॥ ನವಮಂ ಶತಕಮ್ ॥

॥ ತ್ರಯಸ್ತ್ರಿಂಶಃ ಸ್ತಬಕಃ - ವಂಶಸ್ಥವೃತ್ತಮ್ ॥

ಜಪೋ ಯೋಗೋಽರ್ಪಣಂ ಚ

ಸುಧಾಂ ಕಿರಂತೋಽಖಿಲತಾಪಹಾರಿಣೀಂ ತಮೋ ಹರಂತಃ ಪಟಲೇನ ರೋಚಿಷಾಮ್ ।

ಶ್ರಿಯಂ ದಿಶಂತೋ ದಿಶಿ ದಿಶ್ಯಸಂಕ್ಷಯಾಂ ಜಯಂತಿ ಶೀತಾದ್ರಿಸುತಾಸ್ಮಿತಾಂಕುರಾಃ ॥ ೮೦೧ ॥

ಕೃಪಾಕಟಾಕ್ಷಸ್ತವ ಕೇನ ವಾಽಽಪ್ಯತೇ ಮಹೇಶಶುದ್ಧಾಂತಪುರಂಧ್ರಿ ಕರ್ಮಣಾ ।

ನಿರಂತರಂ ಮಂತ್ರಜಪೇನ ವಾ ಮತೇರ್ವಿಶೋಧನೇನೋತ ಮನೋರ್ಪಣೇನ ವಾ ॥ ೮೦೨ ॥

ವಿಶೋಧನಾದ್ದೇವಿ ಮತೇಃ ಪ್ರಗೃಹ್ಯಸೇ ಮನೋರ್ಪಣೇನೇಶವಧು ಪ್ರಸೀದಸಿ ।

ಜಪೇನ ಮಂತ್ರಸ್ಯ ಶುಭಸ್ಯ ವರ್ಧಸೇ ಜಗತ್ತ್ರಯೀಧಾತ್ರಿ ಕಲೇವರಾಂತರೇ ॥ ೮೦೩ ॥

ಮನಃಪ್ರತಾಪಸ್ಯ ಭವತ್ಯಸಂಶಯಂ ಪ್ರವರ್ಧನಂ ವೈದಿಕಮಂತ್ರಚಿಂತನಮ್ ।

ಪ್ರಶಸ್ಯತೇ ಪ್ರಾಣಮಹಃಪ್ರದೀಪನೇ ದಯಾನ್ವಿತೇ ತಾಂತ್ರಿಕಮಂತ್ರಸೇವಿತಾ ॥ ೮೦೪ ॥

ತವಾಂಬಿಕೇ ತಾಂತ್ರಿಕಮಂತ್ರಮುತ್ತಮಂ ಸ್ತವಾತಿಗಂ ಯಃ ಕನಕಾಂಗಿ ಸೇವತೇ ।

ವಿಚಿತ್ರಯಂತ್ರಾದಿವ ವೈದ್ಯುತಂ ಮಹಸ್ತತೋ ವಿನಿರ್ಯದ್ ಭುವನಂ ವಿಗಾಹತೇ ॥ ೮೦೫ ॥

ನ ತಸ್ಯ ಚೇತೋ ವಿಕೃತೇರ್ವಶೇ ಭವೇನ್ನ ತಸ್ಯ ದೃಷ್ಟಿರ್ವಿಷಯೈರ್ವಿಕೃಷ್ಯತೇ ।

ನ ತಸ್ಯ ರೋಗೈರಪಕೃಷ್ಯತೇ ವಪುಃ ಸವಿತ್ರಿ ಯಸ್ತೇ ಭಜತೇ ಮಹಾಮನುಮ್ ॥ ೮೦೬ ॥

ಸ್ಮರಂತಿ ಮಾಯಾಂ ಗಗನಾಗ್ನಿಶಾಂತಿಭಿಃ ಸಹಾಚ್ಛಭಾಸಾ ಸಹಿತಾಭಿರಂಬಿಕೇ ।

ತಥಾ ರಸಜ್ಞಾಂ ದ್ರುಹಿಣಾಗ್ನಿಶಾಂತಿಭಿರ್ಭಣಂತಿ ದೋಗ್ಧ್ರೀಂ ತು ಖಷಷ್ಠಬಿಂದುಭಿಃ ॥ ೮೦೭ ॥

ಅಭಣ್ಯತಾದ್ಯಾ ಭುವನೇಶ್ವರೀ ಬುಧೈರನಂತರಾ ಮಾತರಗಾದಿ ಕಾಲಿಕಾ ।

ಪ್ರಚಂಡಚಂಡೀ ಪರಿಕೀರ್ತಿತಾ ಪರಾ ತ್ರಯೋಽಪ್ಯಮೀ ತೇ ಮನವೋ ಮಹಾಫಲಾಃ ॥ ೮೦೮ ॥

ಉಪಾಧಿಭೂತಂ ಶುಚಿ ನಾಭಸಂ ರಜೋ ದಧಾತಿ ಸಾಕ್ಷಾದ್ ಭುವನೇಶ್ವರೀಪದಮ್ ।

ತದಾಶ್ರಯಾ ವ್ಯಾಪಕಶಕ್ತಿರದ್ಭುತಾ ಮನಸ್ವಿನೀ ಕಾಚನ ಕಾಲಿಕೇರಿತಾ ॥ ೮೦೯ ॥

ಅಮರ್ತ್ಯಸಾಮ್ರಾಜ್ಯಭೃತಃ ಪ್ರವರ್ತಿಕಾ ವಿಶಾಲಲೋಕತ್ರಯರಂಗನರ್ತಿಕಾ ।

ಪರಾಕ್ರಮಾಣಾಮಧಿನಾಯಿಕೋಚ್ಯತೇ ಪ್ರಚಂಡಚಂಡೀತಿ ಕಲಾ ಸವಿತ್ರಿ ತೇ ॥ ೮೧೦ ॥

ಸ್ಮರನ್ಮನುಂ ರೋದಿತಿ ಭಕ್ತಿಮಾಂಸ್ತವ ಪ್ರಗೃಹ್ಯ ಪಾದಂ ಮುನಿರಂಬ ಲಂಬತೇ ।

ಫಲಂ ಚಿರಾಯ ಪ್ರಥಮಃ ಸಮಾಪ್ನುಯಾತ್ ಪರೋ ಮರಂದಂ ಪದ ಏವ ವಿಂದತಿ ॥ ೮೧೧ ॥

ಪದಂ ತವಾನ್ವಿಷ್ಟಮನೇಕದಾ ಮುದಾ ಹೃದಂತರೇ ಸ್ಪೃಷ್ಟಮಿವೇದಮಂಬಿಕೇ ।

ಪಲಾಯತೇಽಧೋಽಹಮನಂತರಂ ಶುಚಾ ಪರಾತ್ಪರೇ ರೋದಿಮಿ ಮಂತ್ರಶಬ್ದತಃ ॥ ೮೧೨ ॥

ಭಣಂತಿ ಸಂತೋ ಮರುತಾಂ ಸವಿತ್ರಿ ತೇ ಮಹಾಮನುಂ ತ್ವತ್ಪದಭಾಸ್ಕರಾತಪಮ್ ।

ತತೋ ಹಿ ಮೂಲಾತ್ಸ್ವರ ಏಷ ನಿರ್ಗತಸ್ತಪತ್ಯಘೌಘಂ ಜರಯನ್ಮಹೋಮಯಃ ॥ ೮೧೩ ॥

ಸವಿತ್ರಿ ಸಾಕ್ಷಾಚ್ಚರಣಸ್ಯ ತೇ ಪ್ರಭಾಂ ವಿಧಾರಯಂಸ್ತಜ್ಜನಿಮೂಲಮಾರ್ಗಣೇ ।

ಮುಹುರ್ಮುಹುಸ್ಸೋಽಹಮಜೇ ಧೃತೋದ್ಯಮಃ ಪಥಾ ಮಹರ್ಷೀ ರಮಣೋ ಬಭಾಣ ಯಮ್ ॥ ೮೧೪ ॥

ಅಹಂಪದಾರ್ಥೋ ಯದಿ ಚಿಲ್ಲತಾ ತತಾ ಕಿಮೇಷ ದೋಗ್ಧ್ರೀಮನುಭಾವತೋಽಪರಃ ।

ಅಹಂ ಯದಿ ಪ್ರಾಣನಿನಾದವೈಖರೀ ನ ಕೂರ್ಚ ಆಖ್ಯಾತುಮಸೀತಿ ಶಕ್ಯತೇ ॥ ೮೧೫ ॥

ಪರೇ ತು ಯಾಂ ಚೇತನಶಕ್ತಿಮಾಮನಂತ್ಯಭಾಣಿ ಸಾ ಕುಂಡಲಿನೀತಿ ತಾಂತ್ರಿಕೈಃ ।

ವಿಲಕ್ಷಣಾ ನಾಮ ಚಮತ್ಕೃತಿರ್ಜಡಾನ್ ಪ್ರತಾರಯತ್ಯಾಗಮಸಾರದೂರಗಾನ್ ॥ ೮೧೬ ॥

ಭವತ್ಯಖಂಡಾನುಭವಃ ಪ್ರಬೋಧಿನಾಮತೀವ ಸೂಕ್ಷ್ಮಾನುಭವಶ್ಚ ಯೋಗಿನಾಮ್ ।

ಕರಂ ಗತಾಸ್ಸರ್ವವಿಧಾಶ್ಚ ಶೇರತೇ ಮಹೇಶ್ವರೀಮಂತ್ರಪರಸ್ಯ ಸಿದ್ಧಯಃ ॥ ೮೧೭ ॥

ಸಹಸ್ರಸಂಖ್ಯಾನಿ ಜನೂಂಷಿ ವಾ ಮಮ ಪ್ರಿಯಾಣಿ ಭಕ್ತಿಸ್ತವ ಚೇದ್ಭವೇ ಭವೇ ।

ತವ ಸ್ಮೃತಿಂ ಚೇದ್ ಗಲಯೇನ್ನ ಸಮ್ಮದಂ ಕರೋತಿ ಮೋಕ್ಷೋಽಪಿ ಮಮೇಶವಲ್ಲಭೇ ॥ ೮೧೮ ॥

ವಿನೈವ ದೃಷ್ಟಿಂ ಯದಿ ಸತ್ಪ್ರಶಿಷ್ಯತೇ ನ ಸತ್ತಯಾಽರ್ಥಃ ಫಲಹೀನಯಾ ತಯಾ ।

ಇದಂ ತು ಸತ್ ಕಿನ್ವಸತೋ ವಿಶಿಷ್ಯತೇ ನ ತಾತ ಮುಕ್ತೋಪಲಯೋಸ್ತದಾ ಭಿದಾ ॥ ೮೧೯ ॥

ಶುಚಾಂ ನಿವೃತ್ತಿರ್ಯದಿ ಮುಕ್ತಿರಿಷ್ಯತೇ ಸುಖಪ್ರವೃತ್ತಿರ್ಯದಿ ನಾತ್ರ ವಿದ್ಯತೇ ।

ಸದೇವ ಚೇತ್ತತ್ರ ಮತಿರ್ನ ಭಾಸತೇ ಜಡಂ ವಿಮುಕ್ತಾದ್ವಚಸೈವ ಭಿದ್ಯತೇ ॥ ೮೨೦ ॥

ಮತಿಃ ಪರಾಚೀ ವ್ಯವಹಾರಕಾರಣಂ ಭವೇತ್ಪ್ರತೀಚೀ ಪರಮಾರ್ಥಸಂಪದಿ ।

ಉಭೇ ದಿಶೌ ಯಸ್ಯ ಮತಿರ್ವಿಗಾಹತೇ ಪದಾ ಚ ಮೂರ್ಧ್ವಾ ಚ ಸ ಸಿದ್ಧ ಇಷ್ಯತೇ ॥ ೮೨೧ ॥

ದೃಢಂ ಪದಂ ಯಸ್ಯ ಮತೇಃ ಸದಾಽಂತರೇ ಸ ನಾ ಧಿಯೋಽಗ್ರೇಣ ಬಹಿಶ್ಚರನ್ನಪಿ ।

ಸವಿತ್ರಿ ಮಗ್ನಸ್ತ್ವಯಿ ಸಂಪ್ರಕೀರ್ತ್ಯತೇ ನ ತಸ್ಯ ಭೀಃ ಸಂಚರತೋಽಪಿ ಸಂಸೃತೇಃ ॥ ೮೨೨ ॥

ವಿಚಿಂತನೆಯಲ್ಲಿ ಚಿಂತನಶಕ್ತಿಮದ್ಭುತಾಂ ವಿಲೋಕನೇ ಲೋಕನಶಕ್ತಿಮುಜ್ವಲಾಮ್ ।

ಪ್ರಭಾಷಣೇ ಭಾಷಣಶಕ್ತಿಮುತ್ತಮಾಂ ನಿಭಾಲಯಂಸ್ತ್ವಾಂ ವಿಷಯೈರ್ನ ಜೀಯತೇ ॥ ೮೨೩ ॥

ವಿಲೋಕಮಾನಸ್ಯ ವಿಲೋಕನಂ ಕವೇರ್ವಿಲೋಕ್ಯಮಾನೇಷು ವಿಹಾಯ ಸಕ್ತತಾಮ್ ।

ವಿಲೋಚನೇ ಸನ್ನಿಹಿತಾ ನಿರಂತರಂ ವಿಧೂತಭೀತಿರ್ವಿಬುಧಸ್ತುತಾ ಶಿವಾ ॥ ೮೨೪ ॥

ಅಯಂ ಭಯಾನಾಂ ಪರಿಮಾರ್ಜಕಸ್ಸತಾಂ ಸಮಸ್ತಪಾಪೌಘನಿವಾರಣಕ್ಷಮಃ ।

ಮನೋಜ್ಞವಂಶಸ್ಥಗಣೋ ಗಣೇಶಿತುರ್ಮನೋ ಮಹೇಶಾಬ್ಜದೃಶೋ ಧಿನೋತ್ವಲಮ್ ॥ ೮೨೫ ॥