ।

ಅಂಬಾಂ ಪರಾಂ ಜೀವನಲಿಂಗಶಕ್ತಿಂ ಭೂಯಃ ಸ ಕಾಯಂ ನ ಭವೇ ಲಭೇತ ॥ ೬೦೪ ॥

ಬಿಭ್ರತ್ಸಹಸ್ರಂ ಚ ಮುಖಾನಿ ಶಕ್ತೋ ವಕ್ತುಂ ಗುಣಾನ್ ಕಃ ಕಮಲಾಲಯಸ್ಯ ।

ಜನ್ಮಾಪಿ ಯತ್ರ ಪ್ರಭವೇಜ್ಜನಾನಾಂ ಮುಕ್ತ್ಯೈ ಮುನೀನಾಮಪಿ ದುರ್ಲಭಾಯೈ ॥ ೬೦೫ ॥

ವ್ಯಾಘ್ರಾಂಘ್ರಿವಾತಾಶನಪೂಜಿತಸ್ಯ ನಾಟ್ಯಸ್ಥಲೀನಾಯಿಕಯಾ ಶಿವಸ್ಯ ।

ನೇತ್ರಾಧ್ವಭಾಜಾ ಶಿವಕಾಮಯಾ ವೋ ಮಿತ್ರಾಣಿ ಕಾಮಾಃ ಫಲಿನೋ ಭವಂತು ॥ ೬೦೬ ॥

ಆಲೋಕತೇಽಪೀತಕುಚಾಮಯಿ ತ್ವಾಮಾಲೋಲಚಿತ್ತಾಮರುಣಾಚಲೇ ಯಃ ।

ನಿರ್ವೇದವಾನ್ ಪರ್ವಸುಧಾಂಶುವಕ್ತ್ರೇ ಸರ್ವೇ ವಶೇ ತಸ್ಯ ಭವಂತಿ ಕಾಮಾಃ ॥ ೬೦೭ ॥

ಯಃ ಕುಂಡಲೀಪಟ್ಟಣರಾಜಧಾನೀಮಾಲೋಕತೇ ಕಾಮಪಿ ಕೃತ್ತಮಸ್ತಾಮ್ ।

ನಿಸ್ಸಾರಮಾನಂದಕಥಾವಿಹೀನಂ ಸಂಸಾರಮೇತಂ ಸ ಜಹಾತಿ ಬುದ್ಧ್ಯಾ ॥ ೬೦೮ ॥

ದೃಷ್ಟ್ವಾ ವಧೂಮಾದಿಪುರೀಶ್ವರಸ್ಯ ಯೋ ಲೋಚನಾರೋಚಕಮಾಧುನೋತಿ ।

ತಸ್ಯಾಂತರಂಗಂ ಧುತಸರ್ವಸಂಗಂ ಭೂಯೋ ಭವಾರೋಚಕಮಾವೃಣೋತಿ ॥ ೬೦೯ ॥

ಕಾಂಚೀ ರಮಣ್ಯಾಃ ಕುರುತಾಂ ಗೃಹಸ್ಥೇ ಕ್ವಾಣೈರ್ಮುದಂ ಕಾಮಪಿ ಕಿಂಕಿಣೀನಾಮ್ ।

ಕಾಂಚೀ ಭುವಃ ಪುಣ್ಯಪುರೀ ಯತೀಂದ್ರ ತ್ವಾಮಂಬಿಕಾನಾಮರವೈರ್ಧಿನೋತು ॥ ೬೧೦ ॥

ಶ್ರೀಕಾಲಹಸ್ತಿಸ್ಥಲದರ್ಶನಸ್ಯ ಕೈಲಾಸವೀಕ್ಷಾಂ ಪುನರುಕ್ತಿಮಾಹುಃ ।

ಜ್ಞಾನಂ ಪ್ರದಾತುಂ ಚರಣಾಶ್ರಿತೇಭ್ಯೋ ಜ್ಞಾನಾಂಬಿಕಾ ಯತ್ರ ನಿಬದ್ಧದೀಕ್ಷಾ ॥ ೬೧೧ ॥

ಶ್ರೀಶೈಲಶೃಂಗಸ್ಯ ವಿಲೋಕನೇನ ಸಂಗೇನ ಹೀನೋ ಭವಿತಾ ಮನುಷ್ಯಃ ।

ಧಾಮಾಸ್ತಿ ಯತ್ರ ಭ್ರಮರಾಲಕಾಯಾಃ ಶಾಂತಭ್ರಮಂ ತದ್ಭ್ರಮರಾಂಬಿಕಾಯಾಃ ॥ ೬೧೨ ॥

ತೀರೇ ವಿಪಶ್ಚಿದ್ವರ ಪಶ್ಚಿಮಾಬ್ಧೇರ್ಗೋಕರ್ಣಗಾಂ ಲೋಕಯ ಭದ್ರಕರ್ಣೀಮ್ ।

ಬುದ್ಧಿಂ ಶಿವಾಂ ಸರ್ವಮನೋರಥಾನಾಂ ಸಿದ್ಧಿಂ ಚ ಯದ್ಯಸ್ತಿ ಮನೋಽಧಿಗಂತುಮ್ ॥ ೬೧೩ ॥

ಧಾಮ್ನಿ ಪ್ರಸಿದ್ಧೇ ಕರವೀರನಾಮ್ನಿ ಪುಣ್ಯಾಭಿಧಾನಾಂ ಕೃತಸನ್ನಿಧಾನಾಮ್ ।

ದೇವೀಂ ಪರಾಂ ಪಶ್ಯತಿ ಯೋ ವಿರಕ್ತೋ ಮುಕ್ತೇಃ ಸ ಪಾಣಿಗ್ರಹಣಾಯ ಶಕ್ತಃ ॥ ೬೧೪ ॥

ಜ್ಞಾನೇ ದೃಢಾ ತೇ ಯದಿ ಕ್ರಾಪಿ ಕಾಂಕ್ಷಾ ನಾನೇಹಸಂ ಮಿತ್ರ ಮುಧಾ ಕ್ಷಿಪೇಮಮ್ ।

ಸೇವಸ್ವ ದೇವೀಂ ತುಲಜಾಪುರಸ್ಥಾಂ ನೈವ ಸ್ವರೂಪಾದಿತರಾ ಕಿಲೇಯಮ್ ॥ ೬೧೫ ॥

ಗೋಪಾಲಿನೀವೇಷಭೃತಂ ಭಜಸ್ವ ಲೀಲಾಸಖೀಂ ತಾಂ ಭುವನೇಶ್ವರಸ್ಯ ।

ಇಷ್ಟಂ ಹೃದಿಸ್ಥಂ ತವ ಹಸ್ತಗಂ ಸ್ಯಾತ್ ಕಷ್ಟಂ ಚ ಸಂಸಾರಭವಂ ನ ಭೂಯಃ ॥ ೬೧೬ ॥

ಆರಾಧ್ಯತೇ ವೈತರಣೀತಟಸ್ಥಾ ಯೇನೇಯಮಂಬಾ ವಿರಜೋಽಭಿಧಾನಾ ।

ಆರಾಧಿತಂ ತೇನ ಸಮಸ್ತಮನ್ಯತ್ ಸಾರೋ ಧರಾಯಾಮಯಮಾರ್ಯಗೀತಃ ॥ ೬೧೭ ॥

ಸಂಗೀಯಮಾನಂ ಸ್ಥಲಮಾರ್ಯ ಬೃಂದೈರ್ಬೃಂದಾರಕಾಣಾಂ ಸರಿತಸ್ತಟೇಽಸ್ತಿ ।

ಯಃ ಕಾಲಿಕಾಂ ಪಶ್ಯತಿ ಕಾಲಕೇಶೀಂ ತತ್ರಾಸ್ಯ ಕಾಲಾದಪಿ ನೈವ ಭೀತಿಃ ॥ ೬೧೮ ॥

ನೀಲಾಚಲಂ ಸಿದ್ಧಸಮೂಹಸೇವ್ಯಂ ಲೀಲಾನಿಕೇತಂ ಪ್ರವದಂತಿ ಯಸ್ಯಾಃ ।

ಭದ್ರಾ ಪರಾ ಕಾಚನ ಗುಹ್ಯಮುದ್ರಾ ಕಾಮೇಶ್ವರೀ ಸಾ ಭುವನಸ್ಯ ಮೂಲಮ್ ॥ ೬೧೯ ॥

ಮಾಂಗಲ್ಯಗೌರೀಪದದರ್ಶನಸ್ಯ ಕರ್ತಾ ತು ಭೂತ್ವಾ ಸುಕೃತಸ್ಯ ಭರ್ತಾ ।

ಆಚಾರಪೂತೈರಧಿಗಮ್ಯಮಗ್ರ್ಯಂ ಸ್ಥಾನಂ ಪ್ರಪದ್ಯೇತ ಯತೋ ನ ಪಾತಃ ॥ ೬೨೦ ॥

ವಾರಾಣಸೀ ಶುಭ್ರಗಿರೇರನೂನಂ ಕ್ಷೇತ್ರಂ ಪವಿತ್ರಂ ಭುವನತ್ರಯೇಽಪಿ ।

ಅರ್ಥೇ ಪ್ರಜಾನಾಂ ವಿಧೃತಾನ್ನಪಾತ್ರಾ ಗೌರೀ ಸ್ವಯಂ ಯತ್ರ ವಿಶಾಲನೇತ್ರಾ ॥ ೬೨೧ ॥

ಬೃಂದಾರಕಾರಾಧಿತಪಾದಪದ್ಮಾಂ ನಂದಾಮಿಮಾಮಿಂದುಸಮಾನವಕ್ತ್ರಾಮ್ ।

ಆಲೋಕ್ಯ ವಿಂಧ್ಯಾಚಲವಾಸಿನೀಂ ನಾ ನಾಲೋಚಯೇತ್ಸಂಸೃತಿತೋ ಭಯಾನಿ ॥ ೬೨೨ ॥

ಆನಂದದೇಹಾಮಿಹ ಮುಕ್ತಿಸಂಜ್ಞಾಂ ನಾರೀಂ ಪರೀರಬ್ಧುಮನಾ ಮನುಷ್ಯಃ ।

ದೂತೀಂ ವೃಣೋತು ಪ್ರಮಥೇಶ್ವರಸ್ಯ ಕಾಂತಾಮವಂತೀಪುರನಾಯಿಕಾಂ ತಾಮ್ ॥ ೬೨೩ ॥

ಯತ್ರಾಚಲಚ್ಛಿದ್ರಕೃತಾ ಸಹಾಹಂ ಭ್ರಾತ್ರಾ ಮುಹುಃ ಖೇಲಿತವಾನ್ ವನೇಷು ।

ತಂ ಸಿದ್ಧದೇವರ್ಷಿನುತಂ ಸ್ಮರಾಮಿ ಕೈಲಾಸಮಾವಾಸಗಿರಿಂ ಜನನ್ಯಾಃ ॥ ೬೨೪ ॥

ಪೂರ್ಣಾಽಂಬರೇ ಶೀತಕರೇಽಧಿಕಾರಂ ಬಿಭ್ರತ್ಯಗೇಂದ್ರೇ ಧವಲೇ ಸಲೀಲಾ ।

ಕ್ಷೇತ್ರೇಷು ಕಾಶ್ಯಾದಿಷು ಗುಪ್ತಶಕ್ತಿರ್ಗೌರೀಂದ್ರವಜ್ರಾಸು ಚ ಸನ್ನಿಧತ್ತಾಮ್ ॥ ೬೨೫ ॥