॥ ಅಷ್ಟಾವಿಂಶಃ ಸ್ತಬಕಃ - ವಸಂತತಿಲಕಾವೃತ್ತಮ್ ॥

ರೇಣುಕಾದಿವರ್ಣನಮ್

ಅಂತರ್ವಲಕ್ಷಪರಿಧಿಭ್ರಮಮಾದಧಾನೋ ವಕ್ತ್ರಸ್ಯ ಪೂರ್ಣತುಹಿನದ್ಯುತಿಮಂಡಲಸ್ಯ ।

ಹಾಸಃ ಕರೋತು ಭವತಾಂ ಪರಮಂ ಪ್ರಮೋದಂ ಶುದ್ಧಾಂತಪಂಕಜದೃಶಃ ಪ್ರಮಥೇಶ್ವರಸ್ಯ ॥ ೬೭೬ ॥

ಸಮ್ಮೋಹನಾನಿ ತುಹಿನಾಂಶುಕಲಾಧರಸ್ಯ ಸಂಜೀವನಾನಿ ಸರಸೀರುಹಸಾಯಕಸ್ಯ ।

ಸಂದೀಪನಾನಿ ವಿನತೇಷು ಜನೇಷು ಶಕ್ತೇಃ ಸಂಹರ್ಷಣಾನಿ ಮಮ ಸಂತು ಶಿವಾಸ್ಮಿತಾನಿ ॥ ೬೭೭ ॥

ಪಾಪಾನಿ ಮೇ ಹರತು ಕಾಚನ ಕೃತ್ತಶೀರ್ಷಾ ಮಾತಾ ಪದಾಂಬುಜಭುಜಿಷ್ಯವಿತೀರ್ಣಹರ್ಷಾ ।

ಯಾ ಭಕ್ತಲೋಕವರದಾನವಿಧೌ ವಿನಿದ್ರಾ ವಾಸಂ ಕಮಂಡಲುಧುನೀಪುಲಿನೇ ಕರೋತಿ ॥ ೬೭೮ ॥

ಷಷ್ಠಾವತಾರಜನನಾವನಿರೇಕವೀರಾ ಭೀಮಾ ಧುನೋತು ದುರಿತಾನಿ ಗಣಾಧಿಪಸ್ಯ ।

ಯಾ ಭಕ್ತರಕ್ಷಣವಿಧಾವತಿಜಾಗರೂಕಾ ಪುಣ್ಯೇ ಕಮಂಡಲುಧುನೀಪುಲಿನೇ ಚಕಾಸ್ತಿ ॥ ೬೭೯ ॥

ಛೇದಾಯ ಚೇದ್ ಗತರಜಾ ಮುನಿರಾದಿದೇಶ ಚಿಚ್ಛೇದ ಚೇದ್ಬಹುಗುಣಸ್ತನಯಃ ಸವಿತ್ರೀಮ್ ।

ದಾಹ್ಯಂ ಶರೀರಮಖಿಲಪ್ರಭುರೀಶಶಕ್ತಿಃ ಯದ್ಯಾವಿವೇಶ ಚ ಕಥಾ ಪರಮಾದ್ಭುತೇಯಮ್ ॥ ೬೮೦ ॥

ಪುತ್ರಃ ಪ್ರಿಯಸ್ತವ ಶಿರಃ ಸಹಸಾ ಚಕರ್ತ ಕೃತ್ತಾ ಚ ಹರ್ಷಭರಿತಾ ಭವತೀ ನನರ್ತ ।

ನೋ ತಸ್ಯ ಪಾಪಮಪಿ ನೋ ತವ ಕಾಽಪಿ ಹಾನಿಃ ನಾಶೋಽಸ್ಯ ಹಾ ಭುಜಭುವಾಮಭವದ್ವಿಪಾಕಃ ॥ ೬೮೧ ॥

ಅಂಬೈವ ಸಾ ಸುರಭಿರರ್ಜುನಭೂಪತಿರ್ಯಾಂ ವೀರ್ಯಾಜ್ಜಹಾರ ಸ ಚ ಭಾರ್ಗವ ಆಜಹಾರ ।

ತಸ್ಯಾ ಹತೇಃ ಪರಗೃಹಸ್ಥಿತಿರೇವ ಹೇತುಃ ಗಂಧರ್ವದರ್ಶನಕಥಾ ರಿಪುಕಲ್ಪಿತೈವ ॥ ೬೮೨ ॥

ಛಿನ್ನಾನಿ ನೋ ಕತಿ ಶರೀರಭೃತಾಂ ಶಿರಾಂಸಿ ತತ್ಪೂಜ್ಯತೇ ಜಗತಿ ರೈಣುಕಮೇವ ಶೀರ್ಷಮ್ ।

ಕೃತ್ತಾಃ ಕಲೇವರವತಾಂ ಕತಿ ನಾಭಯೋ ನ ಚೇತೋ ಧಿನೋತಿ ಸುರಭಿರ್ಮೃಗನಾಭಿರೇಕಃ ॥ ೬೮೩ ॥

ಪ್ರಾಣಾ ವಸಂತಿ ಶಿರಸಾ ರಹಿತೇ ಶರೀರೇ ಲೀಲಾಸರೋಜತಿ ಶಿರಸ್ತು ಕರೇಽಸ್ಯ ಕೃತ್ತಮ್ ।

ತನ್ನಿಘ್ನಮೇತದಖಿಲಂ ಚ ಧಿಯೈವ ಧೀರಾಃ ಪಶ್ಯಂತು ನಂದನಗರೇ ತದಿದಂ ವಿಚಿತ್ರಮ್ ॥ ೬೮೪ ॥

ಪ್ರಾಣೇಶ್ವರೀ ವಿಧಿಪುರೇ ಲಸತಃ ಪುರಾರೇರಂಗೀಕರೋತು ಶರಣಾಗತಿಮಂಬಿಕಾ ಮೇ ।

ಲಬ್ಧಂ ನಿಪೀಯ ಯದುರೋರುಹಕುಂಭದುಗ್ಧಂ ಸಂಬಂಧಮೂರ್ತಿರಭವತ್ಕವಿಚಕ್ರವರ್ತೀ ॥ ೬೮೫ ॥

ಅಪ್ರಾಪ್ಯ ಲೋಕರಚನಾವನಪಾತನೇಷು ಯಸ್ಯಾಸ್ತ್ರಯೋಽಪಿ ಪುರುಷಾಃ ಕರುಣಾಕಟಾಕ್ಷಮ್ ।

ನೈವೇಶತೇ ಕಿಮಪಿ ಸಾ ಜಗದೇಕಮಾತಾ ಭದ್ರಾ ಪರಾ ಪ್ರಕೃತಿರಸ್ತ್ವಘನಾಶಿನೀ ನಃ ॥ ೬೮೬ ॥

ರಾಕಾ ಪ್ರಬೋಧಶಶಿನೋ ಹೃದಯೋದಯಸ್ಯ ನೌಕಾ ವಿಪಜ್ಜಲನಿಧೌ ಪತತಾಂ ಜನಾನಾಮ್ ।

ವೇದಧ್ವಜಸ್ಯ ಲಲಿತಾ ತ್ರಿರುಚಿಃ ಪತಾಕಾ ಕಾಚಿನ್ಮಮಾಸ್ತು ಶರಣಂ ಶಿವಮೂಲಟೀಕಾ ॥ ೬೮೭ ॥

ಮೌಲೌ ಮಹೇಂದ್ರಸುದೃಶಸ್ಸುಮನೋನಿಕಾಯಸಂಶೋಭಿತೇ ಸದಸಿ ಮಾನ್ಯ ಇವಾಭಿಜಾತಃ ।

ರೇಣುಶ್ಚ ಯಚ್ಚರಣಭೂರ್ಲಭತೇಽಗ್ರಪೀಠಂ ತ್ರಾಣಾಯ ಸಾ ಭವತು ಭೂತಪತೇರ್ವಧೂರ್ನಃ ॥ ೬೮೮ ॥

ಅಂಬಾವೃಣೋತಿ ಪರಿತೋಽಪ್ಯಯಮಂಧಕಾರೋ ನಾತ್ಮಾನಮೇವ ಮಮ ಕಿಂ ತು ಕುಲಂ ಚ ದೇಶಮ್ ।

ಶೀಘ್ರಂ ಮದೀಯಹೃದಯೋದಯಪರ್ವತಾಗ್ರೇ ಶ್ರೀಮಾನುದೇತು ತವ ಪಾದಮಯೂಖಮಾಲೀ ॥ ೬೮೯ ॥

ಕಷ್ಟಂ ಧುನೋತು ಮಮ ಪರ್ವತಪುತ್ರಿಕಾಯಾಃ ಪ್ರತ್ಯಗ್ರಪಂಕರুহಬಾಂಧವಕಾಂತಿಕಾಂತಮ್ ।

ಅಂಭೋರುಹಾಸನಮುಖಾಮರಮೌಲಿರತ್ನಜ್ಯೋತಿರ್ವಿಶೇಷಿತಗುಣಂ ಚರಣಾರವಿಂದಮ್ ॥ ೬೯೦ ॥

ಜ್ಯಾಶಿಂಜಿತಾನಿ ಸಮರೇ ಗಿರಿಶಂ ಜಿಗೀಷೋಃ ಕಾಮಸ್ಯ ಹಂಸನಿವಹಸ್ಯ ನಿಮಂತ್ರಣಾನಿ ।

ಧುನ್ವಂತು ಮೇ ವಿಪದಮದ್ರಿಕುಮಾರಿಕಾಯಾಃ ಪಾದಾರವಿಂದಕಟಕಕ್ವಣಿತಾನಿ ತಾನಿ ॥ ೬೯೧ ॥

ಯಃ ಸರ್ವಲೋಕಮಥನಂ ಮಹಿಷಂ ಜಿಗಾಯ ಯಸ್ಯೈವ ಕರ್ಮ ದಮನಂ ಚ ತದಂತಕಸ್ಯ ।

ನಾರೀನರಾಕೃತಿಭೃತೋ ಮಹಸಸ್ತಮಂಘ್ರಿಂ ಮಂಜೀರನಾದಮಧುರಂ ಶರಣಂ ವ್ರಜಾಮಿ ॥ ೬೯೨ ॥

ಆಪನ್ಮಹೋಗ್ರವಿಷರಾಶಿನಿಮಗ್ನಮೇತಂ ದೀನಂ ತ್ವದೀಯಚರಣಂ ಶರಣಂ ಪ್ರಪನ್ನಮ್ ।

ಉದ್ಧರ್ತುಮಂಬ ಕರುಣಾಪರಿಪೂರ್ಣಚಿತ್ತೇ ವಿತ್ತೇಶಮಿತ್ರಕುಲನಾರಿ ತವೈವ ಭಾರಃ ॥ ೬೯೩ ॥

ಲೋಕಾಧಿರಾಜ್ಞಿ ಪತಿತಂ ವಿಪದಂಧಕೂಪೇ ಸಂರುದ್ಧದೃಷ್ಟಿಮಭಿತಸ್ತಿಮಿರಚ್ಛಟಾಭಿಃ ।

ಮಾತಃ ಸಮುದ್ಧರ ಕೃಪಾಕಲಿತೇ ಮೃಡಾನಿ ಪುತ್ರಂ ಕರೇಣ ಜಗತಾಮಭಯಂಕರೇಣ ॥ ೬೯೪ ॥

ಅಸ್ಯ ತ್ವದೀಯಪದಪಂಕಜಕಿಂಕರಸ್ಯ ದುರ್ಭಾಗ್ಯಪಾಕವಿಫಲೀಕೃತಪೌರುಷಸ್ಯ ।

ಪ್ರಾಣೇಶ್ವರಿ ಪ್ರಮಥಲೋಕಪತೇರುಪಾಯಂ ವೀಕ್ಷಸ್ವ ತಾರಣವಿಧೌ ನಿಪುಣೇ ತ್ವಮೇವ ॥ ೬೯೫ ॥

ಮೃತ್ಯುಂಜಯೋರುಮಣಿಪೀಠತಟೇ ನಿಷಣ್ಣೇ ತಾಟಂಕಕಾಂತಿಬಹುಲೀಕೃತಗಂಡಶೋಭೇ ।

ಮಾಣಿಕ್ಯಕಂಕಣಲಸತ್ಕರವಾರಿಜಾತೇ ಜಾತೇ ಕುಲಾಚಲಪತೇರ್ಜಹಿ ಪಾತಕಂ ನಃ ॥ ೬೯೬ ॥

ಕಿಂ ತೇ ವಪುರ್ಜನನಿ ತಪ್ತಸುವರ್ಣಗೌರಂ ಕಾಮಾರಿಮೋಹಿನಿ ಕಿಮಿಂದುಕಲಾವಲಕ್ಷಮ್ ।

ಪಾಕಾರಿನೀಲಮಣಿಮೇಚಕಕಾಂತ್ಯುತಾಹೋ ಬಂಧೂಕಪುಷ್ಪಕಲಿಕಾರುಚಿ ವಾ ಸ್ಮರಾಮಿ ॥ ೬೯೭ ॥

ತ್ವಂ ಸುಂದರೀ ನೃಪತಿಜಾತಿಜಿತಸ್ತ್ವಮಂಬಾ ಧೂಮಾವತೀ ತ್ವಮಜರೇ ಭುವನೇಶ್ವರೀ ತ್ವಮ್ ।

ಕಾಲೀ ತ್ವಮೀಶ್ವರಿ ಶುಕಾರ್ಭಕಧಾರಿಣೀ ತ್ವಂ ತಾರಾ ತ್ವಮಾಶ್ರಿತವಿಪದ್ದಲನಾಸಿಧಾರಾ ॥ ೬೯೮ ॥

ತ್ವಂ ಭೈರವೀ ಭಗವತೀ ಬಗಲಾಮುಖೀ ತ್ವಂ ರಾಮಾ ಚ ಸಾ ಕಮಲಕಾನನಚಾರಿಣೀ ತ್ವಮ್ ।

ಕೈಲಾಸವಾಸಿನಯನಾಮೃತಭಾನುರೇಖೇ ಕೋ ವೇದ ತೇ ಜನನಿ ಜನ್ಮವತಾಂ ವಿಭೂತೀಃ ॥ ೬೯೯ ॥

ಧುನ್ವಂತು ಸರ್ವವಿಪದಃ ಸುಕೃತಪ್ರಿಯಾಣಾಂ ಧುನ್ವಂತು ಚಾಖಿಲಸುಖಾನ್ಯಘಲಾಲಸಾನಾಮ್ ।

ಆವರ್ಜ್ಯ ಭೂರಿಕರುಣಂ ಪುರಜಿತ್ತರುಣ್ಯಾಶ್ಚಿತ್ತಂ ವಸಂತತಿಲಕಾಃ ಕವಿಭರ್ತುರೇತಾಃ ॥ ೭೦೦ ॥

॥ ಸಮಾಪ್ತಂ ಚ ಸಪ್ತಮಂ ಶತಕಮ್ ॥