॥ ಏಕೋನಚತ್ವಾರಿಂಶಃ ಸ್ತಬಕಃ - ಇಂದ್ರವಜ್ರಾವೃತ್ತಮ್ ॥

ಪ್ರಾಯೋ ವ್ಯೋಮಶರೀರಾ

ವ್ಯಾಪ್ಯೇದಮಿಂದೋರ್ಭುವನಂ ಯ ಏವ ಪ್ರಾಯೇಣ ತಸ್ಯಾಮಲಚಂದ್ರಿಕಾಽಭೂತ್ ।

ಮಂದಸ್ತವಾರ್ತಿಂ ಸ ಧುನೋತು ಹಾಸೋ ನಿಃಶೇಷಲೋಕೇಶ್ವರವಲ್ಲಭಾಯಾಃ ॥ ೯೫೧ ॥

ಪೂರ್ಣೇ ವಿಯತ್ಯೇಕತಟಿಜ್ಜ್ವಲಂತೀ ಲೋಕಾನಶೇಷಾನನಿಶಂ ಪಚಂತೀ ।

ಮೇಘೇ ಕದಾಚಿನ್ಮಹಸಾ ಸ್ಫುರಂತೀ ಚಂಡೀ ಪ್ರಚಂಡಾ ಹರತಾದಘಂ ನಃ ॥ ೯೫೨ ॥

ಗೋಲಾನಿ ಕಾನ್ಯಪ್ಯಧುನೋದ್ಭವಂತಿ ಜೀರ್ಯಂತಿ ಕಾನ್ಯಪ್ಯಖಿಲೇಶಕಾಂತೇ ।

ಯಾಂತ್ಯಂಬಿಕೇ ಕಾನ್ಯಪಿ ವೃದ್ಧಿಮತ್ರ ಪಾಕೇ ಭವತ್ಯಾಃ ಪರಿತಃ ಪ್ರವೃತ್ತೇ ॥ ೯೫೩ ॥

ಭಾಸಾಂ ವಿನೇತ್ರಾ ಮಹತಾ ಗ್ರಹೈಶ್ಚ ಭೂರಿಪ್ರಮಾಣೈರ್ಯುತಮೀಶಕಾಂತೇ ।

ಏಕೈಕಮಂಡಂ ತವ ಲೋಮವಚ್ಚೇತ್ ಕಸ್ತೇ ಮಹದ್ಭಾಗ್ಯಮಿಹ ಬ್ರವೀತು ॥ ೯೫೪ ॥

ನಾಥಸ್ಯ ತೇ ರೂಪಮಣೋರಣೀಯೋ ಮಾತಸ್ತ್ವದೀಯಂ ಮಹತೋ ಮಹೀಯಃ ।

ಜಾನಾತಿ ಯೋ ದೇವಿ ರಹಸ್ಯಮೇತದ್ ವ್ಯಾಖ್ಯಾತುಮೇಷ ಪ್ರಭವತ್ಯಶೇಷಮ್ ॥ ೯೫೫ ॥

ಯದ್ ಗರ್ಜಿತಂ ವಾರಿದಘರ್ಷಣೇಷು ಶಬ್ದಸ್ತವಾಯಂ ಸುಗಭೀರಘೋಷಃ ।

ಯಲ್ಲೋಕರಾಜ್ಞಿ ಸ್ಫುರಿತಂ ತದೇತದುಜ್ಜೃಂಭಿತಂ ಕಿಂಚನ ಕಾಂತಿವೀಚೇಃ ॥ ೯೫೬ ॥

ಇಂದ್ರಸ್ಯ ವಜ್ರಂ ಜ್ವಲಿತಂ ಕೃಶಾನೋರ್ಜ್ಯೋತಿಸ್ಸಹಸ್ರಚ್ಛದಬಾಂಧವಸ್ಯ ।

ಪೀಯೂಷಭಾನೋರ್ಹಸಿತಂ ವಿಸಾರಿ ಜೀವಸ್ಯ ಚಕ್ಷುರ್ಮಮ ತಾತ ದೈವಮ್ ॥ ೯೫೭ ॥

ಯಸ್ಯೈವ ತೇಜಃ ಪ್ರವಿಭಕ್ತಮರ್ಕವಿದ್ಯುಚ್ಛಶಾಂಕಾನಲಲೋಚನೇಷು ।

ಗೂಢಂ ತದಾಕಾಶಗೃಹೇ ಸಮಂತಾದಂತಾನಭಿಜ್ಞಂ ಪ್ರಣಮಾಮಿ ದೈವಮ್ ॥ ೯೫೮ ॥

ಜಾಗ್ರತ್ಸು ಬುದ್ಧಿರ್ನಿಮಿಷತ್ಸು ನಿದ್ರಾ ಶುಷ್ಕೇಷು ಪಕ್ತಿಸ್ತರುಣೇಷು ವೃದ್ಧಿಃ ।

ಧೀರೇಷು ನಿಷ್ಠಾ ಚಪಲೇಷು ಚೇಷ್ಟಾ ದೇವೀ ಮಮಾಪತ್ತಿಮಪಾಕರೋತು ॥ ೯೫೯ ॥

ವಿದ್ಯಾವತೋ ವಾದವಿಧಾನಶಕ್ತಿರ್ವೀರಸ್ಯ ಸಂಗ್ರಾಮವಿಧಾನಶಕ್ತಿಃ ।

ನಾರೀಮಣೇರ್ಮೋಹವಿಧಾನಶಕ್ತಿರ್ಲೇಶತ್ರಯಂ ಕಿಂಚಿದಪಾರಶಕ್ತೇಃ ॥ ೯೬೦ ॥

ಉತ್ಸಾಹಯಂತೀ ತಪತಾಂ ಮನಾಂಸಿ ಸಂಚೋದಯಂತೀ ಚ ಮಹಾಕ್ರಿಯಾಸು ।

ಸಂಕ್ಷೋಭಯಂತೀ ಹೃದಯಂ ಖಲಾನಾಂ ಸಮ್ಮೋಹಯಂತೀ ಚ ಪರಾಽವತಾನ್ನಃ ॥ ೯೬೧ ॥

ಸಂಚಾಲಯಂತೀ ಸಕಲಸ್ಯ ದೇಹಂ ವ್ಯಾನಸ್ಯ ಶಕ್ತ್ಯಾ ಪರಿತೋ ಲಸಂತ್ಯಾ ।

ಜೇತುಃ ಪ್ರತಾಪೇಽಸ್ತಿ ಪಲಾಯನೇಽಸ್ತಿ ಭೀತಸ್ಯ ಚೇಯಂ ನಿಖಿಲೇಶಶಕ್ತಿಃ ॥ ೯೬೨ ॥

ಏಕಂ ಸ್ವರೂಪಂ ಬಹುಚಿತ್ರಯೋಗಾತ್ ಸಂದರ್ಶಯಂತೀ ವಿವಿಧಂ ಜನೇಭ್ಯಃ ।

ಸಮ್ಯಗ್ದೃಶೇ ಸ್ವಂ ವಿಭುಮರ್ಪಯಂತೀ ಸರ್ವಾದಿಮಾಯೈವ ಮಹೇಶಜಾಯಾ ॥ ೯೬೩ ॥

ಯಸ್ಸಂಶ್ರಯೇತಾಖಿಲಸಂಗತಿಸ್ತ್ವಾಂ ಧ್ಯಾನೇನ ಮಂತ್ರೇಣ ಗುಣಸ್ತವೈರ್ವಾ ।

ತ್ರೈಲೋಕ್ಯಸಾಮ್ರಾಜ್ಯಧುರಂಧರಸ್ಯ ಶುದ್ಧಾಂತಕಾಂತೇ ಸ ಕೃತೀ ಮನುಷ್ಯಃ ॥ ೯೬೪ ॥

ಮೂಲಾಗ್ನಿಮುದ್ದೀಪ್ಯ ಶಿರಶ್ಶಶಾಂಕಂ ಸಂದ್ರಾವ್ಯ ಯಸ್ತರ್ಪಯತೇ ಕೃತೀ ತ್ವಾಮ್ ।

ತಸ್ಮಿನ್ನಗಾಧೀಶ್ವರಕನ್ಯಕೇ ತ್ವಂ ಪ್ರಾದುರ್ಭವಂತೀ ನ ಕಿಮಾದಧಾಸಿ ॥ ೯೬೫ ॥

ಯಸ್ತ್ವಾಂ ಸಹಸ್ರಾರಸರೋಜಮಧ್ಯೇ ಸೋಮಸ್ವರೂಪಾಂ ಭಜತೇಽಂಬ ಯೋಗೀ ।

ತಸ್ಯಾಂತರಃ ಶಾಂತಿಮುಪೈತಿ ತಾಪೋ ಬಾಹ್ಯಸ್ಯ ಕಾ ನಾಮ ಕಥಾಽಲ್ಪಕಸ್ಯ ॥ ೯೬೬ ॥

ದಂಡೇನ ಯೋಽಂತರ್ದಹರೇಽವತೀರ್ಣಃ ಪ್ರಾಣೇನ ವಾಚಾ ಮಹಸಾ ಧಿಯಾ ವಾ ।

ಪ್ರಾಪ್ನೋತಿ ಸೋಽಯಂ ಪುರಮದ್ವಿತೀಯಂ ಯತ್ರ ತ್ವಮೀಶಾ ಸಹ ಚಿತ್ರಲೀಲಾ ॥ ೯೬೭ ॥

ತಂತ್ರೋದಿತಂ ವಿಶ್ವವಿನೇತ್ರಿ ಮಂತ್ರಂ ಯಸ್ತೇ ನರಃ ಸಂಯಮವಾನುಪಾಸ್ತೇ ।

ರುದ್ರಾಣಿ ಸಾಂದ್ರಾಂಬುದಕೇಶಪಾಶೇ ಪಾಶೈರ್ವಿಮುಕ್ತಃ ಸ ಜಯತ್ಯಶೇಷಮ್ ॥ ೯೬೮ ॥

ಪದ್ಮಾಸನೋ ದ್ವಾದಶವರ್ಣಶಾಂತೀ ದಂಭೋಲಿಪಾಣಿರ್ಭುವನಾಧಿನಾಥಾ ।

ಗೀರ್ವಾಣಮಾರ್ಗೋ ಭೃಗುರಬ್ಜಯೋನಿರಂತೇ ತಥಾಗ್ರೇ ಚ ಹಲಾಂ ವಿರಾಜೀ ॥ ೯೬೯ ॥

ಜಂಭಸ್ಯ ಹಂತಾಽನಲಶಾಂತಿಚಂದ್ರೈಃ ಸಂಯುಕ್ತ ಊಷ್ಮಾ ಗಲದೇಶಜನ್ಮಾ ।

ದಂತಸ್ಥಲೀಸಂಭವ ಊಷ್ಮವರ್ಣೋ ವಾಣೀಪತಿರ್ವಜ್ರಧರಶ್ಚ ಲಜ್ಜಾ ॥ ೯೭೦ ॥

ವಿದ್ಯಾ ತ್ವಿಯಂ ಪಂಚದಶಾಕ್ಷರಾಢ್ಯಾ ಸಾಕ್ಷಾನ್ಮಹಾಮೌನಗುರೂಪದಿಷ್ಟಾ ।

ಗೋಪ್ಯಾಸು ಗೋಪ್ಯಾ ಸುಕೃತೈರವಾಪ್ಯಾ ಶ್ರೇಷ್ಠಾ ವಿನುತ್ಯಾ ಪರಮೇಷ್ಠಿನಾಽಪಿ ॥ ೯೭೧ ॥

ದೇಹೇಷ್ವಿಯಂ ಕುಂಡಲಿನೀ ನ್ಯಗಾದಿ ಭೂತೇಷು ವಿದ್ಯುದ್ ಭುವನೇಷು ಚಾಭ್ರಮ್ ।

ದೇವಾಂಗನಾಮಸ್ತಕಲಾಲಿತಾಂಘ್ರಿರ್ದೇವೀ ಭವಾನೀ ಖಲು ದೇವತಾಸು ॥ ೯೭೨ ॥

ಚಕ್ಷುರ್ವಿಧಾಯಾಚಲಮಂತರೇಣ ಪ್ರಾಣಂ ಪ್ರಪಶ್ಯನ್ ಮನುವರ್ಣರೂಪಮ್ ।

ಸಂಸೇವತೇ ಚೇತ್ಸಕಲಸ್ಯ ಧಾತ್ರೀಂ ಸರ್ವೇಷ್ಟಲಾಭೋ ವಿದುಷಃ ಕರಸ್ಥಃ ॥ ೯೭೩ ॥

ಏಕಾಕ್ಷರೀಃ ಪಂಚದಶಾಕ್ಷರೀಂ ವಾ ವಿದ್ಯಾಃ ಪ್ರಕೃಷ್ಟಾಃ ಸಕಲೇಶಶಕ್ತೇಃ ।

ಯೋ ಭಕ್ತಿಯುಕ್ತಃ ಪ್ರಜಪೇದಮುಷ್ಯ ಪ್ರಾಣೋ ವಶೇ ನಿಸ್ತುಲಸಿದ್ಧಿಯೋನಿಃ ॥ ೯೭೪ ॥

ಏತಾಃ ಕವೀನಾಂ ಪದಕಿಂಕರಸ್ಯ ಪೂತಾಃ ಪ್ರಮೋದಂ ಪರಮಾವಹಂತು ।

ಗೀತಾಸ್ಸಭಕ್ತಿದ್ರವಮಿಂದ್ರವಜ್ರಾಃ ಶ್ವೇತಾಚಲಾಧೀಶ್ವರವಲ್ಲಭಾಯಾಃ ॥ ೯೭೫ ॥