॥ ದ್ವಾತ್ರಿಂಶಃ ಸ್ತಬಕಃ - ಆರ್ಯಾಗೀತಿವೃತ್ತಮ್ ॥

ಭಕ್ತಿರ್ಯೋಗಶ್ಚ

ವಿದಧಾತು ಸಂಪದಂ ಮೇ ಸಕಲಜಗನ್ನಾಥನಯನಹಾರಿಜ್ಯೋತ್ಸ್ನಃ ।

ಶೀತೋಽಂಧಕಾರಹಾರೀ ಹಾಸಶಶೀ ಕಶ್ಚಿದಂಕರಹಿತೋ ಮಾತುಃ ॥ ೭೭೬ ॥

ಕರುಣಾರಸಾರ್ದ್ರಹೃದಯಾ ಹೃದಯಾಂತರನಿರ್ಯದಚ್ಛವೀಚಿಸ್ಮೇರಾ ।

ಪ್ರಮಥೇಶ್ವರಪ್ರಿಯತಮಾ ಪಾದಪ್ರೇಷ್ಯಸ್ಯ ಭವತು ಕಲ್ಯಾಣಯ ॥ ೭೭೭ ॥

ಕಾರಣಕಾರ್ಯವಿಭೇದಾದ್ ರೂಪದ್ವಿತಯಂ ತವಾಂಬ ಯದೃಷಿಪ್ರೋಕ್ತಮ್ ।

ತತ್ರೈಕಂ ಭರ್ತುಮಿದಂ ವಿಹರ್ತುಮನ್ಯತ್ತು ಭೂತಭರ್ತುರ್ಲಲನೇ ॥ ೭೭೮ ॥

ಶ್ರೋತುಂ ಸ್ತೋತ್ರವಿಶೇಷಂ ಭಕ್ತವಿಶೇಷಂ ಚ ಬೋದ್ಧುಮಯಮೀದೃಗಿತಿ ।

ದಾತುಂ ಚ ವಾಂಛಿತಾರ್ಥಂ ತವ ಮಾತಶ್ಚಂದ್ರಲೋಕರೂಪಂ ಭವತಿ ॥ ೭೭೯ ॥

ಕೀಶಕಿಶೋರನ್ಯಾಯಾತ್ ಕಾರಣರೂಪಂ ತವಾಂಬ ಯೋಗೀ ಧತ್ತೇ ।

ಓತುಕಿಶೋರನ್ಯಾಯಾದ್ ಭಕ್ತಂ ಪರಿಪಾಸಿ ಕಾರ್ಯರೂಪೇಣ ತ್ವಮ್ ॥ ೭೮೦ ॥

ದೃಢಧಾರಣಾ ನ ಚೇತ್ತ್ವಚ್ಚ್ಯವತೇ ಯೋಗೀ ಮಹೇಶನಯನಜ್ಯೋತ್ಸ್ನೇ ।

ನಾಯಂ ಮಮೇತಿ ಭಾವಸ್ತವ ಯದಿ ಸದ್ಯಃ ಸವಿತ್ರಿ ಭಕ್ತಂ ತ್ಯಜಸಿ ॥ ೭೮೧ ॥

ಶಿಥಿಲಧೃತಿರ್ಯೋಗೀ ಸ್ಯಾದ್ ಬಾದ್ಯೈರ್ವಿಷಯೈರ್ನಿತಾಂತಮಾಕೃಷ್ಟೋ ಯಃ ।

ಸ್ವೀಯಮತಿಲುಪ್ಯತಿ ತೇ ಭಕ್ತೇಽಹಂತಾಪ್ರಸಾರಕಲುಷೇ ಮಾತಃ ॥ ೭೮೨ ॥

ಸಾಹಂಕೃತಿರ್ನ ಭಕ್ತಿಃ ಸಬಾಹ್ಯವಿಷಯಾ ಧೃತಿರ್ನ ಸರ್ವೇಶ್ವರಿ ತೇ ।

ಅವಿಜಾನಂತಾವೇತದ್ ಭಕ್ತೋ ಯೋಗೀ ಚ ನೈವ ಸಿದ್ಧೌ ಸ್ಯಾತಾಮ್ ॥ ೭೮೩ ॥

ವ್ಯಕ್ತಿತ್ವಾದಪಿ ಯಸ್ಯ ಪ್ರಿಯಂ ತ್ವದೀಯಂ ಸವಿತ್ರಿ ಪಾದಾಂಭೋಜಮ್ ।

ಸೋಽದ್ಭುತಶಕ್ತಿರ್ಭಕ್ತೋ ಭಗವತಿ ಕಿಂ ಕಿಂ ಕರೋತಿ ನಾಸ್ಮಿನ್ ಜಗತಿ ॥ ೭೮೪ ॥

ವ್ಯಕ್ತಿತ್ವಲೋಭವಿವಶೇ ಸಿದ್ಧಃ ಕಾಮೋಽಪಿ ಭವತಿ ಸಮವಚ್ಛಿನ್ನಃ ।

ಪ್ರಾಪ್ತೋಽಪಿ ಸಲಿಲರಾಶಿಂ ಸಲಿಲಾನಿ ಘಟಃ ಕಿಯಂತಿ ಸಂಗೃಹ್ಣೀಯಾತ್ ॥ ೭೮೫ ॥

ಜೀವನ್ನೇವ ನರೋ ಯಃ ಸಾಯುಜ್ಯಂ ತೇ ಪ್ರಯಾತಿ ಶಂಭೋಃ ಪ್ರಮದೇ ।

ಸರ್ವೇ ಕಾಮಾಸ್ತಸ್ಯ ಪ್ರಯಾಂತಿ ವಶಮಾಶು ವೀತವಿವಿಧಭ್ರಾಂತೇಃ ॥ ೭೮೬ ॥

ವ್ಯಕ್ತಿತ್ವಂ ತುಭ್ಯಮಿದಂ ಮನೀಷಯಾ ಮೇ ಪ್ರದತ್ತಮಧಿಕಾರಿಣ್ಯಾ ।

ಬಹುಕಾಲಭೋಗಬಲತೋ ವಿವದತಿ ದೇಹೋ ಮದಂಬ ಕಿಂ ಕರವಾಣಿ ॥ ೭೮೭ ॥

ಸ್ಥೂಲೇನ ವರ್ಷ್ಮಣಾ ಸಹ ಸೂಕ್ಷ್ಮಾ ಕಲಹಂ ಮತಿರ್ನ ಕರ್ತುಂ ಶಕ್ತಾ ।

ಸುತರಾಂ ಬಲವತಿ ಮಾತರ್ಬಲಾದ್ ಗೃಹಾಣ ಸ್ವಯಂ ತ್ವಮಸ್ಮಾತ್ಸ್ವೀಯಮ್ ॥ ೭೮೮ ॥

ಸರ್ವೇಷಾಂ ಹೃದಿ ಯಸ್ಮಾತ್ತ್ವಮಸಿ ಪ್ರಾಣಾತ್ಮಿಕಾಂಬ ಹೇತೋಸ್ತಸ್ಮಾತ್ ।

ಅಖಿಲಪ್ರಾಣ್ಯಾರಾಧನಮಾರಾಧನನಿರ್ವಿಶೇಷಮಗಪುತ್ರಿ ತವ ॥ ೭೮೯ ॥

ಜುಹ್ವತಿ ಕೇಽಪಿ ಕೃಶಾನೌ ತಸ್ಮಾತ್ಪ್ರಾಪ್ತಿಸ್ತವೇತಿ ಸಂಪಶ್ಯಂತಃ ।

ಅಪರೇ ಪ್ರಾಣಿಷು ಜುಹ್ವತಿ ಸಾಕ್ಷಾತ್ಪ್ರಾಣಾತ್ಮಿಕಾಽಸಿ ತೇಷ್ವಂತರಿತಿ ॥ ೭೯೦ ॥

ಪ್ರಾಣಿಷ್ವಪಿ ಯಃ ಪ್ರಾಣಂ ಭೂತಾದಿಮನಾದಿಮಾತ್ಮನಿ ಸ್ಥಿತಮನಘಮ್ ।

ಸತತಮುಪಾಸ್ತೇ ಯೋಗೀ ತಸ್ಮಿನ್ ಹೋಮೇನ ತೇಽಂಬ ತೃಪ್ತಿಸ್ಸುಲಭಾ ॥ ೭೯೧ ॥

ಆತ್ಮನಿ ಯೋಽಂಬ ಶ್ರೇಷ್ಠೇ ಪ್ರಾಣೇ ಪ್ರಾಣಾನ್ ಜುಹೋತಿ ದಹರಾಭಿಮುಖಃ ।

ತ್ವದ್ರೂಪೇ ಹತಪಾಪೇ ತೇನ ಜಿತಂ ಸಕಲಮೀಶಚಿತ್ತಾರಾಮೇ ॥ ೭೯೨ ॥

ಉಪಸಂಹೃತಮಖಿಲೇಭ್ಯೋ ವಿಷಯೇಭ್ಯೋ ನಿರ್ನಿಮೇಷಮಂತಃಕೃಷ್ಟಮ್ ।

ಹೃದಿ ದೃಢಪದೇನ ಚಕ್ಷುಸ್ತ್ವದ್ರೂಪೇ ಹೂಯತೇ ಮದಂಬ ಪ್ರಾಣೇ ॥ ೭೯೩ ॥

ಅಂತಸ್ಸ್ವರಂ ನಿಗೂಢಂ ಶ್ರೇಷ್ಠಪ್ರಾಣಸ್ಯ ದೇವಿ ತವ ಭಾಗಸ್ಯ ।

ಶೃಣ್ವದಿವ ಪ್ರಣವಾಖ್ಯಂ ಶ್ರವಣಂ ತತ್ರೈವ ಭವತಿ ಜಗದಂಬ ಹುತಮ್ ॥ ೭೯೪ ॥

ಸರ್ವೇಷಾಂ ಮಂತ್ರಾಣಾಂ ಸ್ತೋತ್ರಾಣಾಂ ಚೇಶಚಿತ್ತನಾಥೇ ಪ್ರಕೃತೌ ।

ಗೂಢಂ ಸದಾ ಸ್ವರಂತ್ಯಾಂ ಪ್ರಾಣಂತ್ಯಾಂ ತ್ವಯಿ ಜುಹೋತಿ ಮೌನೀ ವಾಚಮ್ ॥ ೭೯೫ ॥

ದೇಹೇ ಸ್ಖಲತಿ ಮನಶ್ಚೇತ್ ವಿಷಯೇಷು ಹುತಂ ದಧಾತಿ ವಿಷಯಾತ್ಮತ್ವಮ್ ।

ಆವೃತ್ತಂ ಯದಿ ದೇಹಾದ್ ಸೂಕ್ಷ್ಮಾಯಾಂ ತ್ವಯಿ ಹುತಂ ತ್ವದಾಕೃತಿ ಭವತಿ ॥ ೭೯೬ ॥

ತ್ವಗ್ರಸನಘ್ರಾಣಾನಾಮನುಭೂತೀಃ ಪ್ರಾಣಶಕ್ತಿಸಾತ್ಕುರ್ವಾಣಃ ।

ಕಂ ನಾರ್ಪಯತೇ ಭೋಗಂ ಭಗವತಿ ತೇ ಸರ್ವಲೋಕಪಾರ್ಥಿವವನಿತೇ ॥ ೭೯೭ ॥

ಗಚ್ಛನ್ ಕುರ್ವನ್ ವಿಸೃಜನ್ ರಮಮಾಣಶ್ಚಾಂಬ ಸಕಲಲೋಕಾಧೀಶೇ ।

ಯಃ ಕೇವಲಾಂ ಕ್ರಿಯಾಮಪಿ ಚಿಂತಯತೇ ತೇನ ನಿತ್ಯಯಜ್ಞಃ ಕ್ರಿಯತೇ ॥ ೭೯೮ ॥

ಸರ್ವೇಷಾಮಗ್ನೀನಾಂ ಪ್ರಾಣಾಗ್ನಿಸ್ತವ ವಿಭೂತಿರುಕ್ತಃ ಶ್ರೇಷ್ಠಃ ।

ತಸ್ಮಿನ್ಹುತಂ ತು ಸುಹುತಂ ದ್ರವ್ಯಾಣಿ ಧಿಯಃ ಕ್ರಿಯಾಶ್ಚ ಮಂತ್ರಃ ಪ್ರಣವಃ ॥ ೭೯೯ ॥

ಆರ್ಯಾಗೀತೀನಾಮಯಮಧರೀಕೃತಮಧುಸುಧಾದಿಮಾಧುರ್ಯರಸಃ ।

ವರ್ಗೋ ಗಣಪತಿವದನಾನ್ನಿಷ್ಕ್ರಾಂತೋ ಭವತು ಶರ್ವಸುದೃಶಃ ಪ್ರೀತ್ಯೈ ॥ ೮೦೦ ॥

॥ ಸಮಾಪ್ತಂ ಚ ಅಷ್ಟಮಂ ಶತಕಮ್ ॥