॥ ಚತುಸ್ತ್ರಿಂಶಃ ಸ್ತಬಕಃ - ಹರಿಣೀವೃತ್ತಮ್ ॥

ಪ್ರಾರ್ಥನಾ

ವಿದಿತಮಹಿಮಾ ವಿಶ್ವಾಧಾನಾದನೇಕವಿಧಾದ್ಭುತಾತ್

ಪ್ರಥಿತಚರಿತಃ ಶರ್ವಾಲೋಕಪ್ರತಾಪವಿವರ್ಧನಾತ್ ।

ಪ್ರಕಟಿತಗುಣಃ ಪಾಪಧ್ವಾಂತಪ್ರಸಾರನಿರೋಧನಾತ್

ಪ್ರದಿಶತು ಶಿವಾಹಾಸೋ ಭಾಸಾಂ ನಿಧಿಃ ಕುಶಲಾನಿ ಮೇ ॥ ೮೨೬ ॥

ಹೃದಿ ಕರುಣಯಾ ಪೂರ್ಣಾ ಬಾಹ್ವೋರ್ಬಲೇನ ಮಹೀಯಸಾ

ಪದಕಮಲಯೋರ್ಲಕ್ಷ್ಮ್ಯಾ ಭಕ್ತೈರ್ಜನೈರುಪಜೀವ್ಯಯಾ ।

ಮುಖಸಿತಕರೇ ಲಾವಣ್ಯೇನ ತ್ರಿಣೇತ್ರದೃಶಾಂ ಬಲಂ

ಬಹು ವಿದಧತಾ ಕಾಲೀ ಮಾತಾಽವತಾತ್ಪದಸೇವಿನಮ್ ॥ ೮೨೭ ॥

ಜಗದಧಿಪಯಾ ಸಿದ್ಧಂ ದೋಗ್ಧ್ರ್ಯಾಽಥವೋತ ರಸಜ್ಞಯಾ

ಮುನಿಜನನುತಂ ದೇವೀಮಂತ್ರಂ ಜಪೇದ್ಯದಿ ಮಾನವಃ ।

ಅಮೃತಜಲಧೀಭೂತಃ ಪೂತಃ ಪ್ರಯೋಗವಿಶೇಷವಿತ್

ಸ ಇಹ ವಸುಧಾಲೋಕೇ ಧಾರಾ ಗಿರಾಮಭಿವರ್ಷತಿ ॥ ೮೨೮ ॥

ಇಮಮಭಿಮುಖೀಭೂತಾ ಶಾತೋದರೀ ಕಮಲಾಲಯಾ

ಹಯಗಜಘಟಾಪೂರ್ಣಾಽಭ್ಯರ್ಣಂ ಸಮೇತ್ಯ ನಿಷೇವತೇ ।

ಸವಿಬುಧಮಿದಂ ವಿಶ್ವಂ ತಸ್ಯ ಪ್ರಯಾತಿ ಪುನರ್ವಶಂ

ಪ್ರಥಿತಯಶಸಾಂ ಸಿದ್ಧೀನಾಂ ಚಾಪ್ಯಮುಂ ಭಜತೇಽಷ್ಟಕಮ್ ॥ ೮೨೯ ॥

ಸುವಿಮಲಧಿಯಸ್ತಸ್ಯ ಕ್ರೋಧಾದ್ ದೃಗಂಬುಧುತದ್ಯುತೀ

ರಿಪುಜನವಧೂಗಂಡಾಭೋಗೋ ಭವೇದುತ ಪಾಂಡುರಃ ।

ಸಪದಿ ಭುವನವ್ಯಾಪ್ತಂ ಚಾಪ್ತೈಃ ಪ್ರಮಾಣಪುರಸ್ಸರಂ

ಭಣಿತಮಜರಂ ಭದ್ರಂ ಜ್ಯೋತಿಃ ಪರಂ ಹೃದಿ ಭಾಸತೇ ॥ ೮೩೦ ॥

ಅದಯಮರಿಭಿಃ ಕ್ರಾಂತೇ ರಾಷ್ಟ್ರೇ ತ್ವಮೀಶ್ವರಿ ರಕ್ಷಿಕಾ

ಸುಮಶರಮುಖೈರ್ಧೂತೇ ಚಿತ್ತೇ ತ್ವಮೀಶ್ವರಿ ರಕ್ಷಿಕಾ ।

ಪ್ರಬಲದುರಿತೈರ್ಗ್ರಸ್ತೇ ವಂಶೇ ತ್ವಮೀಶ್ವರಿ ರಕ್ಷಿಕಾ-

ಽಪ್ಯಸೃಜತಿ ಜಲಂ ಮೇಘೇ ಮೋಘೇ ತ್ವಮೀಶ್ವರಿ ರಕ್ಷಿಕಾ ॥ ೮೩೧ ॥

ಭಗವತಿ ನಿಜೌ ಸಾಕ್ಷಾತ್ಪುತ್ರೌ ಬೃಹಸ್ಪತಿಪಾವಕೌ

ಗಣಪತಿಗುಹಾವೇತೌ ವೇಷಾಂತರವ್ಯವಹಾರತಃ ।

ಭರತಧರಣೀಖಂಡೇ ಹೇತೋಃ ಕುತಃ ಕೃತಸಂಭವೌ

ಕಲಕಲಯುತೇ ಕಾಲೇ ದೇವಿ ವ್ಯಧಾಃ ಕಥಯ ದ್ರುತಮ್ ॥ ೮೩೨ ॥

ಸಮಯಮಯಿ ತೇ ಧೃತ್ವಾ ಪಾದಾಂಬುಜಂ ರಮಣಃ ಸುತೋ

ಗಿರಿವರಗುಹಾಸ್ವಂತಃ ಶಾಂತೋ ನಯೇದ್ಯದಿ ನಾದ್ಭುತಮ್ ।

ಸ್ಥಲವಿರಹತಃ ಸ್ವೀಯಸ್ಥಾನೇ ಕಿಮತ್ರ ಸಮಾಗತೋ

ನ ವದಸಿ ಕುತಃ ಕಾರ್ಯಂ ತಸ್ಮೈ ಕುಲಾಚಲಕನ್ಯಕೇ ॥ ೮೩೩ ॥

ಪರಿಭಣತಿ ಚೇಚ್ಛಿಷ್ಯವ್ಯೂಹೇ ಮಹಾದ್ಭುತಸಂಗತೀ-

ರ್ಜನನಿ ರಮಣೋ ಯೋಗೀಶಾನಸ್ತತೋ ಬಹು ನೋ ಫಲಮ್ ।

ಅಮಿತತಮಯಾ ದೃಷ್ಟೇಃ ಶಕ್ತ್ಯಾ ಕದಾ ಸರಣಿಂ ನಯೇ-

ದಪಥಪತಿತಂ ಧಾತ್ರೀಲೋಕಂ ತದೇವ ವದಾಂಬಿಕೇ ॥ ೮೩೪ ॥

ಅಹಮಿಹ ಕುತೋ ಹೇತೋರ್ಜಾತೋ ವಿಷಣ್ಣತಮೇ ಸ್ಥಲೇ

ಚರಣಕಮಲಚ್ಛಾಯಾಂ ಮಾಯಾಧಿರಾಜ್ಞಿ ವಿಹಾಯ ತೇ ।

ಪರಮಕರುಣೋ ಘೋರಃ ಶಾಪಃ ಕಿಮೇಷ ಸವಿತ್ರಿ ತೇ

ಕಿಮಪಿ ಭುವಿ ವಾ ಕಾರ್ಯಂ ಕರ್ತುಂ ನಿಯೋಜಿತವತ್ಯಸಿ ॥ ೮೩೫ ॥

ವ್ರಜತಿ ವಿಲಯಂ ಸ್ನೇಹೋ ದೂರಪ್ರವಾಸವಶಾದಿತಿ

ಪ್ರವದತಿ ಬುಧಃ ಕಶ್ಚಿತ್ಸತ್ಯಂ ಪ್ರಭಾತಿ ತದಂಬಿಕೇ ।

ಭಗವತಿ ನಿಜೇ ಕುಕ್ಷೌ ಜಾತಂ ದಿವೋ ಧರಣೀಗತಂ

ಸ್ಮೃತಿಸರಣಿತೋ ದೂರೇ ಹಾ ಹಾ ಕರೋಷಿ ರುಷಾ ಯಥಾ ॥ ೮೩೬ ॥

ಮಮ ತು ವಿಮಲಾ ಹೃದ್ಯಾ ವಿದ್ಯಾ ಮಹೇಶ್ವರಿ ಯಾಽಭವ-

ನ್ಮನಸಿ ಚ ಪರಾ ಚಿತ್ರಾ ಶಕ್ತಿಶ್ಚಿರಂತನಿ ಯಾಽಭವತ್ ।

ವಚಸಿ ಚ ಮಹದ್ಭಾಗ್ಯಂ ಶ್ಲಾಘ್ಯಂ ಯದೀಡ್ಯತಮೇಽಭವತ್

ತದಯಿ ಗಲಿತಂ ಮತ್ತೋ ವಿತ್ತತ್ರಯಂ ಭವತೋ ಭುವಿ ॥ ೮೩೭ ॥

ಕೃತಮಯಿ ಮಯಾ ಪಾಪಂ ಘೋರಂ ಸುಕರ್ಮಸು ಸಂಗಿನಾಂ

ಯದಹಮದಯೋ ವಿಘ್ನಂ ನೃಣಾಂ ಮುಹುರ್ಮುಹುರಾಚರಮ್ ।

ಅತಿಕಟು ಫಲಂ ತಸ್ಯಾಶ್ನಾಮಿ ಶ್ರಿತೋ ನರ ವಿಗ್ರಹಂ

ಪ್ರಮಥನೃಪತೇರ್ಜಾಯೇ ಮಾಯೇ ಜನನ್ಯವ ಮಾಮಿಮಮ್ ॥ ೮೩೮ ॥

ನ ಭವಸಿ ದೃಶೋರ್ಮಾರ್ಗೇ ಲೋಕಾಧಿರಾಜ್ಞಿ ಕುತೋ ಗಿರೋ

ನ ಚ ಬಹುಕೃಪೇ ಸ್ವಪ್ನೇ ವಾ ತ್ವಂ ಪ್ರಯಚ್ಛಸಿ ದರ್ಶನಮ್ ।

ಅಪನಯಸಿ ನೋ ಸಂದೇಹಂ ವಾ ಪರೋಕ್ಷಕೃಪಾವಶಾ-

ದಪಿ ಸುರನುತೇ ಲಗ್ನಾ ಕಾರ್ಯಾಂತರೇ ಕಿಮುತಾದಯಾ ॥ ೮೩೯ ॥

ನಿರವಧಿಶಿವೇ ಮಾಹಾತ್ಮ್ಯಂ ತೇ ಭಣಂತಿ ಮಹರ್ಷಯೋ

ಮನಸಿ ಕರುಣಾ ನ ನ್ಯೂನಾ ತೇ ಯಥಾ ಪ್ರಥಿತಾಃ ಕಥಾಃ ।

ತದಿದಮಖಿಲಂ ಮಿಥ್ಯಾ ಸ್ಯಾದಿತ್ಯಸಾಧ್ಯಮುದೀರಿತುಂ

ಯದಸಿ ವಿಮುಖೀ ಪುತ್ರೇ ಕಿಂ ವಾ ಭವೇದಿಹ ಕಾರಣಮ್ ॥ ೮೪೦ ॥

ಭುವನಭರಣಂ ನಾಲ್ಪಂ ಕಾರ್ಯಂ ನ ದೇವಿ ತವ ಕ್ಷಣೋ

ಗುರು ಚ ಬಹುಲಂ ಕೃತ್ಯಂ ನಿತ್ಯಂ ತವಾಸ್ತಿ ನ ತನ್ಮೃಷಾ ।

ನ ತವ ಕಠಿನಂ ಮೌನಂ ನಿಂದ್ಯಂ ತಥಾಪಿ ನ ಪಾರ್ವತಿ

ಸ್ಮರ ಸಕೃದಿಮಂ ದೀನಂ ಪುತ್ರಂ ತದೇವ ಮಮಾಧಿಕಮ್ ॥ ೮೪೧ ॥

ನ ಭವತಿ ಸುಧಾಧಾರಾವರ್ಷಾದಯಂ ಮುದಿತಸ್ತನೌ

ಮಧುಮದಮುಷಾಂ ವಾಚಾಂ ಸರ್ಗಾನ್ನ ಚಾಪ್ಯಯಮುದ್ಧತಃ ।

ತವ ಪದಯುಗೇ ನಿಷ್ಠಾಲಾಭಾನ್ನ ತೃಪ್ಯತಿ ಚಾಪ್ಯಯಂ

ಭಗವತಿ ಚಿರಾತ್ ಸಂದೇಶಂ ತೇ ಸುತಃ ಪ್ರತಿವೀಕ್ಷತೇ ॥ ೮೪೨ ॥

ಕಿಮಿಹ ಭುವನೇ ಕರ್ತವ್ಯಂ ಮೇ ಕಿಮರ್ಥಮಿಹಾಗತೋ-

ಽಸ್ಮ್ಯವನಿ ಜಗತಾಂ ಕಂ ವೋಪಾಯಂ ಶ್ರಯೇ ನಿಜಶಕ್ತಯೇ ।

ಕಿಮಪಿ ಕಿಮಪಿ ಸ್ವಾಂತೇ ಧ್ವಾಂತೇ ಯಥಾ ಪರಿದೃಶ್ಯತೇ

ಸ್ಫುಟಮಭಯದೇ ವಕ್ತುಂ ಕಿಂಚಿಚ್ಛ್ರಮಂ ತ್ವಮುರೀಕುರು ॥ ೮೪೩ ॥

ನ ಮಮ ಪರಮೇ ಮುಕ್ತಾವಾಶಾ ನ ವಾ ವಿಭವಾಷ್ಟಕೇ

ನ ಚ ಗಜಘಟಾಪೂರ್ಣಾಯಾಂ ವಾ ಮಹೇಶ್ವರಿ ಸಂಪದಿ ।

ನ ಚ ಮಧುಮುಚಾಂ ವಾಚಾಂ ಸರ್ಗೇ ನಿರರ್ಗಲವೈಭವೇ

ಮುನಿಭುವಿ ಕುತೋ ಜಾತಃ ಸೋಽಹಂ ತದೇವ ಸಮೀರ್ಯತಾಮ್ ॥ ೮೪೪ ॥

ಪ್ರಥಮಮನಘಂ ವಾಂಛಾಮ್ಯನ್ನಂ ಸದಾರಸುತಾತಿಥೇ-

ರ್ಭಗವತಿ ತತಃ ಪಾದದ್ವಂದ್ವೇ ತವಾವಿಚಲಾಂ ಸ್ಥಿತಿಮ್ ।

ಅಥ ಸುರಜಗದ್ವಾರ್ತಾಜ್ಞಾನಂ ಸವಿತ್ರಿ ತತಃ ಪರಂ

ಮುನಿಭುವಿ ಭವೇ ಹೇತುಂ ಜ್ಞಾತುಂ ಮೃಗಾಕ್ಷಿ ಪುರದ್ವಿಷಃ ॥ ೮೪೫ ॥

ಯದಿ ತವ ಕೃಪಾ ಪುತ್ರೇ ಭಕ್ತೇ ಪದಾಂಬುಜವಂದಿನಿ

ವ್ರತಶತಕೃಶೇ ಶೀರ್ಷಾಂಭೋಜಾಮೃತಂ ತ್ವಯಿ ಜುಹ್ವತಿ ।

ಭರತಧರಣೀಸೇವಾಲೋಲೇ ಭವಪ್ರಿಯಭಾಮಿನಿ

ಸ್ವಯಮುಪದಿಶಾಮುಷ್ಮೈ ಯೋಗ್ಯಂ ವಿಧಾನಮನಾವಿಲಮ್ ॥ ೮೪೬ ॥

ಜನನಿ ಜಗತಾಂ ಸ್ವಲ್ಪೇ ಕಾಮೇಽಪ್ಯಯಂ ತ್ವಯಿ ಲಂಬತೇ

ಪುರಭಿದಬಲೇ ಮಧ್ಯೇ ಕಾಮೇಽಪ್ಯಯಂ ತ್ವಯಿ ಲಂಬತೇ ।

ಬಹುಲಕರುಣೇ ಶ್ರೇಷ್ಠೇ ಕಾಮೇಽಪ್ಯಯಂ ತ್ವಯಿ ಲಂಬತೇ

ಭಗವತಿ ಪರೇ ವೀತೇ ಕಾಮೇಽಪ್ಯಯಂ ತ್ವಯಿ ಲಂಬತೇ ॥ ೮೪೭ ॥

ತನುಭುವಿ ಮಯಿ ಪ್ರೀತ್ಯಾ ವಾಽಂಬ ತ್ರಿಲೋಕವಿಧಾಯಿಕೇ

ಪದಯುಗರತೇ ವಾತ್ಸಲ್ಯಾದ್ವಾ ಪುರಾರಿಪುರಂಧ್ರಿಕೇ ।

ಸ್ವವಿಮಲಯಶೋಗಾನಾಸಕ್ತೇ ಕೃಪಾವಶತೋಽಥವಾ

ಪರುಷಮಜರೇ ಮೌನಂ ತ್ಯಕ್ತ್ವಾ ಸ್ಫುಟೀಕುರು ಮೇ ಗತಿಮ್ ॥ ೮೪೮ ॥

ಜಯತು ಭರತಕ್ಷೋಣೀಖಂಡಂ ವಿಷಾದವಿವರ್ಜಿತಂ

ಜಯತು ಗಣಪಸ್ತಸ್ಯ ಕ್ಷೇಮಂ ವಿಧಾತುಮನಾ ಮುನಿಃ ।

ಜಯತು ರಮಣಸ್ತಸ್ಯಾಚಾರ್ಯೋ ಮಹರ್ಷಿಕುಲಾಚಲೋ

ಜಯತು ಚ ತಯೋರ್ಮಾತಾ ಪೂತಾ ಮಹೇಶವಿಲಾಸಿನೀ ॥ ೮೪೯ ॥

ಗಣಪತಿಮುನೇರೇಷಾ ಭಾಷಾವಿದಾಂ ಹೃದಯಂಗಮಾ

ಸುಕವಿಸುಹೃದಃ ಶಬ್ದೈರತ್ಯುಜ್ವಲಾ ಹರಿಣೀತತಿಃ ।

ಲಲಿತಚತುರೈರ್ಭಾವೈರ್ಯಾಂತೀ ಸುರೂಪವನಾಂತರಂ

ಮದಯತು ಮನಃ ಕಾಮಾರಾತೇರ್ನಿಶಾಂತಮೃಗೀದೃಶಃ ॥ ೮೫೦ ॥