॥ ಷಡ್ವಿಂಶಃ ಸ್ತಬಕಃ - ದೋಧಕವೃತ್ತಮ್ ॥

ಅಪೀತಕುಚಾಂಬಾ

ಆಗಮವಿನ್ಮತಿಕೈರವಿಣೀನಾಂ ಬೋಧಮಜಸ್ರಮಸೌ ವಿದಧಾನಃ ।

ಪಾತು ಮಹೇಶವಧೂವದನಾಂಶೋ ಹಾಸಶಶೀ ಸಕಲಾನಿ ಕುಲಾನಿ ॥ ೬೨೬ ॥

ಆಯತಲೋಚನಚುಂಬಿತಕರ್ಣಾ ದಾನಯಶೋಜಿತತೋಯದಕರ್ಣಾ ।

ಶೋಣನಗೇಶಮನಃ ಪ್ರಿಯವರ್ಣಾ ನಾಶಯತಾಜ್ಜಗದಾರ್ತಿಮಪರ್ಣಾ ॥ ೬೨೭ ॥

ವೇದತುರಂಗವಿಲೋಚನಭಾಗ್ಯಂ ವೇದಶಿರೋನಿಚಯೈರಪಿ ಮೃಗ್ಯಮ್ ।

ಶೋಕವಿದಾರಿಸುಧಾಕಿರಣಾಸ್ಯಂ ಶೋಣಗಿರೌ ಸಮಲೋಕಿ ರಹಸ್ಯಮ್ ॥ ೬೨೮ ॥

ಮುಂಚ ಸಮಸ್ತಮನೋರಥಲಾಭೇ ಸಂಶಯಮದ್ಯ ಕರಾಮಲಕಾಭೇ ।

ದೃಕ್ಪಥಮಾಪ ನಗೇಂದ್ರತನೂಜಾ ಸೋಽಹಮಿತಃ ಪರಮಂತರಂರಾಜಾ ॥ ೬೨೯ ॥

ಶಿಲ್ಪವಿದಃ ಪ್ರತಿಮಾಂ ಪ್ರವಿಶಂತೀ ಸ್ವಲ್ಪವಿದಾಂ ತರಣಾಯ ಚಕಾಸ್ತಿ ।

ಶೋಣಧರಾಭೃತಿ ಸಂಪ್ರತಿ ಲಬ್ಧಾ ಹಂತ ಚಿರಾದಿಯಮೇವ ಮಮಾಂಬಾ ॥ ೬೩೦ ॥

ಭಾರತಭೂವಲಯೇಽತ್ರ ವಿಶಾಲೇ ಸಂತ್ವನಘಾನಿ ಬಹೂನಿ ಗೃಹಾಣಿ ।

ಆಸ್ಯವಿಗೀತಸುಧಾಕರಬಿಂಬಾ ಶೋಣಗಿರೌ ರಮತೇಽತ್ರ ಮದಂಬಾ ॥ ೬೩೧ ॥

ವಾರಿತಸಂಶ್ರಿತಪಾತಕಜಾಲಾ ವಾರಿಧಿವೀಚಿನಿರಂಕುಶಲೀಲಾ ।

ವಾರಿಜಪತ್ರವಿಡಂಬನನೇತ್ರಾ ವಾರಣರಾಜಮುಖೇನ ಸಪುತ್ರಾ ॥ ೬೩೨ ॥

ಆಯತವಕ್ರಘನಾಸಿತಕೇಶೀ ತೋಯಜಬಾಣರಿಪೋರ್ಹೃದಯೇಶೀ ।

ಕಾಶಸುಮಾಚ್ಛಯಶಾಃ ಪರಮೈಷಾ ಪಾಶಭಿದಸ್ತು ತವೇಂದುವಿಭೂಷಾ ॥ ೬೩೩ ॥

ಪಂಕಜಸಂಭವಪೂಜಿತಪಾದಾ ಪಂಕವಿನಾಶನಪಾವನನಾಮಾ ।

ಕಿಂಕರಕಲ್ಪಲತಾ ಪರಮೇಯಂ ಶಂಕರನೇತ್ರಸುಧಾ ಶರಣಂ ನಃ ॥ ೬೩೪ ॥

ಚಂಚಲದೃಗ್ವಿನತಾಮರವಲ್ಲೀ ಪಂಚಪೃಷತ್ಕಶರಾಸನಝಿಲ್ಲೀ ।

ಕಾಂಚನಗರ್ಭಮುಖಪ್ರಣುತೇಯಂ ಪಂಚಮುಖಪ್ರಮದಾ ಶರಣಂ ನಃ ॥ ೬೩೫ ॥

ಅಂಬ ವಿಧೂಯ ಭಟಾನ್ಮದನಾದೀನ್ ನೂಪುರನಾದಬಿಭೀಷಿಕಯೈಷಃ ।

ಹಂತ ಜಹಾರ ಬಲೇನ ಮನೋ ಮೇ ಶೋಣನಗಾಂಘ್ರಿನಿವಾಸಿನಿ ತೇಽಂಘ್ರಿಃ ॥ ೬೩೬ ॥

ಕರ್ಣಪುಟೇ ಕುರು ಮುಗ್ಧ ಮಮೋಕ್ತಿಂ ಮುಂಚ ಧನಾದಿಷು ಮಾನಸಸಕ್ತಿಮ್ ।

ಶೋಣಗಿರೀಂದ್ರವಧೂಪದಭಕ್ತಿಂ ಶೀಲಯ ಶೀಲಯ ಯಾಸ್ಯಸಿ ಮುಕ್ತಿಮ್ ॥ ೬೩೭ ॥

ಜೀರ್ಣತರೇ ಜರಯಾಽಖಿಲದೇಹೇ ಬುದ್ಧಿಬಲಂ ಚ ವಿಲುಂಪತಿ ಮೋಹೇ ।

ಹಂತ ಸವಿತ್ರಿ ತಪನ್ಮತಿರಂತೇ ಸೇವಿತುಮಿಚ್ಛತಿ ನಾ ಚರಣಂ ತೇ ॥ ೬೩೮ ॥

ತಂತ್ರವಿದೋ ನವಯೋನಿ ತು ಚಕ್ರಂ ಶೋಣಧರಾಧರರೂಪಮುಶಂತಿ ।

ಅರ್ಧಮಮುಷ್ಯ ವಪುರ್ಮದನಾರೇರರ್ಧಮಗೇಂದ್ರಸುತೇ ತವ ಗಾತ್ರಮ್ ॥ ೬೩೯ ॥

ಅಸ್ತು ನಗೇಶ್ವರನಂದಿನಿ ಲಿಂಗಂ ತೈಜಸಮೇತದಿಹಾಪಿ ತವಾಂಶಃ ।

ವೀತಗುಣಸ್ಯ ವಿನಾ ತವ ಯೋಗಂ ದೇವಿ ಶಿವಸ್ಯ ಕುತಃ ಖಲು ತೇಜಃ ॥ ೬೪೦ ॥

ಸ್ಥಾಪಿತಮೂರ್ತಿರಿಯಂ ತವ ನಮ್ಯಾ ಪೂಜಯಿತುಂ ಜಗದೀಶ್ವರಿ ರಮ್ಯಾ ।

ಶೋಣನಗಾರ್ಧಮಿದಂ ತವ ರೂಪಂ ಕೀರ್ತಯಿತುಂ ನಗಜೇ ಧುತಪಾಪಮ್ ॥ ೬೪೧ ॥

ಶೋಣನಗಾರ್ಧತನೋಽನಿಶಮಂಕೇ ಧಾರಯಸೇಽಯಿ ಗುಹಂ ರಮಣಾಖ್ಯಮ್ ।

ಆಗತಮಪ್ಯಯಿ ಹಾ ಮುಹುರಂಬೋಚ್ಚಾಟಯಸೇ ಗಣಪಂ ನನು ಕಸ್ಮಾತ್ ॥ ೬೪೨ ॥

ಅಂಕಜುಷೇ ರಮಣಾಯ ನು ದಾತುಂ ಮಾನವವೇಷಧರಾಯ ಗುಹಾಯ ।

ಶೋಣನಗಾರ್ಧತನೋ ಬಹು ದುಗ್ಧಂ ಮಾತರಪೀತಕುಚೇಹ ವಿಭಾಸಿ ॥ ೬೪೩ ॥

ಪೂರ್ಣಸಮಾಧಿವಶಾತ್ ಸ್ವಪಿಷಿ ತ್ವಂ ಪೀತಮಪೀತಕುಚೇಽಂಬ ನ ವೇತ್ಸಿ ।

ಅಂಕಜುಷಾ ರಮಣೇನ ಸುತೇನ ಪ್ರೇಕ್ಷ್ಯ ಯಥೇಷ್ಟಮುರೋರುಹದುಗ್ಧಮ್ ॥ ೬೪೪ ॥

ಜ್ಞಾನರಸಾಹ್ವಯಮಂಬ ನಿಪೀಯ ಸ್ತನ್ಯಮಸೌ ರಮಣೋ ಮುನಿರಾಟ್ ತೇ ।

ಜ್ಞಾನಮಯೋಽಭವದೀಶ್ವರಿ ಸರ್ವಃ ಪುಷ್ಯತಿ ಯೇನ ತನುಂ ಹಿ ತದಾತ್ಮಾ ॥ ೬೪೫ ॥

ಪ್ರೀತಿಪದಾಯ ಪಯೋಧರಕುಂಭಾತ್ ಪಾರ್ವತಿ ಧೀಮಯದುಗ್ಧಮಪೀತಾತ್ ।

ಅಸ್ತು ಗುಹಾಯ ಶಿವೇ ಬಹು ದತ್ತಂ ಕಿಂಚಿದಿವೇಶ್ವರಿ ಧಾರಯ ಮಹ್ಯಮ್ ॥ ೬೪೬ ॥

ಪ್ರೌಢಮಿಮಂ ಯದಿ ವೇತ್ಸಿ ತನೂಜಂ ಶೈಲಸುತೇ ಮದವಾರಿ ದಧಾನಮ್ ।

ಮಾಸ್ತು ಪಯೋ ವಿತರಾನಘಮನ್ನಂ ಯೇನ ದಧಾನಿ ಮಹೇಶ್ವರಿ ಶಕ್ತಿಮ್ ॥ ೬೪೭ ॥

ಸ್ವಾರ್ಜಿತಮೇವ ಮಯಾ ಯದಿ ಭೋಜ್ಯಂ ಸಮ್ಮದ ಏವ ಮಮಾಖಿಲಮಾತಃ ।

ಆಶಿಷಮಗ್ರ್ಯತಮಾಮಯಿ ದತ್ತ್ವಾ ಪ್ರೇಷಯ ಯಾನಿ ಜಯಾನಿ ಧರಿತ್ರೀಮ್ ॥ ೬೪೮ ॥

ವಿದ್ಯುತಿ ವಿದ್ಯುತಿ ವೀಕ್ಷ್ಯವಿಲಾಸಾ ವೀಕ್ಷಿತಕರ್ಮಣಿ ಲಕ್ಷ್ಯರಹಸ್ಯಾ ।

ಪಾರ್ವಣಚಂದ್ರಮುಖೀ ಲಲಿತಾಂಗೀ ತೈಜಸಲಿಂಗಸಖೀ ಶರಣಂ ನಃ ॥ ೬೪೯ ॥

ಮಾತರಪೀತಕುಚೇಽರುಣಶೈಲಾಧೀಶ್ವರಭಾಮಿನಿ ಭಾಮಹನೀಯೇ ।

ಸಾಧು ವಿಧಾಯ ಸಮರ್ಪಯತೇ ತೇ ದೋಧಕಮಾಲ್ಯಮಿದಂ ಗಣನಾಥಃ ॥ ೬೫೦ ॥