॥ ಪಂಚತ್ರಿಂಶಃ ಸ್ತಬಕಃ - ಇಂದು ವದನಾವೃತ್ತಮ್ ॥

ಪ್ರಾರ್ಥನಾ

ಅಂಧತಮಸಂ ಶಶಿವಿಭಾಮಭಿದಧಾನಾ

ಕಾಂತಿಮಲಮಾಸ್ಯಕಮಲಸ್ಯ ವಿದಧಾನಾ ।

ಅಂಧಕವಿರೋಧಿದಯಿತಾಸ್ಮಿತಲವಶ್ರೀ-

ರ್ಭಾತು ಭುವನಸ್ಯ ಸಕಲಸ್ಯ ಕುಶಲಾಯ ॥ ೮೫೧ ॥

ಭಾಹಿ ವಿವಿಧಾ ಕೃತಿಮತೀ ದ್ವಿಜಸಮೂಹೇ

ಪಾಹಿ ಗತಿಹೀನಮಖಿಲೇಶ್ವರಿ ಕುಲಂ ನಃ ।

ದೇಹಿ ಬಹುಕಾಲಭಜಕಾಯ ವರಮೇತಂ

ಯಾಹಿ ನಗನಂದಿನಿ ಯಶಃ ಶಶಿವಲಕ್ಷಮ್ ॥ ೮೫೨ ॥

ವಾರಯತಿ ಘೋರತರಪಾತಕಸಮೂಹಂ

ವರ್ಧಯತಿ ಧರ್ಮಮಪಿ ಶರ್ಮಕರಮಂತೇ ।

ಕಿಂಕರಜನಸ್ಯ ನ ಕಿಮಾವಹತಿ ಭವ್ಯಂ

ಶಂಕರಪುರಂಧ್ರಿ ತವ ಪಾದಪರಿಚರ್ಯಾ ॥ ೮೫೩ ॥

ಯಸ್ಯ ಮನುಜಸ್ಯ ಹೃದಯೇಽಸ್ತಿ ಸದಯೇ ತೇ

ನಾಕಚರಸೇವ್ಯಮಯಿ ಪಾದಸರಸೀಜಮ್ ।

ತಂ ಭಜತಿ ಪದ್ಮಮುಖಿ ಪದ್ಮವನವಾಸಾ

ಲಾಭಭವನೇ ಭವತು ನಾಮರಪುರೋಧಾಃ ॥ ೮೫೪ ॥

ಯದ್ಯಖಿಲಮೌನಿಗಣಗೀತಗುಣಜಾಲಂ

ಕಾಲಭಯಹಾರಿಕರುಣಾರಸಮರಂದಮ್ ।

ಅದ್ರಿತನಯಾಂಘ್ರಿಜಲಜನ್ಮ ಹೃದಯೇ ಸ್ಯಾ-

ದಷ್ಟಮಗತೋಽಪಿ ವಿದಧಾತು ರವಿಜಃ ಕಿಮ್ ॥ ೮೫೫ ॥

ಲೇಖಲಲನಾಕಚಸುಮೈಃ ಕೃತಬಲಿಂ ತೇ

ಯೋ ಭಜತಿ ಪಾದಘೃಣಿಮಾಲಿನಮನಂತೇ ।

ನಿಸ್ತರತಿ ನೂನಮಯಮಸ್ತಮಿತಮೋಹಃ

ಶೋಕತಿಮಿರಂ ಸಕಲಲೋಕಗಣಮಾತಃ ॥ ೮೫೬ ॥

ಶೀತಕರದರ್ಪಹರವಕ್ತ್ರಜಲಜಾತೇ

ಶೀತಗಿರಿನಂದಿನಿ ತವಾಂಘ್ರಿಜಲಜಾತಮ್ ।

ಯಃ ಸ್ಮರತಿ ದೇವಿ ಹೃದಿ ವಿಸ್ಮರತಿ ಸೋಽಯಂ

ವಿಷ್ಟಪಮಶೇಷಮಪಿ ಕಷ್ಟತತಿಮುಕ್ತಃ ॥ ೮೫೭ ॥

ಸಕ್ತಿರಯಿ ಯಸ್ಯ ತವ ಪಾದಸರಸೀಜೇ

ಶಕ್ತಿಧರಮಾತರನಲಾಕ್ಷಗೃಹನಾಥೇ ।

ಪೂರ್ಣಶಶಿಜೈತ್ರಮುಖಿ ಪುಣ್ಯಪುರುಷೋಽಸೌ

ಸ್ವರ್ಣಶಿಖರೀವ ಬುಧಲೋಕಶರಣಂ ಸ್ಯಾತ್ ॥ ೮೫೮ ॥

ವೈರಿಗಣನಿರ್ದಲನಖಡ್ಗವರಪಾಣೇ

ವಾಸಸಿ ಪದೋರ್ದಶನವಾಸಸಿ ಚ ಶೋಣೇ ।

ನೇತ್ರಮಿಷಪಾವಕವಿಶೇಷಿತಲಲಾಟೇ

ಪಾಪಮಖಿಲಂ ಜಹಿ ಮೃಗಾಧಿಪತಿಘೋಟೇ ॥ ೮೫೯ ॥

ವೇದಚಯವೇದಿಜನವಾದವಿಷಯಸ್ಯ

ಪ್ರೀತಿಯುತಲೋಕತತಿಶೋಕಶಮನಸ್ಯ ।

ವೇತನವಿವರ್ಜಿತಭಟೋಽಯಮಹಮಂಘ್ರೇಃ

ಶೀತಕರಪೋತಧರಪುಣ್ಯವನಿತೇ ತೇ ॥ ೮೬೦ ॥

ಕಾರ್ಯಮಯಿ ಮೇ ಕಿಮಪಿ ಕಾರ್ಯಪಟುಬುದ್ಧೇಃ

ಪಾದಸರಸೀಜಯುಗಲೀಪರಿಜನಸ್ಯ ।

ಅಂಬ ವದ ಜಂಭರಿಪುಗೀತಗುಣಜಾಲೇ

ಶುಂಭಕುಲನಾಶಕರಿ ಶಂಭುಕುಲಯೋಷೇ ॥ ೮೬೧ ॥

ತ್ವಂ ಯದಿ ಶಿಲಾವದಯಿ ನೋ ವದಸಿ ಕೃತ್ಯಂ

ನಾಸ್ತಿ ತವ ರಾಜ್ಯಪಟುಬುದ್ಧಿರಿತಿ ಸತ್ಯಮ್ ।

ಆದಿಶ ಯಥಾರ್ಹಕರಣೀಯಕೃತಿನಿತ್ಯಂ

ರಾಜ್ಞಿ ಭುವನಸ್ಯ ಚರಣಾಂಬುರುಹಭೃತ್ಯಮ್ ॥ ೮೬೨ ॥

ಪಂಚಸು ವಿಹಾಯ ಮನಸಃ ಕಮಪಿ ಸಂಗಂ

ಪುತ್ರಧನಮಿತ್ರಜನಬಾಂಧವವಧೂಷು ।

ಏಷ ಭಜತೇ ಜನನಿ ಪಾದಜಲಜಂ ತೇ

ಪಾಲಯ ನು ಮುಂಚ ನು ತವೋಪರಿ ಸ ಭಾರಃ ॥ ೮೬೩ ॥

ವಜ್ರಧರಮುಖ್ಯಸುರಸಂಚಯಕಿರೀಟ-

ಸ್ಥಾಪಿತಮಹಾರ್ಘಮಣಿರಂಜಿತನಖಾಯ ।

ಜೀವಿತಮದಾಯಿ ಜಗದೀಶ್ವರಿ ಮದೀಯಂ

ಪಾದಜಲಜಾಯ ತವ ಪಾಲಯ ನು ಮಾ ವಾ ॥ ೮೬೪ ॥

ದೇಹಿ ಜಗದೀಶ್ವರಿ ನ ವಾ ಮದಭಿಲಾಷಂ

ಪಾಹಿ ಕರುಣಾವತಿ ನ ವಾ ಕುಲಮಿದಂ ನಃ ।

ಶೂಲಧರಕಾಮಿನಿ ಸುರಾಸುರನಿಷೇವ್ಯಂ

ಪಾದಕಮಲಂ ತವ ಪರೇ ನ ವಿಜಹಾಮಿ ॥ ೮೬೫ ॥

ಪಾಸಿ ಕಿಲ ಪಾದಯುಗಕಿಂಕರಸಮೂಹಂ

ಹಂಸಿ ಕಿಲ ಪಾಪತತಿಮಾಪದಿ ನುತಾ ತ್ವಮ್ ।

ದಂತಿವದನಪ್ರಸು ವದಂತಿ ಮತಿಮಂತೋ

ನಾನೃತಮಿದಂ ಭವತು ನಾಕಿಜನವರ್ಣ್ಯೇ ॥ ೮೬೬ ॥

ಶಕ್ರಮುಖದೇವತತಿವಂದಿತವಿಸೃಷ್ಟೇ

ವಕ್ರಘನಕೇಶಿ ಚರಣೇ ತವ ಲುಠಂತಮ್ ।

ಆಪದಿ ನಿಮಗ್ನಮಿಮಮಾಶ್ರಿತಮನಾಥಂ

ನಂದಿಹಯಸುಂದರಿ ನ ಪಾಲಯಸಿ ಕೇನ ॥ ೮೬೭ ॥

ಘೋಷಮಯಮಂಬ ವಿದಧಾತಿ ಪದಲಗ್ನೋ

ನಾವಸಿ ಪುರಾಣಿ ಕಿಮು ನಾರಿ ಬಧಿರಾಽಸಿ ।

ವಂದಿಸುರಬೃಂದನುತಿಭಾಷಿತಹೃತಂ ವಾ

ಕರ್ಣಯುಗಲಂ ತವ ಕಪಾಲಿಕುಲಯೋಷೇ ॥ ೮೬೮ ॥

ಅಂಬ ಭವ ಬಿಂಬಫಲಕಲ್ಪರದಚೇಲೇ

ಶಂಬರಸಪತ್ನಬಲಕಾರಿಬಹುಲೀಲೇ ।

ಪ್ರಾಗಮೃತಭಾನುಮುಕುಟಸ್ಯ ಮದಯಿತ್ರೀ

ತಂ ಕುರು ತತಃ ಪರಮುರೀಕೃತಮದರ್ಥಮ್ ॥ ೮೬೯ ॥

ನಿರ್ಮಲಸುಧಾಕರಕಲಾಕಲಿತಮಸ್ತೇ

ಧರ್ಮರತಪಾಲಿನಿ ದಯಾವತಿ ನಮಸ್ತೇ ।

ಏತಮವ ದೇವಿ ಚರಣಾಂಬುರುಹಬಂಧುಂ

ಶೀತಧರಣೀಧರಸುತೇ ಗಮಯ ನಾಂಧುಮ್ ॥ ೮೭೦ ॥

ಅದ್ರಿಕುಲಪಾಲಕಕುಲಧ್ವಜಪತಾಕೇ

ಭದ್ರಗಜಗಾಮಿನಿ ದರಿದ್ರಮಯಿ ಮತ್ವಾ ।

ಕ್ಷುದ್ರಮಿವ ಶೋಚ್ಯಮಿಮಮಂಘ್ರಿಜಲಜಾಪ್ತಂ

ರುದ್ರದಯಿತೇ ಜನನಿ ಪಾಹಿ ನ ಜಹೀಹಿ ॥ ೮೭೧ ॥

ಅಸ್ತು ತವ ಪಾದಕಮಲೇ ಸ್ಥಿತಿರಜಸ್ರಂ

ನಾಸ್ತಿ ಪರದುಃಖವಿವಶೇ ಹೃದಿ ತು ಶಾಂತಿಃ ।

ಅಸ್ತು ಕರುಣೇಽಯಮಸ್ತು ಮತಿಲೋಪಃ

ಕಷ್ಟಮಿದಮಂಬ ಮಮ ಭೂರಿ ಪರಿಶಿಷ್ಟಮ್ ॥ ೮೭೨ ॥

ದುಃಖಸುಖಭೇದರಹಿತಾ ನ ಮತಿರಾಸೀತ್ ।

ಸಾಧುಖಲಭೇದರಹಿತಾ ನ ಮತಿರಾಸೀತ್ ।

ಭಾಗ್ಯಮತಿಮಾನ್ಯಮಥವಾ ಮಮ ತದೇತ-

ನ್ಮಾತರಿಹ ಸಂಘಭಜನೇ ಯದವಕಾಶಃ ॥ ೮೭೩ ॥

ಅಸ್ತು ಮಮ ಭೇದಮತಿರಸ್ತು ಮಮ ಪಕ್ಷೋ

ಯತ್ನಪರತಾಽಸ್ತು ಮಮ ಮಾಸ್ತು ಚ ವಿಮೋಕ್ಷಃ ।

ಮೋಕ್ಷಮಯಿ ವೇದ್ಮಿ ಕುಲಕಷ್ಟತತಿಮೋಕ್ಷಂ

ಪ್ರೇಷಯ ಸಕೃತ್ತವ ಮಹೇಶ್ವರಿ ಕಟಾಕ್ಷಮ್ ॥ ೮೭೪ ॥

ಶಾಕ್ವರಗಣೇನ ಮುಖರೇಽತ್ರ ಗಣನಾಥೇ

ವಿಷ್ಣುಯಶಸೀಶವಧು ಜಿಷ್ಣುಮುಖವಂದ್ಯೇ ।

ಅಂಬ ಕರುಣಾಂ ಕುರು ಶಿವಂಕರಿ ನಿರಂಕ-

ಸ್ವಚ್ಛಕಿರಣಾರ್ಭಕವಿಭೂಷಿತಲಲಾಟೇ ॥ ೮೭೫ ॥