॥ ಷಟ್ತ್ರಿಂಶಃ ಸ್ತಬಕಃ - ತೂಣಕವೃತ್ತಮ್ ॥

ಪ್ರಕೀರ್ಣಕಮ್

ಉನ್ನತಸ್ತನಸ್ಥಲೀವಿಲೋಲಹಾರಮೌಕ್ತಿಕ-

ವ್ರಾತದೀಧಿತಿಪ್ರತಾನಬದ್ಧಸೌಹೃದಾ ಸದಾ ।

ಅಂಧಕಾರಿಕಾಮಿನೀದರಸ್ಮಿತದ್ಯುತಿರ್ಭುನೋ-

ತ್ವಂಧಕಾರಮಂತರಂಗವಾಸಿನಂ ಘನಂ ಮಮ ॥ ೮೭೬ ॥

ಅಂಬರಸ್ಥಲೇ ಪುರಾ ಪುರಂದರೋ ದದರ್ಶ ಯಾಂ

ಯಾಂ ವದಂತಿ ಪರ್ವತಪ್ರಸೂತಿಮೈತಿಹಾಸಿಕಾಃ ।

ಸಾ ಪರಾ ಪುರಾಮರೇಃ ಪುರಂಧ್ರಿಕಾಽಖಿಲಾಂಬಿಕಾ

ಪುತ್ರಕಾಯ ಮಜ್ಜತೇ ದದಾತು ದಕ್ಷಿಣಂ ಕರಮ್ ॥ ೮೭೭ ॥

ಪಾದಪಂಕಜೇ ಧೃತಾ ನರೈರಬಾಹ್ಯಭಕ್ತಿಭಿಃ

ಪಾಣಿಪಂಕಜೇ ಧೃತಾ ನವೇಂದ್ರುಖಂಡಧಾರಿಣಾ ।

ಚಾರುಹೇಮಹಂಸಕಾ ಮನೋಜ್ಞರತ್ನಕಂಕಣಾ

ಲೋಕಜಾಲಪಾಲಿನೀ ಪುನಾತು ಮಾಂ ವಿಲಾಸಿನೀ ॥ ೮೭೮ ॥

ಉಕ್ಷರಾಜವಾಹನಸ್ಯ ಜೀವಿತಾದ್ ಗರೀಯಸೀ

ಪಕ್ಷಿರಾಜವಾಹನಾದಿವರ್ಣ್ಯಮಾನವೈಭವಾ ।

ಕೇಕಿಲೋಕಚಕ್ರವರ್ತಿವಾಹನೇನ ಪುತ್ರಿಣೀ

ವಾರಣಾರಿಸಾರ್ವಭೌಮವಾಹನಾ ಗತಿರ್ಮಮ ॥ ೮೭೯ ॥

ಬಾಲಕುಂದಕುಟ್ಮಲಾಲಿಕಾಂತದಂತಪಂಕ್ತಿಕಾ

ಕುಂಡಲಾನುಬಿಂಬಶೋಭಿಶುದ್ಧಗಂಡಮಂಡಲಾ ।

ಬಿಭ್ರತೀ ರತೀಶವೇತ್ರವಿಭ್ರಮಂ ಧ್ರುವೋರ್ಯುಗಂ

ಶುಭ್ರಭಾನುಶೇಖರಸ್ಯ ಸುಂದರೀ ಪ್ರಣಮ್ಯತೇ ॥ ೮೮೦ ॥

ಆಜಿದಕ್ಷವಾಹವೈರಿಯಾತುಧಾನಬಾಧಿತಂ

ಯಾ ರರಕ್ಷ ದೇವಬೃಂದಮಿಂದಿರಾದಿವಂದಿತಾ ।

ಸಾ ಕಟಾಕ್ಷಪಾತಧೂತಭಕ್ತಲೋಕಪಾತಕಾ

ಪಾವಕಾಕ್ಷಸುಂದರೀ ಪರಾತ್ಪರಾ ಗತಿರ್ಮಮ ॥ ೮೮೧ ॥

ತಾರಕಾಧಿನಾಥಚೂಡಚಿತ್ತರಂಗನರ್ತಕೀ

ಮಂದಹಾಸಸುಂದರಾಸ್ಯಪಂಕಜಾ ನಗಾತ್ಮಜಾ ।

ದೀನಪೋಷಕೃತ್ಯನಿತ್ಯಬದ್ಧಬುದ್ಧಿರವ್ಯಯಾ

ಗೃಹ್ಯತೇ ಗಣಾಧಿಪೇನ ಸರ್ವತೋ ನೃಣಾಂ ಪದೇ ॥ ೮೮೨ ॥

ಅಷ್ಟಮೀಶಶಾಂಕಖಂಡದರ್ಪಭಂಜನಾಲಿಕಾ

ವಿಷ್ಟಪತ್ರಯಾಧಿನಾಥಮಾನಸಸ್ಯ ಡೋಲಿಕಾ ।

ಪಾಪಪುಂಜನಾಶಕಾರಿಪಾದಕಂಜಧೂಲಿಕಾ

ಶ್ರೇಯಸೇ ಮಮಾಸ್ತು ಶೈಲಲೋಕಪಾಲಬಾಲಿಕಾ ॥ ೮೮೩ ॥

ಸಾನುಮತ್ಕುಲಾಧಿನಾಥಬಾಲಿಕಾಲಿಕುಂತಲಾ

ಜಂಗಮೇವ ಕಾಽಪಿ ತಪ್ತಹೇಮಸಾಲಭಂಜಿಕಾ ।

ಭಕ್ತಿಯುಕ್ತಲೋಕಶೋಕವಾರಣಾಯ ದೀಕ್ಷಿತಾ

ಶೀತಶೀತವೀಕ್ಷಿತಾ ಲಘು ಸ್ಯತಾದಘಂ ಮಮ ॥ ೮೮೪ ॥

ಪುಣ್ಯನಾಮಸಂಹತಿಃ ಪುರಾರಿಚಿತ್ತಮೋಹಿನೀ

ಪುಷ್ಪಬಾಣಚಾಪಚಾರುಝಿಲ್ಲಿಕಾಽಖಿಲಾಂಬಿಕಾ ।

ಪುಣ್ಯವೈರಿಪುಷ್ಟದುಷ್ಟದೈತ್ಯವಂಶನಾಶಿನೀ

ಪುತ್ರಕಸ್ಯ ರಕ್ಷಣಂ ಪುರಾತನೀ ಕರೋತು ಮೇ ॥ ೮೮೫ ॥

ಕ್ಷಾಮಮಧ್ಯಮಸ್ಥಲೀ ಸುಧಾಘಟೋಪಮಸ್ತನೀ

ಕೃಷ್ಣಸಾರಲೋಚನಾ ಕುಮುದ್ವತೀಪ್ರಿಯಾನನಾ ।

ಭೂವಿಲಾಸಧೂತಧೈರ್ಯಕಾಂಚನಾದ್ರಿಕಾರ್ಮುಕಾ

ಕಾಚಿದಿಕ್ಷುಕಾರ್ಮುಕಸ್ಯ ಜೀವಿಕಾ ಜಯತ್ಯುಮಾ ॥ ೮೮೬ ॥

ಲೋಹಿತಾಚಲೇಶ್ವರಸ್ಯ ಲೋಚನತ್ರಯೀಹಿತಾ

ಲೋಹಿತಪ್ರಭಾನಿಮಜ್ಜದಬ್ಜಜಾಂಡಕಂದರಾ ।

ಹಾಸಕಾಂತಿವರ್ಧ್ಯಮಾನಸಾರಸಾರಿಮಂಡಲಾ

ವಾಸಮತ್ರ ಮೇ ಕರೋತು ಮಾನಸೇ ಮಹೇಶ್ವರೀ ॥ ೮೮೭ ॥

ದಕ್ಷಿಣೇಕ್ಷಣಪ್ರಭಾವಿಜೃಂಭಿತಾಂಬುಸಂಭವಾ

ಕಾಮಮಿತ್ರವಾಮನೇತ್ರಧಾಮತೃಪ್ತಕೈರವಾ ।

ಏಕತಃ ಪರಃ ಪುಮಾನ್ಪರಾ ವರಾಂಗನಾಽನ್ಯತಃ

ಶುಭ್ರಕೀರ್ತಿರೇಕಮೂರ್ತಿರಾದಧಾತು ನಶ್ಶಿವಮ್ ॥ ೮೮೮ ॥

ಶುಂಭದೈತ್ಯಮಾರಿಣೀ ಸುಪರ್ವಹರ್ಷಕಾರಿಣೀ

ಶಂಭುಚಿತ್ತಹಾರಿಣೀ ಮುನೀಂದ್ರಚಿತ್ತಚಾರಿಣೀ ।

ಕಾಮಿತಾರ್ಥದಾಯಿನೀ ಕರಿಪ್ರಕಾಂಡಗಾಮಿನೀ

ವೀತಕಲ್ಕಮಾದಧಾತು ವಿಘ್ನರಾಜಮಂಬಿಕಾ ॥ ೮೮೯ ॥

ದೇವತಾಸಪತ್ನವಂಶಕಾನನಾನಲಚ್ಛಟಾ

ವಾರಣಾರಿಸಾರ್ವಭೌಮವಾಹನಾ ಘನಾಲಕಾ ।

ನಂದಿವಾಹನಸ್ಯ ಕಾಽಪಿ ನೇತ್ರನಂದಿನೀ ಸುಧಾ

ನೇತ್ರಲಾಂಛಿತಾಲಿಕಾ ಸುತಂ ಪುನಾತು ಕಾಲಿಕಾ ॥ ೮೯೦ ॥

ರಾಜಸುಂದರಾನನಾ ಮರಾಲರಾಜಗಾಮಿನೀ

ರಾಜಮೌಲಿವಲ್ಲಭಾ ಮೃಗಾಧಿರಾಜಮಧ್ಯಮಾ ।

ರಾಜಮಾನವಿಗ್ರಹಾ ವಿರಾಜಮಾನಸದ್ಗುಣಾ

ರಾಜತೇ ಮಹೀಧರೇ ಮದಂಬಿಕಾ ವಿರಾಜತೇ ॥ ೮೯೧ ॥

ಪರ್ವಚಂದ್ರಮಂಡಲಪ್ರಭಾವಿಡಂಬನಾನನಾ

ಪರ್ವತಾಧಿನಾಥವಂಶಪಾವನೀ ಸನಾತನೀ ।

ಗರ್ವಗಂಧನಾಶಿನೀ ವಿಭಾವರೀವಿಚಾರಿಣಾಂ

ಶರ್ವಚಿತ್ತನಾಯಿಕಾ ಕರೋತು ಮಂಗಳಂ ಮಮ ॥ ೮೯೨ ॥

ಓಜಸಶ್ಚ ತೇಜಸಶ್ಚ ಜನ್ಮಭೂಮಿರಚ್ಯುತಾ

ನೀಲಕಂಜಬಂಧುಬದ್ಧಮೌಲಿರಾಗಮಸ್ತುತಾ ।

ವೀತರಾಗಪಾಶಜಾಲನಾಶಬದ್ಧಕಂಕಣಾ

ವಿಶ್ವಪಾಲಿನೀ ಮಯಾ ಮಹೇಶ್ವರೀ ವಿಚಿಂತ್ಯತೇ ॥ ೮೯೩ ॥

ಅಂಡಮಂಡಲಂ ಯಯಾ ನಿರಂತರಂ ಚ ಪಚ್ಯತೇ

ಸಂಸ್ಫುರತ್ಯಶೇಷಭೂತಹಾರ್ದಪೀಠಿಕಾಸು ಯಾ ।

ಶ್ವಾಸದೃಷ್ಟಿಸಂವಿದೂಷ್ಮನಾದವಾರಿವರ್ತ್ಮಭಿ-

ರ್ಯಾಮುಪಾಸತೇ ವಿದೋ ನಮಾಮಿ ತಾಂ ಪರಾತ್ಪರಾಮ್ ॥ ೮೯೪ ॥

ಪಂಚಯುಗ್ಮವೇಷಭೃತ್ಪರಾತ್ಪರಾ ಸುರಾರ್ಚಿತಾ

ಪಂಚವಕ್ತ್ರವಕ್ತ್ರಪದ್ಮಚಂಚರೀಕಲೋಚನಾ ।

ವಂಚಕಾಂತರಂಗಶತ್ರುಸಂಚಯಪ್ರಣಾಶಿನೀ

ಪ್ರೇತಮಂಚಶಾಯಿನೀ ಕುಲಂ ಚಿರಾಯ ಪಾತು ಮೇ ॥ ೮೯೫ ॥

ಕರ್ಮಣಾ ಯಥಾವಿಧಿ ದ್ವಿಜಾತಯೋ ಯಜಂತಿ ಯಾಂ

ಬ್ರಹ್ಮಣಾ ಯಥಾಶ್ರುತಂ ಸ್ತುವಂತಿ ಯಾಮಧೀತಿನಃ ।

ಚೇತಸಾ ಯಥಾ ಗುರೂಕ್ತಿ ಚಿಂತಯಂತಿ ಯಾಂ ವಿದಃ

ಸಾ ಪರಾ ಜಗತ್ತ್ರಯೀಜನನ್ಯಜಾ ಜಯತ್ಯುಮಾ ॥ ೮೯೬ ॥

ವಾಸುದೇವಜಾಯಯಾ ವಿನಮ್ರಯಾ ನಿಷೇವಿತಾ

ವಾಮದೇವಚಾಟುಚಿತ್ರವಾಕ್ಯಬಂಧಲಾಲಿತಾ ।

ವಾಸವಾದಿದೇವತಾಜಯಪ್ರಣಾದಹರ್ಷಿತಾ

ವಾರಯತ್ವಘಾನಿ ಮೇ ವಸುಂಧರಾಭೃತಸ್ಸುತಾ ॥ ೮೯೭ ॥

ಪೂರ್ಣಿಮಾಸುಧಾಮರೀಚಿಸುಂದರಾಸ್ಯಮಂಡಲಾ

ಫುಲ್ಲಪದ್ಮಪತ್ರದೀರ್ಘಸಂಪ್ರಸನ್ನಲೋಚನಾ ।

ಪುಣ್ಯಭೂನಿಷೇವಣಾಯ ಪುತ್ರಮೇತಮುದ್ಯತಂ

ಪೂರ್ಣಕಾಮಮಾದಧಾತು ಪಾದಲಗ್ನಮಂಬಿಕಾ ॥ ೮೯೮ ॥

ಲಾಲಯಂತಿ ಬಾಲಕಂ ವತಂಸಶೀತದೀಧಿತಿಂ

ಶೀಲಯಂತಿ ಸೂಕ್ಷ್ಮತಾಂ ಮನಾಂಸಿ ಯೋಗಿನಾಮಿವ ।

ಕಾಲಯಂತು ಪಾಪಿನಾಂ ಕುಲಾನಿ ಸಂಹತೀಸ್ಸತಾಂ

ಪಾಲಯಂತು ಚ ಸ್ಮಿತಾನಿ ಯೋಷಿತಃ ಪುರದ್ವಿಷಃ ॥ ೮೯೯ ॥

ಪಾದಸೇವಿನಃ ಕವೇರ್ಮನೋಹರಾತಿಶಕ್ವರೀ-

ವರ್ಗ ಏಷ ನಾಟ್ಯಕಾರಿನಿರ್ಜರೀಗಣೋ ಯಥಾ ।

ಲೋಕಜಾಲಚಕ್ರವರ್ತಿಪುಣ್ಯಯೋಷಿತೋ ಮನ-

ಸ್ಸಮ್ಮದಾಯ ಸಾಧುಕಷ್ಟವಾರಣಾಯ ಕಲ್ಪತಾಮ್ ॥ ೯೦೦ ॥

॥ ಸಮಾಪ್ತಂ ಚ ನವಮಂ ಶತಕಮ್ ॥