॥ ಸಪ್ತವಿಂಶಃ ಸ್ತಬಕಃ - ಶಿಖರಿಣೀವೃತ್ತಮ್ ॥

ಪ್ರಚಂಡಚಂಡೀ

ವಿಧುನ್ವಂಧ್ವಾಂತಾನಿ ಪ್ರತಿದಿಶಮಧರ್ಮಂ ಪರಿಹರಂ-

ಛ್ರಿಯಂ ವ್ಯಾತನ್ವಾನಸ್ಸಪದಿ ಶಮಯನ್ ದುಃಖಪಟಲಮ್ ।

ಸಹಸ್ರಾರಾಂಭೋಜೇ ದ್ರವಮಸದೃಶಂ ಮೇ ಪ್ರಜನಯನ್

ಪ್ರಚಂಡಾಯಾಶ್ಚಂಡ್ಯಾಸ್ಸಿತಹಸಿತಲೇಶೋ ವಿಜಯತೇ ॥ ೬೫೧ ॥

ಅರೀಣಾಂ ಶೀರ್ಷೇಷು ಜ್ವಲಿತದವಕೀಲೇಂದ್ರಸದೃಶಂ

ವಿನಮ್ರಾಣಾಂ ಶೀರ್ಷೇಷ್ವಮೃತಕರಬಿಂಬೇನ ತುಲಿತಮ್ ।

ವಿರೋಧಿಧ್ವಾಂತಾನಾಂ ತರುಣತರಣಿಪ್ರಾಭವಹರಂ

ಪ್ರಚಂಡಾಯಾಶ್ಚಂಡ್ಯಾಶ್ಚರಣಮಸತಾಂ ಹಂತು ವಿಭವಮ್ ॥ ೬೫೨ ॥

ಭಜೇ ಭಾಸಾಂ ಶಾಲಾಂ ನಿಖಿಲಧಿಷಣಾನಾಂ ಜನಿಭುವಂ

ಬಲಾನಾಮಾಧಾತ್ರೀಂ ನಿಖಿಲಭುವನೇಂದ್ರಸ್ಯ ದಯಿತಾಮ್ ।

ಭಜಂತೇ ಯಾಂ ಗೀತೈರ್ಮಧುಸಮಯಮಾದ್ಯತ್ಪಿಕವಧೂ-

ಕಲಾಲಾಪಾ ಹೃದ್ಯೈರ್ಹಯವದನಪಂಕೇರುಹದೃಶಃ ॥ ೬೫೩ ॥

ಜ್ವಲಂತೀ ತೇಜೋಭಿರ್ಮಹಿಷಮಥನೇ ಯಾ ತವ ತನು-

ರ್ಲಸಂತೀ ಲಾವಣ್ಯೈರ್ಗಿರಿಶರಮಣೇ ಯಾ ತವ ತನುಃ ।

ವಿನಾ ಕ್ರೋಧಪ್ರೀತೀ ನ ಕಿಮಪಿ ತಯೋರ್ಭೇದಕಮಭೂತ್

ತಯೋರಾದ್ಯಾ ದುರ್ಗಾ ಭವತಿ ಲಲಿತಾಽನ್ಯಾ ಮುನಿನುತೇ ॥ ೬೫೪ ॥

ಸಹಸ್ರಂ ಭಾನೂನಾಂ ಭವತಿ ದಿವಸಾನಾಮಧಿಪತೇಃ

ಸಹಸ್ರಂ ಶೀರ್ಷಾಣಾಂ ಭವತಿ ಭುಜಗಾನಾಮಧಿಪತೇಃ ।

ಸಹಸ್ರಂ ನೇತ್ರಾಣಾಂ ಭವತಿ ವಿಬುಧಾನಾಮಧಿಪತೇಃ

ಸಹಸ್ರಂ ಬಾಹೂನಾಂ ಭವತಿ ಸಮಯೇ ಹೈಮವತಿ ತೇ ॥ ೬೫೫ ॥

ಪ್ರಸನ್ನೋ ವಕ್ತ್ರೇಂದುರ್ನ ಚ ನಯನಯೋಃ ಕೋಽಪ್ಯರುಣಿಮಾ

ನ ಕಂಪೋ ಬಿಂಬೋಷ್ಠೇ ಸ್ಮಿತಮಪಿ ಲಸತ್ಕಾಶವಿಶದಮ್ ।

ಸರೋಜಾಭಃ ಪಾಣಿಃ ಕಿಣವಿರಹಿತಃ ಕೋಮಲತಮೋ

ಜ್ವಲಚ್ಛೂಲಂ ತ್ವಾಸೀಜ್ಜನನಿ ತವ ಶುಂಭಾಯ ಭಯದಮ್ ॥ ೬೫೬ ॥

ವಧೇ ಶುಂಭಸ್ಯಾಸೀತ್ತವ ಜನನಿ ಯಾ ಕಾಚನ ತನು-

ರ್ದಧಾನಾಽಗ್ರ್ಯಾಃ ಶಕ್ತೀಃ ಶಶಿಕಿರಣಸಾರೋಪಮರುಚಿಃ ।

ಇಮಾಂ ಧ್ಯಾಯಂ ಧ್ಯಾಯಂ ಸ್ಮರಹರಸಖಿ ವ್ಯಾಕುಲಮಿದಂ

ಮನೋ ಮೇ ವಿಶ್ರಾಂತಿಂ ಭಜತಿ ಭಜತಾಂ ಕಲ್ಪಲತಿಕೇ ॥ ೬೫೭ ॥

ಯದಿ ತ್ವಂ ಸಂಹಾರೇ ಪಟುರಸಿ ಸವಿತ್ರಿ ತ್ರಿಜಗತ-

ಸ್ತದೇತತ್ತ್ವಾಂ ಯಾಚೇ ಸರಸಿರುಹಗರ್ಭಾದಿವಿನುತೇ ।

ಇಮೇ ಮೇ ಪಾಪ್ಮಾನೋ ಭಗವತಿ ನದಂತೋ ಬಹುವಿಧಾ-

ಸ್ತದೇಷು ಪ್ರಖ್ಯಾತಂ ಪ್ರತಿಭಯತಮಂ ದರ್ಶಯ ಬಲಮ್ ॥ ೬೫೮ ॥

ಬಿಭೇದೋರಃ ಕ್ರೋಧಾತ್ಕನಕಕಶಿಪೋರಬ್ಧಿತನಯಾ-

ಕುಚಗ್ರಾವೋಲ್ಲೀಢೈರತಿಶಿತಶಿಖೈರ್ಯಃ ಕಿಲ ನಖೈಃ ।

ತ್ವಯಾ ದತ್ತಾ ಶಕ್ತಿರ್ನರಹರಿಶರೀರಾಯ ಜಗತಾಂ

ವಿನೇತ್ರೇ ಪುಂಸೇಽಸ್ಮೈ ಜನನಿ ರಣರಂಗಸ್ಥಲರಮೇ ॥ ೬೫೯ ॥

ಅಜೇಯಸ್ತ್ರೈಲೋಕ್ಯಪ್ರಕಟಿತಪತಾಕಃ ಪಲಭುಜಾಂ

ಬಿಡೌಜಾ ಯತ್ಕಾರಾಗೃಹಪರಿಚಯೀ ಪಂಕ್ತಿವದನಃ ।

ಸಹಸ್ರಾರಂ ಸಾಕ್ಷಾದ್ಧೃತನರಶರೀರಂ ತಮಜಯತ್

ತವೈವಾವೇಶೇನ ಪ್ರಿಯಪರಶುರಂಬ ದ್ವಿಜಶಿಶುಃ ॥ ೬೬೦ ॥

ತ್ವದೀಯಾ ಸಾ ಶಕ್ತಿಸ್ಸಕಲಜಗದಂತೇಽಪ್ಯನಲಸಾ

ಪುರಾ ಕಾರ್ಯಸ್ಯಾಂತೇ ತನಯಮಯಿ ಹಿತ್ವಾ ನೃಪರಿಪುಮ್ ।

ಅವಿಕ್ಷತ್ಕಾಕುತ್ಸ್ಥಂ ದಶಮುಖಕುಲೋನ್ಮಾಥವಿಧಯೇ

ಸಹಸ್ರಾಂಶುಂ ಹಿತ್ವಾ ಶಶಿನಮಿವ ಘಸ್ರೇ ಗಲತಿ ಭಾ ॥ ೬೬೧ ॥

ಹೃತೇ ಲೋಕವ್ರಾತೇ ಭಗವತಿ ಭವತ್ಯೈವ ಸ ಪುರಾ-

ಮರಿಃ ಕೀರ್ತಿಂ ಲಬ್ಧುಂ ಚತುರಮತಿರಾಯಾತಿ ಸಮಯೇ ।

ತ್ವಯಾ ಲೋಕತ್ರಾಣೇ ಜನನಿ ರಚಿತೇ ರಾಕ್ಷಸವಧಾದ್

ಯಶೋಽವಾಪ್ತುಂ ವಿಷ್ಣುರ್ಮಿಲತಿ ಚ ಕುತೋಽಪ್ಯೇಷ ನಿಪುಣಃ ॥ ೬೬೨ ॥

ಸ್ವರೂಪಂ ತೇ ವಜ್ರಂ ವಿಯತಿ ರಜಸಾಂ ಸೂಕ್ಷ್ಮಮಹಸಾ-

ಮುಪಾಧಿಸ್ತೇ ಸ್ತೋಮೋ ಭವತಿ ಚಪಲಾ ಕಾಽಪಿ ತನುಭಾ ।

ಅರುದ್ಧಾ ತೇ ವ್ಯಾಪ್ತಿರ್ಬಲಮಖಿಲದತ್ತಂ ಬಲನಿಧೇಃ

ಸಹಸ್ರಾಂಶಃ ಸ್ವಸ್ಯ ಪ್ರಭವಸಿ ಸಮಸ್ತಸ್ಯ ಚ ಶಿವೇ ॥ ೬೬೩ ॥

ಯತಃ ಕಾಲವ್ಯಾಜಾತ್ಪಚಸಿ ಭುವನಂ ವೈದ್ಯುತಮಹಃ

ಪ್ರಭಾವಾತ್ಕಾಲೀಂ ತ್ವಾಮಯಿ ವಿದುರತಃ ಪಂಡಿತವರಾಃ ।

ಪ್ರಭೋಃ ಶಸ್ತ್ರಂ ಭೂತ್ವಾ ದಹಸಿ ಯದರೀನ್ವಜ್ರವಪುಷಾ

ಪ್ರಚಂಡಾಂ ಚಂಡೀಂ ತದ್ಭಗವತಿ ಭಣಂತ್ಯಕ್ಷಯಬಲೇ ॥ ೬೬೪ ॥

ಅಯಿ ತ್ವಾಮೇವೇಂದ್ರಂ ಕಥಯತಿ ಮುನಿಃ ಕಶ್ಚಿದಜರೇ

ತ್ವಯಾ ಶಸ್ತ್ರಾಢ್ಯಂ ತಂ ಭಣತಿ ತು ಪರಸ್ತತ್ತ್ವವಿದೃಷಿಃ ।

ಯುವಾಂ ಮಾತಾಪುತ್ರೌ ಭಗವತಿ ವಿಭಾಜ್ಯೌ ನ ಭವತ-

ಸ್ತತೋ ಧೀನಾಂ ದ್ವೇಧಾ ವಿಬುಧಜನಗೋಷ್ಠೀಷು ಗತಯಃ ॥ ೬೬೫ ॥

ವಿಕುರ್ವಾಣಾ ವಿಶ್ವಂ ವಿವಿಧಗುಣಭೇದೈಃ ಪರಿಣಮದ್

ವಿಧುನ್ವಾನಾ ಭಾವಾನ್ ಭುವನಗತಿರೋಧಾಯ ಭವತಃ ।

ವಿತನ್ವಾನಾ ಶರ್ವಂ ಚಲವದಚಲಂ ಕಾಚಿದವಿತುಂ

ವಿಚಿನ್ವಾನಾ ಜಂತೋಃ ಕೃತಲವಮಪೀಶಾ ವಿಜಯತೇ ॥ ೬೬೬ ॥

ಪ್ರಭಾ ಭಾನೋರ್ಯದ್ವದ್ಭವಸಿ ಸಕಲಸ್ಯಾಪಿ ತಪನೀ

ಪ್ರಚಂಡಾ ಶಕ್ತಿಃ ಸತ್ಯಖಿಲಭುವನೇಶಸ್ಯ ತಪತಃ ।

ಸುಧಾಂಶೋರ್ಜ್ಯೋತ್ಸ್ನೇವ ಪ್ರಮದಯಸಿ ಚೇತಃ ಪ್ರವಿಶತೋ

ಭವಂತೀ ಭೂತಾದೇರ್ದಹರಕುಹರಂ ಮೋದಲಹರೀ ॥ ೬೬೭ ॥

ಪ್ರಚಂಡಾ ಗೌರೀ ವಾ ತ್ವಮಸಿ ವಸುರುದ್ರಾರ್ಕವಿನುತೇ

ಸ ಭೀಮಃ ಶಂಭುರ್ವಾ ವಿಭುರಭಯದಃ ಪಾದಸುಹೃದಾಮ್ ।

ತಯೋರೇಕಂ ರೂಪಂ ತವ ಸಹವಿಭೋಃ ಖೇಲತಿ ಮಹ-

ತ್ಯಮುಷ್ಮಿನ್ನಾಕಾಶೇ ಧವಲಮಹಸಿ ಕ್ರೀಡತಿ ಪರಮ್ ॥ ೬೬೮ ॥

ವಿಭಕ್ತಾ ಯಾ ದ್ವೇಧಾ ತ್ವಮಸಿ ಗಗನೇ ಶೀತಮಹಸ-

ಸ್ತಥಾ ರಮ್ಯೇ ಬಿಂಬೇ ಜ್ವಲಿತಲಲಿತಸ್ತ್ರೀತನುವಿಧಾ ।

ತಯೋರ್ನೂಹೀಶಾನೇ ಜನನಿ ಕತಮಾ ಮೇ ಜನನಭೂಃ

ಪುರಾಜನ್ಮನ್ಯಾಸೀದ್ವಿಕಟಮಥವೋಗ್ರೈವ ಸುಷುವೇ ॥ ೬೬೯ ॥

ದೃಶೋರ್ಭೇದಾದ್ ದೃಷ್ಟೇರ್ನ ಭವತಿ ಭಿದಾ ಕಾಽಪಿ ಕರಯೋ-

ರ್ನ ಭೇದಾದ್ಭಿನ್ನಂ ಸ್ಯಾತ್ಕೃತಮಭಿವಿಮಾನೈಕ್ಯವಶತಃ ।

ಭಿದಾ ತನ್ವೋರೇವಂ ನ ಭವತಿ ಭಿದಾಯೈ ತವ ಶಿವೇ

ವಿಯದ್ದೇಶೇ ಚಂಡ್ಯಾಂ ಸಿತಮಹಸಿ ಗೌರ್ಯಾಂ ಚ ಭವತಿ ॥ ೬೭೦ ॥

ತವ ಚ್ಛಿನ್ನಂ ಶೀರ್ಷಂ ವಿದುರಖಿಲಧಾತ್ರ್ಯಾಗಮವಿದೋ

ಮನುಷ್ಯಾಣಾಂ ಮಸ್ತೇ ಬಹುಲತಪಸಾ ಯದ್ವಿದಲಿತೇ ।

ಸುಷುಮ್ನಾಯಾಂ ನಾಡ್ಯಾಂ ತನುಕರಣಸಂಪರ್ಕರಹಿತಾ

ಬಹಿಶ್ಶಕ್ತ್ಯಾ ಯುಕ್ತಾ ವಿಗತಚಿರನಿದ್ರಾ ವಿಲಸಸಿ ॥ ೬೭೧ ॥

ಉತಾಹೋ ತನ್ವಂಗ್ಯಾಂ ಭೃಗುಕುಲವಿಧಾತ್ರ್ಯಾಂ ಪಿತೃಗಿರಾ

ತನೂಜೇನಚ್ಛಿನ್ನೇ ಶಿರಸಿ ಭಯಲೋಲಾಕ್ಷಿ ನಲಿನೇ ।

ನ್ಯಧಾಸ್ತೇಜೋ ಭೀಮಂ ನಿಜಮಯಿ ಯದಕ್ಷುದ್ರಮನಘಂ

ತದಾಹುಸ್ತ್ವಾಮಂಬ ಪ್ರಥಿತಚರಿತೇ ಕೃತ್ತಶಿರಸಮ್ ॥ ೬೭೨ ॥

ಹುತಂ ಧಾರಾಜ್ವಾಲಾಜಟಿಲಚಟುಲೇ ಶಸ್ತ್ರದಹನೇ

ತಪಸ್ವಿನ್ಯಾಃ ಕಾಯಂ ಭಗವತಿ ಯದಾಽಂಬ ತ್ವಮವಿಶಃ ।

ತದಾ ತಸ್ಯಾಃ ಕಂಠಪ್ರಗಲದಸೃಜಃ ಕೃತ್ತಶಿರಸಃ

ಕಬಂಧೇನ ಪ್ರಾಪ್ತೋ ಭುವನವಿನುತಃ ಕೋಽಪಿ ಮಹಿಮಾ ॥ ೬೭೩ ॥

ನಿಧೇಸ್ತ್ವತ್ತೋ ಹೃತ್ವಾ ಭಗವತಿ ನ ಲಜ್ಜೇ ಭುವಿ ಸೃಜನ್

ರಸಕ್ಷೋಣೀರ್ವಾಣೀಸ್ತ್ವದಮಲಯಶಸ್ಸೌರಭಜುಷಃ ।

ನೃಪೋದ್ಯಾನಾತ್ಸೂನೋತ್ಕರಮಪಹರನ್ ಭಕ್ತಿನಟನಂ

ವಿತನ್ವಾನಸ್ತಸ್ಮೈ ಮುಹುರುಪಹರಂತ್ಸೇವಕ ಇವ ॥ ೬೭೪ ॥

ದಧಾನಾಸ್ಸಂತೋಷಂ ಮನಸಿ ಸುಕವೀನಾಮತಿತರಾಂ

ದದಾನಾಃ ಪ್ರತ್ಯಗ್ರಂ ವಿಬುಧಸದಸೇ ಭಾವಮಲಘುಮ್ ।

ಕುಲಾನಾಮುತ್ಸಾಹಂ ಸಪದಿ ವಿದಧಾನಾಶ್ಶಿವವಧೂ-

ಪರಾಣಾಂ ಶೋಭಂತಾಂ ಜಗತಿ ಶಿಖರಿಣ್ಯೋ ಗಣಪತೇಃ ॥ ೬೭೫ ॥