॥ ಏಕತ್ರಿಂಶಃ ಸ್ತಬಕಃ - ಉಪಜಾತಿವೃತ್ತಮ್ ॥

ನಾಮವೈಭವಮ್

ದರಸ್ಮಿತಶ್ರೀಕಪಟಾ ಸುಪರ್ವಸ್ರೋತಸ್ವಿನೀ ಪರ್ವತಜಾಸ್ಯಜಾತಾ ।

ಪಂಕಂ ಮಮ ಕ್ಷಾಲಯತಾದಶೇಷಂ ಸಂಸಾರಮಗ್ನೇ ಹೃದಯೇ ವಿಲಗ್ನಮ್ ॥ ೭೫೧ ॥

ಹರಾಟ್ಟಹಾಸೇನ ಸಮಂ ಮಿಲಿತ್ವಾ ಪಿತ್ರೇವ ಪುತ್ರೋ ಗುರುಣೇವ ಶಿಷ್ಯಃ ।

ವಿಭ್ರಾಜಮಾನೋ ಮಮ ಶಂ ಕರೋತು ಹಾಸಾಂಕುರಃ ಕೇಸರಿವಾಹನಾಯಾಃ ॥ ೭೫೨ ॥

ನಮಶ್ಶಿವಾಯೈ ಭಣತ ದ್ವಿಪಾದೋ ಯುಷ್ಮಾಕಮಗ್ರ್ಯಾಂ ಧಿಷಣಾಂ ದಧತ್ಯೈ ।

ಆಧಾರಚಕ್ರೇಶಿತುರಂಬಿಕಾಯೈ ಬ್ರಹ್ಮಾಂಡಚಕ್ರಸ್ಯ ವಿಧಾಯಿಕಾಯೈ ॥ ೭೫೩ ॥

ನದಂತಿ ಗಾವೋಽಪಿ ವಿಶಿಷ್ಟಕಾಲೇಷ್ವಂಬೇತಿ ಯೋ ನಾಹ್ವಯತೇ ಸ ಕಿಂ ನಾ ।

ಲಕ್ಷ್ಯಂ ಪುನಃ ಪ್ರಾಣವದಸ್ತು ಸರ್ವಂ ಸರ್ವಸ್ಯ ಚಾಂತರ್ಹಿ ಪರಾಽಸ್ತಿ ಶಕ್ತಿಃ ॥ ೭೫೪ ॥

ಆತ್ಮನ್ಯುತಾನ್ಯತ್ರ ವಿಧಾಯ ಲಕ್ಷ್ಯಂ ತಾಂ ಶಕ್ತಿಮಾದ್ಯಾಮಖಿಲೇಷು ಸುಪ್ತಾಮ್ ।

ಯಾವತ್ಪ್ರಬೋಧಂ ಮುಹುರಾಹ್ವಯಸ್ವ ಪ್ರಬುಧ್ಯತೇ ಸಾ ಯದಿ ಕಿನ್ವಸಾಧ್ಯಮ್ ॥ ೭೫೫ ॥

ಯೇ ನಾಮ ಶಾಂತಿಂ ಪರಮಾಂ ವಹಂತೋ ನಾಮಾನಿ ಶೀತಾಚಲಪುತ್ರಿಕಾಯಾಃ ।

ಸಂಕೀರ್ತಯಂತೋ ವಿಜನೇ ವಸಂತಿ ಜಯಂತತಾತಾದಪಿ ತೇ ಜಯಂತಿ ॥ ೭೫೬ ॥

ನಾಮಾನಿ ಸಂಕೀರ್ತಯತಾಂ ಜನಾನಾಂ ಕಾರುಣ್ಯವತ್ಯಾಃ ಕರಿವಕ್ತ್ರಮಾತುಃ ।

ಪುನರ್ಜನನ್ಯಾ ಜಠರೇ ನಿವಾಸಾದಾಯಾಸವತ್ತಾ ಭವತೀತಿ ಮಿಥ್ಯಾ ॥ ೭೫೭ ॥

ಪಾಪೈಸ್ಸಮಂತಾತ್ಸಮಭಿದ್ರುತೋಽಪಿ ವಿಶ್ವಸ್ಯ ತೇ ವಿಕ್ರಮಮಸ್ಮಿ ಧೀರಃ ।

ನ ಚೇದ್ರಸಜ್ಞೇ ಭವತೀ ಬ್ರವೀತಿ ನಾಮಾನಿ ಶೀತಾಂಶುಭೃತೋ ಹತೋಽಹಮ್ ॥ ೭೫೮ ॥

ದೇಹೀತಿ ಸಂಪಲ್ಲವದರ್ಪಿತಾನಾಂ ದ್ವಾರೇಷು ಘೋಷಂ ಕುರುಷೇ ಪರೇಷಾಮ್ ।

ಭವಾನಿ ಭದ್ರೇ ಭುವನಾಂಬ ದುರ್ಗೇ ಪಾಹೀತಿ ನಾಯಾತಿ ಕಿಮಂಬ ಜಿಹ್ವೇ ॥ ೭೫೯ ॥

ವಾಕ್ಯಾನಿ ವಕ್ತುಂ ಯದಿ ತೇ ರಸಜ್ಞೇ ರಸೋಜ್ಜ್ವಲಾನಿ ವ್ಯಸನಂ ಗರೀಯಃ ।

ಕಿಂ ವಾ ನಮೋಂತಾನಿ ಸುಧಾಂ ಕಿರಂತಿ ನಾಮಾನಿ ನೋ ಸಂತಿ ಕುಮಾರಮಾತುಃ ॥ ೭೬೦ ॥

ಯದ್ ಗೀಯತೇ ಶೈಲಸುತಾಭಿಧಾನಂ ತದೇವ ಬೋಧ್ಯಂ ಸುಕೃತಂ ಪ್ರಧಾನಮ್ ।

ಅಜ್ಞಾನಿಲೋಕಸ್ಯ ಕೃತೇ ಭಣಂತಿ ಯಜ್ಞಾದಿಪುಣ್ಯಾನಿ ಪರಾಣಿ ವಿಜ್ಞಾಃ ॥ ೭೬೧ ॥

ಸಾಮ್ನಾ ಪ್ರಯುಕ್ತೇನ ಜಗದ್ವಶೇ ಸ್ಯಾತ್ ನಾಮ್ನಾ ಸದೋಕ್ತೇನ ಜಗದ್ವಿನೇತ್ರೀ ।

ವೇದೋಭಯಂ ಸಮ್ಯಗಿದಂ ಕೃತೀ ಯೋ ಭವೇ ಭಯಂ ತಸ್ಯ ಕುತೋಽಪಿ ನ ಸ್ಯಾತ್ ॥ ೭೬೨ ॥

ಸಂಕೀರ್ತನಾತ್ತುಷ್ಯತಿ ಶರ್ವಯೋಷಾ ತುಷ್ಟಾ ತ್ವಭೀಷ್ಟಂ ನ ದದಾತಿ ನೈಷಾ ।

ಇಮಂ ತ್ವವಿಜ್ಞಾಯ ಜಗತ್ಯುಪಾಯಂ ವ್ರಜಂತ್ಯಪಾಯಂ ಬಹುಧಾ ಮನುಷ್ಯಾಃ ॥ ೭೬೩ ॥

ಭಾಷೇ ಭುಜಂಗಾಭರಣಪ್ರಿಯಾಯಾ ನಾಮಾನಿ ಕಾಮಾನಿತರಾನ್ ವಿಹಾಯ ।

ಅಪಿ ಪ್ರಪಂಚಾತಿಗಘೋರಕೃತ್ಯಂ ಕರೋತು ಕಿಂ ಮಾಂ ತರಣೇರಪತ್ಯಮ್ ॥ ೭೬೪ ॥

ಯಜ್ಞೇನ ದಾನೈಃ ಕಠಿನವ್ರತೈರ್ವಾ ಸಿದ್ಧಿಂ ಯ ಇಚ್ಛೇತ್ಸ ಗ್ರಹೀತುಮಿಚ್ಛೇತ್ ।

ಮಾತುಃ ಶಯಾನೋಽಂಕತಲೇ ಶಶಾಂಕಂ ಮಹೇಶ್ವರೀಂ ಕೀರ್ತಯತಸ್ತು ಸಿದ್ಧಿಃ ॥ ೭೬೫ ॥

ರಹಸ್ಯತಂತ್ರಾಣಿ ವಿವಿಚ್ಯ ದೂರಂ ವ್ಯಾಜಂ ವಿಮುಚ್ಯ ಪ್ರವದಾಮಿ ಸಾರಮ್ ।

ನಾಮೈವ ಕಾಮಾರಿಪುರಂಧ್ರಿಕಾಯಾಃ ಸಿದ್ಧೇರ್ನಿದಾನಂ ನ ಮಖೋ ನ ದಾನಮ್ ॥ ೭೬೬ ॥

ಪೀಯೂಷಮೀಷನ್ಮಧುರಂ ಭಣಂತಿ ಯೇ ನಾಮ ರಾಮಾಧರಪಾನಲೋಲಾಃ ।

ಕಾಮಾರಿರಾಮಾಹ್ವಯಗಾನಲೋಲಾಃ ಕವೀಶ್ವರಾಃ ಕಾಂಜಿಕಮಾಲಪಂತಿ ॥ ೭೬೭ ॥

ಸುಧಾಘಟಃ ಕೋಽಪ್ಯಧರೋ ವಧೂನಾಂ ಕವಿಸ್ಸುಧಾತೋಯಧರೋಽಭಿಧೇಯಃ ।

ಅಯಂ ಸುಧಾವೀಚಿವಿತಾನಮಾಲೀ ನಾಮಪ್ರಣಾದೋ ನಗಕನ್ಯಕಾಯಾಃ ॥ ೭೬೮ ॥

ಸುರಾಲಯೇ ಭಾತಿತರಾಂ ಸುಧೈಕಾ ಸುಧಾ ಪರಾ ವಾಚಿ ಮಹಾಕವೀನಾಮ್ ।

ಬಿಂಬಾಧರೇ ಕಂಜದೃಶಾಂ ಸುಧಾಽನ್ಯಾ ಸುಧೇತರಾ ನಾಮನಿ ಲೋಕಮಾತುಃ ॥ ೭೬೯ ॥

ಮಾಧುರ್ಯಮಾಭಾತ್ಯಧರೇ ವಧೂನಾಂ ಚಕೋರಬಂಧೋಃ ಶಕಲೇ ಪ್ರಸಾದಃ ।

ತ್ರಿಸ್ರೋತಸೋ ವಾರಿಣಿ ಪಾವನತ್ವಂ ತ್ರಯಂ ಚ ನಾಮ್ನಿ ತ್ರಿಪುರಾಂಬಿಕಾಯಾಃ ॥ ೭೭೦ ॥

ಯಾ ಮಾಧುರೀ ಪ್ರೇಮಭರೇಣ ದಷ್ಟೇ ಜಾಗರ್ತಿ ಕಾಂತಾವರದಂತಚೇಲೇ ।

ಸಾ ದೃಶ್ಯತೇ ಭಕ್ತಿಭರೇಣ ಗೀತೇ ಧರಾಧರಾಧೀಶಸುತಾಭಿಧಾನೇ ॥ ೭೭೧ ॥

ಯತ್ತೇ ಜಗಲ್ಲಂಪಟಕೇಽಪಿ ವರ್ಣಾಸ್ತನ್ಮೇಽಮೃತಂ ನಾಮ ನಗಾತ್ಮಜಾಯಾಃ ।

ಲಾಲಾಮಯೋ ಯೋ ಮಮ ತಂ ಬ್ರವೀಷಿ ಸುಧಾಮಯಂ ಸ್ತ್ರೀದಶನಚ್ಛದಂ ತ್ವಮ್ ॥ ೭೭೨ ॥

ಉಚ್ಚಾರಯೋಚ್ಚಾಟಿತಪಾತಕಾನಿ ನಾಮಾನಿ ಜಿಹ್ವೇ ಭುವನಸ್ಯ ಮಾತುಃ ।

ತದಾ ವದಾಮೋ ಮಧುಚೂತರಂಭಾ-ರಾಮಾಧರಾಸ್ತೇ ರುಚಯೇ ಯದಿ ಸ್ಯುಃ ॥ ೭೭೩ ॥

ಆಕ್ಷೇಪಮಿಕ್ಷೋರಧಿಕಂ ವಿಧತ್ತೇ ಪೀಯೂಷದೋಷಾನಭಿತೋಽಭಿಧತ್ತೇ ।

ಕಾಂತಾಧರಾರಬ್ಧದುರಂತವಾದಃ ಕಪರ್ದಿಕಾಂತಾವರನಾಮನಾದಃ ॥ ೭೭೪ ॥

ವಿಶ್ವಾಸಹೀನೈಃ ಸುತರಾಮಬೋಧ್ಯಂ ನಾಮಾನುಭಾವಂ ನಗಕನ್ಯಕಾಯಾಃ ।

ಜಯಂತು ಸಿದ್ಧೈರಪಿ ಗೀಯಮಾನಂ ಗಾಯಂತ್ಯ ಏತಾ ಉಪಜಾತಯೋ ನಃ ॥ ೭೭೫ ॥